Xikita nochi

Tlen kiualika

 TLAMACHTIL 28

Ma tiktekichiuilikan Jehová maski tekiuajkej ayakmo techkauiliskej

Ma tiktekichiuilikan Jehová maski tekiuajkej ayakmo techkauiliskej

Amo “weletis san tejwah matikpixtokah tlan [otikitakej] iwa otikkakeh” (HECH. 4:19, 20).

TLAKUIKALI 122 ¡Ma titlaxikojtokan!

XIKILNAMIKTO *

1, 2. (1) ¿Tleka amo techtlajtlachialtia tla ayakmo techkauiliskej ma tiktekichiuilikan Jehová? (2) ¿Tlen timomachtiskej?

ITECH 2018 kanaj 223,000 (doscientos veintitrés mil) tokniuan ochantiayaj kanin amo okinkauiliayaj ma tetlapouikan nion ma monechikokan. Pero amo techtlajtlachialtia nin tlamantli. Porque itech okse tlamachtil otikitakej sekimej techtlajyouiltiskej akinmej melauak tikchiuaj ken Cristo (2 Tim. 3:12). Maski san kanin tiyetoskej, san tlen tonal tekiuajkej uelis techiluiskej ayakmo ma titetlapouikan uan ayakmo ma tikueyichiuakan Jehová.

2 Tla tekiuajkej techiluiskej ayakmo ma tiktekichiuilikan toTajtsin Dios, xamo timotlajtlaniskej: “¿Techtlajyouiltiskej porque ayakmo techselia toTajtsin Dios? ¿Ayakmo tikueyichiuaskej Jehová ijkuak techtlajyouiltiskej? ¿Moneki nias kanin kitekauiliaj ma tiktekichiuilikan toTajtsin Dios?”. Itech nin tlamachtil tikinnankiliskej ninmej tlajtlanilmej. Noijki tikitaskej ken ok tiktekichiuiliskej Jehová maski tekiuajkej ayakmo techkauiliskej uan tikitaskej tlen amo moneki tikchiuaskej.

¿TECHTLAJYOUILTISKEJ PORQUE AYAKMO TECHSELIA TOTAJTSIN DIOS?

3. ¿Tlen techmachtia tlen okipanok Pablo ijkon ken kijtoa 2 Corintios 11:23-27?

3 Ijkuak tekiuajkej ayakmo techkauiliskej ma tiktekichiuilikan Jehová xamo timokuayejyekoskej ye ayakmo techselia. Pero non amo melauak. Ma timokuayejyekokan tlen  okipanok tlatitlanil Pablo. Tinochtin tikmatij toTajtsin Dios iuan okatka. Okinmijkuilo 14 cartas tlen pouij itech Escrituras Griegas Cristianas uan okinmatilti kuali tlajtolmej akinmej amo okatkaj judíos. Pero noijki sapanoa okitlajyouiltijkej (xiktlajtolti 2 Corintios 11:23-27). Nin techititia Jehová kitekauilia ma kintlajyouiltikan akinmej kitekichiuiliaj.

4. ¿Tleka techkokoliaj akinmej amo kitekichiuiliaj Jehová?

4 Jesús okijto tleka moneki ma tikmatokan ajsis tonal techtlajyouiltiskej. Okijto techkokoliskej porque amo tikchiuaj ken akinmej amo kitekichiuiliaj toTajtsin Dios (Juan 15:18, 19). Ijkuak techtlajyouiltiskej amo kijtosneki ayakmo techselia Jehová. Kijtosneki tikchijtokej tlen kuali.

¿AYAKMO TIKUEYICHIUASKEJ JEHOVÁ IJKUAK TECHTLAJYOUILTISKEJ?

5. Xikijto kox ikaj uelis kichiuas ayakmo ma tiktekichiuilikan Jehová.

5 Amikaj uelis kichiuas ayakmo ma tikueyichiuakan Jehová. Miakej amo kinekij ma tikueyichiuakan Jehová pero non amo keman techtsakuilis. Ma tikitakan tlen opanok itech Segunda Guerra Mundial. Miakej tekiuajkej tlen okatkaj itech okseki altepemej okintlajyouiltijkej tokniuan. Amo san nazis okintlajyouiltijkej. Noijki tekiuajkej tlen okatkaj Australia, Canadá uan okseki altepemej. Maski okintlajyouiltijkej toTajtsin Dios okinpaleui. Itech 1939 ijkuak opejki guerra yokatkaj 72,475 tokniuan ipan nochi tlaltikpak. Noijki ijkuak yitlamiskia guerra itech 1945 okitakej yokatkaj 156,299 (ciento cincuenta y seis mil doscientos noventa y nueve) tokniuan. Sapanoa omomiaktilijkej.

6. Xikijto ken kinpaleuis oksekimej ijkuak techtlajyouiltiskej.

6 Tla tekiuajkej techiluiskej ayakmo ma titetlapouikan nion ma timonechikokan, amo ma timomojtikan porque non techpaleuis okachi kuali ma tiktekichiuilikan Jehová. Ma tikitakan tlen okipanok se tokni uan inamik. Yejuan okipiayaj se chokotsin uan ochantiayaj kanin amo okinkauiliayaj ma kitekichiuilikan Jehová. Ninmej tokniuan amo omomojtijkej uan omochijkej precursores regulares. Ik non, isiua tokni okika se tekitl kanin kuali okitlaxtlauiayaj. Tokni okijto miakej okitayaj ken okintlajyouiltiayaj  iTlaixpantijkauan Jehová uan okinekiayaj kimatiskej tleka ijkon okinchiuiliayaj. Ik non, amo oui okinmachtiayaj. Noijki oksekimej okinpaleui. Se tlayekanki okijto miakej tlen ayakmo okitekichiuiliayaj Jehová oksepa opejki monechikoaj uan opejki tetlapouiaj.

7. (1) ¿Tlen techmachtia Levítico 26:36, 37? (2) ¿Tlen tikchiuas ijkuak techiluiskej ayakmo ma tiktekichiuilikan Jehová?

7 Ijkuak ayakmo techkauiliskej ma titetlapouikan, miakej kinekiskej ma timomojtikan ijkuak tiktekichiuiliskej Jehová. Ualeua kijtoskej miak tlamantli tlen amo melauak, tekiuajkej tlatemotiuij tokalijtik, techuikaskej inmixpan tekiuajkej uan xamo techtsakuaskej. Kinekiskej ma timomojtikan ijkuak peuas kintsakuaskej tokniuan. Ayakmo tiktekichiuiliskej Jehová tla timomojtiskej porque itlaj techchiuiliskej. Tla timomojtiskej, san toneuian tikchiuaskej tlen yejuan kinekij. Amo tiknekij tikchiuaskej ken akinmej moijtoa itech Levítico 26:36, 37 (xiktlajtolti). Amo ma timomojtikan tlamo ayakmo kuali tiktekichiuiliskej Jehová noso tikkauaskej. Ika nochi toyolo itech ma titlaneltokakan uan amo ma tikinkauilikan oksekimej ma techmomojtikan (Is. 28:16). Ma tikiluikan Jehová ma techyekana. Ye techpaleuis maski tekiuajkej amo techkauiliskej ma tiktekichiuilikan (Heb. 13:6).

¿MONEKI NIAS KANIN KITEKAUILIAJ MA TIKTEKICHIUILIKAN TOTAJTSIN DIOS?

8, 9. (1) ¿Tlen moneki kipejpenaskej tetajmej uan tejuan? (2) ¿Tlen techpaleuis kuali ma tikpejpenakan tlen tikchiuaskej?

8 Ijkuak tekiuajkej kijtoskej ayakmo uelis tiktekichiuiliskej Jehová xamo timotlajtlaniskej kox moneki oksekan tichantitiuij. San tejuan moneki tikpejpenaskej tlen tikchiuaskej. Sekimej xamo kinpaleuis tlen okichijkej tokniuan itech achto siglo ijkuak okintlajyouiltijkej. Ijkuak Esteban okimiktijkej ika tetl, sekimej imachtijkauan Jesús oyajkej ik Judea, Samaria uan oksekimej oyajkej Fenicia, Chipre uan Antioquía (Mat. 10:23; Hech. 8:1; 11:19). Pero sekimej tokniuan kinpaleuis tlen okichi Pablo. Ye omoka kanin sapanoa okintlajyouiltiayaj tokniuan. Maski uelis kimiktiskiaj, ye ok otetlapoui uan okinyolchika tokniuan tlen sapanoa okintlajyouiltiayaj (Hech. 14:19-23).

9 ¿Tlen techmachtia nin tlamantli? San tetajmej tlen kinyekanaj inkalchanejkauan kijtoskej tlen kichiuaskej. Pero moneki achto ma kitlatlaujtikan Jehová, kox uelis kinmaluiskej inkalchanejkauan uan kox momatiskej kanin chantitiuij. Porque tisejse tiktemakaskej “cuenta inawak Dios de tlan se kichiwa” (Gál. 6:5, Itlajtol totajtzin Dios [NHY]). Amo toteki tla tokniuan kipejpenaskej oksekan chantitiuij noso mokauaskej itech inmialtepe.

¿KEN TIKTEKICHIUILISKEJ JEHOVÁ MASKI TEKIUAJKEJ AYAKMO TECHKAUILISKEJ?

10. ¿Tlen uelis technauatiskej akinmej tlayekanaj Betel uan tlayekankej?

10 ¿Ken tiktekichiuiliskej Jehová maski amo techkauiliskej? Akinmej tlayekanaj itech Betel kinmiluiskej tlayekankej tlen kichiuaskej uan kinmiluiskej ken tikinseliskej amatlajkuilolmej. Noijki techiluiskej ken timonechikoskej uan ken titetlapouiskej. Pero ¿tla akinmej tlayekanaj Betel amo ueli motlapouiaj iuan tlayekankej? Tlayekankej moyekanaskej ika Biblia uan ika amatlajkuilolmej ijkuak techiluiskej tlen tikchiuaskej para ma tiktekichiuilijtokan Jehová (Mat. 28:19, 20, TNM; Hech. 5:29; Heb. 10:24, 25).

11. (1) ¿Ken tikmatij nochipa tikseliskej tlen ika timomachtiskej? (2) ¿Tlen tikchiuaskej tla amo tiknekij ma kajsikan tlen ika timomachtiaj?

 11 Jehová yokijto akinmej kitekichiuiliaj kipiaskej tlen ika momachtiskej (Is. 65:13, 14; Luc. 12:42-44TNM). Ik non, tikneltokaj ialtepe techmakas tlen monekis uan ijkon tiyetoskej tiyolmelajkej. Pero tejuan noijki itlaj uelis tikchiuaskej. Tla tekiuajkej kijtoskej ayakmo ma tiktekichiuilikan Jehová, ma tiktlalikan Biblia uan amatlajkuilolmej kanin amikaj kinmajsis. Sapanoa miak ipati amatlajkuilolmej uan noijki ika formatos digitales, ik non, amo ma tikinkauakan kanin kinmajsiskej. Tinochtin moneki itlaj tikchiuaskej tla tiknekij tikpiaskej chikauak totlaneltokilis ijkuak ayakmo techkauiliskej ma titetlapouikan.

Jehová techpaleuis amo ma timomojtikan ijkuak timonechikoskej. (Xikita párrafo 12). *

12. ¿Tlen uelis kichiuaskej tlayekankej tla amo kinekij ma kimatikan oksekimej kanin timonechikoaj?

12 ¿Ok timonechikoskej? Tlayekankej kitaskej kanin timonechikoskej uan amo ma kimatikan oksekimej tlen tikchiuaj. Ualeua techiluiskej amo timiakej ma timonechikokan. Noijki xamo nochipa kipatlaskej kanin timonechikoskej uan tlen hora. ¿Tlen tikchiuaskej tla amo tiknekij itlaj ma kinchiuilikan tokniuan? Amo chikauak ma timotlapouikan ijkuak tiajsitiuij uan noijki san yolik ma timotlapouikan ijkuak tlamis tonechikol. Noijki amo ma timoyektlalikan ken ijkuak tiauij nechikol tlamo nochtin kimatiskej kanin tiauij.

Nochipa titetlapouiskej maski tekiuajkej ayakmo techkauiliskej. (Xikita párrafo 13). *

13. ¿Tlen techmachtia tlen okichijkej tokniuan ompa Unión Soviética?

13 ¿Ok titetlapouiskej? Amo tikmatij tlen techiluiskej. Pero tiktemoskej ken titetlapouiskej tla tiktlasojtlaj Jehová uan tla techpaktia tiktematiltiskej iTekiuajkayo (Luc. 8:1; Hech. 4:29). Ma tikitakan tlen okijto se ixtlamatki itoka Emily Baran ijkuak tokniuan okinmiluijkej ayakmo ma tetlapouikan ompa Unión Soviética. Okijto: “Ijkuak okinmiluijkej iTlaixpantijkauan Jehová ayakmo tetlapouiskiaj, yejuan opejkej kintlapouiaj tlen ik ompa ochantiayaj, okintlapouiayaj tlen inmiuan otekipanoayaj uan inyolikniuan. Ijkuak okinuikakej ma tekipanotij noijki okintlapouijkej akinmej ompa otekipanoayaj porque noijki okinekiayaj ma momachtikan”. Tokniuan tlen okatkaj ompa Unión Soviética nochipa otetlapouijkej maski amo okinkauiliayaj. Noijki ijkon ma tikchiuakan ijkuak techiluiskej ayakmo ma titetlapouikan.

¿TLEN AMO MONEKI TIKCHIUASKEJ?

Ma tikmatikan tlen amo tikijtoskej ijkuak itlaj techtlajtlaniskej. (Xikita párrafo 14). *

14. ¿Tlen amo tikchiuaskej tla tiktlakamatiskej tlen kijtoa Salmo 39:1?

14 Ma timokuayejyekokan tlen tikijtoskej ijkuak itlaj techtlajtlaniskej. Moneki tikmatiskej tlen amo tikijtoskej ijkuak ayakmo techkauiliskej ma titetlapouikan nion ma timonechikokan (Ecl. 3:7). Amo ma  tikijtokan tlen amo moneki. Amo ma tikijtokan intoka tokniuan, kanin timonechikoaj, ken titetlapouiaj uan ken tikinseliaj amatlajkuilolmej uan okseki tlamantli. Amitlaj ma tikinmiluikan tekiuajkej nion toyolikniuan tlen chantij itech toaltepe nion tlen chantij itech okseki altepemej. Tikinmouijtiliskej tokniuan tla itlaj tikijtoskej (xiktlajtolti Salmo 39:1).

15. ¿Tlen kineki kichiuas Satanás uan tlen tikchiuaskej tla amo tiknekij ma techijtlako?

15 Amo ma timokualanikan ika tlen amitlaj ipati. Satanás kimati tla kinxelos kalchanejkej, amo uelis san sekan yetoskej (Mar. 3:24, 25). Ik non, mochijchikauas techxelos. Kineki ma timokualanikan iuan tokniuan uan amo ma tikitakan ye techtlanilijtok.

16. ¿Tlen techmachtia tlen okichi tokni Gertrud Poetzinger?

16 Noijki moneki momaluiskej tokniuan tlen kipiaj chikauak intlaneltokilis. Ma tikitakan tlen okipanok tokni Gertrud Poetzinger uan Elfriede Löhr. Ninmej ome tokniuan tlapejpenalmej okinuikakej iuan oksekimej tokniuan ompa kanin otetsakuayaj nazis. Tokni Gertrud opejki chauati porque tokni Elfriede okintemakaya kualtsitsintin tlapoualismej tlen okinyolchikauaya tokniuan. Satepan tokni Gertrud opinauaya, ik non, okitlatlaujti Jehová ma kipaleui. Tokni Gertrud okijkuilo: “Moneki tikajsikamatiskej oksekimej okachi kimatij kichiuaskej seki tlamantli noso oksekimej okachi kinkauiliaj ma tlapaleuikan”. ¿Tlen okipaleui ayakmo ma chauati? Okitak tokni Elfriede okipiaya kualtsin iyelis uan oksepa kuali omouikakej. Yejuan amo omikej ijkuak okintsakej uan san sekan okitekichiuilijkej Jehová ijkuak okatkaj nikan tlaltikpak. Satanás amo techxelos tla timochijchikauaj tikyektlaliskej ouijkayotl iuan tokniuan (Col. 3:13, 14).

17. ¿Tleka moneki ma titetlakamatikan?

17 Ma tikchiuakan tlen technauatiaj. Amo timoouijtiliskej tla tikintlakamatiskej tokniuan tlen techmaluiskej (1 Ped. 5:5). Ma tikitakan tlen okipanok se tokni. Itech ialtepe tokni amo okinkauiliayaj ma tetlapouikan ika amatlajkuilolmej. Ik non, tokniuan tlayekankej okinmiluijkej amo ma kintemakakan amatlajkuilolmej ijkuak tetlapouiskiaj. Pero se precursor amo otetlakamatki porque omokuayejyeko okachi okimatiaya tlen kichiuas. ¿Tlen opanok? Se tonal ijkuak otetlapouitoj, policías okintlajtlanijkej seki tlamantli ye uan oksekimej tokniuan. Nesi policías okintokakej uan okintlajtlantiajkej amatlajkuilolmej kanin yejuan okintemakakej. ¿Tlen techmachtia tlen okichi tokni? Moneki ma titetlakamatikan maski timokuayejyekoskej okachi tikmatij tlen tikchiuaskej.  Jehová techteochiuas tla tikintlakamatij tokniuan tlen okintlali ma techyekanakan (Heb. 13:7, 17).

18. ¿Tleka amo san tlen tlamantli ma tikinnauatikan tokniuan?

18 Amo san tlen tlamantli ma tikinnauatikan tokniuan. Porque tlajyouiskej tokniuan tla ijkon kichiuaskej tlayekankej. Ma tikitakan tlen opanok ijkuak tokniuan amo okinkauilijkej ma tetlapouikan kanin achto omotokayotiaya Checoslovaquia. Tokni Juraj Kaminský okijto: “Ijkuak okinkitskijkej tokniuan tlen otlayekanayaj, miakej tlayekankej uan sekimej tlayekankej itech circuito opejki kinmiluiaj tokniuan tlen omonekiaya kichiuaskej. Okijkuilojkej se amatl kanin okijtoayaj tlen kichiuaskiaj uan tlen amo”. Jehová amo techiluia ma tikinmiluikan tokniuan tlen moneki kichiuaskej. Akin ijkon kichiua amo kinmaluia tokniuan. San kineki kinnauatis (2 Cor. 1:24).

AMO KEMAN MA TIKKAUAKAN JEHOVÁ

19. Ijkon ken kijtoa 2 Crónicas 32:7, 8, ¿ken tiyetoskej tiyolchikauakej maski san tlen tlamantli kichiuas Satanás?

19 Satanás akin sapanoa techkokolia kinekiskia nochipa techtlajyouiltis (1 Ped. 5:8; Apoc. 2:10). Noijki akinmej kipaleuiaj kijtoskej ayakmo ma titetlapouikan nion ma timonechikokan. Pero amo keman ma tikinkauilikan ma techmomojtikan (Deut. 7:21). Jehová touan kajki uan nochipa techpaleuis maski ayakmo techkauiliskej ma tiktekichiuilikan (xiktlajtolti 2 Crónicas 32:7, 8).

20. ¿Tlen moneki tikchiuas?

20 Ma tikchiuakan ken tokniuan okichijkej itech achto siglo: “Kuali xikyejyekolikah nomejwah, kox kuali inawak Dios tlan nomejwah nontechnawatiah, ¿akin okachi moneki se makitlakita, nomejwah noso Dios? Mach weletis san tejwah matikpixtokah tlan [otikitakej] iwa otikkakeh” (Hech. 4:19, 20).

TLAKUIKALI 73 ToTajtsin Dios techyolchikaua

^ párr. 5 ¿Tlen tikchiuaskej tla tekiuajkej techiluiskej ayakmo ma titetlapouikan nion ma timonechikokan? Itech nin tlamachtil tikitaskej tlen tikchiuaskej uan tlen amo tikchiuaskej. Nin techpaleuis amo ma tikkauakan toTajtsin Dios.

^ párr. 59 FOTO: Nochi fotos kiteititiaj kanin tokniuan amo kinkauiliaj ma kitekichiuilikan Jehová. Nin foto kiteititia sekimej tokniuan omonechikojkej ikalijtik se tokni.

^ párr. 61 FOTO: Se tokni okitemo ken tetlapouis.

^ párr. 63 FOTO: Policías kitlajtlaniaj se tokni miak tlamantli pero amitlaj kijtoa.