Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok (tlen ika timomachtiaj)  |  Junio de 2016

Tlakatl tlen kipia tintero tlen kitekitiltia akin tlajkuiloa kineskayotia Jesús. Ye akin kintlalilia marca akinmej momakixtiskej.

Sekimej techtlajtlaniaj

Sekimej techtlajtlaniaj

Itech se kochtemikilistli, Ezequiel okitak se tlakatl tlen okipiaya se tintero tlen kitekitiltia akin tlajkuiloa uan chikuase tlakamej tlen okipiayaj intepos pampa tlamiktiskej. ¿Akinmej kinneskayotiaj ninmej tlakamej?

Kinneskayotiaj ángeles tlen otlapaleuijkej ijkuak okipojpolojkej Jerusalén uan tlen noijki tlapaleuiskej ijkuak kipojpoloskej nochi tlen kiyekantok Satanás itech Armagedón. Nin se yankuik tlamachtil. ¿Tleka omopatlak ken tikajsikamatij nin tlamachtil?

Itech xiuitl 607 achto itech xiuitl 1 (a.i.x. 1), Jehová okichi Ezequiel ma kita tlen panoskia itech Jerusalén achto kipojpoloskiaj. Itech nin kochtemikilistli, Ezequiel okitak akinmej ochantiayaj Jerusalén okichiuayaj tlen amo kuali. Satepan okinmitak chikuase tlakamej tlen okiuikayaj “intepos itech inma pampa tlamiktiskej”. Noijki okitak se tlakatl tlen “otlakentitoka ika lino” uan tlen okipiaya “se tintero tlen kitekitiltia akin tlajkuiloa” (Ezequiel 8:6-12; 9:2, 3). Jehová okilui nin tlakatl: “Xipano itlajkotia altepetl, itlajkotia Jerusalén, uan moneki tikintlalilis se marca inmixkuak tlakamej tlen elsijsiuij uan moyolkokoaj pampa nochi tlamantli tlen amo kuali tlen kichijtokej itech altepetl”. Uan chikuase tlakamej tlen okiuikayaj intepos okinmilui ma kinmiktikan nochtin tlen amo kipiaj marca (Ezequiel 9:4-7). ¿Tlen timomachtiaj itech nin kochtemikilistli? ¿Uan akin tlakatl tlen kipia tintero?

Ezequiel okitak nin kochtemikilistli itech xiuitl 612 a.i.x. 1. Uan achto omochi ijkuak opanok makuili xiuitl, ijkuak Jehová okikauili Babilonia ma kipojpolo Jerusalén. ToTajtsin Dios okitekitilti Babilonia pampa kitlajyouiltis ialtepe pampa amo okitlakamatki  (Jeremías 25:9, 15-18). Pero ¿tlen okinpanok judíos yolmelajkej tlen omoyolkokoayaj pampa oksekimej okichiuayaj tlen amo kuali itech Jerusalén? Jehová okitak ken kinmakixtis.

Itech tlen Ezequiel okitak, ye amo ikaj okitlalili se marca tlen omotaya nion otlapaleui ijkuak okipojpolojkej Jerusalén. Ijkuak okipojpolojkej Jerusalén yejuan ángeles akinmej otlayekankej. Nin techititia tlen panoa iluikak. Jehová okinmilui ángeles ma tlayekanakan pampa kinmixpoloskiaj akinmej amo yolmelajkej uan ma mochiua seki tlamantli pampa momakixtiskia akinmej yolmelajkej. *

Pero nin oksepa mochiuas. ¿Ken mochiuas uan keman? Achto toamatlajkuiloluan okijtoayaj tlakatl tlen okipiaya tintero okineskayotiaya tlapejpenalmej tlen ok katej itech Tlaltikpak. Noijki okiyekijtoayaj tlaltikpaktlakamej kintlaliliaj marca pampa momakixtiskej ijkuak kikakij uan kiseliaj tlen tikinmachtiaj itech Biblia. Pero axkan okse tlamantli tikajsikamatij. ¿Tleka? Pampa otimomachtijkej Mateo 25:31-33 uan otikajsikamatkej ye Jesús akin kinmixkomaka tlaltikpaktlakamej uan kinmixkomakas itech ueyi tlajyouilistli. Ijkuakon, Jesús kijtos akinmej katej ken ichkamej uan akinmej ken tentsomej. Kinmakixtiskej ichkamej pero tentsomej kinmixpoloskej.

Ijkuakon, ¿tlen timomachtiaj itech kochtemikilistli tlen okitak Ezequiel? Ma tikinmitakan makuili tlamantli:

  1. Achto kipojpoloskiaj Jerusalén, Jehová okitekitilti Ezequiel, Isaías uan Jeremías ken tlajpixkej pampa kinnejmachtiskiaj tlaltikpaktlakamej tlen kipanoskia altepetl. Itech ninmej tonalmej, Jehová kitekitiltia sekimej tlapejpenalmej pampa ma kinmachtikan itekipanojkauan uan pampa ma kinnejmachtikan tlaltikpaktlakamej achto uits ueyi tlajyouilistli. Tlapejpenalmej uan akinmej mokauaskej itech Tlaltikpak yejuan akinmej tlanechmachtiaj, kijtosneki nochtin itekipanojkauan toTajtsin Dios (Mateo 24:45-47).

  2. Ezequiel amo okintlalili se marca akinmej momakixtiskiaj. Itech ninmej tonalmej, itekipanojkauan toTajtsin Dios amo kintlaliliaj se marca tlaltikpaktlakamej. Yejuan san tetlapouiaj uan kinnejmachtiaj itech tlen panos satepan. Uan ángeles kinpaleuiaj ika nin tekitl (Apocalipsis 14:6).

  3. Itech tonalmej ijkuak okatka Ezequiel, akinmej omomakixtijkej amo okipiayaj inmixkuak se marca tlen omotaya. Itech ninmej tonalmej, akinmej momakixtiskej itech ueyi tlajyouilistli amo kintlaliliskej inmixkuak se marca tlen motas. ¿Tlen moneki kichiuaskej tlaltikpaktlakamej pampa momakixtiskej? Ijkuak kinnejmachtiaj uan tlakakij, moneki kichiuaskej ken Cristo, motemakaskej iixpan toTajtsin Dios uan kinpaleuiskej iikniuan Cristo ma tetlapouikan itech Tekiuajkayotl (Mateo 25:35-40). Ijkuak uits ueyi tlajyouilistli, kiseliskej marca, nin kijtosneki, kinmakixtiskej.

  4. Tlakatl tlen kipia se tintero kineskayotia Jesús. Ijkuak uits ueyi tlajyouilistli, Jesús kintlalilis marca akinmej mokauaskej Tlaltikpak ijkuak kinmixkomakas uan kijtos yejuan ichkamej. Ijkuakon, uelis yoltoskej nochipa itech Tlaltikpak (Mateo 25:34, 46, TNM). *

  5. Itech ninmej tonalmej, chikuase tlakamej tlen kiuikaj intepos kinneskayotiaj ángeles tlen Jesús kinyekana. Yejuan kinpojpoloskej altepemej uan kitlajtlamiskej nochi tlen amo kuali (Ezequiel 10:2, 6, 7; Apocalipsis 19:11-21).

Ninmej makuili tlamachtilmej techpaleuia ma tikneltokakan Jehová amo kinmixpolos itekipanojkauan yolmelajkej iuan akinmej amo yolkualmej (2 Pedro 2:9; 3:9). Noijki techilnamiktia miak ipati ma titetlapouikan. Moneki nochtin tikinnejmachtiskej yitlamis nochi tlen amo kuali (Mateo 24:14).

^ párr. 6 Sekimej itech akinmej omomakixtijkej okatkaj recabitas, etíope Ébed-mélec uan Baruc, akin okipaleuiaya Jeremías (Jeremías 35:1-19; 39:15-18; 45:1-5). Pero yejuan amo okintlalilijkej se marca tlen omotaya inmixkuak. Okintlalilijkej se marca tlen amo omotaya, tlen kiteititiskia momakixtiskiaj.

^ párr. 12 Tlapejpenalmej yolmelajkej amo monekis kintlaliliskej se marca pampa momakixtiskej. Jehová kintlalilis sello achto mikiskej noso achto peuas ueyi tlajyouilistli (Apocalipsis 7:1, 3).