Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok (tlen ika timomachtiaj)  |  Mayo de 2016

¿Ken tikpejpenaj tlen tikchiuaskej?

¿Ken tikpejpenaj tlen tikchiuaskej?

‘Xikajsikamatikah tlan Dios kimonekiltia xikchiwakah’ (EFESIOS 5:17).

TLAKUIKALMEJ: 11 UAN 22

1. ¿Tlen tlanauatilmej katej itech Biblia uan ken techpaleuiaj?

ITECH Biblia, Jehová techmaka tlanauatilmej pampa tikmatiskej tlen tikchiuaskej. Se neskayotl, kijtoa amo ma tikinueyichiuakan teotsitsintin, amo ma titlachtekikan, amo ma titlauanakan nion ma tiauilnemikan (1 Corintios 6:9, 10). Noijki Jesús okinnauati imachtijkauan: “Xiakan, uan ijkon, xikinchiuakan nomachtijkauan itech nochi altepemej, xikinapolaktikan itech itoka toTajtsin uan iKone uan espíritu santo, xikinmachtikan ma kichiuakan nochi tlen onamechnauati. Uan, ¡xikitakan!, niyetok namouan nochi tonalmej hasta itlamian tonalmej” (Mateo 28:19, 20, TNM). Tikintlakamatiskej ninmej tlanauatilmej tlen techmaka Jehová uan iKone, techpaleuia. Itlanauatiluan toTajtsin Dios techmachtia ken timomaluiskej uan tikinmaluiskej tokalchanejkauan. Noijki techpaleuia ma tichikajtokan uan ma tiyolpakikan. Pero okachi ipati ma tiktlakamatikan tlanauatil kanin kijtoa ma titetlapouikan uan ijkon tikyolpaktiskej Jehová uan techteochiuas.

2, 3. (1) ¿Tleka Biblia amo techiluia nochi tlen moneki tikchiuaskej itech tonemilis? (2) ¿Tlen tlajtlanilmej tikinnankiliskej itech nin tlamachtil? (Xikita tlaixkopinal tlen ika peua tlamachtil).

 2 Biblia amo techiluia nochi tlen moneki tikchiuaskej itech tonemilis. Se neskayotl, amo techiluia ken moneki timotlakentiskej. Nin kiteititia Jehová sapanoa ixtlamatki. ¿Tleka? Pampa tlaltikpaktlakamej tlatlamantli motlakentiaj itech nochi Tlaltikpak. Noijki mopatlati ken timotlakentiaj. Pero tlanojnotsalmej tlen kinpia Biblia amo keman mopatlaj. Biblia noijki amo kijtoa itech tlen moneki titekitiskej, ken moneki timopajtiskej noso ken moneki timoyolpaktiskej. Jehová techkauilia tisejse ma tikpejpenakan tlen tiknekij tikchiuaskej uan noijki kipaleuia akin kinyekana ikalchanejkauan.

3 Tla monekis tikpejpenaskej itech se tlamantli kanin Biblia amo techiluia tlen moneki tikchiuaskej, ma timotlajtlanikan: “¿Kitekipachoa Jehová tlen nikpejpenas nikchiuas? ¿Uelis nikpejpenas san tlen niknekis tla amo kixnamikis tlen kijtoa Biblia? ¿Ken uelis nikmatis kiyolpaktis Jehová tlen nikpejpenas?”. Itech nin tlamachtil tikinnankiliskej ninmej tlajtlanilmej.

TLEN TIKPEJPENASKEJ TECHPALEUIS NOSO TECHIJTLAKOS TEJUAN UAN OKSEKIMEJ

4, 5. ¿Ken techpaleuis noso techijtlakos tejuan uan oksekimej tlen tikpejpenaskej?

4 Sekimej tlaltikpaktlakamej kijtoaj uelis kichiuaskej tlen kinekiskej. Pero tejuan amo ijkon timokuayejyekoaj, pampa tiknekij tikyolpaktiskej Jehová. Ik non, achto tikpejpenaskej tlen tikchiuaskej, moneki ma timokuayejyekokan tlen kijtoa Biblia uan ma tiktlakamatikan tlen techiluia. Se neskayotl, Biblia kijtoa ken kita Jehová estli, ik non, tiktlakamatij (Génesis 9:4; Hechos 15:28, 29). Ma tikiluikan Jehová ma techpaleui ma tikpejpenakan tlen kiyolpaktis.

5 Tlen tikpejpenaj uelis techpaleuis noso techijtlakos. Tla tikpejpenaj tlen kuali, okachi kuali timouikaskej iuan Jehová. Pero tla tikpejpenaj tlen amo kuali, ayakmo iuan timouikaskej. Tlen tikpejpenaskej uelis kinpaleuis noso kinmijtlakos oksekimej. Tla tikpejpenaskej tlen amo kuali, uelis tikinyolkokoskej tokniuan noso ayakmo kipiaskej chikauak intlaneltokilis. Uan amo tiknekij ijkon tikchiuaskej. Noijki amo tiknekij ma mokualanikan tokniuan. Ken tikitaj, moneki kuali ma tikpejpenakan tlen tikchiuaskej (xiktlajtolti Romanos 14:19; Gálatas 6:7).

6. ¿Akin moneki kiyolpaktis tlen tikpejpenaj?

6 Tla Biblia amo techiluia tlen moneki tikchiuaskej itech se tlamantli, ¿tlen moneki tikchiuaskej? Amo tikpejpenaskej san tlen okachi techpaktia, kuali ma timokuayejyekokan tlen kiyolpaktia Jehová uan ijkon ma tikchiuakan. Ijkon ye techpaleuis kuali ma kisa tlen otikpejpenkej (xiktlajtolti Salmo 37:5 *).

¿TLEN KINEKI JEHOVÁ MA TIKCHIUAKAN?

7. ¿Tlen moneki tikchiuaskej tla Biblia amo kijtoa se tlanauatil itech se tlamantli?

7 ¿Ken uelis tikmatiskej tlen kiyolpaktia Jehová? Efesios 5:17 kijtoa: ‘Xikajsikamatikah tlan Dios kimonekiltia xikchiwakah’. Tla Biblia amo kijtoa se tlanauatil itech se tlamantli, moneki ma tikajsikamatikan  tlen kineki toTajtsin Dios (xikita recuadro “¿Tlen kijtosneki?”). Moneki tikmatiskej tlen kineki Jehová ma tikchiuakan. ¿Ken uelis tikmatiskej? Moneki tiktlatlaujtiskej uan tikkauiliskej ma techyekana iespíritu santo.

8. Ika se neskayotl xikijto ken okiteititi Jesús okimatiaya tlen kineki Jehová ma kichiua.

8 Jesús nochipa omochijchikauaya kimatis tlen okinekiaya Jehová ma kichiua. Se neskayotl, ome uelta omotlatlaujti achto kinchiuaskia milagros ijkuak okintlamakak tlaltikpaktlakamej tlen otiojsiuiayaj (Mateo 14:17-20; 15:34-37). Pero okse tonal, ijkuak Jesús otiojsiuik uan Diablo okilui temej ma kinkuepa panes, Jesús amo okinek kichiuas (xiktlajtolti Mateo 4:2-4). ¿Tleka amo okichi? Pampa kuali kixmati iTajtsin uan kimati amo kipaktiskia ma kitekitilti espíritu santo pampa mopaleuis. Kuali okimatiaya iTajtsin kiyekanaskia uan kimakaskia tlen kikuas.

9, 10. ¿Tlen techpaleuis kuali ma tikpejpenakan tlen tikchiuaskej? Xikijto se neskayotl.

9 Tla tikchiuaj ken Jesús uan tikkauiliaj Jehová ma techyekana, uelis tikpejpenaskej tlen kuali. Biblia kijtoa: “Ximotenmachia itech Jehová ika nochi moyolo, uan amo xikchiua tlen timokuayejyekoa. Itech nochi tlen tikchiua xikchiua ken toTajtsin Dios kineki, uan ye kichiuas kuali xikpia monemilis. Amo ximokuayejyeko tiixtlamatki. Xikmauili Jehová uan ximoxelo itech tlen amo kuali” (Proverbios 3:5-7). Ijkuak timomachtiaj Biblia uan tikmatij ken mokuayejyekoa Jehová, tikmatij tlen kineki ma tikchiuakan. Ijkuak okachi tikmatij ken mokuayejyekoa, okachi amo oui tikpejpenaskej tlen kipaktia. Noijki ika nochi toyolo tiknekiskej ma techyekana (Ezequiel 11:19).

10 Ma timokuayejyekokan itech se siuatl tlen motlakouijtok uan kinpaktia seki kakmej. Sapanoa kuajkualtsitsintin pero patiojkej. Maski amo kajki iuan inamik, ye kimati tlen mokuayejyekos inamik tla kitekitiltis miak tomin pampa kinmokouis ikakuan. ¿Ken kimati? Pampa yikipia miak xiuitl omonamiktijkej uan yikimati ken kineki inamik ma kitekitiltikan intomin. Noijki ijkon, ijkuak tikmatij ken mokuayejyekoa Jehová uan tlen yiuejkika yokichi, tikmatij tlen kineki ma tikchiuakan itech sejse tlamantli.

¿KEN UELIS TIKMATISKEJ TLEN MOKUAYEJYEKOA JEHOVÁ?

11. ¿Tlen uelis timotlajtlaniskej ijkuak tiktlajtoltiaj noso timomachtiaj Biblia? (Xikita recuadro “ Ijkuak timomachtis Biblia ximotlajtlani”).

11 ¿Ken uelis tikmatiskej tlen mokuayejyekoa Jehová? Ijkuak tiktlajtoltiaj uan mojmostla timomachtiaj Biblia. Uan ijkuak timomachtiskej, ma timotlajtlanikan: “¿Tlen nechmachtia nin itech Jehová? ¿Tleka ijkon okichi?”. Ma tikchiuakan ken David uan ma tikiluikan Jehová ma  techpaleui okachi ma tikixmatikan. David okijto: “Xikchiua ma nikinmixmati moojuiuan, oh Jehová, xinechmachti moojuiuan. Xikchiua ma niyeto itech tlen melauak uan xinechmachti, pampa te tinoDios akin nechmakixtia. Motech nimochixtok nochi tonal” (Salmo 25:4, 5). Ijkuak timomachtiaj itlaj itech Jehová, ma timokuayejyekokan keman uelis ika timopaleuiskej. Uelis timotlajtlaniskej: “¿Ken uelis nikchiuas nin iuan nokalchanejkauan, kanin nitekiti, kanin nimomachtia noso ijkuak nitetlapouis?”. Tla timokuayejyekoaj kanin uelis techpaleuis, okachi amo oui tikmatiskej tlen Jehová kineki ma tikchiuakan.

Uelis tikmatiskej tlen mokuayejyekoa Jehová ijkuak mojmostla tiktlajtoltiaj uan timomachtiaj Biblia.

12. ¿Ken techpaleuiskej amatlajkuilolmej uan nechikolmej ma tikmatikan ken mokuayejyekoa Jehová?

12 ¿Tlen okse tlamantli uelis techpaleuis ma tikmatikan ken mokuayejyekoa Jehová? Ijkuak tikkakij tlen techmachtia ialtepe itech Biblia. Se neskayotl, ijkuak moneki tikpejpenaskej itlaj tlen tikchiuaskej, uelis tikintlajtoltiskej amatlajkuilolmej ken Índice de las publicaciones Watch Tower uan Tlen ika momachtiaj iTlaixpantijkauan Jehová  tlen uelis techpaleuiskej ma tikmatikan ken mokuayejyekoa Jehová. Nechikolmej noijki techpaleuiskej ma timomachtikan ken mokuayejyekoa Jehová. Tla kuali titlakakij itech nechikolmej, titlanankiliaj uan timokuayejyekoaj itech tlen timomachtiaj, uelis tikpejpenaskej tlen Jehová kiyolpaktis uan techteochiuas.

MA TIKMATIKAN TLEN MOKUAYEJYEKOA JEHOVÁ ACHTO ITLAJ TIKPEJPENASKEJ

13. Xikijto se neskayotl ken techpaleuia tikmatiskej tlen mokuayejyekoa Jehová.

13 Ijkuak tikmatij tlen mokuayejyekoa Jehová uan itech timokuayejyekoaj techpaleuis kuali ma tikpejpenakan tlen tikchiuaskej. Ma tikitakan se neskayotl. Uelis tiknekij tiyetoskej precursores, ik non, yotimoyektlalijkej pampa okachi timajxiliskej titetlapouiskej. Pero uelis noijki timotlajtlaniaj kox tiyolpakiskej maski ayakmo tikpiaskej miak tomin uan okseki tlamantli. Biblia amo kijtoa moneki tiyetoskej precursores pampa tiktekichiuiliskej Jehová. Uelis tiktekichiuiliskej ken akinmej tetlapouiaj. Pero Jesús okijto Jehová kinteochiua akinmej okachi mochijchikauaj (xiktlajtolti Lucas 18:29, 30). Biblia noijki kijtoa Jehová kipaktia ma timochijchikauakan ma tikueyichiuakan uan kineki ma tiyolpakikan ijkuak tiktekichiuiliaj (Salmo 119:108; 2 Corintios 9:7). Tla timotlatlaujtiaj uan timokuayejyekoaj itech ninmej tlamantli, uelis kuali tikpejpenaskej tlen tikchiuaskej tlen techpaleuis uan Jehová kiteochiuas tlen otikpejpenkej.

14. ¿Ken uelis tikmatiskej kox kipaktia Jehová ken timotlakentiaj?

14 Ma tikitakan okse neskayotl. Ma tikijtokan techpaktia miak seki tlakemitl. Pero tla ijkon timotlakentiskej, uelis amo kinpaktis sekimej tokniuan. Biblia amo techiluia kox uelis ijkon timotlakentiskej noso amo. ¿Ken uelis tikmatiskej tlen mokuayejyekoa Jehová? Biblia techiluia: “Siuamej ma motlakentikan san kuali, ken moneki uan ika kuali inkuayejyekolis, amo sapanoa ma kimalinakan intsonkal nion sapanoa ma kimotlalilikan oro noso perlas noso tlakemitl tlen sapanoa patio, okachi kuali ma kichiuakan ken siuamej tlen kiueyichiuaj toTajtsin Dios, kijtosneki, ma kichiuakan tlen kuali” (1 Timoteo 2:9, 10, TNM). Nin tinochtin techpaleuia, tlakamej uan siuamej. Tla timotlakentiaj ken moneki, timokuayejyekoskej ken uelis kitaskej oksekimej ken timotlakentiaj (1 Corintios 10:23, 24; Filipenses 3:17). Tla timokuayejyekoaj itech tlen kijtoa Biblia uan itech tlen mokuayejyekoa Jehová, tlen tikpejpenaskej kiyolpaktis.

15, 16. (1) ¿Ken momachilia Jehová tla timokuayejyekoaj itech auilnemilistli? (2) Ijkuak tikpejpenaj ken timoyolpaktiskej, ¿ken tikmatiskej kox kiyolpaktia Jehová? (3) ¿Tlen uelis tikchiuaskej ijkuak tikpejpenaskej itlaj tlen miak ipati?

15 Biblia techiluia Jehová moyolkokoa ijkuak tlaltikpaktlakamej mokuayejyekoaj uan kichiuaj tlen amo kuali (xiktlajtolti Génesis 6:5, 6 *). Ye amo kineki ma timokuayejyekokan tiauilnemij. Tla timokuayejyekoaj itech non tlamantli, satepan uelis tikchiuaskej. Ik non, Jehová kineki ma timokuayejyekokan tlen kuali uan  chipauak. Santiago okijkuilo: “Ixtlamatílistli non Dios kitemaka, amo kichiwah tlan amokuali, yej kitemoah yolsewílistli, yejwah tetlakitah iwa kualteh n tlakah iwan nochteh. Yejwah teiknomatkeh iwa kimatih tepalewiah, iwa nochipa kichiwah tlan kuali. Amo san techikotlasojtlah, nonteh de milajka tlaneltokakeh” (Santiago 3:17). Biblia techmachtia amo ma tikitakan tlamantli tlen uelis kichiuas ma timokuayejyekokan noso ma tiknekikan tikchiuaskej tlen pitsotik uan amo kuali. Tla kuali tikmatij tlen tlamantli kipaktia Jehová uan tlen kikokolia, amo moneki tikintlajtlaniskej tokniuan tlen amochmej tikintlajtoltiskej, tlen películas tikinmitaskej noso tlen timauiltiskej. Amo oui toselti tikpejpenaskej.

16 Ijkuak tikpejpenaskej tlen tikchiuaskej, onka miak tlamantli tlen uelis kiyolpaktis Jehová. Pero tla moneki tikpejpenaskej itlaj tlen miak ipati, uelis tikiluiskej se tlayekanki ma techpaleui noso se tokni tlakatl noso siuatl tlen ixtlamatki (Tito 2:3-5; Santiago 5:13-15). Amo tikiluiskej ma techilui tlen moneki tikchiuaskej, pampa tlatitlanil Pablo okijto: “Kada se kipia de kitemakas kuenta inawak Dios de tlan se kichiwa” (Gálatas 6:5, Itlajtol Totajtzin Dios). Ik non, moneki kuali ma timokuayejyekokan tlen tlamachtia Biblia uan satepan tikpejpenaskej tlen tikchiuaskej (Hebreos 5:14).

17. ¿Tlen panos tla tikpejpenaj tlen kipaktia Jehová?

17 Ijkuak tikpejpenaj tlen kipaktia Jehová, okachi kuali iuan timouikaj, techselia uan techteochiua (Santiago 4:8). Uan nin kichiua okachi chikauak ma tikpiakan totlaneltokilis. Ik non, ma timokuayejyekokan tlen tlamachtia Biblia pampa ma tikajsikamatikan ken mokuayejyekoa Jehová. Nochipa yetos okseki tlamantli tlen itech timomachtiskej (Job 26:14). Pero tla axkan timochijchikauaj okachi kuali tikixmatiskej, tiyetoskej tiixtlamatkej uan uelis kuali tikpejpenaskej tlen tikchiuaskej (Proverbios 2:1-5). Tlaltikpaktlakamej kipatlaj tlen mokuayejyekoaj uan tlen kinekij kichiuaskej, pero Jehová amo ijkon kichiua. Se salmista okijto: “Pero tlen Jehová kipejpena nochipa yetos; tlen onka itech iyolo amo keman mopatlas” (Salmo 33:11). Ken tikitaj, ijkuak tikajsikamatij ken mokuayejyekoa Jehová uan tikchiuaj tlen kiyolpaktia, tikpejpenaj tlen okachi kuali.

^ párr. 6 Salmo 37:5 kijtoa: “Xikmaka Jehová moojui; itech xitlaneltoka, uan ye mitspaleuis”.

^ párr. 15 Génesis 6:5, 6 kijtoa: “Ijkuakon, Jehová okitak tlaltikpaktlakamej sapanoa okichiuayaj tlen amo kuali, uan intech inyolo nochipa omokuayejyekoayaj kichiuaskej tlen amo kuali. Uan Jehová omoyolkoko pampa okinchijchi tlaltikpaktlakamej itech Tlaltikpak, uan omoyolkokoaya”.