Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok (tlen ika timomachtiaj)  |  Mayo de 2017

“¿Techtlasojtla okachi ke ninteh?”

“¿Techtlasojtla okachi ke ninteh?”

“¿Simón ipiltsi n Juan, techtlasojtla okachi ke ninteh?” (JUAN 21:15).

TLAKUIKALMEJ: 32 UAN 45

1, 2. ¿Tlen okajsikamatki Pedro?

CHIKOME imachtijkauan Jesús okatkaj nochi yoak itech mar de Galilea uan nion se michin okikitskijkej. Ijkuak otlaneski, ikaj okinualimitoka itempa ueyi atl. Ye Jesús akin okiyolitijkej. Uan okinmilui: “Xikontlamotlakah n michayatl iyekma n barka iwa nonkinmajsiskeh michimeh. Yejwah ijkó okichijkeh, iwa ayakmó oweletiah okikixtiayah n michayatl, porke miaktikeh michimeh okinkitskijkeh” (Juan 21:1-6).

2 Jesús okinmakak pan uan michimej imachtijkauan para ma tlakuakan. Satepan okitak Simón Pedro uan okitlajtlani: “¿Techtlasojtla okachi ke ninteh?”. Jesús okimatiaya Pedro sapanoa okipaktiaya michkitskis. Jesús okitlajtlanijtoka Pedro kox okitlasojtlaya ye uan tlen otlamachtiaya noso okachi okipaktiaya michkitskis. Pedro otlanankili: “Noteko Tejwatsi kuali tikmatok nimitsneki” (Juan 21:15). Pedro  okajsikamatki omonekiaya okachi kitlasojtlas Jesús uan amo okseki tlamantli. Ijkuakon Pedro opejki okachi tetlapouia uan ijkon okiteititi okachi okitlasojtlaya Jesús. Ijkon okachi otlapaleui itech tlanechikol.

3. ¿Tleka moneki timomaluiskej?

3 ¿Tlen techmachtia tlen Jesús okilui Pedro? Moneki timomaluiskej uan nochipa ma tiktlasojtlakan Cristo. Jesús okimatiaya timotekipachoskiaj uan tikpiaskiaj ouijkayotl. Ijkuak otlajto itech akin tlatoka, Jesús okijto sekimej kiseliskiaj “itlajtol Dios” ika nochi inyolo. Uan noijki okijto akinmej “okachi kintekipachoa tlan onka itech nin tlaltíkpaktli, iwa kinekih kitlawelpiaskeh tomi” ayakmo kipatioitaskiaj iTlajtol toTajtsin Dios (Mateo 13:19-22; Marcos 4:19). Noijki tejuan tla amo timomaluiaj, nochi tlen techtekipachoa kichiuas ayakmo ma tiktekichiuilikan Jehová. Ik non, Jesús okinnejmachti imachtijkauan: “Ximotlachilikah; amo xiktlakuawakah nomoyolo ika tlan amo kuali, amo san xitlakuajtinemikah, amo xitlawantinemikah iwa amo xikkawilikah manomechtekipacho tlan onka itech nin tlaltíkpaktli” (Lucas 21:34).

4. ¿Tlen techpaleuis ma tikitakan kox okachi tiktlasojtlaj Cristo? (Xikinmita tlaixkopinalmej tlen ika peua tlamachtil).

4 Ijkon ken Pedro opejki okachi tetlapouia, tejuan noijki uelis ijkon tikchiuaskej uan ijkon tikteititiskej tiktlasojtlaj Cristo. ¿Ken uelis tikitaskej melauak ijkon tikchijtokej? Ma timotlajtlanikan: “¿Tlen okachi nikpatioita? Tlen okachi nechyolpaktia, ¿niktekichiuilis Jehová noso nikchiuas okseki tlamantli?”. Para uelis tikinnankiliskej ninmej tlajtlanilmej, ma tikitakan eyi tlamantli tlen uelis kichiuas ayakmo ma tiktlasojtlakan Cristo. Timotlapouiskej itech tekitl, tlen ika timoyolpaktiaj, tomin uan okseki tlamantli.

MA TIKITAKAN TEKITL KEN MONEKI

5. ¿Tlen tekitl kipiaj akinmej kinyekanaj inkalchanejkauan?

5 Pedro amo san okipaktiaya michkitskis. Omichkitskiaya para kinmakas tlen ika mopanoltiskiaj ikalchanejkauan. Axkan noijki Jehová kinnauatijtok akinmej kinyekanaj inkalchanejkauan ma kinmakakan tlen ika mopanoltiskej (1 Timoteo 5:8). Moneki tekitiskej chikauak para uelis ijkon kichiuaskej. Pero itech ninmej tonalmej, tekitl uelis kichiuas sapanoa ma motekipachokan.

6. ¿Tleka miakej sapanoa kintekipachoa tekitl?

6 Axkan amo onka miak tekitl uan sapanoa miakej kitemojtokej tekitl. Ik non, miakej motlatlanij para kipiaskej tekitl. Miakej mokuayejyekoaj moneki sapanoa tekitiskej maski amo miak kintlaxtlauiskej. Noijki empresas kinekij kichiuaskej miak tekitl uan amo miakej kintlakeuaskej. Nin kichiua miakej ma motekipachokan,  ma sotlauakan uan ma mokokokan. Miakej momojtiaj tla amo kichiuaj tlen kinmiluiaj ma kichiuakan, porque uelis ayakmo kipiaskej tekitl.

Akinmej tikchiuaj ken Cristo okachi tiktlakamatij Jehová uan amo akin techmaka tekitl

7, 8. (1) ¿Akin okachi moneki tiktlakamatiskej? (2) ¿Tlen techmachtia tlen okipanok se tokni?

7 Akinmej tikchiuaj ken Cristo okachi tiktlakamatij Jehová uan amo akin techmaka tekitl (Lucas 10:27). Titekitij para tikpiaskej tlen ika timopanoltiskej uan uelis tiktekichiuilijtoskej Jehová. Tla amo timomaluiaj, tekitl uelis kichiuas ayakmo okachi ma tiktekichiuilikan Jehová. Ma tikitakan tlen techmachtia tlen okipanok se tokni tlen chanti Tailandia. Kijtoa: “Onikinyektlaliaya computadoras uan onechpaktiaya, pero sapanoa onitekitiaya. Ik non, ayakmo onimajxiliaya okachi niktekichiuilis Jehová. Satepan onikitak omonekiaya nikkauas non tekitl tla oniknekiaya niktlalis achto itech nonemilis iTekiuajkayo toTajtsin Dios”. ¿Tlen okichi tokni?

8 Noijki okijto: “Onimokuayejyekojtoka kanaj se xiuitl tlen uelis nikchiuaskia uan satepan onikpejpenki nikinnemakas helados. Ijkuak opejki nitlanemaka amo miak oniktlaniaya uan onimotekipachoaya. Ijkuak onechitayaj akinmej inmiuan onitekitiaya onechpinauiayaj uan onechtlajtlanijkej kox okachi kuali nikinnemakas helados uan amo nikinyektlalis computadoras kanin onikpiaya aire acondicionado. Onikilui Jehová ma nechpaleui ma nitlaxiko uan ma nimajxili okachi niktekichiuilis. Satepan akinmej onikintlanemakiltiaya opejki kinpaktia helados uan okachi uelik opejki nikinchijchiua. Noijki oniknemakaya nochi helado tlen onikchijchiuaya. Uan axkan okachi miak niktlani uan amo ken ijkuak onikinyektlaliaya computadoras. Okachi niyolpaki porque amo ikaj nechiluia tlen nikchiuas uan ayakmo nimotekipachoa ken achto. Uan okachi kuali nimouika iuan Jehová” (xiktlajtolti Mateo 5:3, 6).

¿Okachi nechpaktia noteki uan amo okachi nechpaktia niktekichiuilis Jehová?

9. ¿Ken uelis tikmatiskej kox tikitaj tekitl ken moneki?

9 Jehová kipaktia ma titekitikan uan nin miak ipati (Proverbios 12:14). Pero amo ma tikkauakan tekitl ma kichiua ayakmo okachi ma tiktekichiuilikan Jehová. Jesús otlajto itech tlen ika timopanoltiskej, okijto: “Nomejwah moneki achto xikchiwakah tlan Dios nomechnawatia iwa xikchiwakah tlan Ye kimonekiltia. Iwa ijkó Dios nomechmakas nochi tlan nomechpolos” (Mateo 6:33). ¿Ken uelis tikmatiskej kox tikitaj tekitl ken moneki? Ma timotlajtlanikan: “¿Okachi nechpaktia noteki uan amo okachi nechpaktia niktekichiuilis Jehová?”. Tlen titlanankiliskej techpaleuis tikitaskej tlen okachi tikpatioitaj.

10. ¿Tlen okachi miak ipati otlamachti Jesús?

10 Jesús otechmachti tlen achto moneki yetos itech tonemilis. Se tonal okitlajpaloto María uan Marta, yejuan  okatkaj iknimej. Marta san niman opejki kitlakualchiuilia Jesús, pero María iuan omotlali uan okikaktoka. Ik non, Marta amo okipakti María amo okipaleuijtoka. Jesús okilui Marta: “Sanwel onka itla tlan okachi ipati. María yokipéjpenki, iwa amaka weletis kikixtilis” (Lucas 10:38-42). Ijkon Jesús okiteititi se tlamantli tlen miak ipati. ¿Tlen tlamantli? Moneki ma tikpejpenakan “tlan okachi ipati” para okachi tiktlasojtlaskej Cristo uan amo okseki tlamantli. Nin kijtosneki okachi miak ipati kuali ma timouikakan iuan toTajtsin Dios.

¿KEN TIKITAJ TLEN IKA TIMOYOLPAKTIAJ?

11. Ijkuak timoseuiaj uan timoyolpaktiaj, ¿tlen kijtoa Biblia itech nin tlamantli?

11 Tinochtin amo timajxiliaj. Ik non, moneki timoseuiskej. Biblia kijtoa: “Amo onka okse tlamantli kuali tlen uelis kichiuas tlakatl ken tlakuas uan tlakonis uan moyolpaktis porque chikauak tekiti” (Eclesiastés 2:24). Jesús kuali okimatiaya imachtijkauan omonekiaya moseuiskej. Se neskayotl, ijkuak sapanoa otetlapouijkej, Jesús okinmilui: “Xiwikih, matimosewitih kan amaka nemi” (Marcos 6:31, 32).

12. ¿Tleka moneki timomaluiskej ijkuak timoyolpaktiaj? Xikijto se neskayotl.

12 Timoseuiaj ijkuak timoyolpaktiaj. Pero moneki timomaluiskej para amo okachi tikpatioitaskej tlen ika timoyolpaktiaj. Itech achto siglo, miakej omokuayejyekoayaj ijkin: “Matitlakuakah iwa matikonikah, porke mostla timikiskeh” (1 Corintios 15:32). Axkan noijki ijkon mokuayejyekoaj. Se neskayotl, se telpochtli tlen chanti Europa opejki yaui nechikolmej. Pero sapanoa okipaktiaya moyolpaktis uan ayakmo oyaya nechikolmej. Satepan okajsikamatki san omoyolpaktiaya uan non okichiuaya ma kipia ouijkayotl. Ik non, oksepa opejki momachtia Biblia. Opejki tetlapouia itech iTekiuajkayo toTajtsin Dios. Satepan omoapolakti uan okijto kiyolkokoa san omotonalpolo ijkuak omoyolpaktiaya. Okijto kitekichiuilis Jehová okachi kiyolpaktia uan amo tlen achto ika omoyolpaktiaya.

13. (1) Xikijto tleka amo kuali sapanoa miak kauitl ma timoyolpaktikan. (2) ¿Ken uelis tikmatiskej kox timoyolpaktiaj san ken moneki?

13 Ijkuak timoyolpaktiaj moneki ma techpaleui ma timoseuikan. ¿Keski kauitl moneki timoyolpaktiskej? Nin neskayotl uelis techpaleuis ma tikmatikan keski kauitl moneki timoyolpaktiskej. Miakej techpaktia pan uan tsopelik. Pero uelis timokokoskej tla nochipa tikkuaskej. Tla amo tiknekij timokokoskej, moneki tikkuaskej tlen techpaleuis. Tla nochipa san timoyolpaktiskej, non kichiuas ayakmo kuali ma timouikakan iuan Jehová. ¿Ken uelis tikmatiskej kox timoyolpaktiaj san ken moneki? Uelis tikijkuiloskej keski horas itech se semana tiktekichiuiliaj Jehová ken ijkuak tiauij nechikolmej, titetlapouiaj uan timomachtiaj Biblia. Noijki uelis tikijkuiloskej keski horas itech se semana timoyolpaktiaj ika televisión, videojuegos uan keski kauitl timauiltiaj. Ijkuak tikitaskej keski horas timoyolpaktiaj uan keski horas tiktekichiuiliaj Jehová, tikitaskej tlen okachi tikpatioitaj (xiktlajtolti Efesios 5:15, 16).

14. ¿Tlen techpaleuis kuali ma tikpejpenakan tlen ika timoyolpaktiskej?

14 Jehová techkauilia ma tikpejpenakan  tlen ika timoyolpaktiskej. Akinmej kinyekanaj inkalchanejkauan uelis kipejpenaskej tlen ika moyolpaktiskej. Biblia kinpia principios tlen kiteititiaj tlen mokuayejyekoa Jehová. Ninmej principios techpaleuiaj kuali ma tikpejpenakan tlen tikchiuaskej * (xikita tlajtoli tlen kiualika tlakxitlan). Ijkuak timoyolpaktiaj ika tlamantli tlen kuali non se tlateochiualistli (Eclesiastés 3:12, 13). Melauak tlatlamantli techpaktia timoyolpaktiskej (Gálatas 6:4, 5). Maski tlatlamantli techpaktia timoyolpaktiskej, moneki timomaluiskej. Jesús okijto: “Kan kajki tlan momejwah nonkimoliah ipati, ompa kajki nomoyolo” (Mateo 6:21). Tla tiktlasojtlaj toUeyi Tekiua Jesús, tikteititiskej tikpatioitaj Tekiuajkayotl ika tlen timokuayejyekoaj, ika tlen tikijtoaj uan ika tlen tikchiuaj (Filipenses 1:9, 10).

AMO MA TIKTEMOKAN TOMIN UAN OKSEKI TLAMANTLI

15, 16. (1) ¿Tlen uelis techpanos tla tiktemoskej tomin uan okseki tlamantli? (2) ¿Tlen otechnejmachti Jesús?

15 Miakej kinekij kipiaskej miak tlamantli tlen yankuik kisa ken celulares, computadoras uan okseki tlamantli. Okachi kipatioitaj kipiaskej tomin uan okseki tlamantli. Ik non, akinmej tikchiuaj ken Cristo moneki tikitaskej tlen okachi tikpatioitaj. Ma timotlajtlanikan: “¿San nimokuayejyekojtok  itech yankuikej carros, itech okseki tlamantli tlen yankuik noso nimomachtia para nias nechikolmej? ¿Nochipa nikchiua miak tlamantli uan ayakmo nimajxilia niktlatlaujtis Jehová noso niktlajtoltis Biblia?”. Tla amo timomaluiaj, tomin uan okseki tlamantli uelis kichiuas ayakmo okachi ma tiktlasojtlakan Cristo. Ma timokuayejyekokan itech tlen okijto Jesús: “Amo xikmokawilikah manomechyoltilana n tomi” (Lucas 12:15). ¿Tleka ijkon okijto Jesús?

Amo uelis tikmakaskej Jehová tlen okachi kuali uan noijki tiktemojtoskej tomin uan okseki tlamantli

16 Jesús okijto “amaka tlakatl weletis kintekitilis ome inteko, porke se kitlawelitas iwa non ok se kitlasojtlas, noso se kitlakitas iwa non ok se mach kitlakitas. Amaka weletis kimopantis Dios tla satlawel momijmiktia para kitlawelpias tomi” (Mateo 6:24). Amo uelis tikmakaskej Jehová tlen okachi kuali uan noijki tiktemojtoskej tomin uan okseki tlamantli. Ken titlajtlakolejkej, moneki timochijchikauaskej amo ma techtlani “tlan kichiwah n tlaltikpaktlakah, iwa tlan amo kuali otechyoltilanaya” (Efesios 2:3).

17. (1) ¿Tleka sekimej amo kimatij ken moneki kitaskej tomin uan okseki tlamantli? (2) ¿Tlen techpaleuis amo ma techtlanili tomin uan okseki tlamantli?

17 Sekimej sapanoa kitemoaj tomin uan miak tlamantli, ik non, amo kimatij ken moneki kitaskej nin tlamantli (xiktlajtolti 1 Corintios 2:14, Itlajtol totajtzin Dios). Yejuan amo kuali mokuayejyekoaj, ik non, amo kimatij tlen kuali uan tlen amo kuali (Hebreos 5:11-14). Ik non, satepan kinekij okachi miak tlamantli kipiaskej. Uan ijkuak yikipiaj, kinekij okseki tlamantli (Eclesiastés 5:10). Pero uelis timochijchikauaskej amo ijkon timokuayejyekoskej. ¿Tlen uelis tikchiuaskej? Nochipa ma tiktlajtoltikan Biblia. Nin techpaleuis amo ma techtlanili tomin uan okseki tlamantli (1 Pedro 2:2). Jesús omajxiliaya mokuayejyekos itech ixtlamatilis Jehová, ik non, otlaxiko ijkuak Diablo okiyejyeko (Mateo 4:8-10). Tla amo tiknekij tomin uan okseki tlamantli ma techtlanili, moneki tikchiuaskej tlen techiluia Jehová. Ijkon tikteititiskej okachi tiktlasojtlaj Jesús uan amo tomin nion okseki tlamantli.

¿Tlen okachi tikpatioitaj itech tonemilis? (Xikita párrafo 18).

18. ¿Tlen moneki tikchiuaskej?

18 Ijkuak Jesús okitlajtlani Pedro: “¿Techtlasojtla okachi ke ninteh?”, okiluijtoka kitekichiuilis Jehová non tlen okachi ipati itech inemilis. Itoka Pedro kijtosneki “Tetl” uan ye okiteititi kipia iyelis ken se tetl (Hechos 4:5-20). Tejuan noijki moneki ma tiktlasojtlakan Cristo, totlasojtlalis ma yeto ken se tetl. Ma timokuayejyekokan ken moneki tikitaskej tekitl, tlen ika timoyolpaktiskej, tomin uan okseki tlamantli. Tla ijkon tikchiuaskej, tikijtoskej ken Pedro ijkuak okilui Jesús: “Noteko, Tejwatsi kuali tikmatok nimits[n]eki”.

^ párr. 14 Xikita tlamachtil “¿Son sanas nuestras diversiones?”, itech revista La Atalaya 15 de octubre 2011, páginas 9 a 12, párrafos 6 a 15.