Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok (tlen ika timomachtiaj)  |  Marzo de 2017

Ma tikintlakaitakan akinmej moneki tikintlakaitaskej

Ma tikintlakaitakan akinmej moneki tikintlakaitaskej

“¡Akin ewatok itech n weyi yáyantli iwa n Ichkatsi, matiktlakuikilikah, matiktlakitakah, matikweyijkachiwakah, iwa nochipa makipia weletílistli, axa, iwa nochipa!” (APOCALIPSIS 5:13).

TLAKUIKALMEJ: UAN 14

1. ¿Tleka sekimej tikintlakaitaj uan tlen timomachtiskej?

¿KEN titetlakaitaj? Ijkuak tikinpatioitaj oksekimej. Ijkon tikchiuaj porque itlaj okichijkej noso porque okimotlanilijkej uan kipiaj se tekitl tlen miak ipati. Itech nin tlamachtil tikitaskej akinmej moneki tikintlakaitaskej uan tleka.

2. ¿Tleka moneki sapanoa ma tiktlakaitakan Jehová? (Xikita tlaixkopinal tlen ika peua tlamachtil).

2 Apocalipsis 5:13 kijtoa “akin ewatok itech n weyi yáyantli” uan “Ichkatsi” moneki ma tikintlakaitakan. Jehová ye “Akin ewatok itech n weyi yáyantli”. Itech Apocalipsis tlakotonal 4, tlajtoa itech sekimej ángeles tlen kitlakaitaj Jehová, akin kajki nochipa. Yejuan kijtoaj: “Toteko Dios, sanwel Tejwatsi moaxka n weyílistli, mawistílistli iwa n weletílistli. Porke Tejwatsi otikchijchi nochi tlan onka, iwa tejwatsi otikmonekilti  mayetokah, yika otikinchijchi” (Apocalipsis 4:9, 11).

3. ¿Akin “Ichkatsi” tlen moijtoa itech Apocalipsis 5:13 uan tleka moneki ma tiktlakaitakan?

3 “Ichkatsi” tlen moijtoa itech Apocalipsis 5:13 ye Jesucristo. ¿Ken tikmatij? Porque ijkuak okatka itech Tlaltikpak, Jesús okinotsayaj “Iichkatsi Dios, non kitekixtilis nochi intlajtlakol n tlaltikpaktlakah” (Juan 1:29). San Jesús akin ueyi tekiua, okinek topatka ma kimiktikan para kinmakixtis akinmej kinnauatia, ik non, moneki ma tiktlakaitakan. Moneki tiktlakaitaskej Jesús porque “Ye n Rey Akin kinnawatijtok nochteh n reyes iwa Tekowa de nochteh n tekowajkeh” (1 Timoteo 6:14-16). Timomachiliaj ken ángeles tlen otlakuikakej: “¡N Ichkatsi non okimiktijkeh sanwel Ye mayeto weletini, iwa nochi mayeto iaxka, noiwa maixtlamati iwa mayeto chikawak, noiwa makitlakitakah, iwa makiweyilikah iwa kuali makiyektenewakah!” (Apocalipsis 5:12).

4. ¿Tleka sapanoa ma tiktlakaitakan Jehová uan Cristo?

4 Itech Juan 5:22, 23 kijtoa Jehová okitlali Cristo para ma kinmixkomaka tlaltikpaktlakamej. Ik non, moneki ma tiktlakaitakan Jesús. Ijkuak tiktlakaitaj Jesús noijki tiktlakaitaj Jehová. Tla tiktlakaitaj Jesús uan iTajtsin, uelis nochipa tiyoltoskej (xiktlajtolti Salmo 2:11, 12). *

5. ¿Tleka moneki ma techtlakaitakan?

5 ToTajtsin Dios otechchijchi ken ye tlachixtok (Génesis 1:27). Nin kijtosneki tinochtin uelis tikteititiskej iyelis. Se neskayotl, titetlasojtlaj, tiyolkualmej uan titeiknomatij. Tinochtin tikpiaj totlalnamikilis uan nin techiluia tlen kuali uan tlen amo kuali (Romanos 2:14, 15). Tinochtin tiknekij ma yeto tlachipauak, tlakualtsin uan tiknekij kuali tiyetoskej iuan oksekimej. Nin amo techtlajtlachialtia, porque Jehová kineki nochi kuali ma yeto uan ma yeto yolseuilistli. Tinochtin otechchijchijkej para tikchiuaskej miak tlamantli ken toTajtsin Dios kichiua. Ik non, tinochtin moneki ma techtlakaitakan (Salmo 8:5).

MA TITETLAKAITAKAN KEN MONEKI

6, 7. ¿Tleka iTlaixpantijkauan Jehová amo ken oksekimej ijkuak tetlakaitaj?

6 Tikmatokej moneki titetlakaitaskej, pero uelis amo tikajsikamatij hasta kanin uelis titetlakaitaskej uan ken tikchiuaskej. Ijkon panoa porque miakej kikauaj ma kintlanili tlen kitekitiltia Satanás. Miakej kinueyichiuaj tlakamej uan siuamej uan kinmitaj ken teotsitsintin. Sapanoa kintlakaitaj, pero moneki kichiuaskej san ken kijtoa Jehová. Sekimej motlakentiaj uan kichiuaj ken akinmej sapanoa kinmixmatij. Sekimej kichiuaj ken akinmej tlayekanaj itech política, akinmej tlayekanaj itech tlaneltokalismej, akinmej motaj  itech películas noso akinmej mauiltiaj.

7 Akinmej melauak kichiuaj ken Cristo kimatokej amo kuali sapanoa tikintlakaitaskej oksekimej. Amo ikaj onka ken Jesús tlen otechkauili se kuali neskayotl tlen moneki tikchiuaskej (1 Pedro 2:21). Moneki ma tikilnamikikan ‘tinochteh otitlajtlakolchijkeh, iwa otikmopolilijkeh iweyijkachiwalis Dios’ (Romanos 3:23). Ik non, nion se tlaltikpaktlakatl amo moneki ma kiueyichiuakan. Tla ikaj sapanoa tiktlakaitaj tikyolkokoskej Jehová.

8, 9. (1) TiiTlaixpantijkauan Jehová, ¿ken tikinmitaj tekiuajkej? (2) ¿Nochipa uelis tikintlakamatiskej?

8 Sekimej moneki ma tikintlakaitakan porque kipiaj se tekitl. Ma timokuayejyekokan itech tekiuajkej. Yejuan tlapaleuiaj para kuali ma tiyetokan uan para techpaleuiskej itech tlen moneki. Tinochtin techpaleuia tlen kichiuaj. Tlatitlanil Pablo okijto ma tikinmitakan ninmej “tekiwajkeh” uan moneki ma tikintlakamatikan intlanauatiluan. Ye okijto: “Xiktlaxtlawakah nochi tlan moneki nonkitlaxtlawaskeh. Xiktlaxtlawakah impuestos, [...] akin moneki xiktlakitakah, xiktlakitakah” (Romanos 13:1, 7).

9 TiiTlaixpantijkauan Jehová timochijchikauaj tikintlakaitaskej tekiuajkej. Maski itech sejse altepetl kipiaj tlatlamantli costumbres. Uelis itech se altepetl se tekiua itlaj kitlajtlanis pero itech okse amo. Maski san kanin tiyetoskej, tiiTlaixpantijkauan Jehová tikintlakamatij tekiuajkej. Pero amo tikintlakamatij ijkuak technauatiaj ma tikchiuakan itlaj tlen kixnamiki tlen kijtoa toTajtsin Dios (xiktlajtolti 1 Pedro 2:13-17).

10. ¿Tlen techmachtiaj sekimej itekipanojkauan Jehová?

10 Itech Biblia tikinmajsij inneskayo sekimej itekipanojkauan Jehová tlen okintlakamatkej tekiuajkej uan okintlakaitakej. Ma tikitakan ineskayo José uan María. Ijkuak tekiuajkej tlen okatkaj itech altepetl Roma okinekiayaj kimatiskej keski tlaltikpaktlakamej okatkaj itech non altepetl, José uan María oyajkej hasta Belén maski inkone yinesiskia (Lucas 2:1-5). Pablo noijki se kuali neskayotl, porque ye okintlakaitak tekiuajkej. Ijkuak okiluijkej okichi itlaj amo kuali, Pablo ika tlakaitalistli okitlapoui tekiua Herodes uan Festo (Hechos 25:1-12; 26:1-3).

11, 12. (1) ¿Tleka amo sapanoa tikintlakaitaj akinmej tlayekanaj itech tlaneltokalismej? (2) ¿Tlen opanok porque se tokni okitlakaitak ikaj akin tekiti itech política itech altepetl Austria?

11 ¿Sapanoa tikintlakaitaskej akinmej tlayekanaj itech tlaneltokalismej? Amo. Moneki tikintlakaitaskej ken tikintlakaitaj oksekimej. Maski yejuan ma kinekikan sapanoa ma tikintlakaitakan, amo kuali tla ijkon tikchiuaskej. ¿Tleka? Porque amo tlamachtiaj tlen melauak itech toTajtsin Dios uan itech Biblia. Jesús  okijto “tlamachtijkeh iwa fariseos” amo kuali otlayekanayaj, ik non, okinmilui “íxkopteh” (Mateo 23:23, 24). Pero amo tlajtlakoli tla tikintlakaitaj tekiuajkej. Ualeua techpaleuiaj ijkuak kitaj tikintlakaitaj.

12 Otechpaleui se tlakatl tlen itoka Heinrich Gleissner sapanoa omomachti itech tlanauatilmej uan okatka político itech altepetl Austria. Itech Segunda Guerra Mundial, okiuikakej nazis itech se tren uan okitsakuatoj. Itech tren tlen itech oyaya okixmatki se tlakatl tlen itoka Leopold Engleitner tlen okatka iTlaixpantijka Jehová itech altepetl Austria. Tokni Engleitner ika tlakaitalistli okiyekilui nin tlakatl tlen tikneltokaj. Ijkuak otlanki guerra, nin tlakatl miak uelta okinpaleui iTlaixpantijkauan Jehová itech altepetl Austria. Uan uelis onka okseki neskayomej tlen kiteititiaj ijkuak ikaj kitlakaita se tekiua, uelis satepan kipaleuis.

MA TIKINTLAKAITAKAN OKSEKIMEJ

13. ¿Akinmej moneki tikintlakaitaskej uan tleka?

13 Nochtin tokniuan moneki ma tikintlakaitakan. Okachi akinmej tlayekankej itech tlanechikolmej, tlayekankej itech circuito, akinmej tlayekanaj itech Betel uan akinmej pouij itech Cuerpo Gobernante (xiktlajtolti 1 Timoteo 5:17). Ninmej tokniuan kimaluiaj ialtepe toTajtsin Dios. Itech Biblia kijtoa “n tlakah kemi se tlatliokólili” (Efesios 4:8). Ik non, moneki tikintlakaitaskej maski uitsej  itech okseki altepemej, omomachtijkej noso amo, maski kipiaj tomin noso amo. Akinmej okichiuayaj ken Cristo itech achto siglo techmakaj se kuali neskayotl. Yejuan okintlakaitakej akinmej otlayekanayaj uan tejuan noijki ijkon ma tikchiuakan. Pero ijkuak inmiuan tikatej, amo tikinmitaj ken ángeles noso sapanoa tikinpatioitaj. Okachi kuali, tikintlakaitaj porque kichiuaj kuali inteki uan yolyamankej (xiktlajtolti 2 Corintios 1:24; Apocalipsis 19:10).

14, 15. ¿Tleka akinmej tlayekanaj itech tlanechikol amo ken akinmej tlayekanaj itech tlaneltokalismej?

14 Tlayekankej itech tlanechikol katej ken tlajpixkej yolyamankej. Amo kinekij ma tikinmitakan sapanoa inpati. Yejuan amo ken tlayekankej itech tlaneltokalismej tlen katej itech ninmej tonalmej. Noijki amo kichiuaj ken tlayekankej itech tlaneltokalismej ijkuak okatka Jesús. Jesús okijto: “Kimpaktiah moyayantiskeh tlayakapa kan tlatlakualo, noiwa kan sinagogas kiwilitah moyayantiskeh kan nochteh makinmitakah. Kinekih makinyektlajpalokah iwa makinnotsakah ‘tlamachtijkeh’ itech ojtli iwa itech tiánkistli” (Mateo 23:6, 7).

Ijkuak tlayekankej yolyamankej uan kichiuaj tlen Jesús okijto, okachi kintlasojtlaj uan kintlakaitaj

15 Akinmej kichiuaj ken Cristo kitlakamatij tlen okijto: “Pero nomejwah amo xikmokawilikah manomechnotsakah tlamachti, porke non nochteh nonmiknimeh iwa nonkipiah san se Nomotlamachti. Iwa amaka xikilikah padre itech nin tlaltíkpaktli, porke nonkipiah san se Padre non kajki ilwikak. Nion xikmokawilikah manomechnotsakah ‘tlayakankeh’, porke sanwel Cristo nomechyakana. Akin kinekis tlayakantos nomonawak, achto manomechtekichiwili. Porke akin inewia moweyilia, satepa moiknomatinemis, pero akin amo moweyilia, kiweyijkatlaliskeh” (Mateo 23:8-12). Ijkuak nochtin tlayekankej tlen katej itech nochi Tlaltikpak yolyamankej uan kichiuaj tlen Jesús okijto, okachi kintlasojtlaj uan kintlakaitaj.

Ijkuak tlayekankej yolyamankej okachi kintlasojtlaj uan kintlakaitaj. (Xikinmita párrafos 13 a 15).

16. ¿Tleka moneki ma timochijchikauakan titetlakaitaskej?

16 Uelis oui tikintlakaitaskej oksekimej ken moneki. Akinmej okichiuayaj ken Cristo itech achto siglo ijkon okinpanok (Hechos 10:22-26; 3 Juan 9, 10). Pero miak ipati ma timochijchikauakan. Tla titetlakaitaj ken Jehová kineki, tikseliskej tlateochiualistli.

TIKPIASKEJ TLATEOCHIUALISTLI TLA TITETLAKAITAJ

17. ¿Ken techpaleuis ijkuak tikintlakaitaj akinmej kipiaj se tekitl?

17 Ijkuak tikintlakaitaj akinmej kipiaj se tekitl ik kanin  tichantij, uelis techpaleuiskej ijkuak amo techkauiliskej ma titetlapouikan. Uelis kitaskej kuali tlen tikchiuaj. Yikipia miak xiuitl ijkon opanok itech altepetl Alemania. Se precursora tlen itoka Birgit oyajki ijkuak itakotsin okiski itech escuela. Akinmej tlamachtiaj okiluijkej Birgit oyolpakej okinmachtijkej inkoneuan iTlaixpantijkauan Jehová. Noijki okijtojkej inkoneuan iTlaixpantijkauan Jehová okichijkej kuali ma mouikakan konemej. Birgit okinyekilui tetajmej kinmachtiaj inkoneuan ken Jehová kineki, ik non, kintlakaitaj akinmej tlamachtiaj. Se tlamachti okijto tla nochtin konemej ijkon yetoskiaj, sapanoa kuali momachiliskiaj ijkuak kinmachtiskiaj. Akinmej tlamachtiaj kuali okinmitayaj konemej tlen iTlaixpantijkauan Jehová, satepan se tlamachti hasta oyajki itech se ueyi nechikol.

18, 19. ¿Tlen moneki tikilnamikiskej ijkuak tikintlakaitaj tlayekankej?

18 Principios bíblicos techpaleuiskej ma tikitakan ken tikintlakaitaskej tlayekankej itech tlanechikol (xiktlajtolti Hebreos 13:7, 17). Moneki tikinmiluiskej kuali tekitl tlen kichiuaj. Noijki inmiuan ma titekitikan uan ma tikintlakamatikan. Ijkon yejuan yolpakiskej ijkuak tekitiskej. Biblia kijtoa ma titlaneltokakan ken yejuan. Pero nin amo kijtosneki timotlakentiskej, titlajtoskej uan titlamachtiskej ken yejuan. Tla ijkon tikchiuaskej, tikteititiskej tikchiuaj ken se tlakatl uan amo ken Cristo. Amo ma tikilkauakan tlayekankej noijki tlajtlakolejkej.

19 Tla tikintlakaitaj tlayekankej ken moneki uan amo tikinmitaj ken sapanoa inpati noso ken akinmej sapanoa kixmatij, uelis tikinpaleuiskej. ¿Ken tikinpaleuiskej? Ma yetokan yolyamankej, amo ma moueyinekikan uan amo ma mokuayejyekokan amo keman motlapololtiaj.

20. ¿Ken techpaleuia ijkuak titetlakaitaj?

20 Titetlakaitaskej techpaleuia amo ma titlaixnekikan uan ma tiyetokan tiyolyamankej ijkuak oksekimej kinekiskej sapanoa techpatioitaskej. Noijki techpaleuis tla titetlakaitaj. Techpaleuis amo ma tikkauakan Jehová ijkuak ikaj kichiua itlaj amo kuali. Uan techpaleuis amo ma tikkauakan ialtepe Jehová. Itech ialtepe toTajtsin Dios amo ikaj sapanoa kipatioitaj, maski yetoskej iTlaixpantijkauan Jehová noso amo.

21. ¿Ken techpaleuis tla titetlakaitaj?

21 Ijkuak titetlakaitaj tikyolpaktiaj Jehová uan non okachi kuali. Tla titetlakaitaj, tikteititiaj tiktlakamatij toTajtsin Dios uan ixpan tikatej tiyolmelajkej. Ijkon Jehová uelis kinankilis Satanás porque okijto amo ikaj uelis yetos yolmelajki ixpan ye (Proverbios 27:11). Miakej amo kimatij ken moneki tetlakaitaskej. Ik non, ma tiktlasojkamatilikan Jehová techmachtia ken moneki titetlakaitaskej.

^ párr. 4 Salmo 2:11, 12 kijtoa: “Xiktekichiuilikan Jehová ika mauilistli uan sapanoa xiyolpakikan ika uiuiyokalistli. Xiktlakaitakan tekone tlamo toTajtsin Dios kualanis uan nanmikiskej itech ojtli, porque ye totoka kualani. Yolpakij akinmej itech mopaleuiaj”.