Xikita nochi

Tlen kiualika

TLAMACHTIL 11

TLAKUIKALI 129 Jehová nechpaleuis ma nitlaxiko

Amo xikkaua Jehová maski itlaj mitsyolkokos

Amo xikkaua Jehová maski itlaj mitsyolkokos

“Yotikxiko miak ouijkayotl ipatka notoka” (APOC. 2:3).

NIN TLEN TIMOMACHTISKEJ

Nin tlamachtil techpaleuis matitlaxikokan uan matiktekichiuilikan Jehová maski amo mochiua tlen tiknekij.

1. ¿Tlen tlateochiuali tikpiaj porque tipouij itech ialtepe Jehová?

 SAPANOUA tipakij tipouij itech ialtepe Jehová. Tikatej itlamian tonalmej ikinon panotok miak tlamantli pero tejuan san sekan tikatej porque tipouij itech ialtepe Jehová (Sal. 133:1). ToTajtsin Dios techpaleuia matiyolpakikan iuan tofamilia (Efes. 5:​33–6:1). Noijki techpaleuia matiyetokan tiixtlamatkej uan matiyolpakikan maski ualeua amo kuali timomachiliskej.

2. ¿Tlen moneki tikchiuaskej uan tleka?

2 Pero ualeua moneki timochijchikauaskej tla tiknekij tiktekichiuiliskej Jehová. ¿Tleka ijkon tikijtouaj? Porque uelis techyolkokos tlen oksekimej kichiuaj noso tlen techiluiaj. Noijki ualeua timoyolkokoskej porque timotlapololtiaj. Axkan timomachtiskej Jehová techpaleuis matiktekichiuilikan maski techyolkokos se tokni, tonamik noso tosiua uan ijkuak timotlapololtiaj. Tikitaskej tlen okichijkej sekimej itekipanojkauan Jehová tlen ijkuilitokej itech Biblia uan ken techpaleuia tlen okichijkej.

IJKUAK SE TOKNI TECHYOLKOKOUA

3. ¿Tlen kixnamikij itekipanojkauan Jehová?

3 Ijkuak itlaj tikixnamikij. Ualeua sekimej tokniuan techkualaniskej. Oksekimej techyolkokoskej noso kijtoskej itlaj tlen amo techpaktis. Noijki ualeua tlayekankej motlapololtiaj. Ijkuak ijkon panoua xamo timotlajtlaniskej kox melauak tikatej itech ialtepe toTajtsin Dios. Ikinon ayakmo kinnotsaj tokniuan tlen okinyolkokojkej uan ayakmo monechikouaj. Ayakmo san sekan kitekichiuiliaj Jehová (Zac. 3:9). ¿Tikijtoskia kuali tlen kichiuaj? Matikitakan tlen okichi se itekipanojka Jehová tlen noijki ijkon okipanok.

4. ¿Tlen okixnamik apóstol Pablo?

4 Se itekipanojka Jehová itlaj okixnamik. Apóstol Pablo okimatiaya tokniuan tlajtlakolejkej. Ijkon opanok ijkuak opejki monechikoua ompa Jerusalén porque miakej amo okineltokiliayaj tlen okijtouaya uan okimouiliayaj (Hech. 9:26). Miakej okijtouayaj miak tlamantli ijkuak Pablo amo inuan okatka (2 Cor. 10:10). Satepan Pablo okijto se tokni opejki kichiua tlen amo kuali uan non amo kinpaleuiskia tokniuan makitekichiuilikan Jehová (Gál. 2:​11, 12). Marcos noijki okiyolkoko Pablo maski okatka iyolikni (Hech. 15:​37, 38). Pablo uelis kijtoskia ayakmo mouikaskia inuan tokniuan tlen okiyolkokojkej. Pero maski ijkon okipanok Pablo amo okika Jehová uan ok okintlasojtlak tokniuan. ¿Tlen okipaleui ijkon makichiua?

5. ¿Tlen okipaleui Pablo makintlapojpolui tokniuan? (Colosenses 3:​13, 14; noijki xikita dibujo).

5 Pablo okintlasojtlaya tokniuan ikinon ye okitaya yejuan kuali inyelis uan amo san okitaya tlen amo kuali okichiuayaj. Ye okintlasojtlaya ikinon okintlapojpoluiaya ijkon ken kijtoua Colosenses 3:​13, 14 (xiktlajtolti). ¿Pablo oksepa omouikak iuan Marcos? Kema. Pablo amo nochipa okualantoka iuan Marcos maski ayakmo iuan oyajki ijkuak uejka otetlapouito. Satepan okintlajkuilili tokniuan tlen ochantiayaj ompa Colosas uan okijto okitlasojtlaya Marcos uan sapanoua okiyolchikauaya (Col. 4:​10, 11). Noijki Pablo okijto makipaleuiti Marcos ijkuak ye otsaktoka ompa Roma (2 Tim. 4:11). Ijkon tikitaj Pablo okintlapojpolui tokniuan uan kuali inuan omouikaya. ¿Tlen techmachtia tlen okichi?

Pablo amo nochipa okualantoka iuan Bernabé uan Marcos. Satepan san sekan otlapaleuijkej. (Xikita párrafo 5).


6, 7. ¿Tlen techpaleuis matikintlasojtlakan tokniuan maski itlaj techtoktiskej? (1 Juan 4:7).

6 ¿Tlen techmachtia? Jehová kineki matikintlasojtlakan tokniuan (xiktlajtolti 1 Juan 4:7). Amo matimokuayejyekokan se tokni amo yolkuali porque itlaj otechtokti. Matimokuayejyekokan mochijchikaua kichiuas tlen kuali uan amo san kineki techyolkokos (Prov. 12:18). Jehová techtlasojtla maski titlajtlakolejkej. Ye touan mouika maski timotlapololtiaj uan amo san techkualankaitok (Sal. 103:9). Sapanoua miak ipati matitetlapojpoluikan ijkon ken toTajtsin Dios kichiua (Efes. 4:32–5:1).

7 Matikilnamiktokan moneki san sekan matiyetokan inuan tokniuan porque yitlamis tlen amo kuali. Techtlajyouiltiskej uan xamo hasta techtsakuaskej. Ijkuak ijkon panos okachi monekis tiyetoskej inuan tokniuan (Prov. 17:17). Ijkon okipanok se tlayekanki itoka Josep a uan chanti España. Ye okitsakej iuan sekimej tokniuan porque amo mokajkalakiaj itech política. Okijto: “San sekan otikatkaj ikinon uelis timokualaniskiaj. Omonekiaya timoxikoskej uan timotlapojpoluiskej ika nochi toyolo. Tlen otikchijkej otechpaleui san sekan matiyetokan uan matimomaluikan uan ijkon amitlaj techtoktiskiaj akinmej amo kitekichiuiliaj Jehová. Nikilnamiki se tonal onikkojko noma uan amo ueli onikoliniaya porque okimilitoka. Ne amitlaj ueli onikchiuaya ikinon se tokni onechtlapakiaya uan okichiuaya okseki tlamantli. Onikitak melauak onechtlasojtlayaj tokniuan ijkuak onechpaleuijkej”. Nin techititia miak ipati desde axkan matimouikakan inuan tokniuan.

IJKUAK TECHYOLKOKOUA TOSIUA NOSO TONAMIK

8. ¿Tlen kixnamikij akinmej yomonamiktijkej?

8 Ijkuak itlaj tikixnamikij. Nochtin akinmej yomonamiktijkej “kixnamikiskej ouijkayotl” ijkon ken kijtoua Biblia (1 Cor. 7:28). ¿Tleka? Porque siuatl uan tlakatl tlajtlakolejkej. Noijki kipiaj tlatlamantli inyelis uan amo san se tlamantli kinpaktia. Xamo tlatlamantli inmialtepe uan tlatlamantli okinmiskaltijkej. Xamo ijkuak okatkaj novios amo okitakej seki tlamantli tlen amo kinpaktis. Ikinon xamo san mokualanijtoskej. Xamo san motlajtlakoltiskej noso mokuayejyekoskej okachi kuali moxeloskej noso mokajkauaskej inmixpan tekiuajkej. Pero ¿okachi yolpakiskej tla moxeloskej noso mokajkauaskej inmixpan tekiuajkej? b Matikitakan tlen okichi se itekipanojka Jehová tlen amo omosotla maski okixnamik miak tlamantli iuan inamik.

9. ¿Tlen okixnamik Abigaíl?

9 Se itekipanojka Jehová itlaj okixnamik. Abigaíl okatka isiua Nabal. Biblia kijtoua non tlakatl amo okatka yolkuali uan okichiuaya tlen amo kuali (1 Sam. 25:3). Sapanoua okatka oui inemilis Abigaíl. Pero se tonal uelis kikajteuaskia inamik tla ye kinekiskia. David tlen kinyekanaskia israelitas okinekiaya kimiktis Nabal. Ijkon kipanoskia porque okiuijuikalti David uan noijki okinuijuikalti itlakeualuan (1 Sam. 25:​9-13). Abigaíl uelis choloskia uan kikauaskia David makichiua tlen okinekiaya pero ye amo ijkon okichi. Okilui David makitlapojpolui Nabal uan amo makimikti (1 Sam. 25:​23-27). ¿Tlen okipaleui Abigaíl ijkon makichiua?

10. ¿Tlen okipaleui Abigaíl amo mamosotlaua maski inamik amo okatka yolkuali?

10 Abigaíl okitlasojtlaya Jehová ikinon okipatioitaya ken kinmita akinmej yomonamiktijkej. Xamo okimatiaya tlen okijto Jehová ijkuak okinamikti Adán uan Eva (Gén. 2:24). Abigaíl okimatiaya toTajtsin Dios kineki san sekan mayetokan akinmej yomonamiktijkej. Ye okinekiaya kiyolpaktis toTajtsin Dios uan okipaleui inamik mamomakixti uan noijki akinmej inuan ochantiayaj. Ikinon san niman itlaj okichi. Abigaíl amitlaj itlajtlakol okatka pero okilui David makitlapojpolui inamik. Jehová sapanoua okitlasojtlaya Abigaíl porque okatka yolchikauak uan okinpaleuiaya oksekimej. Matikitakan tlen kinmachtia akinmej yomonamiktijkej tlen okichi Abigaíl.

11. (1) ¿Tlen kineki Jehová makichiuakan akinmej yomonamiktijkej? (Efesios 5:33). (2) ¿Tlen mitsmachtia tlen okichi Carmen? (Noijki xikinmita fotos).

11 ¿Tlen techmachtia? Jehová kineki mamotlakaitakan akinmej yomonamiktijkej maski kitaj oui mouikaskej. ToTajtsin Dios sapanoua yolpaki ijkuak kinmita akinmej yomonamiktijkej mochijchikauaj kuali mouikaskej, motlasojtlaskej uan motlakaitaskej (xiktlajtolti Efesios 5:33). Matikitakan tlen okipanok Carmen. Ijkuak okipiaya chikuase xiuitl omonamikti, opejki momachtia Biblia iuan iTlaixpantijkauan Jehová uan omoapolakti. Ye okijto: “Nonamik amo okipakti tlen onikchi. Okualaniaya porque oniktekichiuiliaya Jehová ikinon onechuijuikaltiaya uan onechiluiaya nechkajteuaskia”. Pero Carmen amo omosotla. Kanaj 50 xiuitl omochijchika okitlasojtlak inamik uan okitlakaitaya. Noijki okijto: “Satepan onikajsikamatki nonamik uan opejki kuali timotlapouiaj. Onikilnamiktoka Jehová sapanoua kinpatioita akinmej yomonamiktijkej. Ikinon onimochijchika nimouikas iuan nonamik. Niktlasojtla Jehová ikinon amo onimosotla”. c Jehová mitspaleuis amo ximosotlaua tla tikixnamiki itlaj iuan monamik.

¿Tlen techmachtia ijkuak Abigaíl okinpaleui mamomakixtikan akinmej ochantiayaj ikalijtik? (Xikita párrafo 11).


IJKUAK TIMOYOLKOKOUAJ PORQUE ITLAJ AMO KUALI OTIKCHIJKEJ

12. ¿Ken uelis timomachiliskej tla titlajtlakolchiuaj?

12 Ijkuak itlaj tikixnamikij. Tla titlajtlakolchiuaj xamo timokuayejyekoskej amo keman itlaj kuali tikchiuaskej. Biblia kijtoua timoyolkokouaj ijkuak titlajtlakolchiuaj (Sal. 51:17). Se tokni tlen itoka Robert ijkon okipanok. Ye omochijchika miak xiuitl para yetos siervo ministerial. Ye otlajtlakolchi uan okimatiaya amo okitlakamatki Jehová ijkuak ijkon okichi. Ye okijto: “Sapanoua onechkuejsouaya notlalnamikilis ijkuak onikitak tlen onikchi. Satepan amo kuali onimomachiliaya. Opejki nichoka uan oniktlatlaujti Jehová. Onimokuayejyeko toTajtsin Dios ayakmo keman nechkakiskia porque sapanoua onikyolkoko”. Ijkuak titlajtlakolchiuaj xamo timokuayejyekoskej Jehová ayakmo touan kajki uan ayakmo itlaj ipati matiktekichiuilikan (Sal. 38:4). ¿Noijki ijkon timomachilia? Tla ijkon timomachilia mitspaleuis tlen okichi se itekipanojka Jehová tlen amo okika maski otlajtlakolchi.

13. ¿Tlen tlajtlakoli okichi Pedro uan tleka ijkon okichi?

13 Se itekipanojka Jehová itlaj okixnamik. Youak ijkuak kimiktiskiaj Jesús, apóstol Pedro miak uelta omotlapololti ikinon satepan otlajtlakolchi. Okijto amo keman kikauaskia Jesús maski oksekimej kikauaskiaj (Mar. 14:​27-29). Satepan miak uelta okochki ompa “tetlala tlen omotokayotiaya Getsemaní” (Mar. 14:​32, 37-41). Noijki ocholo ijkuak okikitskijkej Jesús (Mar. 14:50). Saiktlami Pedro eyi uelta okijto amo okixmatiaya Jesús (Mar. 14:​66-71). ¿Tlen okichi ijkuak okitak otlajtlakolchi? Ye sapanoua omoyolkoko uan otlauelchokak (Mar. 14:72). ¿Timokuayejyekouaj ken omomachili ijkuak okitak Jesús okipilojkej itech kouitl? Xamo Pedro okitak amo kuali tlen okichi.

14. ¿Tlen okipaleui Pedro amo makikaua Jehová? (Xikita dibujo).

14 Pedro amo osotlauak uan amo okika Jehová. ¿Tlen okipaleui? Omoyolchika porque okatka inuan tokniuan uan amo san iselti omoka (Luc. 24:33). Noijki ijkuak okiyolitijkej Jesús okimonextili Pedro uan okiyolchika (Luc. 24:34; 1 Cor. 15:5). Satepan Jesús okimakak okachi tekitl uan amo okilnamikti tlen amo kuali okichi (Juan 21:​15-17). Pedro ok omochijchika kichiuas tlen kuali maski otlajtlakolchi. ¿Tleka? Porque okimatiaya Jesús ok okitlasojtlaya uan okipaleuiayaj tokniuan. Matikitakan tlen techmachtia tlen okichi Pedro.

Juan 21:​15-​17 kiteititia Jesús ok okitlasojtlaya Pedro uan non okiyolchika. (Xikita párrafo 14).


15. ¿Tlen kineki Jehová matikneltokakan? (Salmo 86:5; Romanos 8:​38, 39; noijki xikita foto).

15 ¿Tlen techmachtia? Jehová kineki matikneltokakan ye techtlasojtla uan techtlapojpoluia (xiktlajtolti Salmo 86:5; Romanos 8:​38, 39). Amo kuali timomachiliaj ijkuak titlajtlakolchiuaj. Pero amo matimokuayejyekokan Jehová ayakmo keman techtlasojtlas nion techtlapojpoluis. Moneki san niman matikitakan tlen uelis techpaleuis. Robert tlen otimotlapouijkej itech párrafo 12 okiyekijto: “Onimokuayejyekouaya amikaj omonekiaya manechpaleui ijkuak itlaj onechyoltilanaya ikinon onitlajtlakolchi”. Ye okajsikamatki omonekiaya motlapouis inuan tlayekankej. Okijto: “Ijkuak inuan onimotlapoui onechpaleuijkej manikajsikamati Jehová ok onechtlasojtlaya. Tlayekankej amo onechkajkej. Yejuan onechititijkej Jehová nouan kajki”. Tejuan noijki uelis tikneltokaskej Jehová techtlasojtla uan techtlapojpoluia ijkon ken okitlapojpolui Robert. Jehová uelis ijkon kichiuas tla timoyolkopaj, tikinmiluiaj tokniuan matechpaleuikan uan timochijchikauaj ayakmo titlajtlakolchiuaskej (1 Juan 1:​8, 9). Tla tikneltokaj Jehová techtlasojtla uan techtlapojpoluia nochipa tiktekichiuiliskej maski ualeua timotlapololtiskej.

¿Ken timomachiliaj ijkuak tikitaj tlayekankej kinekij techpaleuiskej? (Xikita párrafo 15).


16. ¿Tleka tikneki titlaxikos uan nochipa tiktekichiuilis Jehová?

16 Jehová kipatioita axkan matiktekichiuilikan porque tikatej itlamian tonalmej. Techpaleuis matitlaxikokan uan amo matikkauakan maski techyolkokouaj. Matikintlasojtlakan tokniuan uan matikintlapojpoluikan maski techyolkokoskej. Matikteititikan tiktlasojtlaj Jehová uan matikyektlalikan tlen tikixnamikij iuan tonamik noso tosiua. Tla titlajtlakolchiuaj matikkauilikan Jehová matechpaleui. Matikilnamiktokan ye techtlasojtla, techtlapojpoluia uan nochipa matiktekichiuilikan. “Ikinon nochipa matikchiuakan tlen kuali” porque tikmatij Jehová techteochiuas (Gál. 6:9).

¿TLEN TECHPALEUIS MATIKTEKICHIUILIKAN JEHOVÁ IJKUAK...

  • ... se tokni techyolkokoua?

  • ... techyolkokoua tonamik noso tosiua?

  • ... timoyolkokouaj porque itlaj amo kuali otikchijkej?

TLAKUIKALI 139 Amo ma tikilkauakan xochitlali

a Otikinpatilijkej intoka.

b ITlajtol toTajtsin Dios amo kijtoua mamoxelokan akinmej yomonamiktijkej. Noijki kijtoua akinmej yomoxelojkej amo uelis monamiktiskej. Pero sekimej tokniuan kipejpenaj moxeloskej ijkuak itlaj uelis kinpanos. Xikita amochtli Tiyoltos uan tiyolpakis itech nota 4 kanin kijtoua “Ijkuak moxelouaj akinmej yomonamiktijkej”.