Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok (tlen ika timomachtiaj)  |  Mayo de 2017

Nochipa ma titetlasojtlakan

Nochipa ma titetlasojtlakan

“Momiakilis n tlajtlákoli, yika miakeh ayakmó tetlasojtlaskeh” (MATEO 24:12).

TLAKUIKALMEJ: 23 UAN 24

1, 2. (1) ¿Itech akinmej omochi tlen kijtoa Mateo 24:12? (2) ¿Ken kiteititia amochtli Hechos miakej tokniuan itech achto siglo sapanoa okitlasojtlayaj toTajtsin Dios? (Xikita tlaixkopinal tlen ika peua tlamachtil).

IJKUAK Jesús okatka nikan itech Tlaltikpak, okijto tlen panoskia “itlamian tonalmej”. Se neskayotl, ye okijto: “Miakeh ayakmó tetlasojtlaskeh” (Mateo 24:3, 12) (xikita recuadro “¿Tlen kijtosneki?”). Ninmej tlajtolmej omochijkej itech judíos tlen okatkaj itech achto siglo. Okijtoayaj yejuan okatkaj ialtepe toTajtsin Dios, pero ayakmo okitlasojtlayaj toTajtsin Dios.

2 Pero akinmej okichiuayaj ken Cristo itech nonmej tonalmej kuali omokuayejyekoayaj. Yejuan “otlamachtiayah iwa otetlapowiayah Jesús, Ye n Cristo” uan okiteititiayaj okitlasojtlayaj toTajtsin Dios, inmikniuan uan akinmej amo yokixmatiayaj iTlajtol toTajtsin Dios. Ninmej tokniuan sapanoa okitlasojtlakej toTajtsin Dios (Hechos 2:44-47; 5:42). Pero sekimej tokniuan itech achto siglo ayakmo okitlasojtlakej toTajtsin Dios. ¿Ken tikmatij?

3. ¿Tleka ayakmo otetlasojtlayaj sekimej tokniuan?

 3 Jesús okinmilui tokniuan tlen ochantiayaj Éfeso ayakmo okitlasojtlayaj toTajtsin Dios (Apocalipsis 2:4). Uelis ninmej tokniuan opejki kichiuaj ken oksekimej, opejki kinekij san moyolpaktiskej (Efesios 2:2, 3). Akinmej ochantiayaj Éfeso okipiayaj miak tomin uan okinekiayaj miak tlamantli kipiaskej uan kuali yetoskej. Uan miakej oauilnemiayaj uan amo okintlakaitayaj iTlanauatiluan toTajtsin Dios. San okinekiayaj moyolpaktiskej uan amo okitlasojtlayaj toTajtsin Dios uan oksekimej.

4. (1) ¿Tleka miakej ayakmo tetlasojtlaj itech ninmej tonalmej? (2) ¿Tlen timomachtiskej?

4 Tlen okijto Jesús noijki mochijtok itech ninmej tonalmej. Miakej ayakmo kitlasojtlaj toTajtsin Dios. Miakej kintemoaj organizaciones ma kinpaleuikan uan amo kitemoaj toTajtsin Dios. Nin kichiua ayakmo ma tetlasojtlakan. Noijki itekipanojkauan Jehová uelis ayakmo tetlasojtlaskej, ijkon ken tokniuan akinmej ochantiayaj itech Éfeso. Ik non, ma tikitakan ken uelis okachi tiktlasojtlaskej Jehová, ken tikpatioitaskej tlen tlamachtia Biblia uan ken tikintlasojtlaskej tokniuan.

MA TIKTLASOJTLAKAN JEHOVÁ

5. ¿Tleka moneki ma tiktlasojtlakan toTajtsin Dios?

5 ¿Akin moneki okachi tiktlasojtlaskej? Jesús okijto: “‘Moneki tiktlasojtlas Jehová moDios ika nochi moyolo uan ika nochi moyolilis uan ika nochi motlalnamikilis’. Nin tlen achto tlanauatil uan tlen okachi ueyititok” (Mateo 22:37, 38TNM). Tla tiktlasojtlaj Jehová, techpaleuis ma tikintlakamatikan itlanauatiluan, ma titlaxikokan uan ma tikkokolikan tlen amo kuali (xiktlajtolti Salmo 97:10). * Pero Satanás uan nochi tlen kiyekantok kichiua ayakmo ma tiktlasojtlakan toTajtsin Dios.

6. ¿Tlen kinpanoa akinmej ayakmo kitlasojtlaj toTajtsin Dios?

6 Miakej amo kajsikamatij tlen kijtosneki tlasojtlalistli. Amo kitlasojtlaj toTajtsin Dios uan “xíkojteh” noso san yejuan intech motekipachoaj (2 Timoteo 3:2). San kinekij tlen ‘inkuerpo kelewia, inmixtololowah noiwa kelewiah tlan kita, iwa kinekih makinweyilikah’ (1 Juan 2:16). Tlatitlanil Pablo otechnejmachti tlen uelis techpanos tla san timoyolpaktiskej. Ye okijto: “akin sa kilnamiktok kichiwas tlan ikuerpo kelewia, san semi moixpolos”. ¿Tleka? Porque akinmej san intech motekipachoaj uan moyolpaktiaj ayakmo iyolikniuan toTajtsin Dios (Romanos 8:6, 7). Tlajyouiskej akinmej san kinekij kitlaniskej tomin noso kinpaktia auilnemiskej (1 Corintios 6:18; 1 Timoteo 6:9, 10).

7. ¿Tlen tlamantli uelis techijtlakos?

7 Akinmej agnósticos, akinmej amo tlaneltokaj itech toTajtsin Dios uan akinmej kijtoaj tiuitsej itech se yolkatl, amo kinekij ma titlaneltokakan itech toTajtsin Dios uan amo ma tiktlasojtlakan. Kinekij ma tikitakan san akinmej amo ixtlamatkej tlaneltokaj itech toTajtsin Dios. Uan miakej okachi kintlakaitaj akinmej ixtlamatkej uan amo toTajtsin Dios maski ye nochi okichijchi (Romanos 1:25). Tla tikneltokaj tlen yejuan kijtoaj ayakmo tiktlasojtlaskej Jehová uan ayakmo iuan timouikaskej (Hebreos 3:12).

8. (1) ¿Tlen uelis kichiuas ma timoyolkokokan? (2) ¿Ken techyolchikaua tlen ijkuilitok itech Salmo 136?

 8 Nochi tlen kiyekana Satanás uelis kichiuas amo ma tiyolpakikan (1 Juan 5:19). Pero tla tikkauaskej ijkon ma techpano, uelis ayakmo tikpiaskej chikauak totlaneltokilis uan ayakmo tiktlasojtlaskej Jehová. Uelis amo tikpiaj tomin, timokokoaj noso yitikpiaj miak xiuitl. Noso timoyolkokoaj porque amo kuali tikchiuaj seki tlamantli. Uelis timoyolkokoaj tla amo kuali kisa tlen tiknekij itech tonemilis. Maski san tlen ma techpano, amo keman ma timokuayejyekokan techilkaua toTajtsin Dios. Ma tikilnamikikan tlen kijtoa Salmo 136:23. Ompa kijtoa itech Jehová: “Ye otechilnamik ijkuak otimoyolkokoayaj, porque itlasojtlalis yolmelajki amo keman tlami”. Kuali ma tikmatokan Jehová techkakis uan technankilis ijkuak tiktlatlaujtiskej ma techpaleui (Salmo 116:1; 136:24-26).

9. ¿Tlen okipaleui Pablo okachi ma kitlasojtla toTajtsin Dios?

9 Tlatitlanil Pablo omokuayejyeko ken Jehová okipaleuiaya uan non okiyolchikauaya. Ye okijkuilo: “Amo nimawi, amaka weletis itla nechtoktis porke Dios nechpalewia” (Hebreos 13:6). Pablo otlaneltokaya itech Jehová uan non okipaleui ma kixnamiki ouijkayotl. Maski miak ouijkayotl okipanoaya nochipa otlaneltokak itech Jehová. Uan maski okitsakej ye okinpaleuiaya ikniuan ika cartas tlen okintitlaniliaya uan ijkon okinyolchikauaya (Efesios 4:1; Filipenses 1:7; Filemón 1). Maski otlajyoui, nochipa okitlasojtlak Jehová ika nochi iyolo. Okineltokak Jehová “nochipa techyolchikawa ijkuak titlaijyowiah” (2 Corintios 1:3, 4). ¿Ken uelis tikchiuaskej ken Pablo?

Ma tiktlasojtlakan Jehová. (Xikita párrafo 10).

10. ¿Tlen tikchiuaskej para okachi tiktlasojtlaskej Jehová?

10 Pablo okijto nochipa ma timotlatlaujtikan para okachi tiktlasojtlaskej toTajtsin Dios. Uan satepan okijkuilo: “Nochipa ximotiotsajtsilijtokah” (1 Tesalonicenses 5:17; Romanos 12:12). ¿Tleka ijkuak timotlatlaujtiaj okachi kuali timouikaj iuan  Jehová? Porque ijkuak timotlatlaujtiaj timotlapouiaj iuan Jehová (Salmo 86:3). Ijkuak tikiluiaj toTajtsin Dios tlen timokuayejyekoaj uan tlen tikmachiliaj, okachi itech timotokiaj (Salmo 65:2). Uan okachi tiktlasojtlaj ijkuak tikitaj ken technankilia. Uan ijkon tikitaj “Jehová amo uejka kajki itech akinmej kitlatlaujtiaj” (Salmo 145:18). Ma tikneltokakan Jehová techtlasojtla uan techpaleuia uan nin techpaleuis ma tikixnamikikan ouijkayotl axkan uan satepan.

MA TIKPATIOITAKAN TLEN TLAMACHTIA BIBLIA

11, 12. ¿Tlen tikchiuaskej para okachi tikpatioitaskej tlen tlamachtia Biblia?

11 Akinmej tikchiuaj ken Cristo tikpatioitaj tlen melauak. Uan melauak moajsi itech iTlajtol toTajtsin Dios. Jesús okilui iTajtsin: “Motlajtol ye tlan milák” (Juan 17:17). Ik non, para uelis tikpatioitaskej tlen melauak, moneki tikmatiskej tlen tlamachtia Biblia (Colosenses 1:10). Pero amo san non moneki tikchiuaskej. Akin okijkuilo Salmo 119 techpaleuia ma tikajsikamatikan tlen okseki moneki tikchiuaskej (xiktlajtolti Salmo 119:97-100). * Itech nochi tonal moneki tikilnamiktoskej tlen otiktlajtoltijkej itech Biblia. Tla timokuayejyekoaj ken uelis techpaleuis tlen kijtoa, okachi tikpatioitaskej.

12 Akin okijkuilo Salmo 119 noijki okijto: “¡Tlen tikijtoa nikmachilia tsopelik itech nokamak, okachi tsopelik ken neujtli!” (Salmo 119:103). Amatlajkuilolmej tlen kinchijchiua ialtepe Jehová yeskia ken se tlakuali tlen sapanoa uelik. Ijkuak tikkuaj itlaj tlen sapanoa techpaktia, amo san niman tiktlamiaj. Noijki ijkuak timomachtiaj, amo san totoka ma tikchiuakan. Ijkon tikpatioitaskej tlen melauak, tikilnamikiskej tlen otiktlajtoltijkej uan ika tikinpaleuiskej oksekimej (Eclesiastés 12:10).

13. ¿Tlen okipaleui Jeremías ma kipatioita tlen toTajtsin Dios okimachti uan ken okipaleui?

13 Teotlajtojki Jeremías okipatioitaya tlen toTajtsin Dios okimachtiaya. Ye okijto: “Okinmajsikej motlajtoluan uan onikinkua uan motlajtol kichiua ma niyolpaki; porque nikuika motoka, oh Jehová Dios akin kinyekana miakej soldados” (Jeremías 15:16). Jeremías omokuayejyekoaya itech iTlajtol toTajtsin Dios uan okipatioitaya. Ik non, okipatioitaya yetos iTlaixpantijka Jehová uan otetlapouiaya tlen melauak. Tla tikpatioitaj tlen tlamachtia Biblia, noijki tikpatioitaskej tiyetoskej tiiTlaixpantijkauan Jehová uan titetlapouiskej itech Tekiuajkayotl itech ninmej tonalmej.

Ma tikpatioitakan tlen tlamachtia Biblia. (Xikita párrafo 14).

14. ¿Tlen okseki moneki tikchiuaskej para tikpatioitaskej tlen tlamachtia Biblia?

14 ¿Tlen okseki tlamantli moneki tikchiuaskej para tikpatioitaskej tlen tlamachtia Biblia? Moneki nochipa timonechikoskej porque ompa Jehová techmachtia. Jehová techmachtia sejse semana tlen tlamachtia Biblia ika revista Akin Tetlapouijtok. Achto moneki kuali timoyektlaliskej, tla tiknekij ma techpaleui nin nechikol. Se neskayotl, uelis tikintlajtoltiskej nochi tlaxelolmej tlen kinpia tlamachtil. Axkan nochtin uelis kipiaskej itech incelular noso  itech intableta revista Akin Tetlapouijtok. Nin revista kajki ika miakej tlajtolmej itech jw.org uan itech aplicación JW Library. Itech tabletas uan celulares okachi san niman tikinmajsiskej tlaxelolmej tlen uitsej itech revista. Maski san ken tiknekiskej timomachtiskej revista, moneki tikintlajtoltiskej nochi tlaxelolmej uan kuali intech timokuayejyekoskej (xiktlajtolti Salmo 1:2). *

MA TIKINTLASOJTLAKAN TOKNIUAN

15, 16. (1) ¿Tlen tlanauatil tikajsij itech Juan 13:34, 35? (2) ¿Tleka tlasojtlalistli tlen tikinpialiaj tokniuan uan tlen tikpialiaj Jehová noijki mouika iuan ken tikpatioitaj tlen tlamachtia Biblia?

15 Achto kimiktiskiaj Jesús okinmilui imachtijkauan: “Ne nomechmaka se yankuik tlanawátili: Ximosepantlasojtlakah, ijkó kemi Ne nomechtlasojtla, ijkó moneki ximosepantlasojtlakah. Tla nomejwah nonmosepantlasojtlah, nochteh n tlaltikpaktlakah nomechitaskeh nomejwah de milajka notlamachtijkawah” (Juan 13:34, 35).

16 Tlasojtlalistli tlen tikinpialiaj tokniuan mouika iuan tlen tikpialiaj Jehová. Tla amo tiktlasojtlaj toTajtsin Dios amo uelis tikintlasojtlaskej tokniuan. Uan tla amo tikintlasojtlaj tokniuan amo uelis tiktlasojtlaskej toTajtsin Dios. Tlatitlanil Juan okijkuilo akin “amo kitlasojtla se ikni non konitok, kenomi weletis kitlasojtlas Dios non amo kita” (1 Juan 4:20). Tlasojtlalistli tlen tikinpialiaj tokniuan uan tlen tikpialiaj Jehová noijki mouika iuan ken tikpatioitaj tlen tlamachtia Biblia. ¿Tleka? Porque tla tikpatioitaj tlen timomachtiaj itech Biblia, tiktlakamatiskej tlanauatil tlen kijtoa ma tiktlasojtlakan toTajtsin Dios uan ma tikintlasojtlakan tokniuan (1 Pedro 1:22; 1 Juan 4:21).

Ma tikintlasojtlakan tokniuan. (Xikita párrafo 17).

17. ¿Ken uelis tikteititiskej tikintlasojtlaj tokniuan?

17 (Xiktlajtolti 1 Tesalonicenses 4:9, 10). ¿Ken uelis tikteititiskej tikintlasojtlaj  tokniuan? Uelis akin yikipia miak xiuitl monekis ma tikuikakan ijkuak yas nechikol. Noso uelis tikpaleuiskej se tokni tlen ayakmo kipia inamik ma tikyektlalilikan ikal (Santiago 1:27). Tokniuan tlen moyolkokoaj, noso kipiaj okse ouijkayotl moneki ma tikinyolchikauakan uan ma tikinyolseuikan (Proverbios 12:25; Colosenses 4:11). Ika tlen tikijtoaj uan tlen tikchiuaj tikteititiaj tikintlasojtlaj “tokniwah tlaneltokakeh” (Gálatas 6:10).

18. ¿Tlen techpaleuis san niman ma timotlapojpoluikan?

18 Itech Biblia kijtoa itlamian tonalmej miakej motekipachoskej san intech yejuan uan tlaixnekiskej (2 Timoteo 3:1, 2). Ik non, akinmej tikchiuaj ken Cristo moneki timochijchikauaskej okachi tiktlasojtlaskej Jehová, tikpatioitaskej iTlajtol uan timotlasojtlaskej. Ualeua timokualaniskej inmiuan tokniuan porque titlajtlakolejkej. Pero tla timotlasojtlaj techpaleuis san niman ma timotlapojpoluikan (Efesios 4:32; Colosenses 3:14). Nochipa ma titetlasojtlakan. Nochipa ma tiktlasojtlakan Jehová, ma tikpatioitakan iTlajtol uan ma tikintlasojtlakan tokniuan ika nochi toyolo.

^ párr. 5 Salmo 97:10 kijtoa: “Namejuan tlen nankitlasojtlaj Jehová, xikkokolikan tlen amo kuali. Ye kinmaluijtok inyolilis akinmej yolmelajkej, kinmakixtia inmak akinmej amo yolkualmej”.

^ párr. 11 Salmo 119:97-100 kijtoa: “¡Nikpatioita motlanauatil! Nochi tonal itech nimokuayejyekoa. Motlanauatil nochipa nouan kajki uan kichiua ma niyeto okachi niixtlamatki amo ken akinmej nechkokoliaj. Okachi niixtlamatki amo ken nochtin akinmej nechmachtiaj porque nimokuayejyekoa itech tlen techilnamiktia. Nochi nikchiua ika ixtlamatilistli amo ken tlakamej tlen yikipiaj miak xiuitl porque nikintlakamati motlanauatiluan”.

^ párr. 14 Salmo 1:2 kijtoa: “Okachi kuali, ye moyolpaktia ika itlanauatil Jehová uan tonal uan yoak ichtakatsin kitlajtoltia itlanauatil”.