Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok (tlen ika timomachtiaj)  |  Marzo de 2017

Ma titlaneltokakan itech Jehová ijkuak tikpejpenaj tlen tikchiuaskej

Ma titlaneltokakan itech Jehová ijkuak tikpejpenaj tlen tikchiuaskej

“Pero, ijkuak itla tiktlajtlanis, xiktlajtlani ika nochi motlaneltokalis” (SANTIAGO 1:6).

TLAKUIKALMEJ: 54 UAN 42

1. ¿Tleka Caín amo kuali okipejpenki tlen kichiuas uan tlen okichi?

CAÍN omonekiaya kipejpenas tlen kichiuaskia. Uelis kimoxikoltiskia tlen amo kuali okinekiaya kichiuas uan kuali yetoskia. Noso kikauaskia ma kinauati tlen okimachiliaya uan tlajyouiskia. Biblia techiluia Caín amo kuali tlen okipejpenki. Ik non, okimikti ikni tlen itoka Abel uan ayakmo omouikak iuan Jehová (Génesis 4:3-16).

2. ¿Tleka miak ipati kuali ma tikpejpenakan tlen tikchiuaskej?

2 Tinochtin tikpejpenaj tlen tikchiuaskej itech tonemilis. Seki tlen tikpejpenaskej miak ipati uan seki amo. Pero tlen tikpejpenaskej uelis kichiuas amo ma tiyolpakikan. Tla kuali tikpejpenaj tlen tikchiuaskej, amo tikpiaskej miak ouijkayotl uan okachi kuali tiyetoskej. Pero tla amo kuali tikpejpenaj tlen tikchiuaskej, tikpiaskej miak ouijkayotl uan amo kuali tiyetoskej (Proverbios 14:8).

3. (1) ¿Akin itech titlaneltokaskej tla tiknekij kuali ma kisa tlen tikpejpenaskej tikchiuaskej? (2) ¿Tlen tlajtlanilmej tikinnankiliskej?

 3 ¿Tlen techpaleuis kuali ma tikpejpenakan tlen tikchiuaskej? Ma titlaneltokakan itech toTajtsin Dios. Moneki tikneltokaskej ye kineki techpaleuis uan techmakas ixtlamatilistli. Noijki ma titlaneltokakan itech iTlajtol uan ma tikchiuakan tlen techiluia (xiktlajtolti Santiago 1:5-8). Tla timochijchikauaj timouikaskej iuan Jehová uan tikpatioitaj iTlajtol, tikmatoskej ye kimati tlen okachi kuali para tejuan. Nin kichiuas ma timoyekanakan ika iTlajtol ijkuak itlaj tikpejpenaskej. Pero ¿ken uelis tikmatiskej kuali tlen tikpejpenaskej? Uan tla itlaj yotikpejpenkej tikchiuaskej, ¿kijtosneki amo uelis tikpatlaskej?

TINOCHTIN TIKPEJPENAJ TLEN TIKCHIUASKEJ

4. ¿Tlen okipejpenki Adán uan tlen opanok?

4 Desde ijkuak toTajtsin Dios okichijchi Adán, tinochtin opejki tikpejpenaj tlen tikchiuaskej. Adán omonekiaya kipejpenas kox kitlakamatis toTajtsin Dios noso kox kitlakamatis isiua. Adán okipejpenki kitlakamatis Eva uan okichi ma kipejpena tlen amo kuali. Uan Jehová okikixti Adán uan Eva itech xochitlali Edén uan satepan omikej. Ik non, axkan titlajyouiaj porque Adán amo kuali okipejpenki tlen kichiuaskia.

Jehová otechmakak iTlajtol, tlen techmachtia ken uelis tikpejpenaskej tlen tikchiuaskej

5. ¿Tleka moneki kuali ma timokuayejyekokan tlen tiknekij tikchiuaskej?

5 Sekimej mokuayejyekoaj okachi kuali tiyetoskej tla amo kipejpenaskiaj tlen kichiuaskej. ¿Tejuan ijkon timokuayejyekoaj? Ma tikilnamiktokan toTajtsin Dios amo otechchijchi ken se robot tlen amo ueli mokuayejyekoa nion ueli kipejpena tlen kichiuas. Jehová otechmakak iTlajtol, tlen techmachtia ken uelis tikpejpenaskej tlen tikchiuaskej. Ye kineki kuali ma timokuayejyekokan tlen tiknekij tikchiuaskej uan nin amo san ma tikajauilmatikan. Ma tikitakan se neskayotl.

6. ¿Tlen okipejpenkej israelitas?

6 Ijkuak israelitas yochantiayaj itech tlali tlen okinmakakej, omonekiaya kipejpenaskej akin kiueyichiuaskiaj, Jehová noso okseki teotsitsintin (xiktlajtolti Josué 24:15). * Tlen okipejpenkej omotaya ken amo itlaj ipati. Pero uelis mikiskiaj noso yoltoskiaj. Ijkuak jueces okinyekanayaj israelitas, yejuan amo kuali okipejpenkej tlen kichiuaskiaj. Ayakmo okiueyichijkej Jehová uan opejkej kinueyichiuaj okseki teotsitsintin (Jueces 2:3, 11-23). Satepan ijkuak okatka teotlajtojki Elías, israelitas omonekiaya kipejpenaskej kox kitekichiuiliskej Jehová noso Baal (1 Reyes 18:21). Uelis tikijtoskej amo oui kipejpenaskiaj, porque kuali tikmatij okachi kuali tiktekichiuiliskej Jehová. Akinmej ixtlamatkej amo kinekiskiaj kitekichiuiliskej se teotsin tlen amo yoltok. Pero israelitas sapanoa oui okinchiuiliaya kipejpenaskej akin kiueyichiuaskiaj. Biblia kijtoa: “¿Hasta keman  nanmokuayejyekojtoskej ome tlamantli?”. Elías okatka ixtlamatki, ik non, okinyolchika ma kiueyichiuakan Jehová.

7. ¿Tleka israelitas sapanoa oui okinchiuili kipejpenaskej tlen kichiuaskiaj? (Xikita tlaixkopinal tlen ika peua tlamachtil).

7 ¿Tleka israelitas sapanoa oui okinchiuili kipejpenaskej tlen kichiuaskiaj? Se, amo otlaneltokayaj itech Jehová uan amo okinekiayaj kikakiskej. Amo itech otlaneltokayaj uan amo omajxiliayaj para kixmatiskej nion okinmixmatiayaj tlanojnotsalmej tlen okinmakaya. Tla mochijchikauaskiaj kixmatiskej, kimatiskiaj ken uelis kipejpenaskiaj tlen kichiuaskiaj (Salmo 25:12). Ome, amo kuali okipejpenkej tlen kichiuaskiaj porque omokuayejyekojkej ken okseki altepemej omokuayejyekoayaj. Uan okinkauilijkej oksekimej ma kipejpenakan tlen kichiuaskiaj. Ik non, israelitas opejkej kichiuaj ken okseki altepemej uan opejkej kinueyichiuaj teotsitsintin. Jehová yimiak xiuitl yokinnejmachtijka uelis ijkon kinpanoskia (Éxodo 23:2).

¿TIKINKAUILISKEJ OKSEKIMEJ MA KIPEJPENAKAN TLEN TIKCHIUASKEJ?

8. ¿Tlen techmachtia tlen okinpanok israelitas?

8 Tlen okinpanok israelitas techmachtia moneki timoyekanaskej ika iTlajtol toTajtsin Dios para kuali tikpejpenaskej tlen tikchiuaskej. Romanos 14:12 techilnamiktia toneuian moneki tikpejpenaskej tlen tikchiuaskej. Ik non, amo ma tikinkauilikan oksekimej ma kipejpenakan tlen tikchiuaskej. Okachi kuali, ma tikchiuakan tlen toTajtsin Dios kijtoa.

Tla tikinkauiliaj oksekimej ma kipejpenakan tlen tikchiuaskej, tikinkauilijtokej ma techyekanakan

9. ¿Tleka amo kuali ma tikinkauilikan oksekimej ma kipejpenakan tlen tikchiuaskej?

9 ¿Tlen uelis kichiuas oksekimej ma kipejpenakan tlen tikchiuaskej? Ijkuak techchiualtiaj ma tikpejpenakan tlen amo kuali (Proverbios 1:10, 15). Amo kuali tla tikinkauiliskej oksekimej ma kipejpenakan tlen tikchiuaskej. Moneki toneuian ma timoyekanakan ika totlalnamikilis tlen yotikmachtijkej ika Biblia. Tla tikinkauiliaj oksekimej ma kipejpenakan tlen tikchiuaskej, tikinkauilijtokej yejuan ma techyekanakan uan nin kichiuas ma titlajyouikan.

10. ¿Tlen okinmilui tlatitlanil Pablo tokniuan tlen ochantiayaj Galacia?

10 Tlatitlanil Pablo okinnejmachti tokniuan tlen ochantiayaj Galacia amo ma kinkauilikan oksekimej ma kipejpenakan tlen kichiuaskiaj (xiktlajtolti Gálatas 4:17). Sekimej tokniuan itech tlanechikol Galacia yejuan okijtoayaj tlen kichiuaskej tokniuan. Nonmej tlakamej okinekiayaj ma kichiuakan tlen yejuan okinekiayaj uan amo tlen okijtoayaj tlatitlanilmej. Omoueyinekiayaj uan amo okintlakaitayaj tokniuan inneuian ma kipejpenakan tlen kichiuaskiaj.

11. ¿Ken uelis tikinpaleuiskej oksekimej ijkuak kipejpenaskej tlen kichiuaskej?

11 Tinochtin uelis timomachtiskej itech ineskayo Pablo. Ye okintlakaitak tokniuan porque amo okinpejpeniliaya tlen kichiuaskiaj (xiktlajtolti 2 Corintios 1:24). Axkan,  tlayekankej uelis kichiuaskej ken Pablo ijkuak motlapouiaj iuan se tokni tlen moneki kipejpenas tlen kichiuas. Uan kipaleuiaj ika tlen kijtoa Biblia. Pero momaluiaj amo ipatka itlaj kipejpenaskej, porque kimatij uelis kuali kisas noso amo. ¿Tlen techmachtia nin? Ijkuak itlaj kipejpenaskej tokniuan, ma tikinpaleuikan ika Biblia. Pero san yejuan inneuian moneki kipejpenaskej tlen kichiuaskej. Kinpaleuis tla yejuan kipejpenaskej tlen kichiuaskej. Amo keman ma timokuayejyekokan uelis tikpejpenaskej tlen kichiuaskej tokniuan.

Ika tlasojtlalistli tlayekankej kinpaleuiaj tokniuan kuali ma kipejpenakan tlen kinekij kichiuaskej. (Xikita párrafo 11).

AMO MA TIKCHIUAKAN TLEN TIKMACHILIAJ

12, 13. ¿Tleka amo kuali ma tikpejpenakan tlen tikchiuaskej ijkuak tikualantokej noso timoyolkokoaj?

12 Miakej kichiuaj tlen kimachilia inyolo ijkuak kipejpenaj tlen kichiuaskej. Pero nin amo kuali (xikita recuadro “¿Tlen kijtosneki?”). Biblia techiluia amo san ma tikchiuakan tlen kineki toyolo ijkuak tikpejpenaskej tlen tikchiuaskej porque titlajtlakolejkej (Proverbios 28:26). Amo ma tikchiuakan tlen kineki toyolo porque “toyolo okachi tekajkayaua amo ken okseki tlamantli, uan techouijtilia” (Jeremías 17:9). Biblia techtlapouia itech miakej tlen okichijkej tlen okinekiaya inyolo uan otlajyouijkej (1 Reyes 11:9; Jeremías 3:17; 13:10). ¿Tlen uelis techpanos tla tikchiuaj tlen kimachilia toyolo ijkuak tikpejpenaskej tlen tikchiuaskej?

13 Toyolo miak ipati porque Jehová technauatia ma tiktlasojtlakan ika nochi toyolo uan ma titetlasojtlakan ken tejuan timotlasojtlaj (Mateo 22:37-39). Pero moneki timomaluiskej. Tlaxelolmej tlen katej itech párrafo 12 techmachtiaj moneki timomaluiskej uan amo ma tikkauakan toyolo ma kinauati tlen timokuayejyekoaj uan tlen tiknekij tikchiuaskej. Se neskayotl, amo kuali tikpejpenaskej tlen tikchiuaskej tla tikualantokej (Proverbios 14:17; 29:22). Amo kuali tikpejpenaskej tlen tikchiuaskej tla timoyolkokoaj  (Números 32:6-12; Proverbios 24:10). Ma tikkauilikan itlanauatil toTajtsin Dios ma kiyekana tlen timokuayejyekoaj (Romanos 7:25). Ik non, ijkuak tikpejpenaskej tlen tikchiuaskej tlen miak ipati, amo ma tikchiuakan san ika tlen tikmachiliaj.

¿KEMAN UELIS TIKPATLASKEJ TLEN YOTIKPEJPENKEJ TIKCHIUASKEJ?

14. ¿Ken tikmatokej kuali tikpatlaskej tlen yotikpejpenkej tikchiuaskej?

14 Tinochtin moneki kuali tikpejpenaskej tlen tikchiuaskej. Pero ualeua akin kuali mokuayejyekoa oksepa moneki mokuayejyekos itech tlen yokipejpenki kichiuas uan moneki kitas kox kipatlas. Jehová otechmakak se kuali neskayotl ijkuak ken okinchiuili akinmej ochantiayaj itech altepetl Nínive ijkuak okatka Jonás. Biblia kijtoa: “ToTajtsin Dios okitak tlen yejuan okichijkej uan ayakmo okichijtokaj tlen amo kuali itech inmiojui, oksepa omokuayejyeko itech tlajyouilistli tlen okijto kinchiuiliskia uan ayakmo itlaj okinchiuili” (Jonás 3:10). Jehová okipatlak tlen okinekiaya kichiuas ijkuak okitak ninivitas ayakmo okichiuayaj tlen amo kuali. Ijkon okiteititi kuali mokuayejyekoa, yolyamanki uan teiknomatki. Jehová amo ken tlaltikpaktlakamej, porque ye nochipa kuali mokuayejyekoa ijkuak kipejpena tlen kichiuas noijki ijkuak kualantok.

Jehová okipatlak tlen okinekiaya kichiuas ijkuak okitak ninivitas ayakmo okichiuayaj tlen amo kuali

15. ¿Keman monekis tikpatlaskej tlen yotikpejpenkej tikchiuaskej?

15 Ualeua monekis oksepa timokuayejyekoskej kox kuali tlen otikpejpenkej tikchiuaskej. Ualeua moneki timokuayejyekoskej ijkuak itlaj mopatla itech tonemilis. Ma tikilnamiktokan Jehová ualeua okipatlak tlen okipejpenki kichiuas (1 Reyes 21:20, 21, 27-29; 2 Reyes 20:1-5). Noijki ualeua monekis tikpatlaskej tlen yotikpejpenkej ijkuak itlaj moyankuilia. Ma tikitakan tlen okichi ueyi tekiua David. Ye okipejpenki tlen kichiuaskia tlen okipiaya tlen kitas iuan ixui Saúl uan omoyekanki ika tlen amo melauak okiluijkej. Pero ijkuak okiluijkej tlen melauak okipatlak tlen yokipejpenka kichiuas (2 Samuel 19:24-29). Ualeua tejuan moneki ijkon tikchiuaskej.

16. (1) ¿Tlen techpaleuis ijkuak moneki tikpejpenaskej tlen tikchiuaskej? (2) ¿Tleka moneki oksepa timokuayejyekoskej itech tlen yotikpejpenkej uan tlen moneki tikchiuaskej?

16 Biblia kijtoa amo san niman ma tikpejpentikisakan tlen tikchiuaskej (Proverbios 21:5). Moneki achto kuali ma timokuayejyekokan uan satepan tikpejpenaskej tlen tikchiuaskej (1 Tesalonicenses 5:21). Tetajmej moneki kitaskej keman uelis momachtiskej Biblia uan amatlajkuilolmej iuan inkalchanejkauan ijkuak kipejpenaskej tlen kichiuaskej. Noijki miak ipati moneki ma kinkakikan tlen mokuayejyekoaj inkalchanejkauan. Ma tikilnamikikan toTajtsin Dios okilui Abrahán ma kikaki isiua (Génesis 21:9-12). Tlayekankej noijki moneki ma kitakan keman momachtiskej. Ijkuak kitaj itlaj moyankuilia  uan kiteititia moneki kipatlaskej tlen moneki kichiuaskej, kipatlaj tlen yokipejpenkej uan amo momojtiaj ayakmo kintlakaitaskej. Tlayekankej tlen kuali mokuayejyekoaj uan yolyamankej moneki kipatlaskej tlen omokuayejyekoayaj uan tlen yokijtojkaj kichiuaskej. Techpaleuis tla noijki ijkon tikchiuaskej porque nin techpaleuis ma tikpiakan yolseuilistli uan san sekan ma tiyetokan (Hechos 6:1-4).

MA TIKCHIUAKAN TLEN YOTIKPEJPENKEJ

17. ¿Tlen techpaleuis kuali ma tikpejpenakan tlen tikchiuaskej?

17 Seki tlamantli tlen tikpejpenaskej ipati uan okseki amo. Se neskayotl, moneki kuali timokuayejyekoskej ijkuak tikpejpenaskej kox timonamiktiskej uan noijki iuan akin timonamiktiskej. Noijki moneki kuali timokuayejyekoskej ijkuak okachi tiktekichiuiliskej toTajtsin Dios. Ijkuak ayamo tikpejpenaj tlen tikchiuaskej, moneki kuali ma timokuayejyekokan uan ma tikiluikan Jehová ma techyekana. Nin uelis uejkauas. Pero tla tiknekij kuali tikpejpenaskej tlen tikchiuaskej, moneki ma titlaneltokakan itech Jehová, ma tikkakikan tlen techiluia uan ma tikkauakan ma techyekana (Proverbios 1:5). Jehová kuali technojnotsa ika iTlajtol. Ik non, moneki ma timomachtikan uan ma tikiluikan Jehová ma techyekana. Ye techpaleuis kuali ma tikpejpenakan tlen tikchiuaskej uan ijkon tikchiuaskej tlen mouika iuan itlanekilis. Ijkuak ayamo tikpejpenaj tlen tikchiuaskej, ma timotlajtlanikan: “¿Nikteititia niktlasojtla Jehová ika tlen nikpejpena nikchiuas? ¿Kinpaleuis nokalchanejkauan ma yolpakikan uan kuali ma yetokan? ¿Nikteititis nimochia uan nitetlasojtla?”.

18. ¿Tleka Jehová kineki kuali ma tikpejpenakan tlen tikchiuaskej?

18 Jehová amo techchiualtia ma tiktlasojtlakan noso ma tiktekichiuilikan. Okachi kuali, ye techkauilia ma tikpejpenakan tlen tikchiuaskej. Jehová kitlakaita tlen tikpejpenaj tikchiuaskej kox tiktekichiuiliskej noso amo (Josué 24:15; Eclesiastés 5:4). Pero kineki ma tikchiuakan tlen yotikpejpenkej uan ma timoyekanakan ika iTlajtol. Tla tikneltokaj Jehová techyekana uan timoyekanaj ika principios bíblicos kuali tikpejpenaskej tlen tikchiuaskej. Uan ijkon tikteititiskej nochipa tikchiuaj tlen tikpejpenaj (Santiago 1:5-8; 4:8).

^ párr. 6 Josué 24:15 kijtoa: “Axkan, tla amo kuali nankitaj nankitekichiuiliskej Jehová, axkan nin tonal namoneuian xikpejpenakan akin nankitekichiuiliskej, tla teotsitsintin tlen okinueyichiuayaj namokojkoluan tlen katej ixpan aueyatl, noso inteotsitsiuan amorreos tlen katej itech tlali kanin nanchantij. Pero ne uan nokalchanejkauan, tiktekichiuiliskej Jehová”.