Xikita nochi

Tlen kiualika

TLAMACHTIL 30

TLAKUIKALI 36 Ma tikmaluikan toyolo

¿Tlen techmachtiaj tekiuajkej tlen otlanauatijkej Israel?

¿Tlen techmachtiaj tekiuajkej tlen otlanauatijkej Israel?

“Namejuan oksepa nankitaskej akin yolmelauak uan akin amo yolkuali, akin kitekichiuilia toTajtsin Dios uan akin amo kitekichiuilia” (MAL. 3:18).

NIN TLEN TIMOMACHTISKEJ

Tikitaskej ken okinmixkomakak Jehová tekiuajkej tlen otlanauatiayaj Israel. Non techpaleuis matikitakan tlen moneki tikchiuaskej tla tiknekij tikyolpaktiskej.

1, 2. ¿Tlen kijtoua Biblia okichijkej sekimej tekiuajkej tlen otlanauatijkej Israel?

 BIBLIA kijtoua kanaj 40 tlakamej otlanauatijkej altepetl Israel uan noijki kijtoua tlen tlamantli okichijkej. a Biblia techiluia sekimej tekiuajkej tlen okatkaj yolkualmej satepan okichijkej tlen amo kuali. Matikitakan tlen okichi David. Ye okatka se tekiua yolkuali ikinon Jehová okijto: “Onechtekichiuili ika nochi iyolo porque okichi san tlen nikita kuali” (1 Rey. 14:8). Pero satepan otlajtlakolchi. Omotekak iuan se siuatl tlen yokipiaya inamik. Noijki satepan otlanauati makimiktikan inamik non siuatl (2 Sam. 11:​4, 14, 15).

2 Biblia noijki kijtoua sekimej tekiuajkej tlen okatkaj amo yolkualmej okichijkej tlen kuali. Matikitakan tlen okichi tekiua Rehoboam. Jehová amo kuali okitaya porque okichi tlen amo kuali (2 Crón. 12:14). Pero ye otetlakamatki ijkuak Jehová okilui amo makintlajyouilti majtlaktli familias tlen okatkaj Israel uan makinkaua makipejpenakan intekiua. Noijki okinyektlali miakej altepemej para amo makalakikan akinmej okinkokoliayaj (1 Rey. 12:​21-24; 2 Crón. 11:​5-12).

3. ¿Tlen timotlajtlaniaj uan tlen timomachtiskej?

3 Tla nochtin tekiuajkej okichiuayaj tlen kuali uan tlen amo kuali, ¿tleka Jehová okijto sekimej okatkaj yolkualmej uan oksekimej amo? Matikitakan tlen moneki tikchiuaskej tla tiknekij tikyolpaktiskej Jehová. Tikitaskej eyi tlamantli tlen Jehová okitaya ijkuak okinmixkomakaya tekiuajkej. Ye okitaya kox melauak okitlasojtlayaj, kox melauak omoyolkopayaj uan kox okiueyichiuayaj ken kipaktia.

TEKIUAJKEJ OKITLASOJTLAYAJ JEHOVÁ IKA NOCHI INYOLO

4. ¿Tleka Jehová okinmitaya yolkualmej sekimej tekiuajkej uan oksekimej amo?

4 Jehová okinmitaya yolkualmej tekiuajkej tlen okitlasojtlayaj ika nochi inyolo. b Ijkon okichi tekiua Jehosafat (2 Crón. 22:9). Noijki Biblia kijtoua tlen okichi Josías. Kijtoua: “Ijkuak ayamo onesiaya, nion se tekiua omokopki iuan Jehová ijkon ken ye okichi ika nochi iyolo” (2 Rey. 23:25). Pero tekiua Salomón okichi tlen amo kuali uan “iyolo amo okatka ajsitok iuan Jehová” (1 Rey. 11:4). Noijki Biblia kijtoua tekiua Abiyam amo okitekichiuili Jehová ika nochi iyolo (1 Rey. 15:3).

5. ¿Tlen kijtosneki tiktekichiuiliskej Jehová ika nochi toyolo?

5 ¿Tlen kijtosneki tiktekichiuiliskej Jehová ika nochi toyolo? Tiktekichiuiliaj porque tiktlasojtlaj uan san ye tiknekij tikueyichiuaskej. Tejuan amo tiktekichiuiliaj porque ikaj technauatia noso tikchiuaj san porque moneki ijkon tikchiuaskej. Noijki moneki nochipa tiktlasojtlaskej Jehová.

6. ¿Ken uelis tiktlasojtlaskej Jehová ika nochi toyolo? (Proverbios 4:23; Mateo 5:​29, 30).

6 ¿Ken uelis tikchiuaskej ijkon ken tekiuajkej okichijkej uan tiktlasojtlaskej Jehová ika nochi toyolo? Moneki tikixtopeuaskej nochi tlamantli tlen amo techpaleuia matiktekichiuilikan Jehová ika nochi toyolo. San niman matikpatlakan tlen tikchiuaj tla tikitaj tikchijtokej itlaj tlen amo moneki tikchiuaskej. Matikitakan tlen ika timoyolpaktiaj, kox tiknekij tikpiaskej miak tlamantli uan matikitakan akinmej inuan timouikaj (xiktlajtolti Proverbios 4:23; Mateo 5:​29, 30).

7. ¿Tleka amo matikchiuakan tlen amo kuali?

7 Matikixtopeuakan nochi tlamantli tlen amo techpaleuia matiktekichiuilikan Jehová ika nochi toyolo. Xamo tikijtoskej amitlaj uelis kichiuas matikkauakan Jehová porque tiktekichiuiliaj miak. Matikitakan tleka ijkon tikijtouaj. Matikijtokan tikatej kiauak uan peua seua uan chikauak ejeka. Ijkuak tikalakij tokalijtik xamo titlatlatiaj pero amo tikkauaj matlapoto puerta porque tlamo san niman kalakis ejekatl uan peuas tisekuiskej. Nin techmachtia amo san moneki tiktekichiuiliskej miak Jehová. Moneki tikixtopeuaskej tlen amo kuali. Nin yetoskia ken tiktsakuaskej puerta uan ijkon amo kalakis “ejekatl” tlen kinauatia nin tlaltikpak. Nin kijtosneki amo kalakis nochi tlen amo kuali tlen uelis techijtlakos. Tla ijkon tikchiuaskej nochipa timouikaskej iuan Jehová uan tiktekichiuiliskej ika nochi toyolo (Efes. 2:2).

TEKIUAJKEJ OMOYOLKOPKEJ

8, 9. ¿Tlen okichijkej David uan Ezequías ijkuak okinyektlalijkej? (Noijki xikita foto).

8 Yotikitakej tekiua David otlajtlakolchi. Pero David okatka yolyamanki uan omoyolkopki ijkuak Natán okitlapoui uan okilui amo kuali tlen okichi (2 Sam. 12:13). Ye amo san okijto omoyolkopki porque okinekiaya Natán kuali makita uan amo okinekiaya tlajyouis. Tlen okijkuilo itech Salmo 51 kiteititia melauak omoyolkopki (Sal. 51:​3, 4, 17; kanin peua).

9 Noijki tekiua Ezequías otlajtlakolchi. Biblia kijtoua omoueyineki uan okiyolkoko toTajtsin Dios. Ikinon okikualani Jehová uan noijki altepemej Judá uan Jerusalén (2 Crón. 32:25). ¿Tleka opejki moueyineki? Xamo porque Jehová okimakak miak tlamantli, okipaleui makintlanili asirios noso opejki moueyineki porque Jehová okipajti. Xamo omoueyineki ijkuak okinmititi babilonios nochi tlen okipiaya. Ikinon profeta Isaías okiyektlali (2 Rey. 20:​12-18). Ezequías okatka yolyamanki uan omoyolkopki ijkon ken David okichi (2 Crón. 32:26). Jehová okijto okatka yolkuali porque ok okichi tlen kuali (2 Rey. 18:3).

David uan Ezequías okatkaj yolyamankej porque omoyolkopkej ijkuak okinyektlalijkej porque otlajtlakolchijkej. (Xikinmita párrafos 8 uan 9).


10. ¿Tlen okichi tekiua Amasías ijkuak okiyektlalijkej?

10 Tekiua Amasías tlen okatka Judá okichi tlen kuali pero amo okichi ika nochi iyolo (2 Crón. 25:2). ¿Tleka ijkon okichi? Jehová okipaleui makintlanili edomitas pero satepan opejki kinueyichiua dioses tlen okinueyichiuayaj itech non altepetl. c Satepan Jehová okititlanki se profeta makiyektlaliti pero ye amo okikak porque oyoltlakuauak (2 Crón. 25:​14-16).

11. ¿Tlen tikchiuaskej tla tiknekij matechtlapojpolui Jehová ijkon ken kijtoua 2 Corintios 7:​9, 11? (Noijki xikita foto).

11 ¿Tlen techmachtiaj tlen okichijkej tekiuajkej? Techmachtia moneki timoyolkopaskej uan ayakmo tikchiuaskej tlen otikchijkej. Pero ¿tlen tikchiuaskej tla otikchijkej itlaj tlen mota amo tlajtlakoli uan tlayekankej moneki techyektlaliskej? Amo matimokuayejyekokan Jehová ayakmo techselia uan amo matikintlauelitakan tlayekankej. Noijki matikilnamiktokan tekiuajkej tlen okatkaj yolkualmej ompa Israel noijki okinyektlalijkej uan okinyektlapouijkej (Heb. 12:6). Ikinon ¿tlen moneki tikchiuaskej tla techyektlaliskej? Matiyetokan tiyolyamankej, ayakmo matikchiuakan tlen otikchijtokaj uan matiktekichiuilikan Jehová ika nochi toyolo. Jehová techtlapojpoluis tla melauak timoyolkopaj (xiktlajtolti 2 Corintios 7:​9, 11).

Ijkuak techyektlaliskej matiyetokan tiyolyamankej, ayakmo matikchiuakan tlen otikchiuayaj uan matiktekichiuilikan Jehová ika nochi toyolo. (Xikita párrafo 11). f


TEKIUAJKEJ OKIUEYICHIJKEJ JEHOVÁ IJKON KEN YE KIPAKTIA

12. ¿Tlen miak ipati okichijkej tekiuajkej tlen okatkaj yolkualmej?

12 Jehová okinmitaya yolkualmej tekiuajkej tlen okiueyichiuayaj ijkon ken ye kipaktia. Noijki nonmej tekiuajkej okinyolchikauayaj oksekimej ijkon makichiuakan. Yejuan omotlapololtijkej pero omochijchikajkej kiueyichiuaskej san Jehová uan okinpojpolojkej dioses tlen oksekimej okinueyichiuayaj. d

13. ¿Tleka Jehová amo okitak yolkuali Acab?

13 ¿Tleka Jehová amo okinmitak yolkualmej sekimej tekiuajkej? Nonmej tekiuajkej amo san okichijkej tlen amo kuali. Matimokuayejyekokan tlen okichi tekiua Acab. Ye amo okatka yolkuali pero omoyolkoko ijkuak okimatki itlajtlakol okimiktijkej Nabot. Non okiteititi okatka yolyamanki (1 Rey. 21:​27-29). Noijki okinyektlali miakej altepemej uan okinpaleui israelitas matlatlanikan (1 Rey. 20:​21, 29; 22:39). Pero Acab okichi tlen amo kuali. Ye uan isiua okinmiluijkej oksekimej makinueyichiuakan dioses. Noijki ye amo keman omoyolkopki (1 Rey. 21:​25, 26).

14. (1) ¿Tleka Jehová amo okitak yolkuali Rehoboam? (2) ¿Tlen okichijkej oksekimej tekiuajkej?

14 Matikitakan tlen okichi tekiua Rehoboam. Yotikitakej ye okichi seki tlamantli kuali. Pero ijkuak opejki tlanauatia ayakmo okintlakamatki itlanauatiluan Jehová uan opejki kinueyichiua okseki dioses (2 Crón. 12:1). Okiueyichiuaya Jehová ijkuak ye okinekiaya uan noijki okinueyichiuaya okseki dioses (1 Rey. 14:​21-24). Amo san Rehoboam uan Acab opejki kinueyichiuaj okseki dioses. Noijki miakej tekiuajkej amo yolkualmej ijkon okichijkej. Ikinon Jehová okimatiaya akinmej okatkaj yolkualmej porque okitaya tlen okichiuayaj uan okitaya kox okiueyichiuayaj ijkon ken ye kineki.

15. ¿Tleka Jehová okinekiaya makiueyichiuakan ijkon ken ye kineki?

15 ¿Tleka Jehová okipatioitaya ken okiueyichiuayaj? Tekiuajkej omonekiaya kinpaleuiskej oksekimej makiueyichiuakan toTajtsin Dios ken ye kipaktia. Pero yejuan otlajtlakolchiuayaj porque okinueyichiuayaj dioses uan okichiuayaj okseki tlamantli tlen amo kuali (Os. 4:​1, 2). Nochtin tekiuajkej uan israelitas okatkaj iaxkauan Jehová porque ixpan omotemakakej. Ikinon Biblia kijtoua yetoskia ken oauilnemiayaj ijkuak okinueyichiuayaj dioses (Jer. 3:​8, 9). Ijkuak ikaj auilnemi tlajtlakolchiua uan sapanoua kiyolkokoua inamik noso isiua. Noijki ijkuak ikaj motemaka ixpan Jehová uan satepan kinueyichiua dioses, tlajtlakolchiua uan sapanoua kiyolkokoua toTajtsin Dios (Deut. 4:​23, 24). e

16. ¿Tlen kichiua akin yolkuali uan akin amo yolkuali?

16 ¿Tlen techmachtiaj tlen okichijkej tekiuajkej? Amo matikchiuakan tlen kichiuaj akinmej katej itech religión tlen tlakajkayaua. Noijki matikueyichiuakan Jehová ijkon ken ye kipaktia uan matiktekichiuilikan. Profeta Malaquías okiyekijto tlen kichiua akin yolkuali uan akin amo yolkuali. Ye okijto: “Namejuan oksepa nankitaskej akin yolmelauak uan akin amo yolkuali, akin kitekichiuilia toTajtsin Dios uan akin amo kitekichiuilia” (Mal. 3:18). Amo matikkauakan Jehová maski timotlapololtiskej noso tikchiuaskej itlaj amo kuali. Okachi titlajtlakolchiuaskej tla tikkauaskej.

17. ¿Tleka moneki kuali tikpejpenas akin iuan timonamiktis?

17 ¿Tikneki timonamiktis? Tlen okijto Malaquías mitspaleuis kuali xikpejpena akin iuan timonamiktis. Matikijtokan tikita ikaj kipia kuali iyelis pero amo kitekichiuilia Jehová. Ximotlajtlani kox Jehová kita yolkuali (2 Cor. 6:14). ¿Mitspaleuis xiktekichiuili Jehová tla iuan timonamiktis? Xikilnamikto tlen okipanok Salomón. Ye omonamikti inuan siuamej tlen xamo okipiayaj kuali inyelis pero amo okitekichiuiliayaj Jehová. Ikinon opejki kinueyichiua dioses (1 Rey. 11:​1, 4).

18. ¿Tlen moneki kinmachtiskej tetajmej inkoneuan?

18 Tetajmej uelis kinmachtiskej inkoneuan tlen okichijkej tekiuajkej uan ijkon kinpaleuiskej makitekichiuilikan Jehová. Miak ipati makimatikan Jehová san okinseliaya tekiuajkej tlen okiueyichiuayaj ken ye kipaktia. Noijki porque nonmej tekiuajkej okinpaleuiayaj oksekimej makiueyichiuakan Jehová. Xikinmachtikan okachi ipati makitlajtoltikan Biblia, mamonechikokan uan matetlapouikan. Pero amo san moneki xikinmiluikan tlen kichiuaskej. Noijki ijkon xikchiuakan uan ijkon namokoneuan kitaskej tlen okachi nankipatioitaj (Mat. 6:33). Xikinmachtikan namokoneuan makitlasojtlakan Jehová porque tlamo mokuayejyekoskej moneki mochiuaskej iTlaixpantijkauan Jehová porque namejuan ijkon nankinnauatiaj. Noijki satepan ayakmo kipatioitaskej kitekichiuiliskej Jehová noso kikauaskej.

19. ¿Kijtosneki akin kikaua Jehová ayakmo oksepa kitekichiuilis? (Noijki xikita recuadro “ Oksepa uelis tiktekichiuilis Jehová”).

19 Ijkuak ikaj kikaua Jehová amo kijtosneki ayakmo oksepa kitekichiuilis. Moneki moyolkopas uan oksepa mouikas iuan Jehová. Ikinon moneki yetos yolyamanki uan makinkauili tlayekankej makipaleuikan (Sant. 5:14). Xamo oui kipatlas seki tlamantli pero makilnamiki san ijkon uelis oksepa mouikas iuan Jehová.

20. ¿Ken techitas Jehová tla tikchiuaj ken tekiuajkej yolkualmej?

20 ¿Tlen techmachtia tlen okichijkej tekiuajkej? Techmachtia uelis tikchiuaskej ijkon ken tekiuajkej yolkualmej tla tiktlasojtlaj Jehová ika nochi toyolo. Ayakmo matikchiuakan tlen amo kuali otikchijkej uan matimoyolkopakan. Noijki matikilnamiktokan miak ipati san Jehová matikueyichiuakan. Jehová techitas tiyolkualmej tla amo keman tikkauaj.

TLAKUIKALI 45 Chipauak yetos nokuayejyekol

a Itech nin tlamachtil ijkuak tikijtouaj “tekiuajkej tlen otlanauatiayaj Israel” kijtosneki nochtin tlen okinauatijkej ialtepe Jehová. Sekimej okinnauatijkej ome familias tlen opouiayaj Judá. Oksekimej okinnauatijkej majtlaktli familias tlen opouiayaj Israel. Oksekimej okinnauatijkej nochtin 12 familias.

b TLEN OKACHI IPATI: Ijkuak Biblia kijtoua “toyolo” kijtosneki tlen tiknekij tikchiuaskej, tlen timokuayejyekouaj, tlen techyoltilana, ken tikchiuaj seki tlamantli, tlen tikmatij tikchiuaskej, tlen techyolinia matikchiuakan seki tlamantli uan tlen tikijtouaj tikchiuaskej.

c Nesi tekiuajkej tlen amo okatkaj israelitas okinueyichiuayaj indioses altepemej tlen okinmoaxkatiayaj.

d Tekiua Asá sapanoua otlajtlakolchi (2 Crón. 16:​7, 10). Pero Biblia kijtoua satepan okichi tlen kuali porque omoyolkopki maski achto amo okiseli makiyektlalikan. Jehová okipatioitak tlen kuali okichi maski omotlapololti. Tekiua Asá san okiueyichi Jehová uan omochijchika kinpojpolos dioses tlen okatkaj kanin ye otlanauatiaya (1 Rey. 15:​11-13; 2 Crón. 14:​2-5).

e Achto ome tlanauatilmej tlen okinmijkuilo Moisés kijtouaj san Jehová moneki tikueyichiuaskej (Éx. 20:​1-6).

f FOTO: Se tlayekanki tlen ok telpochtli kiluia tokni tlen yikipia miak xiuitl ayakmo matlakoni. Tokni tlen yikipia miak xiuitl yolyamanki ikinon okikak tlen okiluijkej, okika tlen okichijtoka uan axkan kitekichiuilia Jehová ika nochi iyolo.