Xikita nochi

Tlen kiualika

 TLAMACHTIL 12

Ma titeajsikamatikan

Ma titeajsikamatikan

“Nochipa ximoyekwikakah, ximoteiknomatikah iwa ximotlasojtlakah kemi nonmiknimeh” (1 PED. 3:8).

TLAKUIKALI 90 Ma timoyolchikauakan

XIKILNAMIKTO *

1. Ijkon ken kijtoa 1 Pedro 3:8, ¿tleka kuali timomachiliaj ijkuak tikatej iuan akinmej totech motekipachoaj?

TINOCHTIN kuali timomachiliaj ijkuak tikatej iuan akinmej totech motekipachoaj. Kajsikamatij tlen tikmachiliaj uan tlen timokuayejyekoaj. Kitaj tlen techpoloa, techpaleuiaj uan ualeua yikimatij tlen techpoloa. Tikintlasojtlaj akinmej totech motekipachoaj uan timotlasojtlaj ken tiiknimej * ijkon ken kijtoa 1 Pedro 3:8 (xiktlajtolti).

2. ¿Tleka ualeua amo tikinmajsikamatij oksekimej?

2 Tinochtin tiknekij tikinmajsikamatiskej oksekimej. Pero ualeua amo ijkon tikchiuaj. ¿Tleka ijkon tikchiuaj? Porque titlajtlakolejkej uan san totech timotekipachoaj (Rom. 3:23). Sekimej amo motekipachoaj intech oksekimej porque amo ijkon okinmititijkej ijkuak omoskaltijkej. Noijki yitikatej itlamian tonalmej porque ayakmo ikaj teajsikamati (2 Tim. 3:1, 2). ¿Tlen techpaleuis amo ijkon ma tikchiuakan uan ken timotekipachoskej itech oksekimej?

3. (1) ¿Tlen techpaleuis ma tikinmajsikamatikan oksekimej? (2) ¿Tlen timomachtiskej?

3 Tikinmajsikamatiskej oksekimej tla tikchiuaskej ken Jehová uan Jesús. ToTajtsin Dios sapanoa techtlasojtla uan techajsikamati (1 Juan 4:8). Jesús okiteititi iyelis iTajtsin (Juan 14:9). Ijkuak okatka nikan  tlaltikpak, okitak tejuan uelis titeiknomatiskej. Itech nin tlamachtil tikitaskej Jehová uan Jesús kajsikamatij tlen kinpanoa oksekimej uan satepan tikitaskej ken tikchiuaskej ken yejuan.

JEHOVÁ KAJSIKAMATI TLEN TIKMACHILIAJ

4. Ijkon ken kijtoa Isaías 63:7-9, ¿tlen techititia toTajtsin Dios tiktekipachoaj?

4 Biblia kijtoa Jehová kinmajsikamati akinmej kitekichiuiliaj. Ma tikitakan tlen okimachili ijkuak israelitas otlajyouijkej. Biblia kijtoa: “Ijkuak yejuan otlajyouijkej ye noijki otlajyoui” (xiktlajtolti Isaías 63:7-9). Satepan, Jehová okijto ijkuak kitlajyouiltiaj ialtepe, yetoskia ken ye kitlajyouiltiaj. Noijki okijto ijkuak itlaj kichiuiliaj ialtepe, yetoskia ken kitsopitiliaj ixtololo (Zac. 2:8). ¡Nin tlamantli techpaleuia ma tikajsikamatikan Jehová sapanoa kitekipachoa ialtepe!

Jehová okinmiknomatki israelitas uan okinkixti Egipto. (Xikita párrafo 5).

5. Xikijto ken okinpaleui Jehová itekipanojkauan ijkuak otlajyouiayaj.

5 Ijkuak titlajyouiaj toTajtsin Dios amo san techiknomati, noijki techpaleuia. Ma tikitakan ken okichi. Ijkuak israelitas okintlajyouiltijkej ompa Egipto, Jehová omoyolkoko, ik non, okinkixti israelitas itech non altepetl. Okilui Moisés: “Nikita ken tlajyouia noaltepe [...] uan yonikkak ken kintlajyouiltiaj [...] ne kuali nikmati ken tlajyouiaj. Nitemos namechmakixtiti inmak egipcios” (Éx. 3:7, 8). Okinmiknomatiaya, ik non, okinmakixti. Satepan ijkuak yochantiayaj itech tlali tlen okinmakak, altepemej tlen ik ompa okatkaj okinteuitoj. ¿Tlen okichi toTajtsin Dios? Biblia kijtoa: “Omoyolkokoaya ijkuak yejuan ochokayaj”. Oksepa okinmiknomatki uan okintlalili jueces uan ijkon okinmakixti (Juec. 2:16, 18).

6. Xikijto akin okajsikamatki Jehová maski san tlen amo okijto.

6 Jehová kinmajsikamati itekipanojkauan maski ualeua san tlen amo kijtoaj. Ma tikitakan tlen okipanok Jonás. ToTajtsin Dios okititlanki Jonás ma kinmiluiti akinmej ochantiayaj Nínive tlen kinpanoskia. Pero akinmej ompa ochantiayaj  omoyolkopkej uan Jehová okintlapojpolui. Jonás okualanki porque amo omochi tlen okijto toTajtsin Dios. Pero Jehová okajsikamatki Jonás uan okipaleui amo ma kualani (Jon. 3:10–4:11). Satepan Jonás okajsikamatki tleka toTajtsin Dios okintlapojpolui akinmej ochantiayaj Nínive. Noijki Jehová okilui Jonás ma kijkuilo tlen opanok porque non techpaleuiskia (Rom. 15:4). *

7. ¿Ken techpaleuia tlen Jehová okinchiuili itekipanojkauan?

7 Jehová okinmiknomatki oksekimej uan non techititia techajsikamati. Kita ijkuak titlajyouiaj. Porque ‘san ye kimati tlen tikpiaj tinochtin itech toyolo’ (2 Crón. 6:30). Kajsikamati tlen timokuayejyekoaj, tlen tikmachiliaj uan kimati tlen amo uelis tikchiuaskej. Noijki techiluia amo keman kitekauilis nochipa ma titlajyouikan (1 Cor. 10:13). ¡Melauak techyolseuia nin tlamantli!

JESÚS NOIJKI KAJSIKAMATI TLEN TIKMACHILIAJ

8. ¿Tlen tlamantli okipaleui Jesús ma kinmajsikamati oksekimej?

8 Jesús oteajsikamatiaya ijkuak nikan okatka. Onka kanaj eyi tlamantli tlen okipaleui ijkon ma kichiua. Se tlamantli tlen okipaleui Jesús, ye okiteititi iyelis iTajtsin. Jesús okintlasojtlaya oksekimej ken iTajtsin. Maski oyolpakik okipaleui iTajtsin ijkuak okichijchi nochi tlen onka, ye okachi otechtlasojtlak (Prov. 8:31). Otetlasojtlaya, ik non, okajsikamatiaya tlen okimachiliayaj oksekimej.

9. ¿Tlen okse tlamantli okipaleui Jesús ma kinmajsikamati oksekimej?

9 Okse tlamantli tlen okipaleui Jesús ma teajsikamati, ye kimati tlen tikpiaj itech toyolo. Kijtosneki kimati tlen tikmachiliaj uan tlen tiknekij tikchiuaskej (Mat. 9:4; Juan 13:10, 11). Ik non, ijkuak okinmitaya oksekimej omotekipachoayaj uan omoyolkokoayaj, ye okinmajsikamatki uan okinyolseui (Is. 61:1, 2; Luc. 4:17-21).

10. ¿Tlen okseki tlamantli okipaleui Jesús ma kinmajsikamati oksekimej

10 Okse tlamantli tlen noijki okipaleui Jesús ma teajsikamati, ye okipixki ouijkayotl ken tejuan. Nesi itatajuan amo okipiayaj miak tlamantli. Otekipano iuan itlakpatajtsin tlen omotokayotiaya José. Noijki sapanoa otekipanoaya (Mat. 13:55; Mar. 6:3). Noijki Jesús otlajyoui ijkuak oixpoliuik itlakpatajtsin. Xamo oixpoliuik ijkuak Jesús ayamo opeuaya tetlapouia. Noijki sekimej ikalchanejkauan amo itech otlaneltokayaj, ik non, ye kuali techajsikamati tlen tikmachiliaj ijkuak tikpiaj non ouijkayotl (Juan 7:5). Nochi nin tlamantli okipaleui ma kajsikamati tlen kimachiliaj oksekimej.

Jesús okiknomatki se tlakatl tlen amo otlakakiaya uan oksekan okipajtito. (Xikita párrafo 11).

11. ¿Keman oteajsikamatki Jesús? (Xikita ixko revista).

11 Jesús okiteititiaya okinmajsikamatiaya oksekimej ijkuak okinchiuiliaya milagros. Ye okinmiknomatiaya oksekimej ijkuak otlajyouiayaj, ik non, okinchiuiliaya milagros (Mat. 20:29-34; Mar. 1:40-42). Ma timokuayejyekokan ijkuak uejka okipajtito se tlakatl tlen amo otlakakiaya. Noijki ijkuak okiyoliti ichokotsin se  siuatl tlen oixpoliuik inamik (Mar. 7:32-35; Luc. 7:12-15). Jesús okimachili tlen okinpanoaya oksekimej, ik non, okinekiaya kinpaleuis ika nochi iyolo.

12. Ijkon ken kijtoa Juan 11:32-35, ¿ken okiteititi Jesús okiknomatiaya Marta uan María?

12 Jesús okiknomatki Marta uan María ijkuak oixpoliuik Lázaro. Ijkuak okitak otlajyouijtokaj, ye ochokak (xiktlajtolti Juan 11:32-35). Jesús amo san ochokak porque omikik Lázaro uan ayakmo iuan mouikaskia. Kuali okimatiaya uelis kiyolitiskia. Ye ochokak porque otlajyouijtoka Marta uan María.

13. ¿Tleka techyolchikaua Jesús okinmiknomatki oksekimej?

13 Sapanoa techyolchikaua Jesús okinmiknomatki oksekimej. Tejuan tiktlasojtlaj Jesús maski titlajtlakolejkej (1 Ped. 1:8). Techyolchikaua tikmatij Jesús ye kajki tekiua uan kitlajtlamis nochi tlen techtlajyouiltia. Ye okatka se tlakatl ken tejuan, ik non, ye techpaleuis kitlajtlamis nochi tlajyouilistli tlen Satanás kichiua uan nochi tlen kinyekana. Melauak tiyolpakij porque tikpiaj se tekiua tlen kajsikamati tlen techpanoa (Heb. 2:17, 18; 4:15, 16).

MA TITEAJSIKAMATIKAN KEN JEHOVÁ UAN JESÚS

14. Ijkon ken kijtoa Efesios 5:1, 2, ¿tlen tiknekij tikchiuaskej?

14 Ijkuak timomachtiaj tlen okichi Jehová uan Jesús, techpaleuia noijki ma titeajsikamatikan (xiktlajtolti Efesios 5:1, 2). Tejuan amo tikmatij tlen kipiaj itech inyolo oksekimej. Pero moneki ma timochijchikauakan ma tikinmajsikamatikan tlen kimachiliaj uan tlen kinpoloa (2 Cor. 11:29). Axkan sekimej sapanoa tlaixnekij pero tejuan timochijchikauaj tikchiuaskej tlen okijto Pablo. Okijto: “Amaka makimotemoli san tlan ye kipalewia, yej makitemo tlan ika weletis kimpalewis oksikimeh” (Filip. 2:4).

(Xikinmita párrafos 15 a 19) *

15. ¿Akinmej moneki motekipachoskej itech tokniuan?

15 Tlayekankej noijki moneki kiteititiskej kintekipachoaj oksekimej. Kuali kimatij Jehová kintlajtlanilis kox kuali kinmaluiaj ichkatsitsiuan (Heb. 13:17). Moneki ma kinmajsikamatikan tokniuan tla kinekij kinpaleuiskej. ¿Ken kiteititiaj kinmajsikamatij tokniuan?

16. ¿Tlen kichiuaj tlayekankej tlen teajsikamatij uan tleka miak ipati?

16 Tlayekankej tlen teajsikamatij majxiliaj kinkakiskej tokniuan. Ijkuak itlaj kintlajtlaniaj, kuali kinkakij uan kimatij mochiaskej. Miak ipati tla se tokni kineki motlapouis iuan se tlayekanki uan kineki kijtos tlen mokuayejyekoa pero amo kimati ken kichiuas (Prov. 20:5). Ijkuak tlayekankej majxiliaj kinmaluiskej tokniuan, kuali mouikaj uan kintlasojtlaj (Hech. 20:37).

17. Xikijto ken momachiliaj tokniuan ijkuak tlayekankej kinpaleuiaj.

17 Miakej tokniuan kijtoaj sapanoa kinpatioitaj tokniuan tlayekankej porque motekipachoaj itech oksekimej. ¿Tleka? Adelaide okijto: “Amo oui inmiuan nimotlapouia porque kuali nikmati nechajsikamatiskej”. Noijki okijto: “Nikita nechajsikamatij porque amo san niman kualanij”. Se tokni okijto: “Ijkuak oniktlapouijtoka se tlayekanki tlen onechpanotoka,  oixayotentenki. Non amo keman nikilkauas” (Rom. 12:15).

18. ¿Ken uelis tikinmajsikamatiskej oksekimej?

18 Tinochtin uelis timochijchikauaskej tikinmajsikamatiskej oksekimej. ¿Ken tikchiuaskej? Ma timochijchikauakan ma tikajsikamatikan ouijkayotl tlen kixnamikij tokalchanejkauan uan tokniuan. Ma timotekipachokan itech telpokamej, akinmej yikipiaj miak xiuitl uan akinmej yoixpoliuik se inkalchanejka. Ma tikintlajtlanikan ken katej uan ma tikinkakikan. Ma kitakan melauak techtekipachoa tlen kinpanoa. Ma tikinpaleuikan tla tiuelij. Tla ijkon tikchiuaskej, tikteititiskej melauak timotlasojtlaj (1 Juan 3:18).

19. ¿Tleka moneki ma tikinmajsikamatikan oksekimej tla tiknekij tikinpaleuiskej?

19 Tla tikinpaleuiskej oksekimej, moneki ma tikinmajsikamatikan porque amo san se tlamantli kichiuaj ijkuak kixnamikij ouijkayotl. Sekimej pinauaj tlajtoskej uan oksekimej amo. Ik non, maski tiknekij tikinpaleuiskej, amo ma tikintlajtlanikan tlen amo moneki tikmatiskej (1 Tes. 4:11). Ijkuak ikaj techtlapouia, xamo amo techpaktia tlen mokuayejyekoa. Pero ma tikajsikamatikan ye ijkon momachilia. Ik non, amo san niman itlaj ma tikiluikan uan kualtsin ma tiktlapouikan (Mat. 7:1; Sant. 1:19).

20. ¿Tlen timomachtiskej itech okse tlamachtil?

20 Amo san tokniuan ma tikinmajsikamatikan. Noijki ma tikinmajsikamatikan akinmej tikintlapouiaj. ¿Ken tikteititiaj tikinmajsikamatij akinmej tikintlapouiaj uan akinmej tikinmachtiaj? Nin tlamantli tikitaskej itech okse tlamachtil.

TLAKUIKALI 130 Ma titetlapojpoluikan

^ párr. 5 Jehová uan Jesús motekipachoaj itech oksekimej. Nin tlamachtil techpaleuis ma tikchiuakan ken Jehová uan Jesús. Techmachtis tleka moneki ma timotekipachokan itech oksekimej uan ken uelis tikchiuaskej.

^ párr. 1 TLEN OKACHI IPATI: Ijkuak timotekipachoaj itech oksekimej tikmachiliaj tlen kinpanoa. Nin kijtosneki tikinmajsikamatij oksekimej (Rom. 12:15).

^ párr. 6 Jehová noijki okinmiknomatki oksekimej itekipanojkauan ijkuak omomojtiayaj noso ayakmo otlaxikoayaj. Okiknomatki Ana, Elías uan Ébed-mélec (1 Sam. 1:10-20; 1 Rey. 19:1-18; Jer. 38:7-13; 39:15-18).

^ párr. 67 FOTOS: Ijkuak timonechikoaj uelis tikteititiskej techtekipachoaj tokniuan uan tikintlasojtlaj. Kanin timonechikoaj tikitaj 1) se tlayekanki kualtsin motlapouia iuan se chokotsin iuan inantsin, 2) se tokni iuan itakotsin kiuikaj se tokni tlen yikipia miak xiuitl kanin kajki carro uan 3) ome tlayekankej kuali kikakij se tokni tlen okinmilui ma kipaleuikan.