Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok (tlen ika timomachtiaj)  |  Mayo de 2016

“Xiakan, [...] xikinchiuakan nomachtijkauan itech nochi altepemej”

“Xiakan, [...] xikinchiuakan nomachtijkauan itech nochi altepemej”

“Xiakan, [...] xikinchiuakan nomachtijkauan itech nochi altepemej, xikinapolaktikan [...], xikinmachtikan ma kichiuakan nochi tlen onamechnauati” (MATEO 28:19, 20, TNM).

TLAKUIKALMEJ: 141 UAN 17

1, 2. ¿Tlen timotlajtlaniaj ijkuak tiktlajtoltiaj Mateo 24:14?

JESÚS okijto itech itlamian tonalmej motetlapouiskia kuali tlajtolmej itech Tekiuajkayotl itech nochi Tlaltikpak (Mateo 24:14, TNM). Axkan tiiTlaixpantijkauan Jehová techixmatij pampa titetlapouiaj itech nochi Tlaltikpak. Sekimej kinpaktia tlen tikintlapouiaj uan oksekimej amo, pero kitlakaitaj tlen titetlapouiaj. ¿Uelis tikijtoskej san tiiTlaixpantijkauan Jehová tikchiuaj tlen okijto Jesús? ¿Tleka kuali tikmatij?

2 Miakej tlaneltokalismej kijtoaj tetlapouiaj tlen okijto Jesús. Yejuan kijtoaj tetlapouiaj ijkuak kitemakaj misa itech teopan, ijkuak tlajtoaj itech televisión noso itech Internet. Oksekimej kijtoaj tetlapouiaj ijkuak kintlapouiaj oksekimej ken okixmatkej Jesús. Uan oksekimej tlen tlapajtiaj noso tlamachtiaj kijtoaj tetlapouiaj ijkuak kinpaleuiaj oksekimej. Pero ¿ijkon okijto Jesús ma titetlapouikan?

3. Ika tlen okijto Jesús itech Mateo 28:19, 20, ¿tlen naui tlamantli moneki kichiuaskej akinmej kichiuaj ken Cristo?

3 Jesús amo okijto imachtijkauan kinchiaskiaj ma ualakan  tlaltikpaktlakamej pampa kinmachtiskej. Tikmatij pampa ijkuak Jehová okiyoliti, okinmonextili miakej imachtijkauan uan okinmilui: “Xiakan, uan ijkon, xikinchiuakan nomachtijkauan itech nochi altepemej, xikinapolaktikan [...] xikinmachtikan ma kichiuakan nochi tlen onamechnauati” (Mateo 28:19, 20; TNM). Ken tikitaj, akinmej kichiuaj ken Cristo moneki kinchiuaskej imachtijkauan, kinapolaktiskej uan kinmachtiskej. Pero achto moneki yaskej kintemotiuij tlaltikpaktlakamej. Se ixtlamatki okijto sejse moneki yas kanin katej tlaltikpaktlakamej, maski uejka noso amo uejka kanin monekis yaskej (Mateo 10:7; Lucas 10:3).

4. ¿Tlen moneki pampa ‘tikinmichmaskeh tlakah’?

4 ¿Okinekiaya Jesús toselti ma titetlapouikan? ¿Noso okinekiaya san sekan uan ika tlanechikolmej ma titetlapouikan? San se amo uelis kintlapouis tlaltikpaktlakamej “itech nochi altepemej”. Ik non, akinmej kichiuaj ken Cristo san sekan tetlapouiaj uan ika nechikolmej. Itech non otlajto Jesús ijkuak okinmilui imachtijkauan: “Nonkinmichmaskeh tlakah” (xiktlajtolti Mateo 4:18-22). Ika ninmej tlajtolmej, Jesús amo otlajto itech san se imachtijka tlen iselti michkitskia uan mochiaskia ma kisakan michimej. Okachi kuali, Jesús okijto itech akinmej michkitskiaj ika se michayatl. Pampa uelis kichiuaskiaj nin, omonekiaya miakej tlaltikpaktlakamej tlen san sekan uan chikauak tekitiskiaj (Lucas 5:1-11).

5. ¿Tlen naui tlajtlanilmej tikinnankiliskej, uan tleka?

5 Tla tiknekij tikmatiskej akinmej tetlapouijtokej itech Tekiuajkayotl, moneki ma tikinnankilikan ninmej tlajtlanilmej:

  • ¿Tlen moneki tetlapouiskej akinmej kichiuaj ken Cristo?

  • ¿Tlen moneki kinyolinis ma tetlapouikan?

  • ¿Ken moneki tetlapouiskej?

  • ¿Hasta kanin moneki tetlapouiskej uan keski kauitl?

Intlanankilis ninmej tlajtlanilmej techpaleuis ma tikmatikan akinmej tetlapouijtokej pampa ma momakixtikan tlaltikpaktlakamej. Uan nin techyolchikauas okachi ma titetlapouikan (1 Timoteo 4:16).

¿TLEN MONEKI TETLAPOUISKEJ AKINMEJ KICHIUAJ KEN CRISTO?

6. ¿Ken tikmatij iTlaixpantijkauan Jehová tetlapouiaj tlen otlanauati Jesús?

6 (Xiktlajtolti Lucas 4:43, TNM). Jesús otetlapoui “kuali tlajtolmej itech iTekiuajkayo toTajtsin Dios”. Uan kineki imachtijkauan noijki non ma tetlapouikan. ¿Tlen tlaneltokalistli kintlapouia nochtin tlaltikpaktlakamej itech Tekiuajkayotl? ITlaixpantijkauan Jehová. Uan non noijki kitaj akinmej amo kinpaktia tlen titetlapouiaj. Se neskayotl, se teopixki tlen okatka misionero omotlapoui iuan se iTlaixpantijka Jehová. Okilui ye okatka itech miakej altepemej uan itech sejse altepetl okintlajtlaniaya iTlaixpantijkauan Jehová itech tlen tetlapouiaj. Okijto: “Nochtin xoxojtin pampa  san se tlamantli tlanankiliaj: ‘Itech iTekiuajkayo toTajtsin Dios’”. Tlen okijto nin tlakatl kiteititia amo tixoxojtin, san sekan titekitij pampa tinochtin melauak tikchiuaj ken Cristo (1 Corintios 1:10). Nin revista kitematiltia iTekiuajkayo toTajtsin Dios, itoka Akin Tetlapouijtok. Kitematiltia iTekiuajkayo Jehová. Nin revista mochijchiua kanaj 59,000,000 (cincuenta y nueve millones) copias ika 254 tlatlamantli tlajtolmej. Revista Akin Tetlapouijtok non tlen okachi moxexeloa itech nochi Tlaltikpak.

San iTlaixpantijkauan Jehová tetlapouiaj itech iTekiuajkayo toTajtsin Dios.

7. ¿Tleka tikijtoaj akinmej tlayekanaj itech tlaneltokalismej amo tetlapouiaj itech Tekiuajkayotl?

7 Akinmej tlayekanaj itech tlaneltokalismej tlen kijtoaj kichiuaj ken Cristo amo tetlapouiaj itech iTekiuajkayo toTajtsin Dios. Uan tla tetlapouiaj itech Tekiuajkayotl kijtoaj non se tlamantli tlen totech kajki (Lucas 17:21). Amo tlamachtiaj Tekiuajkayotl kajki iluikak nion kijtoaj Jesús kajki ken ueyi Tekiua itech non Tekiuajkayotl. Yejuan tlajtoaj itech Jesús san itech Navidad noso Semana Santa. Amo tlamachtiaj Tekiuajkayotl kiyektlalis nochi ouijkayotl tlen onka itech Tlaltikpak uan san niman kitlajtlamis nochi tlen amo kuali (Apocalipsis 19:11-21). San niman mota amo kimatij tlen kichiuas Jesús ken ueyi tekiua itech iTekiuajkayo toTajtsin Dios. Uan noijki amo kajsikamatij tlen okijto Jesús ma motetlapoui nion kajsikamatij tleka moneki tetlapouiskej.

¿TLEN MONEKI KINYOLINIS MA TETLAPOUIKAN AKINMEJ KICHIUAJ KEN CRISTO?

8. ¿Tleka amo titetlapouiaj pampa tiktlaniskej tomin?

8 Imachtijkauan Jesús amo moneki tetlapouiskej san pampa kitlaniskej tomin noso pampa kinchijchiuaskej uejueyij kalmej kanin monechikoskej. Jesús okijto: “Amo onankitlaxtlajkej, noijki ijkon xiktemakakan” (Mateo 10:8, TNM). Ken tikitaj, amo titetlapouiaj pampa tiktlaniskej tomin (2 Corintios 2:17). Imachtijkauan Jesús amo kitlajtlanij tomin pampa tetlapouiaj (xiktlajtolti Hechos 20:33-35). Jesús kuali okijto amo ma tiktlajtlanikan tomin, pero tlaneltokalismej kitlajtlanij tomin pampa kinpiaskej kalmej kanin monechikoaj uan pampa kintlaxtlauiskej akinmej ompa tlayekanaj uan oksekimej tlen inmiuan tekitij. Ik non, miakej tlayekankej kipiaj miak tomin (Apocalipsis 17:4, 5).

Amo titetlapouiaj pampa tiktlaniskej tomin.

9. ¿Tlen kinyolinia iTlaixpantijkauan Jehová ma tetlapouikan?

9 ¿Uan iTlaixpantijkauan Jehová kinchiualtiaj oksekimej ma kitemakakan tomin kanin monechikoaj noso itech uejueyij nechikolmej? Amo. Inteki motlaxtlaua ika tomin tlen kitemakaj tlaltikpaktlakamej ika nochi inyolo (2 Corintios 9:7). Maski amo ikaj kintlaxtlauia pampa tlamachtiaj ika Biblia, yisexiuitl otetlapouijkej kanaj 2,000,000,000 (dos mil millones) de horas uan okinmachtijkej kanaj 9,000,000 (nueve millones) tlaltikpaktlakamej sejse metstli. Ika nochi inyolo okitekitiltijkej intomin pampa otetlapouijkej. Se ixtlamatki okijto iTlaixpantijkauan Jehová okachi  tetlapouiaj uan tlamachtiaj. Uan noijki okijto amo kintlaxtlauiaj intlayekankej. Pero tla tiiTlaixpantijkauan Jehová amo titetlapouiaj pampa techtlaxtlauiaj, ¿tleka titetlapouiaj? Pampa tiktlasojtlaj Jehová uan tlaltikpaktlakamej. Ijkon mochiua tlen kijtoa Salmo 110:3 * (xiktlajtolti).

¿KEN TETLAPOUIAJ AKINMEJ KICHIUAJ KEN CRISTO?

Tikintlapouiaj tlaltikpaktlakamej maski san kanin yetoskej. (Xikita párrafo 10).

10. ¿Ken otetlapoui Jesús uan imachtijkauan?

10 ¿Ken otetlapouijkej Jesús uan imachtijkauan? Oyayaj san kanin okatkaj tlaltikpaktlakamej. Otetlapouiayaj itech ojtli uan itech tiankistli uan noijki otetlapouiayaj inkalijtik tlaltikpaktlakamej (Mateo 10:11; Lucas 8:1; Hechos 5:42; 20:20). Pampa oyayaj inkalijtik tlaltikpaktlakamej, nochtin okintlapouiayaj.

11, 12. ¿Ken tetlapouiaj iTlaixpantijkauan Jehová uan ken tetlapouiaj akinmej kijtoaj kichiuaj ken Cristo?

11 ¿Uan tlen kichiuaj akinmej kijtoaj kichiuaj ken Cristo? ¿Tetlapouiaj kuali tlajtolmej itech Tekiuajkayotl ken okichi Jesús? Miakej okachi kinpaktia kintlaxtlauiskej intlayekankej pampa yejuan ma tlamachtikan. Pero amo tetlapouiaj pampa kinchiuaskej imachtijkauan Jesús, ken ye okichi. San kinekij amo ma yakan itech okse tlaneltokalistli akinmej inmiuan monechikoaj. Se neskayotl, itech xiuitl 2001, papa Juan Pablo II itech se carta okijto católicos moneki ma tetlapouikan ken  tlatitlanil Pablo, akin okijto: “¡Nimialma tla amo oniktetlapowi!”. Papa noijki okijto amo ma tetlapouikan san akinmej ixtlamatkej, moneki nochtin ma tetlapouikan akinmej pouij itech teopan. Pero amo nochtin okikakilijkej.

12 San iTlaixpantijkauan Jehová tetlapouiaj Jesús opejki tlanauatia ken ueyi Tekiua itech xiuitl 1914. Yejuan okachi kipatioitaj tetlapouiskej ken otlanauati Jesús (Marcos 13:10). Uan se amochtli tlen tlajtoa itech tlaneltokalismej, kijtoa iTlaixpantijkauan Jehová sapanoa kipatioitaj tetlapouiskej. Noijki okijto mochijchikauaj kinpaleuiskej akinmej apismikij, akinmej inselti noso mokokoaj pero amo kilkauaj tlen okachi moneki kichiuaskej: kintlapouiskej oksekimej ayakmo miak poliui pampa tlamis nochi tlen amo kuali uan tlen moneki kichiuaskej tla kinekij momakixtiskej. Uan melauak ijkon tikchiuaj. TiiTlaixpantijkauan Jehová titetlapouiaj ken okichi Jesús uan imachtijkauan.

¿HASTA KANIN MONEKI TETLAPOUISKEJ UAN KESKI KAUITL?

13. ¿Hasta kanin moneki tetlapouiskej akinmej kichiuaj ken Cristo?

13 Jesús okijto imachtijkauan tetlapouiskiaj uan tlamachtiskiaj “itech nochi Tlaltikpak”. Okinnauati ma kinchiuakan imachtijkauan itech “nochi uejueyij altepemej” (Mateo 24:14; 28:19, 20, TNM). Ken tikitaj, akinmej kichiuaj ken Cristo moneki tetlapouiskej itech Tekiuajkayotl itech nochi Tlaltikpak.

14, 15. ¿Tleka uelis tikijtoskej iTlaixpantijkauan Jehová tetlapouijtokej ijkon ken otlanauati Jesús? (Xikinmita tlaixkopinalmej tlen ika peua tlamachtil).

14 Ken yotikitakej, Jesús okijto Tekiuajkayotl motetlapouiskia itech nochi Tlaltikpak. ¿Tleka uelis tikijtoskej iTlaixpantijkauan Jehová ijkon kichijtokej? Itech ueyi altepetl Estados Unidos, akinmej kijtoaj kichiuaj ken Cristo kinpiaj kanaj 600,000 (seiscientos mil) tlayekankej. Pero itech non ueyi altepetl katej kanaj 1,200,000 (un millón doscientos mil) iTlaixpantijkauan Jehová tlen tetlapouijtokej ken otlanauati Jesús. Uan itech nochi Tlaltikpak katej kanaj 400,000 (cuatrocientos mil) teopixkej cátolicos, pero katej kanaj 8,000,000 (ocho millones) iTlaixpantijkauan Jehová tlen tetlapouijtokej itech 240 uejueyij altepemej. Nin kiteititia iTlaixpantijkauan Jehová tetlapouijtokej itech nochi Tlaltikpak uan nin kiueyichiua Jehová (Salmo 34:1; 51:15).

15 TiiTlaixpantijkauan Jehová tiknekij tikintlapouiskej sapanoa miakej tlaltikpaktlakamej achto tlamis nochi tlen amo kuali. Ik non, yotikintlajtolkuepkej uan yotikinchijchijkej miakej amochmej, revistas uan amatsitsintin ika kanaj 700 tlatlamantli tlajtolmej. Uan amo tikinnemakaj amatlajkuilolmej. Yisexiuitl otikinchijchijkej 4,500,000,000 (cuatro mil quinientos millones) amatlajkuilolmej. Noijki yotikinchijchijkej kanaj 200,000,000 (doscientos millones) copias itech Traducción del Nuevo Mundo de las Santas Escrituras ika kanaj 130 tlatlamantli tlajtolmej. Uan página tlen tikpiaj itech Internet kajki ika kanaj 750 tlatlamantli tlajtolmej. San tiiTlaixpantijkauan Jehová tikchijtokej nin ueyi tekitl tlen tetlajtlachialtia.

16. ¿Ken tikmatij tiiTlaixpantijkauan Jehová tikpiaj espíritu santo?

16 ¿Keski uejkauas tetlapouilistli? Jesús okijto uejkauaskia hasta ijkuak tlamis tlen amo kuali. TiiTlaixpantijkauan Jehová  titetlapouijtokej pampa toTajtsin Dios techmaka iespíritu santo (Hechos 1:8; 1 Pedro 4:14). Sekimej tlen pouij itech okseki tlaneltokalismej kijtoaj kipiaj espíritu santo. Pero ¿tetlapouiaj ken iTlaixpantijkauan Jehová? Sekimej kinekij tetlapouiskej ken tejuan pero amo ueli kichiuaj. Oksekimej kinekij tetlapouiskej san seki kauitl. Uan oksekimej yauij inkalijtik tlaltikpaktlakamej pero amo tetlapouiaj itech Tekiuajkayotl. Amo kichijtokej tekitl tlen Jesús okipeualti.

¿AKINMEJ TETLAPOUIAJ AXKAN ITECH ITEKIUAJKAYO TOTAJTSIN DIOS?

17, 18. (1) ¿Ken tikmatij iTlaixpantijkauan Jehová tetlapouiaj kuali tlajtolmej itech Tekiuajkayotl? (2) ¿Ken tikchiuaj nin tekitl?

17 ¿Akinmej tetlapouiaj axkan itech iTekiuajkayo toTajtsin Dios? San iTlaixpantijkauan Jehová. ¿Ken tikmatij? Achto, titetlapouiaj tlen melauak itech Tekiuajkayotl. Ome, titetlapouiaj ken moneki, tikintemoaj tlaltikpaktlakamej. Eyi, tikchiuaj pampa tiktlasojtlaj Jehová uan tlaltikpaktlakamej. Naui, titetlapouiaj itech nochi Tlaltikpak uan ika miakej tlatlamantli tlajtolmej. Uan makuili, titetlapouiskej hasta ijkuak tlamis nochi tlen amo kuali.

18 Melauak tetlajtlachialtia nochi tlen kichijtok ialtepe Jehová pampa motetlapouia kuali tlajtolmej itech itlamian tonalmej. ¿Ken tikchiuaj nin tekitl? Tlatitlanil Pablo okijto toTajtsin Dios techyolinia uan techyolchikaua pampa ma tikchiuakan (Filipenses 2:13). Ik non, tiktlatlaujtiaj Jehová ma techyolchikaua ma titetlapouikan (2 Timoteo 4:5).

^ párr. 9 Salmo 110:3 kijtoa: “Ika miak pakilistli motemakas moaltepe itech tonal ijkuak tikteititis tikinyekana soldados. Ijkuak motematiltis tlen santo, desde kanin kisa Tonaltsin, tikpia inpaleuilis miakej telpokamej ijkon ken ajuachtli”.