Xikita nochi

Tlen kiualika

TLAMACHTIL 9

TLAKUIKALI 75 “¡Nikan nika, techtitlani!”

¿Tikneki timotemakas ixpan Jehová ika nochi moyolo?

¿Tikneki timotemakas ixpan Jehová ika nochi moyolo?

“¿Tlen ika niktlaxtlauilis Jehová nochi tlamantli kuali tlen nechmaka?” (SAL. 116:12).

NIN TLEN TIMOMACHTISKEJ

Nin tlamachtil mitspaleuis okachi kuali ximouika iuan Jehová. Non mitsyolinis ixpan ximotemaka uan ximoapolakti.

1, 2. ¿Tlen moneki tikchiuas tla tikneki timoapolaktis?

 MAKUILI xiuitl tlen yopanok omoapolaktijkej kanaj se millón uan ijkon omochijkej iTlaixpantijkauan Jehová. Miakej okixmatkej Jehová ijkuak okatkaj konemej ijkon ken Timoteo okipanok (2 Tim. 3:​14, 15). Oksekimej okixmatkej Jehová ijkuak omoskaltijkej noso ijkuak yokipiayaj miak xiuitl. Ijkon okipanok se siuatl tlen opejki momachtia inuan iTlaixpantijkauan Jehová. Ye omoapolakti ijkuak yokipiaya noventa y siete xiuitl.

2 ¿Timomachtijtok Biblia? ¿Mitsmachtiaj Biblia mopapanuan porque yejuan iTlaixpantijkauan Jehová? Maski san akin mitsmachtia xamo yotimokuayejyeko timoapolaktis. Kuali tlen tikneki tikchiuas pero achto moneki timotemakas ixpan Jehová uan ijkon uelis timoapolaktis. Axkan tikitaskej tlen kijtosneki timotemakas ixpan Jehová. Noijki tikitaskej tleka amo moneki timomojtis timotemakas ixpan Jehová uan timoapolaktis.

¿TLEN KIJTOSNEKI TIMOTEMAKAS IXPAN JEHOVÁ?

3. Xikijto yiuejkika akinmej omotemakakej ixpan Jehová.

3 Biblia kijtoua ijkuak ikaj motemaka yetoskia ken kipejpena para kichiuas itlaj miak ipati. Nin kijtosneki kitekichiuilis toTajtsin Dios. Akinmej opouiayaj itech altepetl Israel omotemakakej ixpan Jehová. Pero san sekimej israelitas omotemakakej ixpan Jehová para kichiuaskiaj seki tekitl miak ipati. Ijkon opanok ijkuak Jehová okipejpenki Aarón mayeto teopixki tlen otlayekanaya. Ikinon ye okiuikaya ixkuak se tepostli de oro tlen okiteititiaya omotemakak ixpan Jehová (Lev. 8:9). Akinmej okatkaj nazareos noijki omotemakayaj ixpan Jehová para kichiuaskiaj itlaj miak ipati. Tlajtoli nazír kajki ika hebreo uan kijtosneki ikaj okipejpenkej noso ikaj omotemakaya para kichiuas itlaj miak ipati. ITlanauatil Moisés okijtouaya yejuan omonekiaya kintlakamatiskej seki tlanauatilmej (Núm. 6:​2-8).

4. (1) ¿Tlen kijtosneki ijkuak timotemakaj ixpan Jehová? (2) ¿Tlen kijtosneki ayakmo tikchiuaskej tlen tejuan tiknekij? (Noijki xikita dibujo).

4 Ijkuak tejuan otimotemakakej ixpan Jehová, otikpejpenkej tiyetoskej idiscípulos Jesús. Noijki otikpejpenkej tiktekichiuiliskej toTajtsin Dios. ¿Tlen kijtosneki non tlamantli? Jesús okijto: “Tla ikaj kineki nouan uits, ayakmo makichiua san tlen ye kineki” (Mat. 16:24). “Ayakmo makichiua san tlen ye kineki” omotlajtolkopki ika griego uan noijki uelis motlajtolkopas “ayakmo makichiua tlen kipaktiskia kichiuas”. Ijkuak timotemakas ixpan Jehová ayakmo tikchiuas tlen Jehová amo kipaktia (2 Cor. 5:​14, 15). Ikinon amo tikkauas mamitsyoltilana tlen oksekimej kichiuaj uan nin kijtosneki ijkuak auilnemij (Gál. 5:​19-21; 1 Cor. 6:18). ¿Tikita oui ijkon tikchiuas? Amo oui tikitas tla tiktlasojtla Jehová uan tikneltoka mitspaleuiskej itlanauatiluan tla tikintlakamatis (Sal. 119:97; Is. 48:​17, 18). Se tokni itoka Nicholas okijto: “Xamo tikinmita itlanauatiluan Jehová ken yetoskia titsaktok uan amo ueli tikchiua tlen mitspaktiskia. Noso uelis tikinmitas itlanauatiluan toTajtsin Dios ijkon ken ijkuak tiauij tikinmitatiuij leones uan tsaktokej para amitlaj techtoktiskej”.

¿Tikinmita itlanauatiluan Jehová ken yetoskia titsaktok uan amo ueli tikchiua tlen mitspaktia? Noso ¿tikinmita itlanauatiluan toTajtsin Dios ijkon ken ijkuak tiauij tikinmitatiuij leones uan tsaktokej para amitlaj techtoktiskej? (Xikita párrafo 4).


5. (1) ¿Ken uelis timotemakas ixpan Jehová? (2) ¿Tleka amo san se tlamantli kijtosneki ijkuak timotemakas ixpan Jehová uan ijkuak timoapolaktis? (Noijki xikinmita fotos).

5 ¿Ken uelis timotemakas ixpan Jehová? Tiktlatlaujtis Jehová uan tikiluis san ye tikueyichiuas uan tikchiuas tlen ye kineki. Non kijtosneki tikiluis Jehová nochipa tiktekichiuilis ika nochi moyolo, moyolilis, motlayejyekol uan mochikaualis (Mar. 12:30). San te moneuia timotemakas ixpan Jehová ikinon san ye kimatis. Pero ijkuak timoapolaktis nochtin kitaskej uan ijkon kimatiskej yotimotemakak ixpan Jehová. Amo san ajauili timotemakas ixpan Jehová. Moneki tikchiuas tlen yotikilui uan ye kichia ijkon xikchiua (Ecl. 5:​4, 5).

Ijkuak timotemakas ixpan Jehová tikiluis san ye tikueyichiuas uan tikchiuas tlen ye kineki. (Xikita párrafo 5).


¿TLEN MITSPALEUIS XIMOTEMAKA IXPAN JEHOVÁ?

6. ¿Tlen kiyolinia ikaj mamotemaka ixpan Jehová?

6 Ijkuak ikaj motemaka ixpan Jehová kichiua porque kitlasojtla. Tiktlasojtla Jehová porque yomitspaleui xikajsikamati tlen ye kineki uan okimatki ken iyelis (Col. 1:9). Tlen Biblia tlamachtia yomitspaleui xikneltoka Jehová melauak kajki. Noijki tikneltoka Jehová otlanauati makijkuilokan Biblia uan kipia ialtepe tlen kiyekana para kichiuas tlen ye kineki.

7. ¿Tlen moneki kichiuas akin kineki motemakas ixpan Jehová?

7 Tla ikaj kineki motemakas ixpan Jehová moneki kimatis tlen tlamachtia Biblia. Noijki moneki kintlakamatis itlanauatiluan toTajtsin Dios uan nochipa kintlapouis oksekimej tlen kineltoka (Mat. 28:​19, 20). Noijki moneki sapanoua kitlasojtlas Jehová uan san ye kiueyichiuas ika nochi iyolo. ¿Tikneki noijki ijkon tikchiuas? Timotemakas ixpan Jehová uan timoapolaktis porque tiktlasojtla uan amo tikchiuas san para tikyolpaktis akin mitsmachtia. Tla titelpochtli noso tiichpochtli amo ijkon tikchiuas san para tikinyolpaktis mopapanuan noso moyolikniuan.

8. ¿Ken mitspaleuis ximotemaka ixpan Jehová tla timotlasojkamati? (Salmo 116:​12-14).

8 Okachi tiknekis timotemakas ixpan Jehová tla timokuayejyekos nochi tlen mopatka yokichi uan timotlasojkamati (xiktlajtolti Salmo 116:​12-14). Biblia kijtoua: “Nochi tetliokolil kuali uan ajsitok” techmaka Jehová (Sant. 1:17). Ijkuak topatka okitemakak iKone otechmakak se tetliokolil tlen sapanoua miak ipati. Non tetliokolil mitspaleuis kuali ximouika iuan toTajtsin Dios uan uelis nochipa tiyoltos (1 Juan 4:​9, 10, 19). Ijkuak ixpan timotemakas tikteititis timotlasojkamati porque mitstlasojtla (Deut. 16:17; 2 Cor. 5:15). Non techmachtia amochtli Tiyoltos uan tiyolpakis tlamachtil 46 punto 4 kanin kajki video tlen itoka ¿Tlen uelis tiktliokoliskej Jehová?

¿YIUELIS TIMOTEMAKAS IXPAN JEHOVÁ UAN TIMOAPOLAKTIS?

9. ¿Tleka amo ximotemaka ixpan Jehová san porque oksekimej ijkon kichiuaj?

9 Xamo timokuayejyekoua ayamo uelis timotemakas ixpan Jehová uan timoapolaktis. Xamo ok moneki itlaj tikpatlas para tiktlakamatis Jehová noso moneki okachi titlaneltokas (Col. 2:​6, 7). Xikilnamikto amo tinochtin san niman titlaneltokaj. Noijki telpochmej uan ichpochmej amo nochtin san niman peua tlaneltokaj. Ikinon xikita tlen uelis tikchiuas uan amo san xikchiua tlen oksekimej kichiuaj (Gál. 6:​4, 5).

10. ¿Tlen uelis tikchiuas tla tikita ayamo uelis timotemakas ixpan Jehová uan timoapolaktis? (Noijki xikita recuadro “ Tla mopapanuan kitekichiuiliaj Jehová”).

10 Ximochijchikaua xikchiua tlen moneki tla tikita ayamo uelis timotemakas ixpan Jehová. Xikilui Jehová mamitspaleui xikchiua tlen moneki (Filip. 2:13; 3:16). Xikneltoka Jehová mitskakis uan mitspaleuis (1 Juan 5:14).

¿TLEKA SEKIMEJ AMO MOTEMAKAJ IXPAN JEHOVÁ UAN AMO MOAPOLAKTIAJ?

11. ¿Ken techpaleuis Jehová nochipa matiktlakamatikan?

11 Sekimej yiuelis motemakaskej ixpan Jehová uan moapolaktiskej pero amo kinekij ijkon kichiuaskej. Xamo momojtiaj tlajtlakolchiuaskej uan kinkixtiskej itech tlanechikol. Pero Biblia kijtoua Jehová kinpaleuis itekipanojkauan ‘mayeknemikan’ ken ye kineki uan ‘nochipa makiyolpaktikan’ (Col. 1:10). Ikinon matikneltokakan Jehová techyolchikauas matikchiuakan tlen kuali. Uelis ijkon tikneltokaskej porque yokinpaleui oksekimej (1 Cor. 10:13). Jehová techpaleuia ikinon amo miakej kinkixtiaj itech tlanechikol. Jehová techpaleuis nochipa matiktlakamatikan.

12. ¿Tlen techpaleuis amo matitlajtlakolchiuakan?

12 Tinochtin titlajtlakolejkej ikinon ualeua tiknekij tikchiuaskej tlen amo kuali (Sant. 1:14). Pero san tejuan uelis tikpejpenaskej tlen tikchiuaskej ijkuak itlaj techyoltilanas. Miakej kijtouaj amo uelis timonauatiskej ijkuak itlaj techyoltilana pero non amo melauak. Uelis tikmatiskej ken timonauatiskej ijkuak itlaj techyoltilanas uan noijki uelis tikitaskej tlen tikchiuaskej. Ijkon uelis tikchiuaskej tla nochipa timotlatlaujtiaj, tla nochipa timomachtiaj Biblia, tla timonechikouaj uan tla titetlapouiaj. Tla nochipa ijkon tikchiuaskej, techpaleuis matikchiuakan tlen otikiluijkej Jehová ijkuak ixpan otimotemakakej. Matikilnamiktokan Jehová nochipa techpaleuis uan amo tikatej toselti (Gál. 5:16).

13. ¿Tlen techmachtia tlen okichi José?

13 San niman tiktlakamatiskej Jehová tla achto timokuayejyekouaj tlen tikchiuaskej tla itlaj techyoltilanas. Biblia kijtoua sekimej ijkon okichijkej maski okatkaj tlajtlakolejkej ijkon ken tejuan. Matimokuayejyekokan tlen okipanok José. Miak uelta isiua Potifar okiluiaya iuan mamoteka. Pero ye okimatiaya tlen kichiuas. Biblia kijtoua “ye amo okinekiaya ijkon kichiuas”. Ye okiluiaya: “Ne amo uelis nikchiuas tlen sapanoua amo kuali uan ijkon nitlajtlakolchiuas ixpan Dios” (Gén. 39:​8-10). Tlen kijtoua nin texto kiteititia José yokimatiaya tlen kichiuaskia ijkuak kixnamikiskia tlen amo kuali. Ijkon okimatki tlen kichiuas ijkuak isiua Potifar okilui iuan mamoteka.

14. ¿Ken uelis tikixtopeuaskej tlen amo kipaktia Jehová?

14 ¿Ken uelis tikchiuaskej ijkon ken José okichi uan nochipa tiktlakamatiskej Jehová? Axkan matimokuayejyekokan tlen tikchiuaskej tla itlaj techyoltilanas. Amo matimokuayejyekokan tlen uelis panos tla tikchiuaskej tlen amo kuali. Okachi kuali san niman matikixtopeuakan tlen amo kipaktia Jehová (Sal. 97:10; 119:165). Non techpaleuis amo matitlajtlakolchiuakan. Ijkon tikmatiskej tlen tikchiuaskej ijkuak itlaj techyoltilanas.

15. ¿Ken uelis tikteititis timochijchikaua tikixmatis Jehová? (Hebreos 11:6).

15 Xamo tikmati melauak tlen timomachtia uan tikneki tiktekichiuilis Jehová ika nochi moyolo. Pero ¿itlaj mitstsakuilia amo ximotemaka ixpan Jehová uan amo ximoapolakti? Xikchiua ken tekiua David okichi uan xiktlatlaujti Jehová: “Notech xitlatemo, oh Dios uan xikixmati noyolo. Techita uan xikixmati tlen nimokuayejyekoua uan tlen nechtekipachoua. Xikita kox notech onka se ojtli tlen amo kuali uan techyekana itech ojtli tlen amo keman tlamis” (Sal. 139:​23, 24). Tikteititis tikneki tikixmatis Jehová tla timochijchikauas ixpan timotemakas uan timoapolaktis. Biblia kijtoua kinteochiua akinmej mochijchikauaj kitemouaj (xiktlajtolti Hebreos 11:6).

XIMOCHIJCHIKAUA OKACHI TIMOTOKIS INAUAK JEHOVÁ

16, 17. ¿Ken kinnotsa Jehová inkoneuan tokniuan? (Juan 6:44).

16 Jesús okijto Jehová kinnotsa akinmej pouiskej itech ialtepe (xiktlajtolti Juan 6:44). Sapanoua kualtsin tlen ye okijto. ¿Yotimokuayejyeko tlen kijtosneki tlen okijto? Jehová kita ken iyelis akin kinotsa mapoui itech ialtepe. Ikinon Jehová sapanoua kinpatioita akinmej kitekichiuiliaj (Deut. 7:6; nota). Noijki ijkon mitspatioita.

17 Tla te titelpochtli noso tiichpochtli xamo tikijtos amo omitsnotski Jehová porque mopapanuan mitsmachtiaj tlen kijtoua Biblia. Pero Biblia kijtoua: “Ximotokikan inauak toTajtsin Dios uan ye namonauak motokis” (Sant. 4:8; 1 Crón. 28:9). Non kijtosneki te achto inauak timotokis uan ye monauak motokis. Jehová mitspatioita uan mitstlasojtla. Jehová sejse okinnotski tlen pouij itech tlanechikol. Noijki ijkon okinnotski ikoneuan tokniuan. Ikinon ijkon ken kijtoua Santiago 4:8 ijkuak ikaj motokia inauak Jehová ye noijki inauak motokia (noijki xikita 2 Tesalonicenses 2:13).

18. ¿Tlen tikitaskej chikome? (Salmo 40:8).

18 Ijkuak Jesús omoapolakti okiteititi okinekiaya kitlakamatis iTajtsin (xiktlajtolti Salmo 40:8; Heb. 10:7). Noijki uelis tikchiuas ijkon ken Jesús okichi ijkuak timotemakas ixpan Jehová uan timoapolaktis. Chikome tikitaskej tlen mitspaleuis nochipa xiktekichiuili Jehová maski yotimoapolakti.

¿TLEN TITLANANKILISKIA?

  • ¿Tlen kijtosneki timotemakas ixpan Jehová?

  • ¿Ken mitspaleuis ximotemaka ixpan Jehová tla timotlasojkamati?

  • ¿Tlen mitspaleuis amo xitlajtlakolchiua?

TLAKUIKALI 38 Jehová nochipa mitsmaluis