Xikita nochi

Tlen kiualika

 TLAMACHTIL 29

‘Matikinmachtikah nochteh [...] mamochiwakah imachtijkawah’ Jesús

‘Matikinmachtikah nochteh [...] mamochiwakah imachtijkawah’ Jesús

“Xiwiah iwa xikinmachtikah nochteh n tlaltikpaktlakah para mamochiwakah notlamachtijkawah” (MAT. 28:19).

TLAKUIKALI 60 Ma tikinpaleuikan ma momakixtikan

XIKILNAMIKTO *

1, 2. (1) Ijkon ken otlanauati Jesús itech Mateo 28:18, 19, ¿tlen okachi moneki tikchiuaskej? (2) ¿Tlen tlajtlanilmej tikinnankiliskej?

TLATITLANILMEJ xamo sapanoa oyolpakej ijkuak omonechikojkej itech se tepetl. Jesús okinmilui ompa kinnamikiskia ijkuak kiyolitiskiaj (Mat. 28:16). Xamo ijkuakon okinmonextili “mákuili siento tokniwah” (1 Cor. 15:6). ¿Tleka Jesús okinekiaya kinnechikos? Okinekiaya kinmiluis ma kichiuakan itlaj miak ipati: “Xiwiah iwa xikinmachtikah nochteh n tlaltikpaktlakah para mamochiwakah notlamachtijkawah” (xiktlajtolti Mateo 28:18, 19).

2 Ijkuakon akinmej okikakej Jesús, opejki monechikoaj itech achto siglo. Omonekiaya kinmachtiskej oksekimej uan ijkon mochiuaskiaj imachtijkauan Cristo. * Axkan ipan nochi tlaltikpak monechikoaj miakej tokniuan uan noijki ok tlamachtiaj ken otlanauati Jesús. Ik non, itech nin tlamachtil tikinnankiliskej naui tlajtlanilmej: “¿Tleka miak ipati ma tikinmachtikan oksekimej ma kichiuakan ken Jesús? ¿Tlen moneki tikchiuaskej tla tiknekij kuali titlamachtiskej? ¿Tinochtin titlapaleuiaj ma mochiua nin tekitl? ¿Tleka amo ma timosotlauakan?”.

 ¿TLEKA MIAK IPATI NOCHTIN MA TIKINMACHTIKAN MA MOCHIUAKAN IMACHTIJKAUAN JESÚS?

3. Ijkon ken kijtoa Juan 14:6 uan 17:3, ¿tleka miak ipati ma tikinmachtikan oksekimej ma kichiuakan ken Cristo?

3 ¿Tleka miak ipati nochtin ma tikinmachtikan ma mochiuakan imachtijkauan Jesús? Porque san akinmej kichiuaj ken Cristo uelis mouikaskej iuan toTajtsin Dios. Noijki axkan okachi kuali katej uan satepan kichiaj kipiaskej yolilistli tlen amo keman tlamis (xiktlajtolti Juan 14:6; 17:3). Jesús otechnauati ma tikchiuakan se tekitl miak ipati pero amo toselti tikchiuaj. Tlatitlanil Pablo okijto: “Tejwah san titlapalewijkeh itech iteki Dios” (1 Cor. 3:9). Jehová uan Cristo techkauiliaj ma tikinpaleuikan maski titlajtlakolejkej.

4. ¿Tlen techmachtia tlen okipanok Ivan uan Matilde?

4 Sapanoa tiyolpakiskej tla tikinmachtiskej oksekimej ma kichiuakan ken Cristo. Ma tikitakan tlen okipanok tokni Iván uan isiua tlen itoka Matilde tlen chantij Colombia. Yejuan okitlapouijkej se telpochtli itoka Davier pero ye okinmilui: “Nechpaktiskia nikpatlas nonemilis pero amo niueli”. Davier okatka boxeador, sapanoa otlauanaya uan okintekitiltiayaj drogas. Noijki ochantiaya iuan inovia itoka Erika. Iván okijto: “Opejki tikmachtiaj ikalijtik. Otiayaj miak horas ipan bicicleta uan omonekiaya tipanoskej kanin tlasokitla. Ijkuak Erika okitak Davier okipatlak iyelis, ye noijki opejki momachtia Biblia”. Satepan Davier ayakmo okintekitiltiayaj drogas, ayakmo otlauanaya nion ok okatka boxeador. Noijki omonamikti iuan Érika. Matilde okijto: “Itech 2016 ijkuak Davier uan Érika omoapolaktijkej, otikilnamikej tlen okijto Davier: ‘Nechpaktiskia nikpatlas nonemilis pero amo niueli’. Non tonal otichokakej”. Nin kiteititia sapanoa tiyolpakij ijkuak tikinpaleuiaj oksekimej ma kichiuakan ken Cristo.

¿TLEN MONEKI TIKCHIUASKEJ TLA TIKNEKIJ KUALI TITLAMACHTISKEJ?

5. ¿Tlen achto moneki tikchiuaskej tla tiknekij tikinmachtiskej oksekimej ma kichiuakan ken Cristo?

5 Achto moneki tikintemoskej akinmej kinekij kixmatiskej Jehová (Mat. 10:11). Tikteititiskej melauak tiiTlaixpantijkauan Jehová tla nochtin tikintlapouiaj. Noijki tikteititiskej tikchiuaj ken Cristo tla titetlapouiaj ken ye otechnauati.

6. ¿Tlen tikchiuaskej tla tiknekij ma techkakikan ijkuak titetlapouiaj?

6 Miakej ika nochi inyolo kinekij kimatiskej tlen tlamachtia Biblia. Oksekimej xamo moneki tikinyolchikauaskej ma momachtikan. Tla tiknekij tiyolpakiskej ijkuak titetlapouiaj, moneki tikmatiskej tlen tikijtoskej. Kuali ma timokuayejyekokan tlen kinpaktiskiaj ma tikintlapouikan uan ma tikmatikan ken tikintlapouiskej.

7. (1) ¿Ken peuas titetlapouiskej? (2) ¿Tleka miak ipati ma tikinkakikan uan ma tikintlakaitakan akinmej tikintlapouiaj?

7 Ma tikitakan tlen uelis tikijtoskej: “Nechpaktiskia nikmatis tlen timokuayejyekoa. Axkan tinochtin tikixnamikij ouijkayotl. ¿Timokuayejyekoa moneki san se tekiua ma yeto ipan nochi tlaltikpak uan ijkon kuali tiyetoskej?”. Satepan uelis tiktlajtoltiliskej Daniel 2:44 uan ma tikiluikan tlen kijtosneki. Noijki  uelis tikijtoskej: “Nikneki nimitstlajtlanis. ¿Tlen moneki tikchiuaskej para ma tetlakaitakan tokoneuan uan ma tetlakamatikan?”. Satepan uelis tikijtoskej tlen kijtoa Deuteronomio 6:6, 7. Ma timokuayejyekokan tlen tikinmiluiskej akinmej tikintlapouiskej. Noijki ma timokuayejyekokan ken kinpaleuis tlen tlamachtia Biblia. Ijkuak inmiuan timotlapouiskej, ma tikinkakikan uan ma tikintlakaitakan. Tla ijkon tikchiuaskej, okachi tikinmajsikamatiskej uan kinekiskej techkakiskej.

8. ¿Tleka amo ma timosotlauakan titetlajpalotiuij?

8 Xamo moneki miak uelta tiktlajpalotiuij akin tiknekij tikmachtiskej. ¿Tleka? Xamo amo tikajsititiuij ijkuak tiktlajpalotiuij noso amo majxilis touan motlapouis. Noijki xamo moneki miak uelta tiktlajpalotiuij para touan ma momati uan ijkon kinekis momachtis. Tla tiknekij kualtsin ma moskalti se xochitsintli, moneki miak uelta tikatekiskej, noijki moneki miak uelta tikintlapouiskej oksekimej tla tiknekij ma kitlasojtlakan Jehová uan Jesús.

¿TINOCHTIN TITLAPALEUIAJ MA MOCHIUA NIN TEKITL?

TiiTlaixpantijkauan Jehová itech nochi tlaltikpak titlapaleuiaj tikintemoaj akinmej yolyamankej. (Xikita párrafo 9 uan 10). *

9, 10. ¿Tleka tikijtoaj akinmej tikchiuaj ken Cristo titlapaleuiaj tikintemoaj akinmej yolyamankej?

9 Akinmej tikchiuaj ken Cristo titlapaleuiaj tikintemoaj akinmej yolyamankej. Ma tikitakan ken titlapaleuiaj. Axkan tikitaskej tlen opanok ijkuak se chokotsin omoixpolo ijkuak okipiaya eyi xiuitl. Otlapaleuijkej kanaj quinientos para kajsiskiaj. Opanok kanaj veinte horas uan ikaj okajsik chokotsin ijtik mila.

10 Axkan miakej kinpanoa ken chokotsin tlen omoixpolo. Yejuan mokuayejyekoaj  amitlaj moyektlalis pero kinekij ma kinpaleuikan (Efes. 2:12). TiiTlaixpantijkauan Jehová tikatej kanaj ocho millones ipan tlaltikpak uan tikintemoaj akinmej kinekij ma kinpaleuikan. Xamo tejuan amo tikinmajsij akinmej tikinmachtiskej pero kinmajsij oksekimej tokniuan. Tinochtin tiyolpakij ijkuak se tokni ikaj kipaleuia ma mochiua imachtijka Jesús.

11. ¿Ken uelis titlapaleuiskej maski axkan amikaj tikmachtiaj?

11 Tinochtin uelis titlapaleuiskej maski axkan amikaj tikmachtiaj. Ma tikitakan ken titlapaleuiskej. Ijkuak ikaj yikin yaui kanin timonechikoaj, kuali ma tikselikan uan ijkon kuali momachilis. Ijkon kitas timotlasojtlaj akinmej melauak tikchiuaj ken Cristo (Juan 13:34, 35). Noijki tla titlanankiliaj ijkuak timonechikoaj, kinpaleuis ma tetlakaitakan ijkuak kijtoskej tlen mokuayejyekoaj. Noijki uelis titetlapouitiuij iuan se tokni tlen yikin peua tetlapouia uan ma tikpaleuikan ma kitekitilti Biblia (Luc. 10:25-28).

12. Xikijto kox moneki tiyetoskej sapanoa tiixtlamatkej tla tiknekij ikaj tikpaleuiskej ma kichiua ken Cristo.

12 Amo ma timokuayejyekokan moneki tiyetoskej sapanoa tiixtlamatkej tla tiknekij ikaj tikpaleuiskej ma kichiua ken Cristo. Tlen okipanok Faustina techititia amo moneki tiyetoskej sapanoa tiixtlamatkej. Ye chanti Bolivia. Ijkuak okinmixmatki iTlaixpantijkauan Jehová amo okimatiaya kitlajtoltis se amatl pero tepitsin yomomachti. Axkan yomoapolakti uan kipaktia tetlapouis tlen tlamachtia Biblia. Faustina chichikometika kinmachtia kanaj makuili. Ye yokinpaleui ma moapolaktikan chikuase maski amo okachi kimati kitlajtoltis se amatl (Luc. 10:21).

13. ¿Ken techpaleuia tla timochijchikauaj tikinmachtiskej oksekimej?

13 Sekimej tokniuan kipiaj miak tekitl uan amo majxiliaj. Pero mochijchikauaj kinmachtiskej oksekimej uan non kinyolpaktia. Ma tikitakan tlen okipanok Melanie. Ye san iselti kiskaltia itakotsin tlen yikipia chikueyi xiuitl. Ye sejse tonal tekipanoa uan noijki okipaleuiaya itajtsin porque okipiaya cáncer. Ye ochantiaya itech se altepetsintli tlen uejka omokauaya ompa Alaska uan san ye okatka iTlaixpantijka Jehová. Nochipa okitlatlaujtiaya toTajtsin Dios ma kipaleui ma tetlapouiti maski sapanoa oseuaya. Ye okinekiaya ikaj kimachtis tlen kijtoa Biblia.  Satepan opejki motlapouia iuan Sara. Ye sapanoa omotlajtlachialti ijkuak okimatki tlen itoka toTajtsin Dios. Satepan opejki momachtia. Melanie okijto: “Sapanoa onisotlauaya nochi viernes tiotlak. Pero oniaya iuan notakotsin tikmachtitiuij Sara uan sapanoa otiyolpakiayaj. Otechpaktiaya tiktemoskej ken tiknankiliskej tlen otechtlajtlaniaya. Sapanoa otiyolpakej porque opejki mouika iuan Jehová”. Sara okixnamik miak tlamantli pero okinka akinmej inmiuan omonechikoaya uan omoapolakti.

¿TLEKA AMO MA TIMOSOTLAUAKAN?

14. (1) ¿Tleka ijkuak titlamachtiaj yetoskia ken timichkitskiaj? (2) ¿Ken techpaleuia tlen kijtoa 2 Timoteo 4:1, 2?

14 Amo ma timosotlauakan maski amo tikinmajsij akinmej tikinmachtiskej. Ma tikilnamikikan Jesús okijto tlen tikchiuaj yetoskia ken timichkitskiaj. Akinmej michkitskiaj, ualeua uejkika mochiaj uan amo kikitskiaj nion se michin. Tekipanoaj yoak noso yauij sapanoa uejka uan kualkan kintemotiuij michimej (Luc. 5:5). Noijki ijkon miakej tokniuan uejkika kintemoaj akinmej kinmachtiskej, kisaj tlatlamantli hora uan kipapatlaj kanin tetlapouiaj. Ijkon kichiuaj porque kinekij miakej kintlapouiskej. Akinmej ijkon mochijchikauaj, okachi miakej kinmajsij akinmej kinekij momachtiskej iTlajtol toTajtsin Dios. ¿Uelis titetlapouiskej kanin okachi miakej panoaj noso ijkuak katej inkalijtik? (xiktlajtolti 2 Timoteo 4:1, 2).

Amo ma timosotlauakan ijkuak tikinpaleuiaj oksekimej ma mouikakan iuan Jehová. (Xikita párrafo 15 uan 16). *

15. ¿Tleka amo ma timosotlauakan ijkuak titlamachtiaj?

 15 ¿Tleka amo ma timosotlauakan ijkuak titlamachtiaj? Amo san moneki tikinmachtiskej oksekimej ma kimatikan tlen tlamachtia Biblia uan ma kipatioitakan. Noijki moneki tikinpaleuiskej ma kixmatikan Jehová uan ma kitlasojtlakan. Amo san tikinmachtiskej tlen tlanauatia Jesús, noijki moneki tikinpaleuiskej ma kichiuakan ken ye. Amo inselti ma tikinkauakan akinmej yikin momachtijtokej moyekanaskej ika principios bíblicos. Sekimej totoka kipatlaj innemilis uan oksekimej okachi uejkauaj.

16. ¿Tlen techmachtia tlen okipanok Raúl?

16 Ompa Perú kajki se misionero tlen techititia tleka miak ipati ma tikmatikan timochiaskej. Tokni okijto: “Onikmachtiaya se tlakatl itoka Raúl. Onikmachti ika ome amochmej. Pero sapanoa okipiaya ouijkayotl. Amo kuali omouikaya iuan isiua, otlauijuikaltiaya uan ikoneuan amo okitlakaitayaj. Pero ye nochipa touan omonechikoaya, ik non, ok onikmachtiaya ye uan ikalchanejkauan. Opanok eyi xiuitl uan omoapolakti”.

17. ¿Tlen timomachtiskej chikome?

17 Jesús otechnauati ma tikinmachtikan “nochteh n tlaltikpaktlakah”. Tla tiknekij tiktlakamatiskej tlen otechnauati Jesús, moneki nochtin ma tikintlapouikan maski tlatlamantli mokuayejyekoaj, akinmej amo pouij itech se religión noso amo kineltokaj kajki toTajtsin Dios. Itech okse tlamachtil tikitaskej ken okachi kuali tikintlapouiskej akinmej ijkon mokuayejyekoaj.

TLAKUIKALI 68 Nikchiuas tekitl tlen miak ipati

^ párr. 5 Akinmej tikchiuaj ken Cristo moneki tikinmachtiskej oksekimej. Itech nin tlamachtil tikitaskej tlen techpaleuis kuali ma titlamachtikan.

^ párr. 2 TLEN OKACHI IPATI: Imachtijkauan Jesús amo san momachtiaj tlen ye okijto. Noijki mochijchikauaj kichiuaskej tlen otlamachti uan kichiuaj ken ye (1 Ped. 2:21).

^ párr. 52 FOTO: Se tlakatl kajki aeropuerto uan okikuitikiski se amatsintli tlen okatka itech se carrito. Satepan ijkuak opaxialoto okinmitak oksekimej tokniuan tetlapouiaj ika carritos. Ijkuak omokopki ikalijtik sekimej tokniuan okitlajpalotoj.

^ párr. 54 FOTO: Non tlakatl yikimachtijtokej uan satepan omoapolakti.