Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok (tlen ika timomachtiaj)  |  Junio de 2016

Amo ma techijtlako tlen oksekimej amo kuali kichiuaj

Amo ma techijtlako tlen oksekimej amo kuali kichiuaj

“Sepa ximotlapojpoluikan” (COLOSENSES 3:13, TNM).

TLAKUIKALMEJ: 53 UAN 28

1, 2. ¿Tlen okijto Jehová itech ken momiaktiliskia ialtepe?

ITECH nochi Tlaltikpak, katej miakej tlaltikpaktlakamej tlen kitlasojtlaj toTajtsin Dios uan kinekij kitekichiuiliskej. Yejuan iTlaixpantijkauan Jehová. Uan maski ualeua kichiuaj tlen amo kuali, Jehová kinyekana uan kinteochiua ika iespíritu santo. Ma tikitakan ken yokichi.

2 Itech xiuitl 1914, amo miakej okiueyichiuayaj Jehová. Pero ken ye kiteochiua tetlapouilistli, sapanoa miakej tlaltikpaktlakamej okixmatkej tlen melauak itech Biblia uan omochijkej iTlaixpantijkauan Jehová. Ye okijto ken ialtepe momiaktiliskia: “Tlen tsikitsin mochiuas mil, uan tlen amo ueyi mochiuas se altepetl chikauak. Ne Jehová noneuian, nikchiuas totoka ma mochiua ijkuak monekis” (Isaías 60:22). Tlen omoijto mochijtok itech ninmej tonalmej. Ialtepe Jehová se ueyi altepetl kanin katej kanaj 8,000,000 (ocho millones) tlaltikpaktlakamej. Nin kiteititia ialtepe Jehová okachi ueyi uan amo okseki altepemej tlen katej itech Tlaltikpak.

3. ¿Ken yokiteititijkej itekipanojkauan toTajtsin Dios tetlasojtlaj?

 3 Itech ninmej tonalmej, Jehová kinpaleuia itekipanojkauan okachi ma motlasojtlakan. “Dios Ye n tlasojtlálistli” uan kineki itekipanojkauan noijki ma motlasojtlakan (1 Juan 4:8). Jesús okinnauati imachtijkauan ma motlasojtlakan uan noijki okinmilui: “Tla nomejwah nonmosepantlasojtlah, nochteh n tlaltikpaktlakah nomechitaskeh nomejwah de milajka notlamachtijkawah” (Juan 13:34, 35). Itech ninmej tonalmej itekipanojkauan Jehová kiteititiaj nochipa motlasojtlaj uan noijki ijkuak onka guerras. Se neskayotl, itech Segunda Guerra Mundial omikej kanaj 55,000,000 (cincuenta y cinco millones) tlaltikpaktlakamej. Pero iTlaixpantijkauan Jehová amo otemiktijkej (xiktlajtolti Miqueas 4:1, 3). * Nin okinpaleui amo ma tlajtlakolchiuakan (Hechos 20:26, TNM).

4. ¿Tleka sapanoa momiaktilijtok ialtepe toTajtsin Dios?

4 Axkan, ialtepe toTajtsin Dios momiaktilijtok maski ikaj sapanoa kinkokolia. Ye Satanás akin “kinawatijtok nin tlaltíkpaktli” (2 Corintios 4:4). Satanás kiyekana tlen kichiuaj políticos uan tlen moijtoa itech televisión, radio noso oksekan uan kintekitiltia pampa amo kineki ma titetlapouikan. Pero ye amo uelis kitsakuilis tetlapouilistli. Kimati “mach ok wejkawitl nentinemis”, ik non, mochijchikajtok pampa ayakmo ma tiktekichiuilikan Jehová (Apocalipsis 12:12).

¿TIYETOSKEJ TIYOLMELAJKEJ MASKI OKSEKIMEJ KICHIUASKEJ TLEN AMO KUALI?

5. ¿Tleka ualeua techyolkokoaj tokniuan? (Xikita tlaixkopinal tlen ika peua tlamachtil).

5 Tiitekipanojkauan toTajtsin Dios tikmatij moneki ma tiktlasojtlakan toTajtsin Dios uan oksekimej. Jesús okijto: “‘Xiktlasojtla Moteko Dios ika nochi moyolo, ika nochi moalma iwa ika nochi motlalnamikilis’. Ye nin tlanawátili non okachi tlayakantok iwa okachi weyi kijtosneki. Iwa onka ok se tlanawátili non kimoiknitia iwa kijtoa: ‘Xiktlasojtla mokni kemi te timotlasojtla’” (Mateo 22:35-39). Pero Biblia kijtoa tinesij titlajtlakolejkej pampa Adán otlajtlakolchi (xiktlajtolti Romanos 5:12, 19). Ik non, ualeua se tokni uelis kijtos itlaj tlen techyolkokos. Ijkuak ijkon techpanos, ¿tlen tikchiuaskej? ¿Ok tiktlasojtlaskej Jehová? ¿Tiyetoskej tiyolmelajkej iixpan Jehová uan ialtepe? (Xikita recuadro “¿Tlen kijtosneki?”). Biblia kijtoa sekimej itekipanojkauan Jehová okijtojkej noso okichijkej seki tlamantli tlen okinyolkoko oksekimej. Ma tikitakan tlen uelis timomachtiskej itech tlen okinpanok.

Tla tiyetoskiaj itech tonalmej ijkuak okatka Elí uan ikoneuan, ¿tlen tikchiuaskiaj? (Xikita párrafo 6).

6. ¿Tlen amo kuali okichi Elí?

6 Ma timomachtikan itech Elí. Ye okatka ueyi teopixki itech Israel uan ome ikoneuan amo okitlakamatiayaj Jehová. Biblia kijtoa ikoneuan Elí okatkaj amo yolkualmej uan amo okitlakaitayaj Jehová (1 Samuel 2:12). Elí okimatiaya ikoneuan okichijtokaj tlen amo kuali. Pero amo okinyektlali ken omonekiaya. Satepan,  Jehová okitlajyouilti Elí uan ikoneuan. Uan noijki, nion se iixui Elí omochi ueyi teopixki (1 Samuel 3:10-14). Ma timokuayejyekokan tikatej itech tonalmej ijkuak okatka Elí uan ikoneuan uan tikitaj ye kinkauilia ma kichiuakan tlen amo kuali. ¿Tlen tikchiuaskiaj? ¿Ayakmo titlaneltokaskiaj itech Jehová uan ayakmo tiktekichiuiliskiaj?

7. ¿Ken otlajtlakolchi David, uan tlen okichi toTajtsin Dios?

7 Axkan ma timotlapouikan itech David. Ye okipiaya kuali iyelis, ik non, Jehová sapanoa okitlasojtlaya (1 Samuel 13:13, 14; Hechos 13:22). Pero David noijki otlajtlakolchi. Omotekak iuan isiua se isoldado, akin omotokayotiaya Urías uan tlen okatka itech guerra. Siuatl kipiaskia ikone David. Pero ken David amo okinekiaya oksekimej ma kimatikan, okinotski Urías uan okilui ma uia ikalijtik. David okinekiaya Urías ma moteka iuan isiua. Ijkon nochtin kijtoskiaj konetl yetoskia ikone Urías. Pero Urías amo okinek yas ikalijtik. Ik non, David omokuayejyeko ken kichiuaskia pampa Urías ma miki itech okse guerra. David uan ikalchanejkauan sapanoa otlajyouijkej pampa ye otlajtlakolchi (2 Samuel 12:9-12). Pero Jehová okiknomatki uan okitlapojpolui. Jehová okimatiaya David okinekiaya kichiuas tlen kuali (1 Reyes 9:4). Tla tiyetoskiaj itech nonmej tonalmej, ¿tlen tikmachiliskiaj pampa tlen okichi David? ¿Ayakmo tiktekichiuiliskiaj Jehová?

8. (1) ¿Tlen tlamantli okijto Pedro kichiuaskia? (2) ¿Tleka Jehová okimakak Pedro okseki tekitl maski okichi tlen amo kuali?

8 Onka okse neskayotl itech Biblia:  tlatitlanil Pedro. Jesús okipejpenki pampa ma yeto itlatitlanil. Pero Pedro ualeua okijto noso okichi itlaj tlen amo kuali. Se neskayotl, se tonal okijto amo keman kikauaskia Jesús, maski oksekimej kikauaskiaj (Marcos 14:27-31, 50). Pero ijkuak okikitskijkej Jesús, nochtin itlatitlaniluan okikajtejkej, noijki Pedro. Uan eyi uelta, Pedro okijto amo okixmatiaya Jesús (Marcos 14:53, 54, 66-72). Pero Pedro omoyolkoko ijkuak ijkon okichi, ik non, Jehová okitlapojpolui uan satepan okimakak okseki tekitl. Tla tiyetoskiaj tiimachtijkauan Jesús itech nonmej tonalmej uan tikmatiskiaj tlen okichi Pedro, ¿ok titlaneltokaskiaj itech Jehová?

Jehová nochipa kichiuas tlen kuali uan tlen moneki

9. ¿Tleka tikneltokaj Jehová nochipa kichiuas tlen kuali uan tlen moneki?

9 ¿Tlen techmachtiaj neskayomej tlen yotikinmitakej? Sekimej itekipanojkauan Jehová okichijkej tlen amo kuali uan okintlajyouiltijkej oksekimej. Tla ijkon techpanos, ¿tlen tikchiuaskej? ¿Ayakmo tiaskej nechikolmej uan tikkauaskej Jehová uan ialtepe? ¿Noso tikilnamikiskej Jehová teiknomati uan kikauilijtok akin okichi tlen amo kuali ma moyolkuepa? Pero ¿tla akin otlajtlakolchi amo moyolkuepa? ¿Tikneltokaskej Jehová kimati tlen panotok uan kichiuas tlen moneki? Tla moneki, ye uelis kikixtis itech tlanechikol akin otlajtlakolchi. Pero moneki ma tikneltokakan Jehová nochipa kichiuas tlen kuali uan tlen moneki.

MA TIYETOKAN TIYOLMELAJKEJ

10. ¿Tlen okajsikamatki Jesús itech tlen amo kuali okichi Judas Iscariote uan Pedro?

10 Biblia techtlapouia itech miakej itekipanojkauan toTajtsin Dios tlen okatkaj yolmelajkej maski oksekimej okichijkej tlen amo kuali. Jesús se kuali neskayotl. Ijkuak kinpejpenaskia doce itlatitlaniluan, nochi se yoak okitlatlaujti iTajtsin pampa ma kipaleui. Pero satepan, Judas Iscariote, akin okatka itlatitlanil okitemaktili. Noijki, tlatitlanil Pedro okijto amo okixmatiaya Jesús (Lucas 6: 12-16; 22:2-6, 31, 32). Jesús okimatiaya Jehová uan oksekimej imachtijkauan amo intlajtlakol tlen okichi Judas Iscariote uan Pedro. Ik non, Jesús nochipa okatka iuan Jehová uan okitekichiuiliaya ika yolmelajkayotl. Ik non, Jehová okiteochi uan okimakak yolilistli uan satepan okitlali ken ueyi tekiua itech Tekiuajkayotl tlen kajki iluikak (Mateo 28:7, 18-20).

11. ¿Ken okijto Biblia yetoskiaj itekipanojkauan toTajtsin Dios itech itlamian tonalmej?

11 Ineskayo Jesús techititia ma tiyetokan tiyolmelajkej iixpan Jehová uan ialtepe. Uan onka tlamantli tlen kiteititia tleka moneki tiyetoskej tiyolmelajkej. Tikitaj ken Jehová techyekantok itech itlamian tonalmej. Techpaleuia ma titlamachtikan tlen melauak itech Biblia itech nochi Tlaltikpak. San tejuan ijkon titlamachtiaj. Uan noijki san sekan tikatej uan tiyolpakij pampa nochi tlen toTajtsin Dios techmachtia. Biblia okijto itekipanojkauan toTajtsin Dios melauak yolpakiskiaj (Isaías 65:14).

Amo kuali ma tikkauakan Jehová nion ialtepe pampa ikaj okichi tlen amo kuali

12. ¿Tlen moneki tikchiuaskej ijkuak oksekimej kichiuaj tlen amo kuali?

12 Sapanoa tiyolpakij pampa Jehová techyekana uan techpaleuia ma tikchiuakan  miak tlamantli tlen kuali. Akinmej Satanás kinyekantok amo yolpakij uan amo kipiaj se chialistli. Ik non, ijkuak sekimej tokniuan kichiuaskej tlen amo kuali, ma timokuayejyekokan ken moneki tikinmitaskej uan tlen moneki tikchiuaskej. Amo ma tikkauakan Jehová nion ialtepe. Non amo kuali, okachi kuali, moneki ma tiyetokan tiyolmelajkej iixpan Jehová uan ma tikkauilikan ma techyekana. Ma tikitakan ken uelis tikchiuaskej.

¿TLEN MONEKI TIKCHIUASKEJ?

13, 14. (1) ¿Tlen moneki tikchiuaskej tla se tokni kijtoa noso kichiua itlaj tlen techyolkokoa? (2) ¿Tlen moneki ma tikilnamikikan?

13 ¿Tlen moneki tikchiuaskej tla se tokni kijtoa noso kichiua itlaj tlen techyolkokoa? Biblia kijtoa amo san niman ma tikualanikan nion ma timoyolkokokan (Eclesiastés 7:9). Tinochtin titlajtlakolejkej uan tikchiuaj tlen amo kuali. Ik non, moneki ma timoyolseuikan uan ma tikilnamikikan ualeua tokniuan kijtoskej noso kichiuaskej itlaj tlen amo kuali. Noijki, amo kuali nochipa ma timokuayejyekojtokan itech tlen amo kuali kichiuaj oksekimej, pampa ayakmo tiktekichiuiliskej Jehová ika pakilistli. Uelis ayakmo itech titlaneltokaskej uan tikkauaskej ialtepe. Tla ijkon tikchiuaskej, ayakmo uelis tiktekichiuiliskej nion uelis tiyetoskej itech Xochitlali.

14 Pero ijkuak oksekimej techyolkokoskej, ¿tlen techpaleuis ma tiktekichiuilikan Jehová ika pakilistli? Nochipa ma tikilnamikikan ninmej tlajtolmej: “¡Xikitakan!, nikchiuas se yankuik iluikak uan se yankuik Tlaltikpak; uan nochi tlamantli tlen achto opanok ayakmo moilnamikis, nion ayakmo yetos itech toyolo” (Isaías 65:17; 2 Pedro 3:13). Jehová techmakas nonmej tlateochiualismej tla tikatej tiyolmelajkej.

15. ¿Tlen okijto Jesús moneki tikchiuaskej ijkuak oksekimej kichiuaj tlen amo kuali?

15 Axkan ayamo tikatej itech Xochitlali, pero tla ikaj techyolkokoa, ma timokuayejyekokan itech tlen Jehová kineki ma tikchiuakan. Se neskayotl, Jesús okijto: “Tla nomejwah nonkintlapojpolwiah non nomechtoktiah tlan amo kuali, Nomotajtsi non kajki ilwikak noiwa nomechtlapojpolwis. Pero tla amo nonkintlapojpolwiah n tlakah, noiwa Nomotajtsi amo nomechtlapojpolwis”. Uan ijkuak Pedro okitlajtlani Jesús kox moneki titetlapojpoluiskej “chikome welta”, Jesús okinankili “eyipóali iwan májtlaktli iwa chikomeh welta” moneki titetlapojpoluiskej. Ye otechmachti moneki nochipa ma tikintlapojpoluikan oksekimej (Mateo 6:14, 15; 18:21, 22).

16. ¿Tlen kuali neskayotl okiteititi José?

16 Ineskayo José techmachtia tlen moneki tikchiuaskej ijkuak oksekimej techyolkokoskej. Jacob san ome ikoneuan okinpixki iuan Raquel: José uan iikni xokoyotl. Jacob okinpiaya ok majtlaktli ikoneuan, pero ye José akin okachi okitlasojtlaya. Ik non, ikniuan José ochauatikej. Pampa sapanoa okikokoliayaj, okinemakakej ken tlakeuali. Itekouan José okiuikakej itech ueyi altepetl Egipto. Ijkuak opanok miak  xiuitl, ueyi tekiua itech Egipto okitlali José ken se ueyi tlayekanki itech nochi altepetl. Ueyi tekiua okitlajtlachialti nochi tlamantli kuali tlen okichiuaya José. Seki xiuitl satepan, ikniuan José okikoatoj tlakuali itech Egipto pampa amo okatka itech inmialtepe. Ijkuak omotlapouijkej iuan José, amo okixmatkej. Pero ye kema okinmixmatki. Maski yejuan okitlajyouiltijkej, ye amo okintlajyouilti. Okinyejyeko pampa kitaskia kox yokipatlakej inyelis. Ijkuak okitak okatkaj yolkualmej, okinmilui ye okatka inmikni. Satepan, okinyolchika uan okinmilui: “Amo ximomojtikan. Ne namechmakatos tlakuali uan noijki pampa namokonetsitsiuan” (Génesis 50:21).

17. ¿Tlen tikchiuas ijkuak oksekimej kichiuaskej tlen amo kuali?

17 Ma tikilnamikikan tinochtin tikchiuaj tlen amo kuali, ik non, ualeua tikinyolkokoaj oksekimej. Ijkuak tikitaj ikaj otikyolkokojkej, ma tikchiuakan tlen kijtoa Biblia. Ma timotlapojpoluikan iuan akin otikyolkokojkej (xiktlajtolti Mateo 5:23, 24). Kuali timomachiliaj ijkuak oksekimej techtlapojpoluiaj. Ik non, tejuan noijki moneki titetlapojpoluiskej. Biblia techiluia: “Ximoxikojtokan uan sepa ximotlapojpoluikan tla ikaj amo kuali okichiuilijkej. Ijkon ken Jehová sepa onamechtlapojpolui, noijki ijkon namejuan moneki xikchiuakan” (Colosenses 3:13, TNM). Tla melauak tikintlasojtlaj tokniuan, amo tikilnamiktoskej tlen otechchiuilijkej (1 Corintios 13:5). Uan tla titetlapojpoluiaj, Jehová techtlapojpoluis. Ik non, ma tikinmiknomatikan oksekimej ijkon ken Jehová techiknomati (xiktlajtolti Salmo 103:13, 14). *

^ párr. 3 Miqueas 4:1 Kijtoa: “Uan itech itlamian tonalmej tepetl kanin kajki ichan Jehová kuali yetos inkuapak tepemej, uan mouejkapantlalis inkuapak tepemej; uan inauak moneki uitsej miakej altepemej”. Uan 4:3 kijtoa: “Uan ye kinmixkomakas miakej altepemej, uan kiyektlalis nochi tlamantli itech uejueyij altepemej tlen katej uejka. Uan kinkuepaskej inmiespadas tlen ika tlameuaskej uan inlanzas kikuepaskej tlen ika kitekiskej xiuitl. Ayakmo moteuiskej ika espadas se ueyi altepetl iuan okse, nion momachtiskej guerra”.

^ párr. 17 Salmo 103:13, 14 kijtoa: “Ijkon ken se teta kinmiknomati ikoneuan, Jehová kinmiknomati akinmej kitlakaitaj. Pampa ye kuali kimati ken tichijchijtokej, uan kilnamiki tejuan titlali”.