Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok (tlen ika timomachtiaj)  |  Junio de 2016

¿Tikkauiliaj Jehová ma kiyektlali toyelis?

¿Tikkauiliaj Jehová ma kiyektlali toyelis?

“¡Xikitakan! Ijkon ken tlali tlen kajki itech imauan akin tlachijchiua ika tlali, ijkon nankatej namejuan itech nomauan” (JEREMÍAS 18:6).

TLAKUIKALMEJ: 23 UAN 22

1, 2. (1) ¿Tleka Daniel okipiaya miak ipati iixpan toTajtsin Dios? (2) ¿Tlen moneki tikchiuaskej pampa titetlakamatiskej ken Daniel?

IJKUAK judíos okinuikakej Babilonia, okitakej itech non ueyi altepetl okinpiayaj miakej teotsitsintin uan okinueyichiuayaj amo kuali ejekamej. Pero judíos tlen okatkaj yolmelajkej amo okichijkej ken babilonios. Se neskayotl, ken Daniel uan eyi iyolikniuan (Daniel 1:6, 8, 12; 3:16-18). Ninmej naui telpokamej okitakej Jehová ken akin okinyektlaliaya uan san ye okiueyichijkej. Maski Daniel ochantiaya itech non altepetl kanin tlaltikpaktlakamej okichiuayaj tlen amo kuali, se ángel okijto Daniel okipiaya miak ipati (Daniel 10:11, 19).

2 Yiuejkika, akin otlachijchiuaya ika tlali, okitlaliaya tlali itech se molde pampa itlaj kichijchiuas. Itech ninmej tonalmej, akinmej melauak tikchiuaj ken Cristo tikmatij san Jehová kinamiki kinyektlalis nochtin altepemej pampa san ye ueyi Tekiua itech nochi Tlaltikpak (xiktlajtolti Jeremías 18:6). * Uan noijki san ye kinamiki kiyektlalis toyelis. Pero amo  techchiualtia ma tikpatlakan toyelis. Kineki tejuan ma tikijtokan kox tiknekij ma techyektlali. Itech nin tlamachtil tikitaskej ken uelis tiyetoskej ken tlali yamanki tlen uelis kitekitiltis. Noijki tikinnankiliskej ninmej eyi tlajtlanilmej: ¿Tlen amo tikchiuaskej pampa nochipa tiktlakamatiskej Jehová uan amo tiyetoskej ken tlali tlakuauak? ¿Ken uelis tikpiaskej toyelis tlen tetlakamati uan tiyetoskej ken tlali yamanki? ¿Ken uelis tetajmej mopaleuiskej iuan Jehová ijkuak kinyektlaliaj inkoneuan?

¿TLEN AMO TIKCHIUASKEJ PAMPA AMO TIKPIASKEJ TLAKUAUAK TOYOLO?

3. ¿Tlen uelis kichiuas ma yeto tlakuauak toyolo? Xikijto se neskayotl.

3 Proverbios 4:23, kijtoa: “Itech nochi tlamantli tlen moneki tikmaluis, okachi xikmalui moyolo, pampa itech kisa yolilistli”. Pampa toyolo amo yetos tlakuauak, moneki nochipa ma tikpiakan chikauak totlaneltokilis uan ma timomaluikan pampa amo ma timoueyinekikan nion ma titlajtlakolchiuakan (xikita recuadro “¿Tlen kijtosneki?”). Tla amo timomaluiaj, nochi nin uelis kichiuas amo ma titetlakamatikan (Daniel 5:1, 20; Hebreos 3:13, 18, 19). Ijkon okipanok se ueyi tekiua itech Judá tlen omotokayotiaya Uzías (xiktlajtolti 2 Crónicas 26:4, 16, 19). * Achto, ye okitlakamatiaya Jehová uan kuali iuan omouikaya. Ik non, Jehová okitlali ken ueyi tekiua. Pero satepan “ijkuak opejki mochiua okachi ueyititok, iyolo opejki moueyineki”. Ken sapanoa omoueyineki oyajki itech teokali okitlatito kopali. Ijkuak teopixkej okiluijkej san yejuan uelis kichiuaskiaj non tekitl, Uzías sapanoa okualanki. Pero Jehová okichi nochipa ma kipia lepra (Proverbios 16:18).

4, 5. ¿Tlen uelis techpanos tla timoueyinekij? Xikijto se neskayotl.

4 Tla timoueyinekij, timokuayejyekoskej okachi topati amo ken oksekimej uan amo tikseliskej ijkuak technojnotsaskej ika Biblia (Proverbios 29:1; Romanos 12:3). Ma tikitakan se neskayotl. Se tlayekanki tlen itoka Jim, amo okipakti tlen oksekimej tlayekankej okijtojkej mochiuaskia. Jim kijtoa: “Onikinmilui non amo okiteititiaya tlasojtlalistli, uan san niman onia”. Ijkuak opanok tlajko xiuitl, opejki monechikoa itech okse tlanechikol, pero ompa ayakmo okatka ken tlayekanki. Okijtoaya omonekiaya mochiuas tlen ye okijto uan ken sapanoa omoyolkoko, ayakmo otetlapouiaya nion omonechikoaya kanaj majtlaktli xiuitl. Axkan kijtoa ijkon okichi pampa omoueyinekiaya uan hasta okitlajtlakolti Jehová tlen okipanok. Miak xiuitl tokniuan okitlajpaloayaj pero amo okinek ma kipaleuikan.

5 Jim kijtoa: “Nochipa onimokuayejyekoaya san itech tlen ne onikitaya oksekimej amo kuali okichiuayaj”. Tlen okipanok Jim techmachtia tla timoueyinekij, amo tikitaskej tlen amo kuali tikchijtokej. Tla ijkon techpanos, ayakmo tiyetoskej ken tlali yamanki (Jeremías 17:9). Tla se tokni otechyolkoko noso ayakmo tikchiuaj se  tekitl itech tlanechikol, ¿tlen otikchijkej? ¿Otimoueyinekej noso otikilnamikej okachi moneki ma tiyetokan ika yolseuilistli iuan tokniuan uan ma tiyetokan tiyolmelajkej? (xiktlajtolti Salmo 119:165; * Colosenses 3:13).

6. ¿Tlen uelis techpanos tla titlajtlakolchiuaj?

6 Tla titlajtlakolchiuaj uan amo tikijtoaj, uelis amo tikseliskej tlen techiluia toTajtsin Dios; uelis okachi titlajtlakolchiuaskej. Se tokni tlen okichiuaya tlen amo kuali kijtoa itlalnamikilis ayakmo okikuejsoaya (Eclesiastés 8:11). Uan se tokni tlen okitaya pornografía kijtoa amo okipaktiaya tlen okichiuayaj tlayekankej. Nin okichi ayakmo kuali ma mouika iuan Jehová. Pero ijkuak sekimej okimatkej tlen amo kuali okichiuaya, ye okinek ma kipaleuikan tlayekankej. Tinochtin titlajtlakolejkej, pero tla peua tikinteneuaj akinmej technojnotsaj noso amo tikseliaj totlajtlakol, toyolo uelis tlakuauas. Ik non, moneki ma tikiluikan toTajtsin Dios ma techtlapojpolui uan ma techpaleui.

Israelitas tlen amo okitlakamatkej Jehová, omikej kanin tlauaki pampa inyolo otlakuauak uan amo otlaneltokakej itech Jehová

7, 8. (1) ¿Ken kiteititia tlen okinpanok israelitas toyolo uelis tlakuauas? (2) ¿Tlen techmachtia tlen okinpanok israelitas?

7 Ijkuak israelitas okiskej itech Egipto, okitakej ijkuak Jehová okichi uejueyij milagros. Pero ijkuak yiajsiskiaj itech Tlali tlen Jehová okijto Kinmakaskia, inyolo otlakuauak. ¿Tleka? Pampa amo otlaneltokakej itech toTajtsin Dios, omomojtijkej uan okitenejkej Moisés. Noijki okijtojkej okinekiayaj mokuepaskej Egipto, kanin okatkaj tlakeualmej. Jehová omoyolkoko miak uan okintlajtlani hasta keman kitlakaitaskiaj (Números 14:1-4, 11; Salmo 78:40, 41). Nonmej israelitas omikej kanin tlauaki pampa inyolo otlakuauak uan amo otlaneltokakej itech Jehová.

8 ¿Tlen techmachtia tlen okinpanok israelitas? Ayakmo miak poliui pampa yetos Xochitlali, uan moyejyekojtok totlaneltokilis. Ik non, moneki ma tikitakan kox tikpiaj chikauak totlaneltokilis. ¿Ken uelis tikchiuaskej? Ma timokuayejyekokan tlen okijto Jesús itech Mateo 6:33 uan ma timotlajtlanikan: “¿Kiteititia tlen nikchiua melauak nitlaneltoka itech tlen okijto Jesús? ¿Amo nias nechikolmej noso amo nitetlapouis pampa nikneki niktlanis okachi tomin? ¿Tlen nikchiuas tla sapanoa nitekiti uan ayakmo itlaj nikneki nikchiuas? ¿Nikchiuas ken tlaltikpaktlakamej uan ayakmo niktekichiuilis Jehová?”.

9. ¿Tleka moneki ma tikyejyekokan totlaneltokilis, uan ken uelis tikchiuaskej?

9 Tla amo tiktlakamatij tlen kijtoa Biblia itech akinmej iuan timouikaskej, akinmej kinkixtiaj itech tlanechikol noso tlen ika timoyolpaktiskej, toyolo uelis tlakuauas. Tla ijkon techpanos, totoka ma tikchiuakan tlen kijtoa 2 Corintios 13:5: “Nomejwah nomonewiah ximoyejyekokah kox  milák nonkipiah tlaneltokálistli”. ¿Uan ken uelis tikyejyekoskej totlaneltokilis? Tla timokuayejyekoaj itech nochi tlen tikchiuaj uan ika Biblia timoyektlaliaj.

MA TIYETOKAN KEN TLALI YAMANKI

10. ¿Tlen techpaleuis ma tiyetokan ken tlali yamanki itech imauan Jehová?

10 Pampa nochipa tiyetoskej ken tlali yamanki, Jehová otechmakak Biblia, tlanechikol uan tetlapouilistli. Moneki mojmostla ma tiktlajtoltikan Biblia uan itech ma timokuayejyekokan pampa non techpaleuis ma tiyetokan ken tlali yamanki itech imauan Jehová. Ye okinnauati tekiuajkej itech Israel ma kijkuilokan se copia itech Tlanauatil uan mojmostla ma kitlajtoltikan (Deuteronomio 17:18, 19). Tlatitlanilmej okimatiayaj omonekiaya kitlajtoltiskej iTlajtol toTajtsin Dios uan itech mokuayejyekoskiaj pampa kuali tetlapouiskiaj. Ik non, ijkuak okijkuilojkej Escrituras Griegas miak veces okijkuilojkej seki tlajtolmej tlen kisaj itech Escrituras Hebreas. Uan ijkuak otetlapouiayaj, nochtin okinmiluiayaj ma kitlajtoltikan iTlajtol toTajtsin Dios (Hechos 17:11). Tejuan noijki mojmostla moneki ma tiktlajtoltikan Biblia uan itech ma timokuayejyekokan (1 Timoteo 4:15). Nin techpaleuia ma tiyetokan tiyolyamankej uan ma tikkauilikan Jehová ma techyektlali.

Ma tiktekitiltikan nochi tlen Jehová techmaka pampa ma tiyetokan ken tlali yamanki. (Xikinmita párrafos 10 a 13).

11, 12. Ika se neskayotl xikijto ken kitekitiltia Jehová tlanechikol pampa techyektlalis.

11 Jehová kimati tlen techpoloa uan kitekitiltia tlanechikol pampa techyektlalis. Oksepa ma timotlapouikan itech Jim,  akin otikijtojkej itech párrafo 4. Ye okipatlak iyelis ijkuak se tlayekanki okipaleui. Jim kijtoa: “Amo keman onechtene nion okijto onikmotemoli tlen onechpanotoka. Onechyolchika uan okiteititi melauak okinekiaya nechpaleuis”. Ijkuak opanok kanaj eyi metstli, tlayekanki okiyole ma uia nechikol. Ompa kuali okiselijkej, ik non, okipatlak ken omokuayejyekoaya. Okitak amo omonekiaya nochipa mokuayejyekojtos itech tlen okimachiliaya. Tlayekankej uan isiua okiyolchikajkej, uan yolik oksepa opejki kitekichiuilia Jehová. Noijki okipaleui kitlajtoltis tlamachtil “Jehová no tiene la culpa” uan “Sirva a Jehová lealmente”, itech revista La Atalaya (ika náhuatl del centro Akin Tetlapouijtok) 15 de noviembre 1992.

12 Satepan, Jim oksepa opejki tekiti ken tlayekanki. Ijkuakon, opejki kinpaleuia miakej tokniuan tlen noijki kipiaj ouijkayotl ken ye okipixki uan noijki pampa ma kipiakan chikauak intlaneltokilis. Ye kijtoa okineltokaya kuali omouikaya iuan toTajtsin Dios pero amo ijkon okatka. Kiyolkokoa pampa omoueyineki uan non okichi ma kita san tlen amo kuali okichiuayaj oksekimej uan amo itech tlen kuali (1 Corintios 10:12).

Tla tikchiuaj ken Cristo ijkuak titetlapouiaj, tlaltikpaktlakamej kinekiskej techkakiskej uan uelis kuali techitaskej

13. (1) ¿Tlen techpaleuia ijkuak titetlapouiaj? (2) ¿Akinmej kinpaleuia ijkuak titetlapouiaj?

13 Tetlapouilistli techyektlalia uan techpaleuia okachi kuali ma tikpiakan toyelis. ¿Tleka? Pampa ijkuak titetlapouiaj moneki tikteititiskej yolyamanilistli uan noijki tlen uits itech espíritu santo (Gálatas 5:22, 23). Ximokuayejyeko, pampa titetlapouia nin yomitspaleui kuali xikpia moyelis. Tla tikchiuaj ken Cristo ijkuak titetlapouiaj, tlaltikpaktlakamej kinekiskej techkakiskej uan uelis kuali techitaskej. Se neskayotl, itech ueyi altepetl Australia, ome tokniuan otetlapouitoj ikalijtik se siuatl tlen okualanki uan amo kuali okinseli. Pero tokniuan okikakej ika tlakaitalistli. Satepan, nin siuatl okiyolkoko tlen okichi uan okijkuilo se carta tlen okititlanki itech Kali kanin tekitij iTlaixpantijkauan Jehová uan okijto ma kitlapojpoluikan. Okijto: “Amo kuali onikchi ijkuak amo onikinseli ome tlaltikpaktlakamej tlen otetlapouijtokaj itech iTlajtol toTajtsin Dios”. Nin techmachtia moneki ma tiyetokan tiyolkualmej ijkuak titetlapouiaj. Ken tikitaj, ijkuak titetlapouiaj amo san oksekimej kinpaleuia, noijki techpaleuia ma tikyektlalikan toyelis.

TETAJMEJ MONEKI MOPALEUISKEJ IUAN JEHOVÁ IJKUAK KINYEKTLALIAJ INKONEUAN

14. ¿Tlen moneki kichiuaskej tetajmej tla kinekij kuali kinyektlaliskej inkoneuan?

14 Miakej konemej yolyamankej uan kinekij ma kinmachtikan (Mateo 18:1-4). Ik non, tetajmej moneki kinpaleuiskej inkoneuan ma momachtikan tlen tlamachtia Biblia uan ma kipatioitakan (2 Timoteo 3:14, 15). Tla tetajmej kinekij kuali kinyektlaliskej inkoneuan, moneki yejuan kipatioitaskej tlen tlamachtia Biblia uan  kitlakamatiskej tlen kijtoa. Ijkon inkoneuan amo oui kipatioitaskej tlen tlamachtia Biblia uan kajsikamatiskej intatajuan uan Jehová kinyektlaliaj pampa kintlasojtlaj.

15, 16. Ijkuak se tekone kikixtiaj itech tlanechikol, ¿tlen moneki kichiuaskej tetajmej pampa kiteititiskej tlaneltokaj itech Jehová?

15 Maski tetajmej kinmachtiskej inkoneuan tlen tlamachtia Biblia, ualeua sekimej kikauaj Jehová noso kinkixtiaj itech tlanechikol. Ijkuak ijkon panoa, inkalchanejkauan sapanoa tlajyouiaj. Se tokni tlen chanti itech ueyi altepetl Sudáfrica okijto: “Ijkuak nokni okikixtijkej itech tlanechikol yetoskia ken omikik. Sapanoa otechyolkoko”. Pero ¿tlen okichi ye uan itatajuan? Okitlakamatkej tlen kijtoa Biblia (xiktlajtolti 1 Corintios 5:11, 13). Itatajuan okimatiayaj omonekiaya kitlakamatiskej toTajtsin Dios. Okajsikamatkej okikixtijkej itech tlanechikol pampa Jehová kitlasojtla. Ik non, okinotsayaj inkone san ijkuak sapanoa omonekiaya.

16 ¿Ken omomachiliaya inkone? Satepan, ye okijto: “Onikmatiaya nokalchanejkauan amo onechkokoliayaj. Yejuan san okitlakamatkej Jehová uan ialtepe”. Noijki okijto okitak san ye Jehová uelis kipaleuiskia uan kitlapojpoluiskia, ik non, sapanoa omonekiaya iuan mouikas. Ijkuak nin telpochtli oksepa opejki kitekichiuilia Jehová, ikalchanejkauan sapanoa oyolpakej. Melauak, tla nochipa tiktlakamatij Jehová, kuali tikpiaskej tonemilis uan tiyolpakiskej (Proverbios 3:5, 6; 28:26).

Tla nochipa tiktlakamatij Jehová uan tiyolyamankej, ye nochipa techpatioitas

17. ¿Tleka moneki nochipa tikchiuaskej itlanekilis Jehová uan ken techpaleuia tla ijkon tikchiuaj?

17 Teotlajtojki Isaías okijto judíos tlen okatkaj Babilonia moyolkuepaskiaj uan kijtoskiaj: “Oh Jehová, te titoTajtsin. Tejuan titlali, uan te ken akin tlachijchiua ika tlali; tinochtin otitechchijchi ika moma”. Uan noijki kiluiskiaj: “Amo nochipa xikilnamikto totlajtlakol. Xitechita, timitstlatlaujtiaj, tinochtin timoaltepe” (Isaías 64:8, 9). Nochipa ma tiktlakamatikan Jehová uan ma tiyetokan tiyolyamankej. Ma tikchiuakan itlanekilis, ijkon nochipa techpatioitas ken Daniel. Jehová techyektlalijtos ika Biblia, ika espíritu santo uan ika ialtepe pampa satepan tiyetoskej “ipilwah n Dios” uan ayakmo tikpiaskej tlajtlakoli (Romanos 8:21).

^ párr. 2 Jeremías 18:6 kijtoa: “¿Amo uelis namechchiuilis ken nin akin tlachijchiua ika tlali, oh kali Israel? Ijkon kijtoa Jehová. ¡Xikitakan! Ijkon ken tlali tlen kajki itech imauan akin tlachijchiua ika tlali, ijkon nankatej namejuan itech nomauan, oh kali Israel”.

^ párr. 3 2 Crónicas 26:4 kijtoa: “Ye okichiuaya tlen kuali iixpan Jehová, ijkon ken okichi itajtsin tlen omotokayotiaya Amasías”. Uan 26:16 kijtoa: “Pero ijkuak opejki mochiua okachi ueyititok, iyolo opejki moueyineki hasta okichi tlen amo kuali, ik non, ayakmo okatka yolmelajki iixpan Jehová akin okatka iDios uan okalak itech iteokal Jehová uan okitlati kopali itech altar kanin okitlatiayaj kopali”. Uan 26:19 kijtoa: “Pero Uzías sapanoa okualanki ijkuak okipixtoka kopalkaxitl kanin okitlatiayaj kopali, uan ken okualanki iuan teopixkej, oualmonexti lepra iixkuak inmixpan teopixkej itech iteokal Jehová inauak altar kanin okitlatiayaj kopali”.

^ párr. 5 Salmo 119:165 kijtoa: “Kipiaj miak yolseuilistli akinmej kitlasojtlaj motlanauatil; amo itlaj kichiua ma uetsikan”.