Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok (tlen ika timomachtiaj)  |  Junio de 2016

Itlaj tlen okachi ipati amo ken diamantes

Itlaj tlen okachi ipati amo ken diamantes

Miakej sapanoa kinpatioitaj diamantes. Seki diamantes sapanoa patiojkej. Pero iixpan toTajtsin Dios onka itlaj tlen okachi ipati amo ken diamantes nion koskamej tlen patiojkej. ¿Tlen tlamantli?

 Haykanush, ye se siuatl tlen chanti iuan inamik itech ueyi altepetl Armenia. Yejuan yotetlapouiayaj pero ayamo omoapolaktiayaj. Se tonal, ik kanin chantij, siuatl okajsik se pasaporte. Itech pasaporte okatkaj tarjetas de banco uan noijki sapanoa miak tomin. Siuatl okilui inamik tlen okajsik.

Yejuan amo okipiayaj tomin uan omonekiaya kitlaxtlauaskej seki tlamantli. Pero amo okimokauijkej tomin uan okikauilitoj akin iaxka. Pero ijkuak okimakatoj akin iaxka tomin uan ikalchanejkauan, amo okineltokayaj. Haykanush uan inamik okiyekiluijkej yejuan omomachtijtokaj Biblia uan omomachtijkej amo ma tlachtekikan. Okintlapouijkej itech iTlaixpantijkauan Jehová uan okinmakakej amatlajkuilolmej tlen tlajtoaj itech Biblia.

Tlakatl uan ikalchanejkauan okinekiayaj kimakaskej tomin Haykanush, pero amo okiseli. Mostlatika, isiua tlakatl akin iaxka tomin okitato Haykanush uan inamik. Okinekiaya kintlasojkamatilis ika se anillo de diamantes.

Ijkon ken nin kalchanejke, miakej kintlajtlachialtiskia tlen okichijkej Haykanush uan inamik. Pero ¿kitlajtlachialtia Jehová non tlamantli? ¿Tlen mokuayejyekoa Jehová itech tlen okichijkej? ¿Kuali tlen okichijkej?

TIKPIASKEJ KUALI TOYELIS OKACHI IPATI

Amo oui intlanankilis nonmej tlajtlanilmej. ¿Tleka? Itekipanojkauan toTajtsin Dios kimatij okachi miak ipati kipiaskej inyelis ken ye uan amo ken oro, diamantes noso okse tlamantli kuajkualtsin. Jehová kipatioita tlen miakej tlaltikpaktlakamej amo kipatioitaj (Isaías 55:8, 9). Ye okachi kipatioita ijkuak itekipanojkauan mochijchikauaj kipiaskej inyelis ken ye.

Se neskayotl, ma tikitakan tlen kijtoa Biblia itech tlamatilistli uan ixtlamatilistli. Proverbios 3:13-15 kijtoa: “Yolpaki tlakatl tlen kajsi ixtlamatilistli uan tlakatl tlen kimati tlen kuali uan tlen amo kuali, okachi kuali kitlanis non uan amo ken plata; uan kitlanis non okachi kuali amo ken kipias oro. Nin tlen okachi kualtsin amo ken corales, nion nochi tlen okachi tikneki amo uelis yetos ken nin”. Ken tikitaj, Jehová okachi kipatioita ma tikpiakan ijkon toyelis uan amo ken tlamantli tlen patio.

¿Noijki kipatioita amo ma titlakajkayauakan?

Biblia kijtoa Jehová “amo tlakajkayawa” (Tito 1:2). Uan ye okinauati Pablo ma kintlajkuilili hebreos tlen okichiuayaj ken Cristo itech achto siglo: “Ximotiotsajtsilikah por tejwah. Tejwah kuali tikmatokeh amitla tlajtlákoli tikpiah, porke tiknekih tikchiwaskeh nochi tlan kuali” noso amo titlakajkayauaj (Hebreos 13:18).

Jesucristo amo keman otlakajkaya. Se tonal, ueyi teopixki Caifás okilui: “Nimitsnawatia ika itoka Totajtsi Dios non yolitok, techili kox Te Ti Cristo, Ikone Dios”. Jesús amo otlakajkaya: ye okijto okatka Cristo noso Mesías. Okijto tlen melauak maski okimatiaya tlayekankej judíos uelis kiteluiskiaj uan tlanauatiskiaj ma kimiktikan pampa okijto tlen amo kuali itech toTajtsin Dios (Mateo 26:63-67).

¿Uan tejuan? ¿Tlen tikchiuaskej tla se tonal uelis itlaj tikseliskej pero moneki titlakajkayauaskej? ¿Tikpatlaskej seki tlamantli noso amo tikijtoskej seki tlamantli?

 ¿TLEKA UALEUA OUI TIKIJTOSKEJ TLEN MELAUAK?

Ken tikatej itech itlamian tonalmej, miakej san intech mokuayejyekoaj uan ‘satlawel kiwilitah tomi’, ik non, ualeua oui tikijtoskej tlen melauak (2 Timoteo 3:2). Ijkuak amo onka tomin noso tekitl, miakej tlachtekij noso tlakajkayauaj. Pampa miakej ijkon kichiuaj, kijtoaj uelis itlaj tikpiaskej pero tla titlakajkayauaj. Sekimej akinmej kichiuaj ken Cristo ualeua ijkon kichiuaj. Ik non, itech tlanechikol ayakmo kintlakaitaj ken achto (1 Timoteo 3:8; Tito 1:7).

Pero miakej kichiuaj ken Cristo. Kimatij okachi kuali kipiaskej inyelis ken toTajtsin Dios uan amo tlamantli tlen patio noso itlaj tlen kinpaleuis. Ik non, telpokamej tlen momachtiaj amo tlakajkayauaj pampa kipiaskej kuali calificaciones (Proverbios 20:23). Amo nochipa itlaj techtliokoliskej pampa tikijtoaj tlen melauak, ijkon ken  okipanok Haykanush. Pero toTajtsin Dios kijtoa nochipa ma tikijtokan tlen melauak pampa non tlen kuali. Ijkon kuali tikpiaskej totlalnamikilis, uan non tlen okachi ipati.

Ineskayo Gagik noijki techititia okachi kuali nochipa tikijtoskej tlen melauak. Ye kijtoa achto yetoskia iTlaixpantijka Jehová, otekitiaya itech se ueyi empresa. Pero iteko okijtoaya amo miak okitlaniaya pampa amo kitlaxtlauaskia impuestos. Ken Gagik otlayekanaya itech non tekitl, iteko okinekiaya ma kimaka tomin inspector pampa amo kijtoskia ken otlachtekiaya itech non ueyi empresa. Ik non, nochtin okimatiayaj Gagik amo okijtoaya tlen melauak. Pero satepan opejki momachtia Biblia uan ayakmo okinekiaya tlakajkayauas, maski kuali okitlaxtlauiayaj. Ik non, ye opejki tlanemaka uan desde ijkuak opejki, okitematilti iempresa inmixpan tekiuajkej uan okitlaxtla nochi impuestos (2 Corintios 8:21).

Gagik kijtoa: “Axkan ayakmo miak niktlani, ik non, oui onechchiuili nikinmakas tlen ika mopanoltiskej nokalchanejkauan. Pero axkan melauak niyolpaki. Kuali nikpia notlalnamikilis iixpan Jehová. Nikinmaka kuali neskayotl ome nokoneuan uan noijki nikpia tekitl itech tlanechikol. Inspectores uan oksekimej kimatij ne amo nitlachteki uan nikijtoa tlen melauak”.

JEHOVÁ TECHPALEUIA

Jehová kintlasojtla akinmej mochijchikauaj kipiaskej inyelis ken ye uan nochipa kijtoaj tlen melauak (Tito 2:10). Ye kijtoa nochipa techpaleuis tla tikpiaj toyelis ken ye. Jehová okinauati David ma kijkuilo: “Ne onikatka nitelpochtli, uan yoniueuejtik, pero amo onikitak ma kikauakan akin yolmelauak, nion ikoneuan ma kitemokan pan” (Salmo 37:25).

Ijkon okipanok Rut. Amo okika imonna maski yokipiaya miak xiuitl. Rut ochantito iuan imonna itech altepetl Israel, kanin uelis kiueyichiuaskia akin melauak toTajtsin Dios (Rut 1:16, 17). Ye amo otlachtekiaya, okachi kuali, chikauak otekitiaya pampa omotijtixiaya, ijkon ken okijtoaya Tlanauatil tlen okijkuilo Moisés. Jehová nochipa okimalui Rut uan imonna, ijkon ken noijki okimalui ueyi tekiua David satepan (Rut 2:2-18). Pero Jehová amo san okimalui Rut. Okichi itech ikalchanejkauan ma kisa ueyi tekiua David uan Mesías (Rut 4:13-17; Mateo 1:5, 16).

Itech ninmej tonalmej, miakej itekipanojkauan toTajtsin Dios oui kitlanij tomin pampa kipiaskej tlen ika mopanoltiskej. Pero amo tlachtekij nion tlakajkayauaj, okachi kuali, chikauak tekitij. Ijkon kiteititiaj okachi ipati kipiaskej inyelis ken toTajtsin Dios uan amo miak tlamantli (Proverbios 12:24; Efesios 4:28).

Miakej kichiuaj ijkon ken Rut; kineltokaj toTajtsin Dios kinmaluis. Kineltokaj tlen kijtoa Jehová: “Ayik nimitskajtewas moselti, nion nimitsilkawas” (Hebreos 13:5). Jehová nochipa kinmaluia akinmej amo tlachtekij uan kijtoaj tlen melauak. Nochipa kinmaka itekipanojkauan tlen ika mopanoltiskej (Mateo 6:33).

Miakej sapanoa kinpatioitaj diamantes uan okseki tlamantli. Pero toTajtsin Dios amo kinpatioita diamantes nion koskamej tlen patiojkej; ye okachi kipatioita amo ma titlachtekikan, nochipa ma tikijtokan tlen melauak uan kuali ma tikpiakan toyelis.

Tla nochipa tikijtoaj tlen melauak, totlalnamikilis amo techkuejsos ijkuak titetlapouiskej.