Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok (tlen ika timomachtiaj)  |  Marzo de 2017

Asá, Jehosafat, Ezequías, Josías

Ma tiktekichiuilikan Jehová ika nochi toyolo

Ma tiktekichiuilikan Jehová ika nochi toyolo

“‘Nimitstlatlaujtia oh Jehová, nimitstlatlaujtia xikilnamiki ken nochipa nika moixpan niyolmelajki uan ika noyolo ajsitok uan moixpan yonikchi tlen kuali’. Uan Ezequías opejki sapanoa choka” (2 REYES 20:3).

TLAKUIKALMEJ: 52 UAN 32

1-3. ¿Tlen kijtosneki tiktekichiuiliskej Jehová ika nochi toyolo? Xikijto se neskayotl.

TINOCHTIN titlajtlakolejkej uan tikchiuaj tlen amo kuali. Ik non, tiktlasojkamatiliaj Jehová okitemakak iKone para techmakixtis uan kineki techtlapojpoluis. Tla tiyolyamankej uan timoyolkuepaj, uelis tikiluiskej ma techtlapojpolui. Kuali ma tikmatokan maski titlajtlakolejkej Jehová amo techchiuilis ken technamiki (Salmo 103:10). Pero kineki ma tiktekichiuilikan ika nochi toyolo (1 Crónicas 28:9). ¿Ken uelis tikchiuaskej maski titlajtlakolejkej?

2 Para uelis tiknankiliskej non tlajtlanilistli, uelis tikitaskej ken okipiaya inemilis ueyi tekiua Asá uan ueyi tekiua Amasías. Ninmej tlakamej okichijkej tlamantli tlen kuali, pero noijki otlajtlakolchijkej. Biblia kijtoa iyolo Asá nochipa okatka ajsitok (2 Crónicas 15:16, 17; 25:1, 2; Proverbios 17:3). Asá nochipa omochijchika kiyolpaktis toTajtsin Dios ika nochi iyolo (1 Crónicas 28:9). Pero Amasías amo ijkon  okichi. Ye amo okitekichiuili Jehová ika nochi iyolo. Satepan ijkuak okinmixpolo akinmej okikokoliayaj Jehová, Amasías okinuikak inteotsitsiuan uan opejki kinueyichiua (2 Crónicas 25:11-16).

3 Akin kitekichiuilia Jehová ika nochi iyolo kitlasojtla ika nochi ichikaualis uan nochipa kiueyichiua. Ijkuak Biblia tlajtoa itech toyolo kijtosneki tlen tlaijtik tikpiaj. Nin noijki kijtosneki ken timokuayejyekoaj, tlen techpaktia, tlen tiknekij tikchiuaskej uan tleka tiknekij itlaj tikchiuaskej. Maski titlajtlakolejkej, uelis tikueyichiuaskej Jehová ika nochi toyolo.Tiktekichiuiliaj porque melauak tiknekij tikchiuaskej, amo porque ikaj techchiualtia noso tikitaj ken se costumbre (2 Crónicas 19:9).

4. ¿Tlen timomachtiskej?

4 Para okachi kuali tikajsikamatiskej tlen kijtosneki tiktekichiuiliskej Jehová ika nochi toyolo, tikitaskej ineskayo Asá, Jehosafat, Ezequías uan Josías. Ninmej tlakamej okatkaj tekiuajkej yolmelajkej itech Judá. Okiyolpaktijkej toTajtsin Dios maski okichijkej tlen amo kuali. Jehová okijto ken okitekichiuilijkej ika nochi inyolo. ¿Tleka ijkon okijto? ¿Ken uelis tikchiuaskej ken yejuan? Ma tikitakan.

ASÁ NOCHIPA OKITEKICHIUILI JEHOVÁ IKA NOCHI IYOLO

5. ¿Tlen okichi Asá ijkuak opejki tlanauatia?

5 Asá opejki tlanauatia ijkuak otlanki otlanauatijkej ome tekiuajkej itech Judá satepan ijkuak altepetl Israel omotlajkoxelo. Ijkuak Asá opejki tlanauatia itech Judá, okipojpolo tlaneltokalistli tlen amo melauak uan nochi auilnemilistli. Okinpojpolo teotsitsintin tlen okinueyichiuayaj uan okinkixti tlakamej tlen oauilnemiayaj itech teokali. Uan noijki isitsin okikixti kanin otlanauatiaya porque okimochijchiuili se teotsin sapanoa tetlajyalti (1 Reyes 15:11-13). Asá okilui altepetl ma kitemokan Jehová uan ma kitlakamatikan tlanauatil. Sapanoa omochijchika kinpaleuis oksekimej ma kiueyichiuakan Jehová (2 Crónicas 14:4).

Asá okipojpolo tlaneltokalistli tlen amo melauak

6. ¿Tlen okichi Asá ijkuak etíopes okiteuitoj altepetl Judá?

6 Ijkuak Asá yotlanauatijtoka majtlaktli xiuitl itech Judá, nochtin kuali okatkaj. Uan se millón soldados etíopes tlen okinpiayaj 300 carretas okiteuitoj altepetl Judá (2 Crónicas 14:1, 6, 9, 10). ¿Tlen okichi Asá? Kuali okimatiaya Jehová kipaleuiskia ialtepe. Ik non, okilui ma kipaleui para kintlaniliskiaj etíopes (xiktlajtolti 2 Crónicas 14:11). * Jehová noijki okinpaleui israelitas ma kintlanilikan akinmej okinkokoliayaj, maski tekiuajkej amo okatkaj yolmelajkej. Ijkon  Jehová okiteititi ye akin melauak toTajtsin Dios (1 Reyes 20:13, 26-30). Pero ijkuakon Jehová okipaleui ialtepe porque Asá itech otlaneltokak. Jehová okinankili Asá uan okinpaleui ma kintlanilikan etíopes (2 Crónicas 14:12, 13). Satepan Asá otlajtlakolchi ijkuak okilui ueyi tekiua asirio ma kipaleui uan amo okilui Jehová (1 Reyes 15:16-22). Pero Jehová okitak Asá okitlasojtlaya. Nochipa okitekichiuili ika nochi iyolo. ¿Ken uelis tikchiuaskej ken Asá? (1 Reyes 15:14).

7, 8. ¿Ken uelis tikchiuaskej ken Asá?

7 ¿Ken tikmatij kox tiktekichiuilijtokej Jehová ika nochi toyolo? Ma timotlajtlanikan: “¿Niktlakamati Jehová maski oui? ¿Nitlapaleuia ma yeto chipauak tlanechikol?”. Ma timokuayejyekokan itech Asá, omonekiaya yetos yolchikauak para kixnamikis isitsin. Ualeua moneki tiyetoskej tiyolchikauakej ken Asá. Se neskayotl, ¿tlen tikchiuaskej tla se tokalchanejka noso se toyolikni tlajtlakolchiua uan kikixtiaj itech tlanechikol porque amo moyolkuepa? ¿Ok iuan timouikaskej? ¿Tlen techiluis toyolo ma tikchiuakan?

8 Ken Asá, ualeua uelis tikmachiliskej nochtin techixnamikij. Uelis akinmej iuan timomachtiaj noso akinmej techmachtiaj techpinauiaj porque tiiTlaixpantijkauan Jehová. Noso uelis akinmej iuan titekitij techpinauiaj porque tikiluiaj akin tikpaleuiaj ma techkauili ma tiakan ueyi nechikol noso porque amo okachi titekitij para tiktlaniskej okachi tomin. Ijkuak ijkon techpanos, moneki ma titlaneltokakan itech Jehová ijkon ken okichi Asá. Ma tiktlatlaujtikan Jehová, ma tiyetokan tiyolchikauakej uan ma tikchiuakan tlen kuali. Ma tikilnamiktokan Jehová techyolchikauas ijkon ken okiyolchika Asá.

9. ¿Tleka tikyolpaktiaj Jehová ijkuak titetlapouiaj?

9 Asá amo san ye itech omotekipacho. Ye omokuayejyeko ken kinpaleuis oksekimej ma kitemokan Jehová. Tejuan noijki tikinyoleuaj tlaltikpaktlakamej ma kiueyichiuakan Jehová. Uan ye kita ijkuak itech titetlapouiaj. Jehová melauak yolpaki ijkuak titetlapouiaj porque tiktlasojtlaj uan timotekipachoaj itech oksekimej uan tlen kipiaskej satepan.

JEHOSAFAT OKITEMO JEHOVÁ

10, 11. ¿Ken uelis tikchiuaskej ken Jehosafat?

10 Asá okipiaya se ikone tlen omotokayotiaya Jehosafat. Biblia kijtoa Jehosafat okichi ken itajtsin (2 Crónicas 20:31, 32). ¿Tlen okichi? Okichi ken itajtsin uan okiyole altepetl ma kiueyichijto Jehová. Okintitlanki sekimej tlakamej itech nochi Judá para ma kinmachtikan tlen okijtoaya itlanauatil toTajtsin Dios (2 Crónicas 17:7-10). Jehosafat oyajki itech tekiuajkayotl norte tlen okatka itech Israel uan oajsito hasta itech tepeyo Efraín para kinpaleuis tlaltikpaktlakamej ma kiueyichiuakan Jehová (2 Crónicas 19:4).  Jehosafat okitemo Jehová ika nochi iyolo (2 Crónicas 22:9).

Jehosafat okinpaleui tlaltikpaktlakamej oksepa ma kitekichiuilikan Jehová

11 Axkan Jehová noijki kineki miakej ma kixmatikan uan tejuan uelis tikinpaleuiskej. Ma timotlajtlanikan: “¿Nimochijchikaua nitetlapouis sejse metstli? ¿Ikaj nikmachtia ika Biblia para noijki ma kitekichiuili Jehová? ¿Niktlatlaujtia Jehová ma nechpaleui ikaj ma nikmachti?”. Tla timochijchikauaj, Jehová techpaleuis ma tikajsikan akin uelis tikmachtiskej ika Biblia. ¿Tikmachtis ikaj maski oui mitschiuilis? Ma tikilnamikikan, Jehosafat omochijchika okinpaleui tlaltikpaktlakamej oksepa ma kitekichiuilikan Jehová. Tejuan noijki uelis timochijchikauaskej tikinpaleuiskej akinmej ayakmo tetlapouiaj oksepa ma tetlapouikan. Tlayekankej mochijchikauaj kinpaleuiskej akinmej okinkixtijkej itech tlanechikol porque uelis ayakmo kichiuaj tlen achto okichiuayaj.

12, 13. (1) ¿Tlen okichi Jehosafat ijkuak omomojti? (2) ¿Tleka moneki ma tikchiuakan ken Jehosafat?

12 Se tonal, miakej soldados okinekiayaj moteuiskej iuan altepetl Judá. Jehosafat otlaneltokak itech Jehová ijkon ken itajtsin (xiktlajtolti 2 Crónicas 20:3). * Jehosafat sapanoa omomojti. Ik non, okilui Jehová ma kipaleui porque ye uan oksekimej amo uelis kintlaniliskiaj akinmej okinkokoliayaj. Noijki okilui amo okimatiayaj tlen kichiuaskiaj. Jehosafat okineltokaya Jehová kinpaleuiskia. Ik non, okilui Jehová tejuan motech titlaneltokaj (2 Crónicas 20:12).

13 Ken Jehosafat, uelis amo tikmatij ken tikyektlaliskej se ouijkayotl uan hasta timomojtiskej (2 Corintios 4:8, 9). Pero ma tikilnamiktokan tlen okichi Jehosafat. Okitlatlaujti Jehová ixpan nochi altepetl uan okilui amo okipiayaj chikaualistli para kinmixnamikiskej akinmej okinkokoliayaj (2 Crónicas 20:5). Tla tikinyekana mokalchanejkauan uelis tikchiuas ken Jehosafat. Ijkuak tikpias se ouijkayotl uan amo tikmati tlen tikchiuas, xiktlatlaujti Jehová ma mitspaleui uan noijki mokalchanejkauan. Amo xipinaua tiktlatlaujtis Jehová ma mitspaleui inmixpan mokalchanejkauan. Ijkon yejuan kitaskej titlaneltoka itech Jehová. Ye okipaleui Jehosafat uan noijki mitspaleuis.

EZEQUÍAS NOCHIPA OKICHI TLEN KUALI

14, 15. ¿Ken okiteititi Ezequías melauak otlaneltokaya itech Jehová?

14 Ueyi tekiua Ezequías noijki omochijchika mouikas iuan Jehová. Ijkon okichi maski itajtsin okinueyichiuaya teotsitsintin. Ezequías okinxajxamani tlaketsalmej tlen ika otlaueyichiuayaj uan okitsonteki tlaketsali tlen ika otlaueyichiuayaj. Uan okixajxamani koatl tlen okichijchi Moisés ika cobre, porque israelitas okiueyichiuayaj. Ezequías okitekichiuili Jehová ika nochi iyolo uan “ye okintlakamatiaya itlanauatiluan Jehová tlen okitemakak ika Moisés” (2 Reyes 18:1-6).

15 Ijkuak otlanauatijtoka Ezequías, soldados asirios okiyaualojkej Judá uan okijtojkej kipojpoloskej Jerusalén. Tekiua asirio okipinaui Jehová uan okinekiaya ma kikauilikan ma kalaki itech altepetl Jerusalén. Itech nin ouijkayotl, Ezequías otlaneltokak itech  Jehová uan okilui ma kipaleui. Ye okimatiaya toTajtsin Dios okachi kipia chikaualistli uan amo asirios (xiktlajtolti Isaías 37:17, 20). * Jehová okinankili Ezequías uan okiualtitlanki se ángel ma kinmikti 185,000 soldados asirios (Isaías 37:36, 37).

16, 17. ¿Ken uelis tikchiuaskej ken Ezequías?

16 Satepan Ezequías omokoko uan yimikiskia. Ijkuak ijkon okipanotoka okitlatlaujti Jehová ma kilnamiki ye okatka yolmelajki uan ma kipaleui (xiktlajtolti 2 Reyes 20:3). * Jehová okikak Ezequías uan okipajti. Tikmatokej axkan Jehová amo uelis kichiuas se milagro para techpajtis noso para kichiuas okachi miak xiuitl ma tiyoltokan. Pero ken Ezequías uelis tikneltokaskej Jehová techpaleuis. Uelis tikiluiskej: “Nimitstlatlaujtia oh Jehová, nimitstlatlaujtia xikilnamiki ken nochipa nika moixpan niyolmelajki uan ika noyolo ajsitok uan moixpan yonikchi tlen kuali”. ¿Tikneltokaj Jehová nochipa techmaluis maski timokokoskej? (Salmo 41:3).

17 Ineskayo Ezequías techmachtia ma tikpojpolokan itlaj tlen kichiuas ma tikkauakan Jehová uan kichiuas ayakmo ma timajxilikan para tiktekichiuiliskej. Se neskayotl, miakej kitekitiltiaj Internet para motlapouiskej iuan oksekimej. Miakej kinmitaj oksekimej ken teotsitsintin. Sapanoa kintlasojtlaj akinmej sapanoa kinmixmatij maski amo kimatij akinmej yejuan. Majxiliaj para kitlajtoltiskej tlen kichiuaj itech innemilis uan kinmitaj intlaixkopinaluan. Internet techpaleuia para timotlapouiskej inmiuan tokalchanejkauan noso toyolikniuan, pero uelis kichiuas ma timotonalpolokan. Uelis sapanoa timoueyinekiskej ika tlen kijkuiloaj oksekimej ijkuak tejuan itlaj tikijkuiloaj uan ijkuak tikintlaliaj tlaixkopinalmej itech Internet. Noso uelis tikualaniskej porque oksekimej ayakmo kitaj tlen tiktlaliaj itech Internet. Ijkuak ijkon panos, ma tikchiuakan ken tlatitlanil Pablo, Áquila uan Priscila non uelis techpaleuis. ¿Yejuan nochipa okinekiayaj kimatiskej tlen okichiuayaj oksekimej maski amo okitekichiuiliayaj Jehová? Biblia kijtoa “Pablo okachi okimosenmák iteki”. Áquila uan Priscila omajxiliayaj tetlapouiskej uan oksekimej ‘okinyekajsikamatiltiayah itlamachtilis Dios’ (Hechos 18:4, 5, 26). Ma timotlajtlanikan: “¿Nimomaluia para amo nikinmitas tlaltikpaktlakamej ken teotsitsintin? ¿Nimotonalpoloa ika miak tlamantli tlen amo ipati?” (xiktlajtolti Efesios 5:15, 16).

JOSÍAS OKINTLAKAMATKI ITLANAUATILUAN JEHOVÁ

18, 19. ¿Ken uelis tikchiuaskej ken Josías?

18 Ueyi tekiua Josías noijki okintlakamatki itlanauatiluan Jehová ika nochi iyolo (2 Crónicas 34:31). Josías okatka iojpa ixui Ezequías. Ijkuak okatka chokotsin opejki kiueyichiua Jehová. Uan ijkuak okipixki 20 xiuitl, okinpojpolo nochi teotsitsintin (xiktlajtolti 2 Crónicas  34:3). * Josías sapanoa omochijchika kiyolpaktis Jehová. Amo ken oksekimej tekiuajkej tlen otlanauatijkej itech Judá. Se tonal, ueyi teopixki okajsik amochtli itech Tlanauatil itech teokali. Nin amochtli uelis okijkuilo Moisés. Ijkuak isecretario okitlajtoltili Josías okitak omonekiaya kichiuas okseki tlamantli para kitekichiuilis Jehová. Uan noijki okinyole oksekimej ijkon ma kichiuakan. Ik non, ijkuak ok oyoltoka miakej amo keman okikajkej toTajtsin Jehová (2 Crónicas 34:27, 33).

Josías okinekiaya kiyolpaktis toTajtsin Dios uan san niman okipatlak miak tlamantli

19 Josías okatka ixui ueyi tekiua Manasés. Uelis okimachti Jehová nochipa kineki tetlapojpoluis. Telpokamej uan ichpokamej uelis kichiuaskej ken Josías uan okachi kuali kixmatiskej Jehová. Noijki uelis momachtiskej itech inkalchanejkauan noso oksekimej tokniuan. Yejuan uelis mitstlapouiskej ken Jehová yokichi miak tlamantli para kinpaleuis. Xikilnamiki ken okimachili Josías ijkuak okikak tlen okijtoaya iTlanauatil toTajtsin Dios. Ye okinekiaya kiyolpaktis toTajtsin Dios, ik non, san niman okipatlak miak tlamantli. Xiktlajtolti Biblia uan noijki tiknekis tiktlakamatis Jehová. Nin mitspaleuis okachi kuali iuan ximouika uan okachi tiyolpakis. Noijki tiknekis tikintlapouis oksekimej itech toTajtsin Dios (xiktlajtolti 2 Crónicas 34:18, 19). * Ijkuak timomachtis Biblia, tikitas moneki tikpatlas seki tlamantli para okachi kuali tiktekichiuilis toTajtsin Dios. Tla ijkon mitspanoa, ximochijchikaua xikpatla tlen moneki ijkon ken okichi Josías.

MA TIKTEKICHIUILIKAN JEHOVÁ IKA NOCHI TOYOLO

20, 21. (1) ¿Tlen okichijkej ninmej naui tekiuajkej? (2) ¿Tlen timomachtiskej chikome?

20 ¿Tlen techmachtiaj tekiuajkej tlen okatkaj Judá tlen okitekichiuilijkej Jehová ika nochi inyolo? Yejuan okipejpenkej kitekichiuiliskej uan kiyolpaktiskej Jehová itech nochi innemilis. Itech otlaneltokakej ijkuak okinmixnamikej akinmej okinkokoliayaj. Uan tlen okachi ipati, okitekichiuilijkej porque okitlasojtlayaj Jehová.

21 Maski ninmej naui tekiuajkej okatkaj tlajtlakolejkej uan okichijkej tlen amo kuali, okiyolpaktijkej toTajtsin Dios. Jehová okitak tlen okatka itech inyolo uan okitak melauak okitlasojtlayaj. Tejuan noijki titlajtlakolejkej uan tikchiuaj tlen amo kuali. Pero Jehová yolpaki ijkuak tiktekichiuiliaj ika nochi toyolo. Itech okse tlamachtil tikitaskej tlen techmachtia ijkuak okichijkej tlen amo kuali.

^ párr. 6 2 Crónicas 14:11 kijtoa: “Asá opejki kinotsa Jehová toTajtsin Dios uan okilui: ‘Oh Jehová te amo mitstekipachoa kox miakej noso amo akinmej tikinpaleuia noso kox kipiaj chikaualistli. Xitechpaleui oh Jehová toTajtsin Dios, porque melauak motech titlaneltokaj uan itech motoka otiualajkej para tikinmixnamikiskej ninmej tlaltikpaktlakamej. Oh Jehová te titoTajtsin Dios. Amo xikkauili se tlaltikpaktlakatl ma mitstlanili’”.

^ párr. 12 2 Crónicas 20:3 kijtoa: “Ik non, Jehosafat omomojti uan okitemo Jehová. Uan otlanauati amo ma tlakuakan akinmej okatkaj Judá”.

^ párr. 15 Isaías 37:17 kijtoa: “¡Xinechkaki, oh Jehová! ¡Xitlachia, oh Jehová! Xikkaki nochi tlajtoli tlen okiualtitlanki Senaquerib para mitspinauis te akin melauak toTajtsin Dios tlen tiyoltok”. Uan 37:20 kijtoa: “Pero axkan, oh Jehová toDios, xitechmakixti para nochtin tekiuajkayomej ma kimatikan te tiDios, san te oh Jehová”.

^ párr. 16 2 Reyes 20:3 kijtoa: “‘Nimitstlatlaujtia oh Jehová, nimitstlatlaujtia xikilnamiki ken nochipa nika moixpan niyolmelajki uan ika noyolo ajsitok uan moixpan yonikchi tlen kuali’. Uan Ezequías opejki sapanoa choka”.

^ párr. 18 2 Crónicas 34:3 kijtoa: “Uan itech xiuitl chikueyi itech itekiuajkayo, ijkuak ok okatka chokotsin, opejki kitemoa iDios David akin okatka ikojkol; uan itech xiuitl doce, itech Judá uan Jerusalén opejki kipojpoloa kanin otlaueyichiuayaj uan tlaketsalmej kanin okinueyichiuayaj teotsitsintin uan teotsitsintin tlen ochijchitokaj ika tepostli”.

^ párr. 19 2 Crónicas 34:18, 19 kijtoa: “Safán akin okatka secretario okilui ueyi tekiua: ‘Onka se amochtli tlen teopixki Hilquías onechmakak’. Uan Safán opejki kitlajtoltia ixpan tekiua. Ijkuak ueyi tekiua okikak tlen okijtoaya Tlanauatil, san niman opejki kitsayana itlaken.