Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok (tlen ika timomachtiaj)  |  Mayo de 2016

Ma timomachtikan nochi tlen Jehová techmaka

Ma timomachtikan nochi tlen Jehová techmaka

“Ne Jehová nimoDios, ne Akin nimitsmachtia pampa kuali xiyeto” (ISAÍAS 48:17).

TLAKUIKALMEJ: 20 UAN 37

1, 2. (1) ¿Ken tikitaj Biblia tiiTlaixpantijkauan Jehová? (2) ¿Tlen amochtli itech Biblia okachi mitspaktia?

TIITLAIXPANTIJKAUAN Jehová tikpatioitaj Biblia. Nin amochtli techyolchikaua, techmaka se chialistli uan noijki kuali techyekana (Romanos 15:4). Itech Biblia amo ijkuilitok tlen mokuayejyekoaj tlaltikpaktlakamej, pampa Biblia “itlajtol Totajtsi Dios” (1 Tesalonicenses 2:13).

2 ¿Tlen amochtli itech Biblia okachi techpaktia? Tinochtin tikpiaj kanin okachi techpaktia. Sekimej kinpaktia amochtli Mateo, Marcos, Lucas uan Juan, pampa tlajtoaj itech Jesús uan nin kinpaleuia ma kixmatikan kualtsin iyelis tlen kipia Jehová (Juan 14:9). Oksekimej kinpaktia amochmej ken Apocalipsis pampa kijtoa “tlan ayakmó wejkawas tlamochiwas” (Apocalipsis 1:1). Miakej kinyolchikaua amochtli Salmos uan oksekimej kinpaktia tlanojnotsalmej tlen kipia amochtli Proverbios. Kuali tikitaj Biblia nochtin kinpaleuia.

3, 4. (1) ¿Ken tikinmitaj amatlajkuilolmej? (2) ¿Tlen amatlajkuilolmej tikinpiaj pampa nochtin tlaltikpaktlakamej?

3 Ken tikpatioitaj Biblia, noijki tikinpatioitaj nochtin  amatlajkuilolmej pampa tikmatij ninmej kisaj itech Biblia. Amochmej, amatlajkuilolmej, revistas uan nochi tlen techmaka Jehová techpaleuiaj kuali iuan ma timouikakan uan ma tikpiakan chikauak totlaneltokilis (Tito 2:2).

4 Miakej amatlajkuilolmej moijkuiloaj pampa nochtin iTlaixpantijkauan Jehová. Okseki amatlajkuilolmej moijkuiloaj pampa telpokamej noso tetajmej. Uan miakej tlamachtilmej uan videos tlen katej itech página tlen tikpiaj itech Internet mochijchiuaj pampa akinmej amo iTlaixpantijkauan Jehová. Nochi nin kiteititia Jehová kichijtok tlen okijto: kinmachtis nochtin tlaltikpaktlakamej (Isaías 25:6).

5. ¿Tlen panos tla timochijchikauaj tikintlajtoltiskej uan timomachtiskej amatlajkuilolmej?

5 Tinochtin techpaktiskia okachi timajxiliskej pampa tiktlajtoltiskej Biblia uan amatlajkuilolmej. Uelis amo tiktlajtoltiskej miak sejse amatlajkuilol tlen tikinpiaj. Pero kuali tikmatij tla timochijchikauaj tikintlajtoltiskej uan timomachtiskej Biblia uan amatlajkuilolmej, Jehová yolpakis (Efesios 5:15, 16). Pero onka se tlamantli tlen moneki itech timokuayejyekoskej. Ma tikitakan tlen tlamantli.

6. ¿Tlen uelis kichiuas amo ma tikpatioitakan nochi tlen Jehová techmaka?

6 Tla amo timomaluiaj, uelis tikijtoskej seki tlaxelolmej itech Biblia noso seki amatlajkuilolmej amo uelis techmachtiskej itlaj tlen miak ipati. Se neskayotl, ¿tlen tikchiuaskej tla ualeua tikitaj amo technamiki itlaj tlen kijtoa Biblia? ¿Noso tlen tikchiuaskej tla se tlamachtil amo omoijkuilo pampa tejuan? ¿Tiktlajtoltiskej noso amo? Tla amo tiktlajtoltiskej, amo tikmatiskej itlaj tlen miak ipati. ¿Tlen uelis tikchiuaskej pampa amo ijkon ma techpano? Ma tikilnamikikan nochtin amatlajkuilolmej tlen tikinseliaj techmaka Jehová. Biblia kijtoa: “Ne Jehová nimoDios, ne Akin nimitsmachtia pampa kuali xiyeto” (Isaías 48:17). Itech nin tlamachtil tikitaskej eyi tlamantli tlen techpaleuiskej ma tikpatioitakan nochi tlen Jehová techmaka.

¿TLEN TLAMANTLI TECHPALEUIS OKACHI KUALI MA TIKTLAJTOLTIKAN BIBLIA?

7. ¿Tleka moneki ma timokuayejyekokan itech okseki tlamantli tlen opanok ijkuak tiktlajtoltiaj Biblia?

7 Ma timokuayejyekokan itech okseki tlamantli tlen opanok. Seki tlamantli itech Biblia omoijkuilo pampa ikaj noso pampa miakej tlaltikpaktlakamej. Pero Biblia kijtoa “nochi tiotlajkuíloli Dios otlanawati makijkuilokah” (2 Timoteo 3:16). Ik non, ijkuak tiktlajtoltiskej moneki ma timokuayejyekokan itech okseki tlamantli tlen opanok. Se neskayotl, se tokni kijtoa nochipa kilnamiktok seki itech Biblia kimachtia miak tlamantli. Ik non, achto tiktlajtoltiskej Biblia, ma tikiluikan Jehová ma techpaleui ma timokuayejyekokan itech okseki tlamantli tlen opanok uan ma techmaka ixtlamatilistli pampa ma tikajsikamatikan tlen kineki techmachtis (Esdras 7:10; xiktlajtolti Santiago 1:5).

¿Tlen tlamantli techpaleuis pampa okachi kuali ma tiktlajtoltikan Biblia? (Xikita párrafo 7).

8, 9. (1) ¿Tlen uelis timotlajtlaniskej ijkuak tiktlajtoltiaj Biblia? (2) ¿Tlen techmachtia itech Jehová tlen moneki kichiuaskej tlayekankej?

8 Ma timotlajtlanikan. Ijkuak tiktlajtoltiaj Biblia, ma timotlajtlanikan: “¿Tlen nechmachtia nin itech Jehová? ¿Ken uelis nechpaleuis itech nonemilis? ¿Ken uelis nikinpaleuis oksekimej ika nin?”. Tla timokuayejyekoaj itech ninmej tlajtlanilmej,  okachi techpaleuis kuali ma tiktlajtoltikan Biblia. Ma tikitakan se neskayotl. Biblia kijtoa tlen moneki kichiuaskej tlayekankej (xiktlajtolti 1 Timoteo 3:2-7). Amo tinochtin titlayekankej, ik non, uelis timokuayejyekoskej ninmej tlaxelolmej amo uelis techpaleuiskej. Pero ika eyi tlajtlanilmej tlen katej itech nin párrafo ma tikitakan nonmej tlaxelolmej uelis techpaleuiskej.

9 “¿Tlen nechmachtia nin itech Jehová?”. Nochi tlen moneki kichiuaskej tlayekankej kiteititia Jehová kineki ma kintlakamatikan tlanauatilmej tlen miak inpati. ¿Tleka? Pampa Jehová kipatioita tlanechikol. Biblia kijtoa ‘Ye okiko ika iesso’ Jesús (Hechos 20:28). Ik non, Jehová kineki tlayekankej ma kiteititikan se kuali neskayotl. Uan satepan, kintlajtlanilis ken okinmaluijkej tokniuan. Jehová kineki kuali ma timomachilikan pampa tlayekankej techmaluiaj (Isaías 32:1, 2). Nochi tlen tlayekankej moneki kichiuaskej kiteititia Jehová totech motekipachoa.

Jehová kineki tinochtin ma tikpiakan ‘totlalnamikilis chipawak’ uan ma tiyetokan tiyolyamankej.

10, 11. (1) ¿Ken techpaleuia tikilnamikiskej nochi tlen moneki kichiuaskej tlayekankej? (2) ¿Ken uelis tikinpaleuiskej oksekimej ika nin?

10 “¿Ken uelis nechpaleuis itech nonemilis?”. Tla titlayekankej itech tlanechikol, moneki ma tikitakan nochi tlen moneki tikchiuaskej uan ma timochijchikauakan okachi kuali tikchiuaskej toteki (1 Timoteo 3:1). Pero tinochtin uelis techpaleuis tikmatiskej  nin. Se neskayotl, Jehová kineki tinochtin ma tikpiakan ‘totlalnamikilis chipawak’ uan ma tiyetokan tiyolyamankej (Filipenses 4:5; 1 Pedro 4:7). Ijkuak tlayekankej kitemaka se kuali neskayotl, nochtin intech uelis momachtiskej uan kipiaskej chikauak intlaneltokilis ken yejuan (1 Pedro 5:3; Hebreos 13:7).

11 “¿Ken uelis nikinpaleuis oksekimej ika nin?”. Uelis tikinmiluiskej akinmej tikinmachtiaj itech Biblia uan oksekimej nochi tlen moneki kichiuaskej tlayekankej itech tlanechikol, uan noijki tikinmiluiskej tlayekankej amo katej ijkon ken akinmej tlayekanaj itech okseki tlaneltokalismej. Nin noijki techilnamiktia tlayekankej chikauak tekitij. Ijkuak timokuayejyekoaj itech nochi nin, okachi tikintlakaitaj (1 Tesalonicenses 5:12). Uan tla okachi tikintlakamatij, okachi yolpakiskej tekitiskej itech tlanechikol (Hebreos 13:17).

12, 13. (1) ¿Tlen uelis timomachtiskej ika nochi tlen techiluia Biblia? (2) Xikijto se neskayotl itech nochi tlen tikajsikamatij ijkuak okachi timomachtiaj itech se tlapoualistli.

12 Okachi ma timomachtikan. Ijkuak timomachtiaj Biblia, uelis okachi timomachtiskej itech ninmej tlajtlanilmej:

  • ¿Akin okijkuilo nin amochtli?

  • ¿Kanin uan keman okijkuilojkej?

  • ¿Tlen tlamantli tlen miak ipati opanok ijkuak okijkuilojkej nin amochtli?

Tla timomachtiskej itech nin, uelis tikitaskej okseki tlamantli tlen ualeua amo san niman tikajsikamatij.

13 Ma tikitakan se neskayotl. Itech Ezequiel 14:13, 14 Jehová okijto tla se altepetl tlajtlakolchiuaskia, ye kiixpoloskia uan kipojpoloskia nochi intlakual uan inyolkauan. Pero noijki okijto: “Uan tla ninmej eyi tlakamej yetoskiaj itlajkotia: Noé, Daniel uan Job, momakixtiskiaj pampa yejuan yolmelajkej”. Tla okachi timomachtiaj itech nin, tikitaskej Ezequiel okinmijkuilo ninmej tlaxelolmej kanaj 612 xiuitl achto ualaskia Cristo. Maski Noé uan Job omikej miak xiuitl achto, Jehová ok okinmilnamikiaya pampa okatkaj yolmelajkej. Pero Daniel ok oyoltoka, uan uelis okipiaya kanaj 20 xiuitl ijkuak Jehová okijto okatka yolmelajki ken Noé uan Job. ¿Tlen techmachtia nin? Jehová kinmita uan kinpatioita nochtin akinmej kitekichiuiliaj, maski ok telpokamej (Salmo 148:12-14).

MA TIMOMACHTIKAN NOCHTIN AMATLAJKUILOLMEJ

14. (1) ¿Ken kinpaleuia telpokamej nochtin tlamachtilmej uan amatlajkuilolmej tlen Jehová kinmaka? (2)¿Ken tinochtin techpaleuia? (Xikita tlaixkopinal tlen ika peua tlamachtil).

14 Amatlajkuilolmej pampa telpokamej. Yotikitakej tinochtin uelis timomachtiskej miak itech Biblia. Noijki ijkon uelis timomachtiskej itech amatlajkuilolmej. Ma tikinmitakan seki neskayomej. Itech ninmej xiuitl, Jehová yotechmakak miakej tlamachtilmej uan amochmej pampa telpokamej. [1] (Xikita nota kanin tlami tlamachtil). Ninmej tlamachtilmej kinpaleuiaj telpokamej  ma kixnamikikan ouijkayotl tlen kipiaj kanin momachtiaj uan noijki pampa moskaltijtokej. ¿Pero ken uelis techpaleuis tinochtin nonmej tlamachtilmej uan amochmej? Tla tikintlajtoltiaj, uelis tikmatiskej tlen ouijkayotl kipiaj telpokamej uan uelis tikinpaleuiskej uan tikinyolchikauaskej.

Akinmej kichiuaj ken Cristo tlen yikipiaj miak xiuitl amo ma kijtokan amo moneki ma momachtikan tlamachtilmej pampa telpokamej.

15. ¿Tleka tinochtin moneki ma momachtikan tlamachtilmej pampa telpokamej?

15 Akinmej kichiuaj ken Cristo tlen yikipiaj miak xiuitl amo ma kijtokan amo moneki ma momachtikan tlamachtilmej pampa telpokamej. Tikteititiaj timoueyinekij tla ijkon timokuayejyekoaj. Akinmej yikipiaj miak xiuitl noijki kipiaj ouijkayotl tlen moijtoa itech nonmej tlamachtilmej. Se neskayotl, tinochtin moneki tikpaleuiskej tlen tikneltokaj, tikyektlaliskej toyelis, amo tikchiuaskej tlen oksekimej kichiuaj, amo timouikaskej iuan akinmej uelis techijtlakoskej uan amo timoyolpaktiskej ika tlen amo kuali. Nochtin tlamachtilmej tlen mochijchiuaj pampa telpokamej noijki kisaj itech Biblia uan noijki tinochtin techpaleuiaj.

16. ¿Ken kinpaleuiaj akinmej yikipiaj miak xiuitl tlamachtilmej pampa telpokamej?

16 Tlamachtilmej pampa telpokamej techpaleuiaj okachi kuali ma timouikakan iuan Jehová (xiktlajtolti Eclesiastés 12:1, 13 *). Akinmej yikipiaj miak xiuitl noijki uelis kinpaleuis nonmej tlamachtilmej. Se neskayotl, ¡Despertad! de abril de 2009 okipiaya se tlamachtil pampa telpokamej tlen motokayotia: “¿Cómo disfrutar la lectura de la Biblia?”. Nin tlamachtil okijto miak tlamantli tlen uelis tikchiuaskej uan se recuadro tlen uelis tiktekiskej uan tiktlatiskej pampa ika timomachtiskej. ¿Okinpaleui nin akinmej yikipiaj miak xiuitl? ¡Kema! Se siuatl tlen kipia inamik uan ikoneuan okijto oui okichiuiliaya kitlajtoltis Biblia, ik non, okichi tlen okijto non tlamachtil uan axkan kipaktia kitlajtoltis Biblia uan kita ken amochmej tlen kipia Biblia san se tlamantli kijtoa. Axkan kijtoa: “Amo keman ijkon onechpaktiaya niktlajtoltis Biblia”.

17, 18. ¿Ken techpaleuiaj amatlajkuilolmej pampa akinmej amo iTlaixpantijkauan Jehová? Xikijto se neskayotl.

17 Amatlajkuilolmej pampa akinmej amo iTlaixpantijkauan Jehová. Itech xiuitl 2008 opejki tikchijchiuaj revista Akin Tetlapouijtok tlen ika timomachtiaj, tlen mochijchiua pampa iTlaixpantijkauan Jehová. Pero noijki tikinchijchiuaj revistas pampa akinmej amo iTlaixpantijkauan Jehová. ¿Ken uelis techpaleuiskej? Ma tiktlalikan se neskayotl. Ma timokuayejyekokan ikaj tikyoleuaj touan ma monechiko uan yaui. Sapanoa tiyolpakiskej. Uan ijkuak motemaka  tlapoualistli, uelis timokuayejyekoskej ken momachilis akin yikin touan omonechiko uan kipaleuis ma kipatla inemilis tlen kikakis. Nochi nin kichiuas okachi ma tikpatioitakan tlen techtlapouiskej.

18 Uelis noijki ijkon techpanos ijkuak tikintlajtoltiaj amatlajkuilolmej tlen okinmijkuilojkej pampa akinmej amo iTlaixpantijkauan Jehová. Se neskayotl, ma timokuayejyekokan itech revista Akin Tetlapouijtok uan tlamachtilmej tlen katej itech jw.org. Ninmej tlamachtilmej itech Biblia amo oui kinmajsikamatiskej akinmej amo iTlaixpantijkauan Jehová. Ijkuak tikintlajtoltiaj, okachi kuali tikinmajsikamatij tlamachtilmej itech Biblia tlen yitikinmixmatij. Uan nin kichiua okachi ma tikpatioitakan. Ninmej tlamachtilmej techpaleuiaj okachi kuali ma tikyekijtokan tlen tikneltokaj ijkuak titetlapouiaj. Revista ¡Despertad! noijki techpaleuia. Itech moijtoa tleka uelis titlaneltokaskej itech toTajtsin Dios uan itech tlen yokichijchi, uan noijki techmachtia ma tikpaleuikan tlen tikneltokaj (xiktlajtolti 1 Pedro 3:15).

19. ¿Ken uelis tikteititiskej tiktlasojkamatiliaj Jehová nochi tlen techmaka?

19 Kuali tikitaj Jehová techmaka miak tlamantli tlen techpaleuia (Mateo 5:3). Ik non, ma tikintlajtoltikan uan ma tikchiuakan nochi tlen techiluia. Tla ijkon tikchiuaskej, kuali tiyetoskej uan tikteititiskej tiktlasojkamatiliaj Jehová nochi tlen techmaka (Isaías 48:17).

^ [1] (Párrafo 14). Se neskayotl, ximomachti volúmenes 1 uan 2 itech amochmej Lo que los jóvenes preguntan. Respuestas prácticas uan sección “Los jóvenes preguntan”, tlen axkan tikajsij itech jw.org.

[Tlajtoli tlen kiualika tlakxitlan]

^ párr. 16 Eclesiastés 12:1 kijtoa: “Uan xikiInamiki akin Omitschijchi ijkuak ok titelpochtli ijkuak ayamo uits ouijkayotl pampa ijkuak ejkoskej non tonalmej tikijtos: ‘Onikauilchi noyolilis’”. Uan 12:13 kijtoa: “Ken yomokak nochi, nin tlamantli tlami ijkin: Xikmauili akin melauak toTajtsin Dios uan xikintlakamati itlanauatiluan. Pampa nochi nin moneki kichiuas tlaltikpaktlakatl”.