Xikita nochi

Tlen kiualika

Ma tikyektlalikan ouijkayotl ika tlasojtlalistli

Ma tikyektlalikan ouijkayotl ika tlasojtlalistli

“Kuali [...] ximoyekwikakah” (MARCOS 9:50).

TLAKUIKALMEJ: 39 UAN 35

1, 2. (1) Xikijto seki ouijkayotl tlen moijtoa itech amochtli Génesis. (2) ¿Tleka Biblia tlajtoa itech ninmej neskayomej?

BIBLIA techtlapouia itech seki ouijkayotl tlen okipixkej sekimej tlaltikpaktlakamej iuan oksekimej. ¿Se tonal yotimokuayejyeko itech nonmej ouijkayotl? Seki ouijkayotl peua moijtoa itech amochtli Génesis. Se neskayotl, Caín okimikti Abel (Génesis 4:3-8). Lamec okimikti se telpochtli pampa okimakak (Génesis 4:23). Akinmej okinmaluiayaj iyolkauan Abrahán omokualanijkej iuan akinmej okinmaluiayaj iyolkauan Lot (Génesis 13:5-7). Agar omokuayejyeko okachi oueyititoka uan amo ken Sara, uan Sara okualanki iuan Abrahán (Génesis 16:3-6). Ismael okinmixnamik miakej tlaltikpaktlakamej uan noijki okixnamikej (Génesis 16:12).

2 ¿Tleka Biblia tlajtoa itech ninmej neskayomej? Pampa noijki ma timomachtikan itech ouijkayotl tlen okipixkej tlaltikpaktlakamej tlen noijki okatkaj tlajtlakolejkej. Tejuan noijki titlajtlakolejkej uan noijki uelis tikpiaskej ouijkayotl. Ijkuak ijkon techpanos, ma tikchiuakan ken akinmej okichijkej tlen kuali uan amo ken akinmej okichijkej tlen amo kuali (Romanos 15:4). Ijkon kuali timouikaskej iuan oksekimej.

3. ¿Tlen tikitaskej itech nin tlamachtil?

 3 Itech nin tlamachtil tikitaskej tleka moneki tikyektlaliskej ouijkayotl tlen tikpiaj iuan oksekimej uan ken moneki tikyektlaliskej. Noijki timomachtiskej principios bíblicos tlen techpaleuiskej ma tikyektlalikan ouijkayotl. Non techpaleuis ma timouikakan iuan Jehová uan noijki iuan oksekimej.

¿TLEKA MONEKI TIKYEKTLALISKEJ OUIJKAYOTL?

4. (1) ¿Ken opejkej mokuayejyekoaj tlaltikpaktlakamej? (2) ¿Tlen panoa pampa tlaltikpaktlakamej ijkon mokuayejyekoaj?

4 Satanás ye akin okachi itlajtlakol amo ma motlasojtlakan tlaltikpaktlakamej uan ma kipiakan ouijkayotl. ¿Tleka ijkon tikijtoaj? Itech Xochitlali Edén, Satanás okijto sejse uelis tikpejpenaskej tlen kuali noso tlen amo kuali, uan amo moneki ma tiktlakamatikan toTajtsin Dios (Génesis 3:1-5). Pero ken tikitaj itech nochi Tlaltikpak, tlen okijto Satanás okichi ma yeto miak ouijkayotl. Miakej tlaltikpaktlakamej kijtoaj inneuian uelis kijtoskej tlen kuali noso tlen amo kuali. San intech mokuayejyekoaj uan kijtoaj okachi inpati amo ken oksekimej. Uan kichiuaj miak tlamantli tlen oksekimej kintlajyouiltiaj. Nin kichiua ma tikpiakan ouijkayotl. Pero Biblia techmachtia tla san niman tikualanij, tikpiaskej ouijkayotl iuan oksekimej uan uelis titlajtlakolchiuaskej (Proverbios 29:22).

5. ¿Ken okinmilui Jesús imachtijkauan kiyektlaliskiaj ouijkayotl iuan oksekimej?

5 Ijkuak Jesús otlamachti itech Tepetl, okinmilui imachtijkauan kuali ma mouikakan iuan oksekimej maski amo kinpaktiskia. Uan okinmilui tlen omonekiaya kichiuaskej pampa amo kipiaskiaj ouijkayotl. Se neskayotl, ma yetokan yolkualmej, ika yolseuilistli iuan oksekimej, amo san niman ma kualanikan, san niman ma kiyektlalikan ouijkayotl uan ma kintlasojtlakan akinmej kinkokoliaj (Mateo 5:5, 9, 22, 25, 44).

6, 7. (1) ¿Tleka miak ipati ma tikintlapojpoluikan oksekimej? (2) ¿Tlen moneki ma timotlajtlanikan?

6 Itech ninmej tonalmej tikueyichiuaj Jehová ijkuak timotlatlaujtiaj, titetlapouiaj uan ijkuak timonechikoaj. Pero tla amo kuali timouikaj iuan tokniuan, toTajtsin Dios amo kiselis ken tikueyichiuaj (Marcos 11:25). Tla tiknekij kuali timouikaskej iuan Jehová, moneki titetlapojpoluiskej (xiktlajtolti Lucas 11:4; Efesios 4:32).

¿San niman tikintlapojpoluiaj tokniuan?

7 Jehová kineki ma tikintlapojpoluikan oksekimej uan kuali inmiuan ma timouikakan. Ik non, moneki ma timotlajtlanikan: “¿San niman nikintlapojpoluia nokniuan? ¿Nechpaktia inmiuan niyetos?”. Tla tikitaj amo san niman tikintlapojpoluiaj tokniuan, ika yolyamanilistli ma tikiluikan Jehová ma techpaleui uan ye techpaleuis (1 Juan 5:14, 15).

¿UELIS TITETLAPOJPOLUISKEJ UAN TIKILKAUASKEJ TLEN OPANOK?

8, 9. ¿Tlen tikchiuaskej tla oksekimej techyolkokoaj?

8 Ken tinochtin titlajtlakolejkej, ualeua techiluiaj noso techchiuiliaj itlaj tlen techyolkokoa (Eclesiastés 7:20; Mateo 18:7). ¿Tlen tikchiuaskej? Ma tikitakan se neskayotl tlen techmachtia itlaj tlen miak ipati:  sekimej tokniuan omonechikojkej pampa tlakuaskej, ijkuakon, se tokni siuatl okintlajpaloto ome tokniuan tlakamej tlen okatkaj ompa. Pero se amo okipakti ken okitlajpalo. Ijkuak tokni siuatl oyajki, non tokni opejki kiteneua. Pero tokni tlen iuan omotlapouijtoka, okilui ken tokni siuatl yokitekichiuilijtoka Jehová 40 xiuitl maski okipiaya ouijkayotl. Uan okilui tokni siuatl amo okinekiaya kiyolkokos. ¿Tlen okichi tokni? Okijto non melauak uan okilka tlen opanok.

9 ¿Tlen techmachtia nin neskayotl? Tla ikaj techyolkokoa, uelis tikpejpenaskej tlen tikchiuaskej. Tla titetlasojtlaj, titetlapojpoluiskej (xiktlajtolti Proverbios 10:12 *; 1 Pedro 4:8). Jehová sapanoa kipatioita ijkuak titetlapojpoluiaj (Proverbios 19:11; Eclesiastés 7:9). Ik non, ijkuak ikaj kijtos noso kichiuas itlaj tlen amo techpaktis, ma timotlajtlanikan: “¿Uelis nitetlapojpoluis uan nikilkauas tlen opanok? ¿Moneki ma nimokuayejyekojto itech non tlamantli?”.

10. (1) Ijkuak sekimej opejkej kiteneuaj se precursora, ¿ken omomachili? (2) ¿Tlen tlaxelolmej itech Biblia okipaleuijkej ma kipia yolseuilistli?

10 Tla ikaj kijtoa totech itlaj tlen amo kuali, uelis oui tiktlapojpoluiskej uan tikilkauaskej tlen opanok. Ijkon okipanok se precursora. Sapanoa omoyolkoko ijkuak sekimej tokniuan kanin monechikoa okitenejkej ken tetlapouia uan tlen kichiua. Ik non, omotlapoui iuan sekimej tokniuan tlen kipiaj chikauak intlaneltokilis uan okinmilui ma kipaleuikan. Yejuan okipaleuijkej ika Biblia pampa amo san ma kitekipachojto tlen oksekimej kijtoaj, okachi kuali, ma mokuayejyeko itech Jehová. Sapanoa okiyolchika ijkuak okitlajtolti Mateo 6:1-4 (xiktlajtolti). Ninmej tlaxelolmej okilnamiktijkej okachi ipati kiyolpaktis Jehová. Ik non, okijto ayakmo mokuayejyekoskia itech tlen okijtojkej akinmej okitenejkej. Axkan tla ikaj kiteneua ken tetlapouia, tokni kipia yolseuilistli uan paki. ¿Tleka? Pampa mochijchikaua kiyolpaktis Jehová.

IJKUAK AMO UELI TITETLAPOJPOLUIAJ NION TIKILKAUAJ TLEN OPANOK

11, 12. (1) ¿Tlen moneki tikchiuaskej tla amo timouikaj iuan se tokni? (2) ¿Tlen techmachtia ineskayo Abrahán? (Xikita tlaixkopinal tlen ika peua tlamachtil).

11 Santiago 3:2, kijtoa: “Tinochteh kualchiwa titlajtolpanoah”. Ma tikijtokan otikyolkokojkej se tokni ika tlen otikijtojkej noso otikchijkej. ¿Tlen tikchiuaskej? Jesús okijto: “Tla ya tio tiktemakati motlamanal itech artal iwa tikilnamiki amo timowika iwan mokni, ompa xikkawa motlamanal iyakapa n artal iwa achto xio ximotlapojpolwiti iwa mokni. Ijkuakó ya weletis tiwalmokopas kan artal iwa tikyektemakas motlamanal” (Mateo 5:23, 24). Ken tikitaj, tla tikpiaj se ouijkayotl iuan se tokni, moneki iuan timotlapouiskej. Moneki tikseliskej totlajtlakol uan amo tikijtoskej ye itlajtlakol. Timotlapouiskej iuan tokni pampa timotlapojpoluiskej. Kuali timouikaskej iuan tokniuan non tlen okachi ipati.

Moneki timotlapojpoluiskej iuan tokniuan

12 Biblia techmachtia ken uelis timouikaskej iuan se tokni ijkuak tikpiaj ouijkayotl. Ma tikitakan se neskayotl, Abrahán uan Lot  akin okatka isobrino. Yejuan okinpiayaj miakej inyolkauan uan akinmej okinmaluiliayaj opejkej mokualaniaj pampa ayakmo okipiayaj kanin tlakuaskiaj yolkamej. Ken Abrahán okinekiaya kuali mouikas iuan Lot, okikauili ma kipejpena tlali tlen okachi kuali (Génesis 13:1, 2, 5-9). Abrahán otechmakak se kuali neskayotl. Pero ¿okipolo nochi pampa okipaktiaya kitemakas tlen okipiaya? Amo, pampa Jehová okilui kimakaskia okachi miak tlali (Génesis 13:14-17). ¿Tlen techmachtia ineskayo Abrahán? Tla tikyektlaliaj se ouijkayotl ika tlasojtlalistli, maski ualeua itlaj tikpoloskej, Jehová techteochiuas. [1] (Xikita nota kanin tlami tlamachtil).

13. (1) ¿Tlen okichi se tokni ijkuak amo kuali okinankili okse tokni? (2) ¿Tlen techmachtia nin neskayotl?

13 Ma tikitakan okse neskayotl. Se tokni tlakatl kichiuaskia se tekitl itech ueyi nechikol tlen amo keman okichiuaya. Okinotski se tokni pampa kiluiskia ma kipaleui. Pero tokni ijkuak okinankili okualantoka uan ayakmo iuan omotlapoui. Ijkon okichi pampa okualantoka iuan tokni tlen achto okichi non tekitl. Tokni akin yikin kichiuaskia non tekitl, amo omoyolkoko uan okijto amo kualaniskia. Ik non, ijkuak opanok se hora, oksepa okinotski tokni uan okitlajtlani kox uelis motlapouiskiaj. Chikome tonal satepan, omonechikojkej itech Kali kanin monechikoaj. Omotlatlaujtijkej uan omotlapouijkej se hora. Tokni akin okualanki, okijto ouijkayotl tlen okipixki iuan tokni akin achto okichi non tekitl. Ijkuakon tokni tlen yikin kichiuaskia tekitl, okilui seki tlaxelolmej itech Biblia tlen kipaleuiskia. Uan satepan, kuali otekitikej itech ueyi nechikol. Tokni akin achto okualanki, okitlasojkamatili pampa kualtsin okitlapoui.

¿MONEKI MA TIMOTLAPOUIKAN IUAN TLAYEKANKEJ?

14, 15. (1) ¿Keman moneki ma tikchiuakan tlen kijtoa Mateo 18:15-17? (2) ¿Tlen eyi tlamantli okijto Jesús uan tleka moneki tikchiuaskej?

14 Ijkuak se tokni kipiaj se ouijkayotl iuan okse tokni uelis san yejuan kiyektlaliskej. Pero ualeua amo uelis ijkon tikchiuaskej. Tla ijkon techpanos, Jesús okijto moneki oksekimej ma techpaleuikan (xiktlajtolti Mateo 18:15-17). ¿Keman uelis tikchiuaskej tlen okijto Jesús? Ye amo otlapojtoka itech se ouijkayotl tlen uelis kiyektlaliskej tokniuan. ¿Ken tikmatij? Pampa okijto tla akin otlajtlakolchi amo moyolkuepa, ijkuak se tokni yokitlapoui, noijki oksekimej tlen kimatij ouijkayotl uan tlayekankej, moneki ma kitakan “kemi non amo kineltoka Dios” noso “kemi se non koololoa impuestos”. Itech ninmej tonalmej, non kijtosneki ma kikixtikan itech tlanechikol. Ijkuak Jesús otlajto itech ‘tlajtlakoli’, okijtojtoka ijkuak kinkajkayauaj oksekimej noso ijkuak kinteneuaj oksekimej. Pero amo okijtojtoka ken ijkuak momekatiaj, mosiuakuepaj noso motlakakuepaj, ijkuak ikaj tlamachtia tlen amo melauak itech tlanechikol noso ijkuak kinueyichiuaj teotsitsintin. ¿Tleka? Pampa ijkuak ikaj kichiua nin tlajtlakoli moneki kitaskej tlayekankej.

Pampa tikyektlaliskej ouijkayotl iuan se tokni, uelis miak uelta iuan timotlapouiskej. (Xikita párrafo 15).

15 ¿Ken uelis tikchiuaskej tlen okijto Jesús? Achto, moneki timotlapouiskej iuan tokni pero amo inmixpan oksekimej. Uelis miak uelta moneki iuan timotlapouiskej. ¿Uan tla amo ueli timotlapojpoluiaj? Ome, timotlapouiskej iuan tokni ikaj iixpan akin kimati ouijkayotl pampa kitas kox  mochijtok itlaj tlen amo kuali. Tla tikyektlaliaj ouijkayotl, yotikmotlanilijkej tokni ken okijto Jesús. Uan tla miak uelta yotimotlapouijkej iuan tokni pero amo ueli timotlapojpoluiaj, ¿tlen moneki tikchiuaskej? Ijkuakon tikchiuaskej tlamantli eyi: timotlapouiskej iuan tlayekankej. ¿Tleka moneki tikchiuaskej ninmej eyi tlamantli? Jesús okijto moneki tikpaleuiskej tokni pampa tiktlasojtlaj (Mateo 18:12-14).

16. ¿Tlen kiteititia tlen okijto Jesús?

16 Uelis amo monekis tikchiuaskej eyi tlamantli tlen ijkuilitok itech Mateo 18:15-17. ¿Tleka? Pampa ualeua akin otlajtlakolchi kiselia itlajtlakol uan kiyektlalia ouijkayotl, ik non, amo moneki kikixtiskej itech tlanechikol. Ijkuakon, tokni akin okiyolkokojkej moneki motlapojpoluis iuan iikni uan ijkon yetoskej ika yolseuilistli. Tikmatiskej nochi nin tlamantli techpaleuia. Tikteititiskej titetlasojtlaj tla amo san niman timotlapouitiuij iuan tlayekankej. San moneki inmiuan tiaskej ijkuak yotikchijkej achto ome tlamantli tlen okijto Jesús uan tla onka tlamantli tlen kiteititia tokni okichi itlaj tlen amo kuali.

17. ¿Tlen tlateochiualismej tikinseliskej tla timochijchikauaj ma yeto yolseuilistli?

17 Ken tinochtin titlajtlakolejkej, nochipa tikchiuaskej noso tikijtoskej itlaj tlen kinyolkokos tokniuan. Santiago okijto: “Tla onka se tlakatl non amo kimati motlapololtia ijkuak itla kijtoa, non tlakatl yekmilajka iwa weletis kinawatis nochi ikuerpo” (Santiago 3:2). Tla tiknekij tikyektlaliskej ouijkayotl, moneki ma timochijchikauakan ma yeto yolseuilistli uan amo timokualanijtoskej (Salmo 34:14). Tla timochijchikauaj ma yeto yolseuilistli, uelis timouikaskej iuan tokniuan uan san sekan tiyetoskej (Salmo 133:1-3). Uan tlen okachi ipati, kuali timouikaskej iuan Jehová akin “techmaka yolsewílistli” (Romanos 15:33). Tikpiaskej ninmej tlateochiualismej tla tikyektlaliaj ouijkayotl ika tlasojtlalistli.

^ [1] (Párrafo 12). Biblia techtlapouia itech oksekimej itekipanojkauan toTajtsin Dios tlen okiyektlalijkej ouijkayotl. Se neskayotl, Jacob omotlapojpolui iuan Esaú, noijki José uan iikniuan omotlapojpoluijkej uan Gedeón iuan tlaltikpaktlakamej tlen opouiayaj itech nechikol Efraín (Génesis 27:41-45; 33:1-11; 45:1-15; Jueces 8:1-3). Uelis timokuayejyekoskej itech okseki neskayomej tlen katej itech Biblia.

^ párr. 9 Proverbios 10:12 kijtoa: “Akin tekokolia kichiua ma mokualanikan, pero akin tetlasojtla, tetlapojpoluia”.