Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok (tlen ika timomachtiaj)  |  Mayo de 2016

Ma tikkauilikan Biblia nochipa ma kipatla toyelis

Ma tikkauilikan Biblia nochipa ma kipatla toyelis

“Xikpatlakah nomotlayejyekolis para ijkó manomechyankuili nomonemilis” (ROMANOS 12:2).

TLAKUIKALMEJ: 29 UAN 52

1-3. (1) ¿Tlen tlamantli oui techchiuilis tikpatlaskej maski yotimoapolaktijkej? (2) Pampa ualeua ok tikchiuaj tlen amo kuali, ¿tlen uelis timotlajtlaniaj? (Xikita tlaixkopinal tlen ika peua tlamachtil).

SE TOKNI tlen itoka Kevin, achto yetoskia iTlaixpantijka Jehová, miak xiuitl omauilti pampa kitlanis tomin, otlachichinaya, otlauanaya uan okintekitiltiaya drogas. [1] (Xikita nota kanin tlami tlamachtil). Ijkuak opejki kixmati Jehová okinek iuan mouikas. Pero achto moapolaktiskia, okipatlak miak tlamantli itech inemilis. Ijkon okichi pampa Jehová uan Biblia okipaleuijkej (Hebreos 4:12).

2 Uan ijkuak Kevin yomoapolakti, ok omonekiaya kipatlas seki tlamantli itech iyelis pampa okachi kichiuaskia ken Cristo (Efesios 4:31, 32). Se neskayotl, san niman  okualaniaya. Omotlajtlachialti ijkuak okitak san niman okualaniaya. Ye okijto okachi oui okitak kipatlas iyelis uan amo okachi oui okitak kikauas tlen amo kuali okichiuaya achto moapolaktiskia. Pero okipatlak iyelis pampa okitlatlaujti Jehová ma kipaleui uan kuali momachtia Biblia.

3 Achto timoapolaktiskiaj, tejuan noijki otikpatlakej toyelis. Ijkon otikchijkej ken kijtoa Biblia. Pero uelis ok moneki ma tikpatlakan toyelis pampa okachi tikchiuaskej ken toTajtsin Dios uan Cristo (Efesios 5:1, 2; 1 Pedro 2:21). Se neskayotl, uelis san tikijtoaj nochi tlen amo techpaktia noso techpaktia tikinteneuaskej oksekimej. Noso ualeua amo tikchiuaj tlen kuali pampa techtekipachoa tlen oksekimej kijtoskej noso mokuayejyekoskej. Uelis yimiak xiuitl timochijchikajtokej tikpatlaskej toyelis, pero ualeua ok tikchiuaj tlen amo kuali. Ik non, uelis timotlajtlaniaj: “¿Tleka sapanoa oui nikpatlas noyelis? ¿Tlen moneki nikchiuas pampa nikpias noyelis ken kijtoa Biblia?”.

UELIS TIKYOLPAKTISKEJ JEHOVÁ

4. ¿Tleka amo nochipa ueli tikyolpaktiaj Jehová?

4 Akinmej tiktekichiuiliaj Jehová tiktlasojtlaj uan tiknekij tikyolpaktiskej. Pero ualeua amo ijkon tikchiuaj pampa titlajtlakolejkej. Ualeua timomachiliaj ken tlatitlanil Pablo akin okijto: “Ne niknekiskia nikchiwas tlan milák, pero amo niweleti nikchiwa” (Romanos 7:18; Santiago 3:2).

5. (1) ¿Tlen tlamantli otikpatlakej itech toyelis pampa timoapolaktiskiaj? (2) ¿Tlen tikchiuaj pampa titlajtlakolejkej?

5 Pampa timoapolaktiskiaj uan tiyetoskiaj tiiTlaixpantijkauan Jehová, otikpatlakej toyelis uan ayakmo tikchiuaj tlen Jehová kikokolia (1 Corintios 6:9, 10). Pero ken titlajtlakolejkej, ualeua ok tikchiuaj tlen amo kuali, maski yikipia miak xiuitl otimoapolaktijkej (Colosenses 3:9, 10). Ualeua ok timokuayejyekoaj noso tiknekij tikchiuaskej tlen amo kuali, noso moneki tikyektlaliskej toyelis. Uelis yikipia miak xiuitl timochijchikajtokej ayakmo ijkon tikchiuaskej.

6, 7. (1) ¿Tleka uelis timouikaskej iuan Jehová maski titlajtlakolejkej? (2) ¿Tleka amo kuali ma timokuayejyekokan amo technamiki ma techtlapojpolui Jehová?

6 Maski titlajtlakolejkej, uelis kuali timouikaskej iuan Jehová uan tiktekichiuiliskej. Amo ma tikilkauakan, kuali timouikaj iuan Jehová pampa okitak tlen kuali itech toyelis uan okinek ma tikixmatikan (Juan 6:44). Ye kimati titlajtlakolejkej, ik non, ualeua tikchiuaj tlen amo kuali. Uan maski kimati non, Jehová kineki kuali iuan ma timouikakan.

7 Ken Jehová sapanoa techtlasojtla, otechmakak se tetliokolil tlen miak ipati. Okiualtitlanki iKone nikan Tlaltikpak pampa ma kitemaka iyolilis uan ma kintlaxtlaua totlajtlakoluan (Juan 3:16). Ijkuak tikchiuaj itlaj tlen amo kuali, uelis tikiluiskej Jehová ma techtlapojpolui. Pampa Jesús okitemakak iyolilis, toTajtsin Dios techtlapojpoluia  uan techkauilia iuan ma timouikakan (Romanos 7:24, 25; 1 Juan 2:1, 2). Ma tikilnamikikan, Jesús omikik inpampa tlajtlakolejkej tlen moyolkuepaj. Ik non, ijkuak amo kuali timomachiliaj pampa otikchijkej itlaj amo kuali, ma tikiluikan Jehová ma techtlapojpolui. Tla amo tikiluiaj ma techtlapojpolui, yetoskia ken ijkuak amo tiknekij timomajtekiskej. Tiktlasojkamatiliaj miak Jehová pampa techkauilia kuali iuan ma timouikakan maski titlajtlakolejkej (xiktlajtolti 1 Timoteo 1:15).

Tla tiknekij timouikaskej iuan Jehová, moneki timochijchikauaskej tikchiuaskej ken ye uan iKone.

8. ¿Tleka amo ma tikijtokan amo uelis tikpatlaskej toyelis?

8 Amo ma tikijtokan amo uelis tikpatlaskej toyelis. Jehová yotechilui ken moneki kipiaskej inyelis akinmej kinekij iuan mouikaskej (Salmo 15:1-5). Ik non, tla tiknekij timouikaskej iuan Jehová, moneki timochijchikauaskej tikchiuaskej ken ye uan iKone. Noijki moneki timochijchikauaskej amo tikchiuaskej tlen amo kuali timokuayejyekoaj. Moneki okachi kuali tikpiaskej toyelis, maski yikipia miak xiuitl otimoapolaktijkej (2 Corintios 13:11).

9. ¿Ken tikmatij uelis tikpatlaskej toyelis?

9 Tlatitlanil Pablo okinmilui akinmej kichiuaj ken Cristo: “Xikkawakah tlan achto ononkichijtinemiah, porke nochi noni onomechixpoloaya iwa onomechyolijtlakoaya ika tlan okelewiaya nomokuerpo”. Uan satepan okijto: “Iwa xikyankuilikah nomoixtlamatilis ika nomoespíritu. Ijkó ximoyolpatlakah, ika se yankuik nomonemilis kemi Ye inewia yetoskia ika se nomonemilis chipawak iwa yekmilajka” (Efesios 4:22-24). Nin kijtosneki moneki timochijchikauaskej pampa tikpiaskej yankuik tonemilis. Maski yikipia miak xiuitl tiktekichiuiliaj Jehová, nochipa uelis okachi timomachtiskej itech iyelis. Uan Biblia uelis techpaleuis pampa tikpiaskej toyelis ken Jehová.

¿TLEKA SAPANOA OUI?

10. (1) ¿Tlen moneki ma tikchiuakan pampa Biblia ma techpaleui ma tikpatlakan toyelis? (2) ¿Tlen uelis timotlajtlaniskej?

10 Tinochtin tiknekij tiktlakamatiskej tlen kijtoa Biblia. Pero tla tiknekij tikpatlaskej toyelis, moneki ma timochijchikauakan. ¿Tleka? ¿Amo uelis kichiuas Jehová amo oui ma tikchiuakan tlen kuali?

11-13. ¿Tleka Jehová kineki ma timochijchikauakan pampa tikpatlaskej toyelis?

11 Ijkuak timokuayejyekoaj itech nochi tlen Jehová okichijchi, tikitaj ye kipia chikaualistli pampa kichiuas san tlen tlamantli. Ma timokuayejyekokan itech Tonaltsin, tlen kipia sapanoa miak chikaualistli. San tepitsin itech nin chikaualistli uits itech Tlaltikpak, pero san non moneki pampa ma yeto  yolilistli (Salmo 74:16; Isaías 40:26). Jehová noijki kinmaka chikaualistli itekipanojkauan ijkuak moneki (Isaías 40:29). Ik non, sekimej motlajtlaniaj tleka Jehová amo kichiua amo oui ma tikchiuakan tlen kuali.

12 Jehová techkauilia ma tikpejpenakan tlen tikchiuaskej. Ye techkauilia ma tikijtokan kox tiktlakamatiskej noso amo. Ijkuak tiktlakamatij uan timochijchikauaj tikchiuaskej tlen kineki, tikteititiaj tiktlasojtlaj uan tiknekij tikyolpaktiskej. Satanás kijtoa Jehová amo kinamiki ma technauati. Pero ijkuak tiktlakamatij toTajtsin Dios, tikteititiaj tiknekij ye ma technauati. Uan Jehová sapanoa kipatioita tlen tikchiuaj (Job 2:3-5; Proverbios 27:11). Ken Jehová amo kichiua amo oui ma tikchiuakan tlen kuali, ika tlen tikchiuaj tikteititiaj tiyolmelajkej uan tiknekij ye ma technauati.

13 Jehová techiluia ma timochijchikauakan pampa tikpiaskej toyelis ken ye (Colosenses 3:12; xiktlajtolti 2 Pedro 1:5-7). Ye kineki ma timochijchikauakan pampa timokuayejyekoskej uan tikchiuaskej tlen kuali (Romanos 8:5; 12:9). Tla timochijchikauaj pampa tikpatlaskej toyelis uan tikchiuaj, sapanoa tiyolpakiskej.

MA TIKKAUILIKAN BIBLIA NOCHIPA MA KIPATLA TOYELIS

14, 15. ¿Tleka uelis tikpiaskej toyelis ken Jehová kipaktia? (Xikita recuadro “ Biblia uan tlatlaujtilistli okinpatili inyelis”).

14 ¿Tlen moneki tikchiuaskej pampa toyelis ma kipakti Jehová? Amo totech poui tikijtoskej tlen moneki tikpatlaskej.  Ma tikkauilikan Jehová ma techyekana. Romanos 12:2 kijtoa: “Ayakmó xinemikah kemi nemih n tlaltikpaktlakah, yej xikpatlakah nomotlayejyekolis para ijkó manomechyankuili nomonemilis. Ijkó weletis nonkimatiskeh tlan kimonekiltia Dios”. Tla tiknekij tikmatiskej tlen kipaktia Jehová, moneki tikseliskej nochi tlen techmaka. Moneki mojmostla tiktlajtoltiskej Biblia uan itech timokuayejyekoskej uan tiktlajtlaniliskej iespíritu santo (Lucas 11:13; Gálatas 5:22, 23). Tla ijkon tikchiuaj, Jehová techpaleuis pampa tikajsikamatiskej tlen ye kipaktia, uan timokuayejyekoskej ken ye. Ijkon tlen timokuayejyekoskej, tikijtoskej uan tikchiuaskej okachi kiyolpaktis Jehová. Pero ok moneki ma timochijchikauakan pampa amo tiknekiskej tikchiuaskej tlen amo kuali (Proverbios 4:23).

Uelis tikintlatiskej seki tlamachtilmej noso tlaxelolmej tlen uelis tikintlajtoltiskej ijkuak monekis. (Xikita párrafo 15).

15 Moneki mojmostla tiktlajtoltiskej Biblia, pero noijki timomachtiskej amatlajkuilolmej ken revista Akin Tetlapouijtok uan ¡Despertad!, miakej tlamachtilmej tlen kinpiaj ninmej revistas techmachtiaj ken uelis tikpiaskej toyelis ken Jehová uan tlen tikchiuaskej pampa ayakmo tiknekiskej tikchiuaskej tlen amo kuali. Seki tlaxelolmej techpaleuiskej. Uelis tikintlatiskej uan tikintlajtoltiskej ijkuak monekis.

16. ¿Tleka amo ma timosotlauakan tla tikitaj amo totoka tikpatlaj toyelis?

16 Moneki miak kauitl pampa uelis  tikpiaskej toyelis ken Jehová. Ik non, amo ma timosotlauakan tla tikitaj ayamo tikpiaj toyelis ken techpaktiskia. Uelis achto moneki sapanoa ma timochijchikauakan tikchiuaskej tlen kijtoa Biblia. Pero amo ma timoyolkokokan. Tla timochijchikauaj timokuayejyekoskej ken Jehová uan tikpiaskej toyelis ken ye kineki, amo oui timokuayejyekoskej ken ye uan tikchiuaskej tlen kuali (Salmo 37:31; Proverbios 23:12; Gálatas 5:16, 17).

MA TIMOKUAYEJYEKOKAN ITECH TLATEOCHIUALISMEJ TLEN SATEPAN TIKINSELISKEJ

17. Tla tiyolmelajkej iixpan Jehová, ¿tlen tlateochiualismej tikinseliskej?

17 Tiknekij ma ajsiki tonal ijkuak ayakmo tiyetoskej titlajtlakolejkej uan nochipa tiktekichiuiliskej Jehová. Ijkuakon, ayakmo tikchiuaskej tlen amo kuali uan okachi uelis tikpiaskej toyelis ken Jehová. Uan maski axkan titlajtlakolejkej, uelis tikueyichiuaskej Jehová pampa Jesús okitemakak iyolilis. Tla nochipa timochijchikauaj pampa okachi kuali tikpiaskej toyelis uan tiktlakamatiskej tlen Jehová techmachtia itech Biblia, uelis tikyolpaktiskej.

18, 19. ¿Tlen kiteititia Biblia uelis kipatlas toyelis?

18 Kanin peua nin tlamachtil, otimotlapouijkej itech Kevin, se tokni tlen omochijchikauaya pampa amo san niman kualanis. Omokuayejyeko tlen omomachti itech Biblia uan omochijchika kipatlas iyelis. Noijki okichi tlen okiluijkej tokniuan. Maski omonekiaya miak xiuitl pampa kipatlas iyelis, satepan omochi siervo ministerial. Uan yikipia 20 xiuitl tekititok ken tlayekanki itech tlanechikol. Pero kimachilia ok moneki mochijchikauas pampa kipias kuali iyelis.

19 Tejuan noijki uelis tikpatlaskej toyelis ijkon ken kichiua Kevin. Tla ijkon tikchiuaj, okachi kuali timouikaskej iuan Jehová (Salmo 25:14). Ma timochijchikauakan tikchiuaskej tlen moneki pampa kuali tikpiaskej toyelis uan Jehová techpaleuis. Ijkuakon, tikitaskej ken Biblia uelis kipatlas toyelis (Salmo 34:8).

^ [1] (Párrafo 1). Otikpatilijkej itoka.