Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok (tlen ika timomachtiaj)  |  Mayo de 2017

 INEMILIS

Maski amo nitlakaki nitlamachtia tlen tlamachtia Biblia

Maski amo nitlakaki nitlamachtia tlen tlamachtia Biblia

Onimoapolakti itech 1941, ijkuak onikpiaya 12 xiuitl. Pero onikajsikamatki tlen tlamachtia Biblia hasta itech 1946. ¿Tleka? Ma namechtlapoui tlen onechpanok.

ITECH 1910, notatajuan ayakmo ochantikej itech altepetl Tiflis (Georgia) uan ochantitoj itech se kali kanin okinpiayaj yolkamej itech altepetl Pelly (Saskatchewan, itech oeste de Canadá). Onineski itech 1928 uan onikinpiaya chikuase nokniuan uan ne nixokoyotl. Notajtsin omikik chikuase metstli achto ninesiskia uan nonantsin omikik ijkuak onikatka nikonetl. Satepan omikik nokni Lucy ijkuak okipiaya 17 xiuitl. Uan notío Nick otechmalui.

Se tonal, nokalchanejkauan onechitakej onikauiltijtoka ikuitlapil se tocaballo. Ne onikpiaya kanaj ome xiuitl. Yejuan omomojtijkej porque caballo uelis nechteliksaskia, ik non, chikauak onechtsajtsilijkej. Pero ne amo onikinkak. Maski amo itlaj onechpanok, nokalchanejkauan okitakej ne amo onitlakakiaya.

Se toyolikni okijto okachi kuali niaskia itech escuela kanin momachtiaj konemej tlen amo tlakakij. Ik non, notío Nick onechtitlanki itech escuela tlen kajki Saskatoon (Saskatchewan). Sapanoa onimomojti porque uejka okatka uan yikin onikpiaya makuili xiuitl. Uan san uelis niaskia nikintlajpaloti nokalchanejkauan ijkuak oiluichiuayaj uan ijkuak amo otlamachtiayaj. Satepan onimomachti señas uan onechpaktiaya nimauiltis iuan oksekimej konemej.

 OPEJKI NIMOMACHTIA TLEN TLAMACHTIA BIBLIA

Itech 1939, nokni Marion akin okachi okipiaya miak xiuitl omonamikti iuan Bill Danylchuck uan yejuan otechmaluijkej. Yejuan achto omomachtijkej iuan iTlaixpantijkauan Jehová. Ijkuak amo oniaya escuela, omochijchikauayaj nechmachtiskej Biblia. Yejuan amo okimatiayaj señas, ik non, oui okinchiuiliaya nouan motlapouiskej. Pero yejuan okitakej onechpaktiaya tlen onimomachtiaya itech Jehová. Onikajsikamatki melauak okichiuayaj tlen tlamachtia Biblia, ik non, onikijto inmiuan nitetlapouiskia. Satepan oniknek nimoapolaktis. Itech 5 de septiembre 1941, Bill onechapolakti itech se barril tlen okipiaya atl sapanoa sesek. ¡Sapanoa okatka sesek!

Nika iuan sekimej tlen amo tlakakij itech se ueyi nechikol itech Cleveland (Ohio) itech 1946

Itech 1946 onimokuepki nokalijtik, otiajkej itech ueyi nechikol tlen omochi itech Cleveland (Ohio, Estados Unidos). Achto tonal, nokniuan okijkuilojkej tlen omomachtijkej para nechititiskiaj. Pero mostlatika sapanoa oniyolpakik ijkuak onikmatki ueyi nechikol noijki kipanoltiskiaj ika señas para akinmej amo otlakakiayaj. Melauak onechpakti uan onikajsikamatki tlen tlamachtia Biblia. ¡Sapanoa oniyolpakik!

ONIKINMACHTI OKSEKIMEJ TLEN TLAMACHTIA BIBLIA

Ijkuak otlanki Segunda Guerra Mundial, tlaltikpaktlakamej okinekiayaj kiteititiskej okitlakamatiayaj inmialtepe. Uan ijkuak otlanki ueyi nechikol, oksepa onia escuela pero yonikijto niyetoskia niyolmelajki ixpan Jehová. Ik non, ayakmo oniktlajpaloaya bandera, ayakmo onitlakuikaya himno nacional uan ayakmo oniiluichiuaya. Noijki ayakmo oniaya teopan. Nin amo okinpakti akinmej otlamachtiayaj itech escuela, okinekiayaj ma nikkaua tlen onimomachtijtoka uan okinekiayaj nechkajkayauaskej para okse tlamantli ma nimokuayejyeko. Akinmej inmiuan onimomachtiaya okitakej tlen onechpanotoka uan non onechpaleui ma nikintlapoui. Sekimej okiselijkej tlen tlamachtia Biblia. Sekimej intoka Larry Androsoff, Norman Dittrick uan Emil Schneider yejuan ok kitekichiuiliaj Jehová.

Ijkuak kanaj oniaya, onimochijchikauaya nikintlapouis akinmej amo tlakakij. Se neskayotl, ompa Montreal onia kanin omonechikoayaj akinmej amo tlakakij. Ompa oniktlapoui Eddie Tager tlen okatka pandillero. Eddie otlapaleui itech tlanechikol ika señas de Laval (Quebec) hasta yisexiuitl ijkuak omikik. Noijki onikixmatki se telpochtli tlen itoka Juan Ardanez. Juan okichi ken akinmej ochantiayaj Berea itech achto siglo, okitak kox melauak omomachtijtoka tlen tlamachtia Biblia (Hechos 17:10, 11). Omochi iTlaixpantijka Jehová uan otekitik ken tlayekanki itech altepetl Ottawa (Ontario) hasta ijkuak omikik.

Nitetlapouijtok itech ojtli itech 1950

Itech 1950 onichantito Vancouver. Maski onechpaktiaya nikintlapouis akinmej amo tlakakij, amo keman nikilkauas tlen onechpanok se tonal ijkuak oniktlapoui se siuatl tlen otlakakiaya. Omotokayotiaya Chris Spicer. Okijto sejse metstli kinseliskia revistas uan noijki okinek ma nikixmati inamik tlen omotokayotiaya Gary. Onia  ikalijtik uan otimotlapouijkej uan onimopaleui ika seki notas. Uan seki xiuitl ayakmo otimotakej hasta ijkuak omochi se ueyi nechikol itech altepetl Toronto (Ontario). Onechtlajtlachialti ijkuak onikmatki Gary moapolaktiskia non tonal. Nin onechilnamikti moneki titetlapouiskej. Porque akinmej tikintlapouiaj uelis satepan kiseliskej tlen tlamachtia Biblia.

Satepan onimokuepki Saskatoon. Ompa se siuatl onechilui ma nikinmachti itakotsitsiuan tlen okatkaj koatsitsintin uan amo otlakakiayaj. Se omotokayotiaya Jean uan okse Joan Rothenberger. Yejuan oyayaj itech escuela kanin ne onimomachti. Otetlapouiayaj tlen omomachtiayaj uan makuili ichpokatsitsintin omochijkej iTlaixpantijkauan Jehová. Se itoka Eunice Colin uan onikixmatki ijkuak yinikisaskia escuela. Ijkuakon, onechmakak se tsopelik uan onechtlajtlani kox oniknekiaya iuan nimouikas. Eunice sapanoa oniktlasojtlak uan satepan iuan onimonamikti.

Nika iuan Eunice itech 1960 uan itech 1989

Ijkuak inantsin okimatki Eunice omomachtijtoka Biblia, okilui director iuan ma motlapoui para ayakmo ma momachti Biblia. Maski director iuan omotlapoui uan okinkixtili amatlajkuilolmej, Eunice okipejpenki yetos yolmelajki ixpan Jehová. Ijkuak okijto okinekiaya moapolaktis, itatajuan okiluijkej: “Tla timochiuas iTlaixpantijka Jehová, ayakmo touan tichantis”. Ik non, ijkuak Eunice okipiaya 17 xiuitl ochantito iuan sekimej iTlaixpantijkauan Jehová. Omomachti Biblia uan omoapolakti. Otimonamiktijkej itech 1960 pero itatajuan amo oyajkej ijkuak otimonamiktijkej. Opanok kauitl opejki kitlakaitaj tlen tikneltokaj uan ken otikinmiskaltiayaj tokoneuan.

 JEHOVÁ NOCHIPA NECHMALUIA

Nokone Nicholas iuan isiua tlen itoka Deborah, katej itech Betel tlen kajki Londres

Otikinpixkej chikome tokoneuan uan yejuan tlakakij. Otechchiuili oui tikinmiskaltiskej. Pero otikchijkej ma momachtikan señas para inmiuan timotlapouiskiaj uan tikinmachtiskiaj tlen tlamachtia Biblia. Uan tokniuan sapanoa otechpaleuijkej. Se neskayotl, se tokni otechtlajkuilili para techiluiskia se tokone otlauijuikaltijtoka itech Kali kanin timonechikoaj. Ompa san niman iuan otimotlapouijkej tokone. Nokoneuan tlen intoka: James, Jerry, Nicholas uan Steven tekitij ken tlayekankej itech tlanechikolmej uan iuan inkalchanejkauan kitekichiuiliaj Jehová. Noijki Nicholas uan inamik tlen itoka Deborah, tlajtolkuepaj ika señas itech Betel tlen kajki Gran Bretaña. Steven uan inamik tlen itoka Shannan, tlajtolkuepaj ika señas itech Betel tlen kajki Estados Unidos.

Nokoneuan uan insiuauan tlatlamantli tlapaleuiaj ma motetlapoui ika señas.

Eunice okipiaya cáncer uan omikik se metstli achto tikajxitiskiaj 40 xiuitl otimonamiktijkej. Maski omokokoaya, nochipa otlaneltokak itech yolitilistli. Melauak nikneki ma ajsi non tonal para oksepa nikitas.

Faye uan James, Jerry uan Evelyn, Shannan uan Steven

 Itech febrero 2012, oniuetski uan onimotlajkoposteki. Uan omonekiaya ikaj ma nechpaleui, ik non, onichantito iuan se nokone. Timonechikoaj itech tlanechikol señas tlen kajki itech altepetl Calgary (Alberta) uan ompa nitekiti ken tlayekanki. Axkan nika itech se tlanechikol ika señas. Uan, ¿tlen onechpaleui kuali ma nimouika iuan Jehová ijkuak onikatka itech tlanechikol inglés? Jehová onechpaleui uan ye kinmaluia iknomej (Salmo 10:14). Sapanoa nikintlasojkamatilia akinmej onechtlajkuililijkej para ma nikajsikamati tlen onechiluiayaj uan akinmej omomachtijkej señas para nechpaleuiskej.

Onia itech Tlamachtil tlen kiseliaj Precursores ijkuak onikpiaya 79 xiuitl

Ualeua onimosotlauaya uan ayakmo oniknekiaya nimochijchikauas porque amo onikajsikamatiaya tlen omoijtoaya uan onikmachiliaya amo ikaj okimatiaya ken kinpaleuiskej akinmej amo tlakakij. Ijkuak ijkon onechpanoaya onimokuayejyekoaya tlen Pedro okilui Jesús: “Noteko, ¿Akin ok se íwa tiaskeh? Sanwel Tejwatsi tikpia non tlájtoli non kitemaka yolílistli non ayik tlami” (Juan 6:66-68). Axkan nikmati nimochias ijkon ken miakej tokniuan tlen amo tlakakij. Noijki nitlaneltoka itech Jehová uan itech ialtepe. Non sapanoa nechpaleuia. Axkan katej miakej amatlajkuilolmej ika notlajtol, nechikolmej uan uejueyij nechikolmej ika señas americano. Melauak niyolpaki uan nikpia miak tlateochiualistli niktekichiuilijtos Jehová akin sapanoa ueyititok.