1. Xikijto tlen tlamantli okachi kualtsin okichi Jesús.

JESÚS kajsikamati tlen ouijkayotl tikixnamikij maski tejuan titlajtlakolejkej. Ijkuak okatka nikan tlaltikpak, ye oyolpakik inmiuan akinmej oyolpakiayaj uan ochokak inmiuan akinmej ochokayaj (Rom. 12:15). Noijki oyolpakik ijkuak setenta imachtijkauan oyolpakiayaj ijkuak omokopatoj otetlapouitoj (Luc. 10:17-21). Noijki Jesús sapanoa okitlasojtlaya Lázaro, ik non, ijkuak omikik “oyoltélinki asta oyolpatsiwik” (Juan 11:33).

2. ¿Tlen okipaleui Jesús ma kinmiknomati oksekimej?

² Jesús okinmiknomatki oksekimej maski tlajtlakolejkej. ¿Tlen okipaleui ijkon ma kichiua? Sapanoa otetlasojtlaya. Ijkon ken otimomachtijkej itech okse tlamachtil, Jesús okachi okintlasojtlaya tlaltikpaktlakamej (Prov. 8:31). Non okipaleui ma kajsikamati ken timokuayejyekoaj. Tlatitlanil Juan okiyekijto: “Ye yokimatia tlan okipiayah itech inyolo” (Juan 2:25). Jesús oteiknomatiaya uan miakej okitakej melauak okintlasojtlaya uan okiselijkej tlen otlamachtiaya itech Tekiuajkayotl. Tla tikchiuaskej ken Jesús, okachi techkakiskej ijkuak titetlapouiskej (2 Tim. 4:5).

3, 4. (1) Tla titeiknomatij, ¿tlen techpaleuis ma titetlapouikan? (2) ¿Tlen timomachtiskej?

³ Pablo okimatiaya omonekiaya tetlapouis uan tejuan moneki ijkon ma tikchiuakan (1 Cor. 9:16). Tla tikinmajsikamatij oksekimej, tikintlapouiskej porque techtekipachoaj uan tiknekij tikinpaleuiskej. Kuali tikmatij okachi tiyolpakij ijkuak itlaj tiktemakaj uan amo ijkuak itlaj tikseliaj (Hech. 20:35, TNM). Tla tikmatoskej nin tlamantli ijkuak titetlapouiaj, techpaleuis okachi tiyolpakiskej.

 ⁴ Itech nin tlamachtil tikitaskej ken tikteititiskej titeajsikamatij ijkuak titetlapouiaj. Achto timomachtiskej ken okinmitaya Jesús oksekimej uan tlen techmachtia. Satepan tikitaskej naui tlamantli tlen techpaleuis ma tikchiuakan ken ye (1 Ped. 2:21).

5. ¿Akinmej okinmiknomatki Jesús?

⁵ Ma tikitakan keman oteiknomatki Jesús. Se tonal, ye uan imachtijkauan sapanoa otetlapouijkej. Amo omajxiliayaj tlakuaskej. Ik non, Jesús okinmilui imachtijkauan: “Matimosewitih kan amaka nemi”. Pero miakej oyajkej kanin omoseuitoj. ¿Tlen okichi? Jesús “okimitak miakeh tlakah non sa okichixtokah iwa okimiknoma, * ken okimitak kemi ichkameh non [amo] kipiah akin kinyakanas. Iwa san miak opé kinmachtia” (Mar. 6:30-34).

6. Ijkon ken kijtoa Lucas 4:18, 19, ¿tleka Jesús okinmiknomatki akinmej okintlapouiaya?

⁶ ¿Tleka Jesús oteiknomatki? Porque okinmitak “kemi ichkameh non [amo] kipiah akin kinyakanas”. Xamo okinmitak sekimej amitlaj okipiayaj uan omonekiaya sapanoa tekipanoskej uan ijkon kipiaskiaj tlen ika mopanoltiskej. Xamo sekimej omoyolkokoayaj porque oixpoliuik se inkalchanejka. Jesús kuali okinmajsikamatiaya porque ye noijki ijkon okipanok ken otimomachtijkej itech okse tlamachtil. Sapanoa okintekipachoaya, ik non, okinyolchika ika iTlajtol toTajtsin Dios (xiktlajtolti Lucas 4:18, 19).

7. ¿Ken uelis titeiknomatiskej ken Jesús?

⁷ ¿Ken uelis titeiknomatiskej ken Jesús? Axkan noijki miakej katej ken “ichkameh non [amo] kipiah akin kinyakanas” uan kipiaj miak ouijkayotl. Pero tejuan moneki ma tikintlapouikan itech Tekiuajkayotl  porque non kinpoloa kimatiskej (Apoc. 14:6). Tikchiuaj ken Jesús ijkuak tikintlapouiaj kuali tlajtolmej ‘akinmej tlajyouiaj uan akinmej amitlaj kipiaj’ (Sal. 72:13). Tikinmiknomatij oksekimej uan tiknekij tikinpaleuiskej.

8. Xikijto tlen techpaleuis ma tikinmiknomatikan akinmej tikintlapouiaj.

⁸ Tla tiknekij tikinmajsikamatiskej akinmej tikintlapouiaj, moneki timokuayejyekoskej ken mokuayejyekoaj, tlen kimachiliaj uan ma tikinchiuilikan ken tejuan tiknekij ma techchiuilikan * (Mat. 7:12). Ma tikitakan naui tlamantli tlen techpaleuis ijkon ma tikchiuakan. Se tlamantli tlen techpaleuis, ma tikitakan tlen kinpanoa akinmej tikintlapouiaj. Ijkuak tejuan titetlapouiaj tiyetoskiaj ken titepajtijkej. Se kuali tepajti mokuayejyekoa tlen kinpanoa akinmej kinpajtia. Xamo kinchiuilia estudios uan ijkon kimati kanin kinkokoa. Amo kinmiluia san tlen amo ma konikan. Kuali kita tlen kinkokoa uan ijkon kinmiluia tlen uelis kinpaleuis ma pajtikan. Tejuan noijki amo san tlen amo tikinmiluiaj akinmej tikintlapouiaj. Achto tikitaj tlen kinpanoa uan ijkon peua tikintlapouiaj. Noijki tikintlajtlaniaj ken kitaj seki tlamantli.

9. (1) ¿Tlen amo ma tikchiuakan ijkuak titetlapouiaj? (2) ¿Tlen moneki ma tikchiuakan?

⁹ Amo ma tikijtokan yitikmatij nochi tlen kinpanoa akinmej tikintlapouiaj nion tlen kineltokaj (Prov. 18:13). Kuali ma tikintlajtlanikan seki tlamantli uan ijkon tikmatiskej tlen kinpanoa (Prov. 20:5). Tla kanin tichantij amo mokuejsoaj, uelis tikintlajtlaniskej kanin tekipanoaj, ken katej inkalchanejkauan, tlen mokuayejyekoaj uan okseki tlamantli. Tla ijkon tikchiuaskej, yejuan inneuian kijtoskej kinpaleuis Tekiuajkayotl tlen tikintlapouiaj. Tla yotikmatkej tlen kinpanotok, tikitaskej tlen kinpaleuis ijkon ken okichi Jesús (noijki xikita 1 Corintios 9:19-23).

10. Ijkon ken kijtoa 2 Corintios 4:7, 8, ¿tlen okse tlamantli techpaleuis ma tikinmajsikamatikan akinmej tikintlapouiaj?

¹⁰ Okse tlamantli tlen techpaleuis, ma timokuayejyekokan ken tlajyouiaj akinmej tikintlapouiaj. Non techpaleuis ma tikinmajsikamatikan akinmej tikintlapouiaj. Porque tejuan noijki tikixnamikij ouijkayotl ken yejuan uan noijki titlajtlakolejkej (1 Cor. 10:13). Tikmatij oui tikixnamikiskej nochi tlen kiyekana Satanás uan kuali tikmatij san Jehová techpaleuia ma titlaxikokan (xiktlajtolti 2 Corintios 4:7, 8). Ma timokuayejyekokan ken momachiliaj akinmej  amo mouikaj iuan Jehová uan kipiaj ouijkayotl. Ma tikchiuakan ken Jesús. Ma tikinmiknomatikan uan ma tikintlapouikan itech itlaj tlen okachi kuali (Is. 52:7).

11. Xikijto ken okiteititi se tokni okinmajsikamatiaya oksekimej.

¹¹ Ma tikitakan tlen okipanok se tokni itoka Sergey. Ye amo okachi otlajtoaya. Satepan opejki momachtia Biblia. Okijto: “Ijkuak opejki nimomachtia onikitak akinmej kichiuaj ken Cristo moneki kintlapouiskej oksekimej tlen kineltokaj. Ne onimokuayejyekoaya amo keman uelis nitetlapouiskia”. Pero Sergey omokuayejyekoaya kox kuali katej akinmej amo kimatij tlen kijtoa Biblia uan amo kixmatij Jehová. Okijto: “Tlen onimomachtiaya onechyolpaktiaya uan onechyolseuiaya. Kuali onikmatiaya oksekimej moneki kimatiskej tlen tlamachtia Biblia”. Nin okipaleui amo ma momojti uan opejki tetlapouia. ¿Tlen opanok? Ye okijto: “Onimotlajtlachialti ijkuak onikitak okachi opejki nitlajtoa uan non onechpaleui okachi ma yeto itech noyolo tlen onimomachtiaya”. *

12. ¿Tleka moneki ma tikinmajsikamatikan akinmej tikinmachtiaj?

¹² Noijki techpaleuis ma tikinmajsikamatikan akinmej tikinmachtiaj. Tejuan yitikmatij tlen tlamachtia Biblia uan akinmej tikinmachtiaj amo keman okimatiayaj. Sekimej amo kinekij kikauaskej tlen kineltokaj porque kijtoaj kinpaleuia san sekan ma yetokan inmiuan inkalchanejkauan. Noijki amo kikauaj costumbres uan tlen kichiuaj kanin chantij. ¿Ken uelis tikinpaleuiskej?

13. Xikijto ken uelis tikinmajsikamatiskej akinmej tikinmachtiaj.

¹³ Ma timotlapouikan itech se tlamantli. ¿Tlen kichiuaj ijkuak se puente ijtlakaui  uan kichijchiuaj se yankuik? Akinmej ik ompa panoaj, kinkauiliaj ma panokan ipan puente tlen yikixitiniskej. Ijkuak tlamis kichijchiuaskej okse puente, kixitiniskej tlen oijtlakauik. Noijki ijkon kinpanoa akinmej tikinmachtiaj. Moneki achto tikinpaleuiskej ma kipatioitakan tlen tlamachtia Biblia uan satepan kikauaskej tlen kineltokaj. Tla tikinpaleuiskej ma kipatioitakan tlen tlamachtia Biblia, kinpaleuis ma kikauakan tlen achto okineltokayaj. Pero ualeua uejkauaj ijkon kichiuaskej (Rom. 12:2).

14, 15. Xikijto ken uelis tikinpaleuiskej akinmej tikinmachtiaj ma kajsikamatikan tichantiskej itech se xochitlali.

¹⁴ Tla tikinmajsikamatij akinmej tikinmachtiaj, amo san niman tiknekiskej ma kineltokakan tlen tikinmachtiaj. Tla tikinmajsikamatij, yolik tikinpaleuiskej ika Biblia kuali ma mokuayejyekokan. Ma tikitakan ken tikinmiluiskej ijkuak toTajtsin Dios kijtoa nochipa tichantiskej itech xochitlali. Miakej amo kimatij nin tlamantli. Sekimej kineltokaj nochi ompa tlami ijkuak ixpoliuij. Oksekimej kineltokaj yauij iluikak ijkuak ixpoliuij. ¿Ken uelis tikinpaleuiskej ma kajsikamatikan tlen Biblia tlamachtia?

¹⁵ Se tokni okijto ken kintlapouia oksekimej tichantiskej itech se xochitlali. Achto kintlajtoltilia Génesis 1:28 uan kintlajtlania kanin kineki toTajtsin Dios ma tichantikan uan ken okinekiaya ma tiyetokan. Miakej kinankiliaj toTajtsin Dios kineki ma tiyolpakikan nikan tlaltikpak. Satepan tokni kintlajtoltilia Isaías 55:11 uan kintlajtlania kox toTajtsin Dios ayakmo kineki ma tichantikan nikan tlaltikpak. Miakej kinankiliaj amo mopatla tlen kijtoa. Saiktlami kintlajtoltilia Salmo 37:10, 11 uan kintlajtlania: “Ijkon ken kijtoa Biblia, ¿ken tichantiskej satepan?”. Yimiakej okinpaleui ma kajsikamatikan toTajtsin Dios kineki ma tichantikan nikan tlaltikpak.

16. Ijkon ken kijtoa Proverbios 3:27, ¿ken uelis tikinmajsikamatiskej akinmej tikintlapouiaj?

¹⁶ Noijki okse tlamantli tlen techpaleuis, ma timokuayejyekokan ken uelis tikinmajsikamatiskej akinmej tikintlapouiaj. Tla titetlajpaloaj itech se kali uan amo majxiliaj, ma tikinmiluikan okse tonal tikintlajpalotiuij. Noijki uelis tikinpaleuiskej tla itlaj kichijtokej. Tla amo uelij kanaj yauij, uelis tikinkouilitiuij tlen kinpoloa noso uelis tikinmiluiskej ken uelis tikinpaleuiskej (xiktlajtolti Proverbios 3:27).

17. Xikijto ken uelis tikinpaleuiskej akinmej tlajyouiaj.

¹⁷ Ma tikitakan tlen okichi se tokni. Ijkuak tokni okimatki se kalchanejkej oixpoliuik inkonetsin ijkuak oneski, okichi itlaj tlen uelis motas amitlaj ipati. Okijkuilo se carta uan itech non carta okinmijkuilo seki textos tlen kinyolseuiskia uan okinmakak non  kalchanejkej. ¿Tlen okijtojkej? Inantsin konetl tlen oixpoliuik okitlajkuilili tokni. Okijkuilo: “Yala ayakmo onikmatiaya tlen nikchiuas. Carta tlen otechijkuilili sapanoa otechyolchika. Amo nikmati ken nimitstlasojkamatilis. Yala oniktlajtolti kanaj veinte veces. Onechtlajtlachialti uan sapanoa otechyolchika non carta. Sapanoa nimitstlasojkamatilia ika nochi noyolo”. Tla noijki ijkon tikinmajsikamatiskej akinmej tlajyouiaj, noijki kinpaleuis tlen tikinmiluiaj.

18. Ijkon ken kijtoa 1 Corintios 3:6, 7, ¿tlen moneki tikilnamiktoskej ijkuak titetlapouiaj?

¹⁸ Amo ma timokuayejyekokan san tejuan tikchiuaj nin tekitl. Tejuan tikinpaleuiaj oksekimej ma kixmatikan toTajtsin Dios pero non amo kijtosneki moneki sapanoa ma techpatioitakan (xiktlajtolti 1 Corintios 3:6, 7). Ye Jehová kinyoltilana akinmej tikintlapouiaj (Juan 6:44). Akinmej tikintlapouiaj yejuan kipejpenaskej kox kiseliskej tlen tlamachtia Biblia noso amo (Mat. 13:4-8). Jesús kuali otlamachti ijkuak okatka nikan tlaltikpak pero non amo kijtosneki nochtin okiselijkej tlen okintlapoui. Ik non, amo ma timoyolkokokan tla akinmej tikintlapouiaj amo techkakij.

19. ¿Tlen panos tla tikinmajsikamatij akinmej tikintlapouiaj?

¹⁹ Tla tikinmajsikamatij oksekimej, techpaleuis ma tiyolpakikan ijkuak titetlapouiaj. Okachi titetlapouiskej, tiyolpakiskej uan titlapaleuiskej ma kixmatikan Jehová “akimeh Dios yokimpejpenka para mayolitokah nochipa” (Hech. 13:48). Ik non, “ijkuak weletis tikinpalewiskeh tokniwah tlaneltokakeh, matikinpalewikah” (Gál. 6:10). Tiyolpakiskej porque tikueyichiuaj toTajtsin Dios Jehová akin kajki iluikak (Mat. 5:16).