Xikita nochi

Tlen kiualika

TLAMACHTIL 29

TLAKUIKALI 121 Kuali ma timonauatikan

Matiijsatokan uan ijkon amo tikchiuaskej tlen techyoltilana

Matiijsatokan uan ijkon amo tikchiuaskej tlen techyoltilana

“Xiijsatokan uan ximotlatlaujtikan, ijkon amo namechyoltilanas tlajtlakoli” (MAT. 26:41).

NIN TLEN TIMOMACHTISKEJ

Amo matitlajtlakolchiuakan uan amo matikchiuakan tlen techyoltilana.

1, 2. (1) ¿Tlen okinmilui Jesús idiscípulos? (2) ¿Tlen okichijkej discípulos? (Noijki xikinmita dibujos).

 JESÚS okijto: “Ijkuak ikaj kineki kichiuas tlen kuali xamo icuerpo amo tlaxikos” (Mat. 26:41b). Ijkon okijto porque kimati titlajtlakolejkej uan ualeua timotlapololtiaj. Pero noijki okijto moneki timomaluiskej para amo matitlajtlakolchiuakan. Ijkuak Jesús ayamo okinmiluiaya non tlamantli idiscípulos, yejuan okijtojkej amo keman kikauaskiaj iselti (Mat. 26:35). Yejuan okitlasojtlayaj Jesús pero amo omokuayejyekouayaj tlen tlamantli kixnamikiskiaj satepan. Ikinon Jesús okinmilui: “Xiijsatokan uan ximotlatlaujtikan, ijkon amo namechyoltilanas tlajtlakoli” (Mat. 26:41a).

2 ¿Tlen okichijkej discípulos ijkuak okikitskijkej Jesús? Amo oijsatokaj ijkon ken Jesús okinmilui. Ikinon ijkuak okikitskijkej, yejuan okikajtejkej uan ocholojkej (Mat. 26:56).

Jesús okinmilui idiscípulos maijsatokan uan ijkon amo kichiuaskiaj tlen kinyoltilana pero yejuan okikajtejkej. (Xikinmita párrafos 1 uan 2).


3. (1) ¿Tleka amo matimokuayejyekokan amo keman titlajtlakolchiuaskej? (2) ¿Tlen timomachtiskej?

3 Amo tiknekij tikchiuaskej itlaj tlen amo techpaleuis matimouikakan iuan Jehová. Pero titlajtlakolejkej uan ualeua techyoltilana tlen amo kuali ikinon amo matimokuayejyekokan amo keman titlajtlakolchiuaskej (Rom. 5:12; 7:​21-23). Ualeua oui tikixtopeuaskej seki tlamantli. Tla tiknekij tikyolpaktiskej Jehová uan Jesús, moneki tikilnamikiskej tlen okijto Jesús uan matiijsatokan. Nin tlamachtil techpaleuis ijkon matikchiuakan. Achto timomachtiskej tlen tlamantli uelis techyoltilanas matitlajtlakolchiuakan. Satepan timomachtiskej ken uelis timomaluiskej para amo titlajtlakolchiuaskej. Saiktlami timomachtiskej tlen tlamantli moneki tikchiuaskej uan ijkon nochipa tiijsatoskej.

¿TLEN TLAMANTLI UELIS TECHYOLTILANAS?

4, 5. ¿Tleka moneki tiijsatoskej para amo titlajtlakolchiuaskej?

4 Onka seki tlamantli tlen kichiuas ayakmo matimouikakan iuan Jehová maski timokuayejyekoskej amo tlajtlakoli. Pero noijki non tlamantli uelis kichiuas matitlajtlakolchiuakan.

5 Tinochtin techyoltilana tlen amo kuali pero tisejse tikmatij tlen okachi techyoltilana. Ikinon tlatlamantli techyoltilana tlen amo kuali. Xamo sekimej mochijchikauaj amo auilnemiskej. Oksekimej mochijchikauaj amo kitaskej pornografía noso amo momajmachiliaj porque non tlamantli amo kuali. Noijki oksekimej mochijchikauaj amo san niman kualaniskej nion moueyinekiskej. Oksekimej mochijchikauaj kichiuaskej tlen kuali uan xamo kinmomojtia tlen oksekimej kijtouaj. Ikinon Santiago okijto: “Sejse kinyejyekoua tlen kinyoltilana ijkuak kinekij kichiuaskej tlen kinekij” (Sant. 1:14).

6. ¿Tlen tlamantli moneki tikmatiskej?

6 ¿Tikmati tlen mitsyoltilana? Amo matimokuayejyekokan amitlaj techyoltilana uan amo matikijtokan amo keman titlajtlakolchiuaskej (1 Juan 1:8). Pablo okinmilui akinmej moyekanaj ika espíritu santo noijki moneki momaluiskej para amitlaj makinyoltilana (Gál. 6:1). Miak ipati matikmatikan tlen tlamantli techyoltilana uan noijki matikitakan tlen tlamantli uelis kichiuas matitlajtlakolchiuakan (2 Cor. 13:5).

7. Xikyekijto tleka moneki timomaluiskej.

7 ¿Tlen moneki tikchiuaskej tla yitikmatij tlen tlamantli techyoltilana? Matikitakan tleka ijkon tikijtouaj. Yiuejkika altepemej okipiayaj tepamitl tlen okinyaualouaya. Ikinon ijkuak okinekiayaj kinmoaxkatiskej, okachi okinmaluiayaj puertas uan ijkon amo uelis kalakiskiaj. Noijki tejuan matimomaluikan tla yitikmatij tlen tlamantli techyoltilana uan ijkon amo titlajtlakolchiuaskej (1 Cor. 9:27).

¿KEN UELIS TIMOMALUISKEJ PARA AMO TITLAJTLAKOLCHIUASKEJ?

8, 9. ¿Tlen kipaleuiskia amo matlajtlakolchiua telpochtli tlen moijtoua itech Proverbios capítulo 7? (Proverbios 7:​8, 9, 13, 14, 21).

8 ¿Ken uelis timomaluiskej para amitlaj matechyoltilana? Matikitakan tlen techmachtia Proverbios capítulo 7. Ompa kijtoua se telpochtli omotekak iuan se siuatl tlen oauilnemiaya. Itech versículo 22 kijtoua ye oyajki okitemoto siuatl. Pero achto versículos kijtouaj tlen tlamantli okichi non telpochtli uan ijkon otlajtlakolchi.

9 ¿Tlen okichi? Non telpochtli opanok yiyouak ik kanin ochantiaya non siuatl uan noijki oyajki ik kanin okatka ikalijtik (xiktlajtolti Proverbios 7:​8, 9). Satepan ijkuak okitak non siuatl amo san niman oyajki. Okimokauili makipipitso non siuatl uan noijki okilui miak tlamantli kualtsin. Xamo non siuatl okinekiaya telpochtli mamokuayejyeko ye okatka yolkuali (xiktlajtolti Proverbios 7:​13, 14, 21). Tla non telpochtli amo kichiuaskia non tlamantli amitlaj kiyoltilanaskia uan amo tlajtlakolchiuaskia.

10. ¿Tlen uelis techpanos ijkon ken okipanok telpochtli?

10 Tinochtin uelis techpanos ijkon ken okipanok non telpochtli. Xamo titlajtlakolchiuaskej uan timokuayejyekoskej amo otikitakej tleka ijkon otikchijkej. Xamo tikijtoskej: “Amo nikmati tleka ijkon onikchi”. Pero tla timokuayejyekoskej tlen achto otikchijkej, tikitaskej otikchijkej seki tlamantli tlen otechyoltilanaya. Xamo opejki timouikaj inuan akinmej amo kitlasojtlaj Jehová. Noijki xamo opejki tikitaj tlen amo kuali itech internet noso otimoyolpaktiayaj ika tlen amo kipaktia Jehová. Noijki xamo ayakmo otimotlatlaujtiayaj, ayakmo otimomachtiayaj Biblia, ayakmo otimonechikouayaj nion ayakmo otitetlapouiayaj.

11. ¿Tlen moneki tikchiuaskej tla amo tiknekij titlajtlakolchiuaskej?

11 ¿Tlen techmachtia tlen okipanok telpochtli? Amo san moneki tikixtopeuaskej tlajtlakoli. Noijki moneki timomaluiskej uan amo tikchiuaskej tlen amo kuali. Ijkon okiyekijto Salomón ijkuak okijto tlen okipanok telpochtli iuan siuatl tlen auilnemi. Ye okijto: “Amo ximopolo itech iojuiuan” (Prov. 7:25). Noijki okijto: “Amo inauak ximotoki nion ximotoki ikaltempa” (Prov. 5:​3, 8). Ikinon tla amo tiknekij titlajtlakolchiuaskej moneki tikixtopeuaskej nochi tlamantli tlen techyoltilana. a Xamo ayakmo tikchiuaskej seki tlamantli tlen mota amo tlajtlakoli pero uelis kichiuas matitlajtlakolchiuakan (Mat. 5:​29, 30).

12. ¿Tlen okijto kichiuas Job uan ken okipaleui? (Job 31:1).

12 Matikchiuakan ijkon ken Job okichi tla amo tiknekij titlajtlakolchiuaskej. Ye okintlakaitaya siuamej ikinon okijto: “Amo nikitas tlen amo moneki” (xiktlajtolti Job 31:1). Non okipaleui amo makikajkayaua isiua. Tejuan noijki moneki tikijtoskej amo tikchiuaskej seki tlamantli tlen kichiuas itlaj matechyoltilana.

13. ¿Tleka moneki matikitakan tlen timokuayejyekouaj? (Noijki xikinmita fotos).

13 Noijki matikitakan tlen timokuayejyekouaj (Éx. 20:17). Miakej kijtouaj amo tlajtlakoli mokuayejyekoskej tlen amo kuali porque amo kichiuaskej. Pero san mokajkayauaj ijkuak ijkon mokuayejyekouaj. Porque ijkuak timokuayejyekouaj tlen amo kuali okachi techyoltilana tlajtlakoli. Ijkon okachi oui tikixtopeuaskej tlen amo kuali. Ikinon ¿tlen moneki tikchiuaskej tla timokuayejyekouaj tlen amo kuali? Moneki san niman matikixtopeuakan uan matimokuayejyekokan tlen kuali. Ijkon amo techyoltilanas tlen amo kuali uan amo titlajtlakolchiuaskej (Filip. 4:8; Col. 3:2; Sant. 1:​13-15).

San niman matikixtopeuakan tlen amo kuali uan ijkon amo tikchiuaskej tlen techyoltilana. (Xikita párrafo 13).


14. ¿Tlen techpaleuis matiijsatokan uan amitlaj matechyoltilana?

14 ¿Tlen techpaleuis matiijsatokan uan amitlaj matechyoltilana? Techpaleuis tla tikintlakamatij itlanauatiluan Jehová. Pero xamo ualeua tikitaskej oui timokuayejyekoskej uan tikchiuaskej tlen Jehová kipaktia. Sapanoua tiyolpakiskej tla timochijchikauaskej ijkon tikchiuaskej.

15. ¿Tlen techpaleuis amo matechyoltilana tlen amo kuali?

15 Moneki matimokuayejyekokan tlen kuali, matikkokolikan tlen amo kuali uan matikchiuakan tlen kuali (Amós 5:15). Non techpaleuis matikchiuakan tlen kuali uan amo titlajtlakolchiuaskej. Noijki ijkuak itlaj techyoltilanas amo oui tikitaskej san niman tikixtopeuaskej.

16. ¿Tlen okseki tlamantli techpaleuis amitlaj matechyoltilana? (Noijki xikinmita fotos).

16 ¿Tlen moneki tikchiuaskej para timokuayejyekoskej tlen kuali? Ijkuak timonechikouaj uan titetlapouiaj okachi tiknekij tikyolpaktiskej Jehová. Non techpaleuis san niman matikixtopeuakan tlen techyoltilana (Mat. 28:​19, 20; Heb. 10:​24, 25). Techpaleuis matikkokolikan tlen amo kuali tla tiktlajtoltiaj iTlajtol toTajtsin Dios uan timokuayejyekouaj tlen timomachtiaj (Jos. 1:8; Sal. 1:​2, 3; 119:​97, 101). Matikilnamiktokan tlen Jesús okijto: “Ximotlatlaujtikan, ijkon amo namechyoltilanas tlajtlakoli” (Mat. 26:41). Ijkuak tiktlatlaujtiaj Jehová, tikitaj ken techpaleuia uan okachi tiknekij tikyolpaktiskej (Sant. 4:8).

Ijkuak timochijchikauaj tikchiuaj tlen Jehová kipaktia techpaleuia amo matikchiuakan tlen techyoltilana. (Xikita párrafo 16). b


NOCHIPA MATIIJSATOKAN

17. ¿Tlen okipanok Pedro miak uelta?

17 Xamo tikixtopeuaskej seki tlamantli tlen techyoltilana pero okseki tlamantli xamo oui tikixtopeuaskej. Ijkon okipanok apóstol Pedro. Ye okinmauiliaya oksekimej ikinon eyi uelta okijto amo okixmatiaya Jesús (Mat. 26:​69-75). Pero satepan ayakmo omomojti porque okintlapoui akinmej opouiayaj itech Sanedrín (Hech. 5:​27-29). Opanok seki xiuitl uan oksepa opejki momomojtia, ayakmo otlakuaya inuan akinmej amo okatkaj judíos porque “okinmauiliaya akinmej okinekiayaj makimochiuilikan circuncisión” (Gál. 2:​11, 12). Amo tikmatij kox okse tonal oksepa okinmauili oksekimej.

18. ¿Ualeua tlen techpanoua?

18 Xamo tejuan moneki timochijchikauaskej amitlaj matechyoltilana maski timokuayejyekouaj yotikpatlakej toyelis. Matikitakan tlen okipanok se tokni. Ye okijto: “Kanaj majtlaktli xiuitl amo onikitak pornografía. Ne onimokuayejyekouaya ayakmo nechyoltilanaskia non tlamantli. Pero ualeua ok oniknekiaya nikitas pornografía. Non tlamantli yetoskia ken se yolkatl tlen okinekiaya nechkuas”. Pero tokni amo omosotla uan okitak omonekiaya nochipa mochijchikauas para amitlaj makiyoltilana. Isiua uan tlayekankej kipaleuiaj ayakmo makita pornografía.

19. ¿Tlen techpaleuis amo matitlajtlakolchiuakan tla itlaj techyoltilana?

19 ¿Tlen techpaleuis amo matitlajtlakolchiuakan tla itlaj techyoltilana? Matiijsatokan ijkon ken Jesús okijto. Matimochijchikauakan matikixtopeuakan tlen techyoltilana maski timokuayejyekoskej ayakmo itlaj techyoltilanas (1 Cor. 10:12). Matikchiuakan tlen techpaleuia matikixtopeuakan tlen techyoltilana. Xikchiua ijkon ken kijtoua Proverbios 28:14: “Paki tlakatl tlen nochipa motlachilia” (2 Ped. 3:14).

¿KEN TECHPALEUIA TLA TIIJSATOSKEJ?

20, 21. (1) ¿Ken techpaleuia tla tiijsatoskej? (2) ¿Tlen kichiuas Jehová tla timochijchikauaj amo tikchiuaskej tlen techyoltilana? (2 Corintios 4:7).

20 Techpaleuis tla timochijchikauaj nochipa tiijsatoskej. Ijkuak tikintlakamatij itlanauatiluan Jehová, okachi tipakij uan amo ijkuak tikchiuaj ‘tlen amo kuali kineki kichiuas to cuerpo’ (Heb. 11:25; Sal. 19:8). Jehová otechchijchi matikchiuakan tlen ye kineki (Gén. 1:27). Ijkon tikpiaskej chipauak totlalnamikilis uan uelis nochipa tiyoltoskej (1 Tim. 6:12; 2 Tim. 1:3; Jud. 20, 21).

21 Onka miak tlamantli tlen techyoltilana pero non amo kijtosneki amo keman tikpatlaskej toyelis. Jehová nochipa techpaleuis (xiktlajtolti 2 Corintios 4:7). Matikilnamiktokan toTajtsin Dios techmakas ichikaualis tlen sapanoua techpaleuis. Pero tejuan noijki moneki timochijchikauaskej amo tikchiuaskej tlen techyoltilana. Tla ijkon tikchiuaskej uelis tikneltokaskej Jehová okachi techmakas chikaualistli tlen tiktlajtlaniliaj ijkuak tiktlatlaujtiaj (1 Cor. 10:13). Jehová nochipa techpaleuis matiijsatokan uan amo matikchiuakan tlen techyoltilana.

TLAKUIKALI 47 Mojmostla niktlapouis Jehová

a Tla ikaj otlajtlakolchi kipaleuis tlen kijtoua amochtli Tiyoltos uan tiyolpakis, tlamachtil 57 puntos 1 hasta 3. Noijki uelis kipaleuis revista Akin Tetlapouijtok noviembre 2020 páginas 27 hasta 29, párrafos 12 hasta 17 kanin kijtoua “Nochipa ma timokuayejyekokan ken tiyetoskej itech xochitlali”.

b FOTOS: Se tokni san kualkan momachtia se texto tlen mojmostla timomachtiaj, ijkuak tlakua kitlajtoltia Biblia uan monechikoua ijkuak yitiotlak.