Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok (tlen ika timomachtiaj)  |  Julio de 2017

“Xichokakah inwah akimeh chokah”

“Xichokakah inwah akimeh chokah”

“Ximosepanyolchikawakah iwa ximochikawakah ijkó kemi ya nonkichijtiwitseh” (1 TES. 5:11).

TLAKUIKALMEJ: 53 UAN 28

1, 2. ¿Tleka moneki tikmatiskej ken tikinpaleuiskej akinmej omikik se inkalchanejka? (Xikita tlaixkopinal tlen ika peua tlamachtil).

SE TOKNI tlen itoka Susi okijto: “Ijkuak omikik tokone, kanaj se xiuitl sapanoa otimoyolkokojtokaj”. Okse tokni kijtoa ijkuak omikik isiua “sapanoa otlajyoui”. Uan sapanoa miakej ijkon kinpanoa. Miakej akinmej kichiuaj ken Cristo amo keman omokuayejyekojkej mikiskia ikaj akin sapanoa kitlasojtlaj. Tla tejuatsin, akin tikixmati noso moyolikni omikik se ikalchanejka, uelis timotlajtlania: “¿Ken uelis nikpaleuis?”.

2 Uelis miakej kijtoskej ma pano kauitl uan ayakmo timoyolkokos. Pero ¿melauak? Se tokni tlen ayakmo kipia inamik kijtoa: “Ne nikita tlen melauak tepaleuia, non ken tiktekitiltiaj kauitl ijkuak timoyolkokoaj”. Ijkuak timoyolkokoaj non ken ijkuak timotekij: tla yolik uan kuali timopajtiaj, yolik uan kuali tipajtitiaskej. Ik non, ¿tlen uelis tikchiuaskej para ayakmo ma moyolkoko akin omikik se ikalchanejka?

 JEHOVÁ “NOCHIPA TECHYOLCHIKAWA”

3, 4. ¿Ken tikmatij Jehová kuali kajsikamati tlen tikmachiliaj ijkuak ikaj miki tlen sapanoa tiktlasojtlaj?

3 San Jehová akin teiknomati techyolchikaua (xiktlajtolti 2 Corintios 1:3, 4). San Jehová kajsikamati ken timomachiliaj uan ye kijtoa techyolchikauas (Is. 51:12; Sal. 119:50, 52, 76).

4 Jehová akin teiknomati noijki yomikej iyolikniuan ken Abrahán, Isaac, Jacob, Moisés uan David (Núm. 12:6-8; Mat. 22:31, 32; Hech. 13:22). Biblia kijtoa toTajtsin Dios kineki ma ajsi tonal ijkuak kinyolitis iyolikniuan (Job 14:14, 15). Ijkuakon, yolpakiskej uan ayakmo keman mokokoskej. ToTajtsin Dios noijki okitak ken okimiktijkej iKone akin sapanoa okitlasojtlaya (Prov. 8:22, 30). Amo tikmatij tlen okimachili Jehová ijkuak ijkon okipanok (Juan 5:20; 10:17).

5, 6. ¿Ken teyolchikaua Jehová?

5 Kuali ma tikmatokan Jehová techpaleuis. Ik non, ma tikiluikan ika nochi toyolo tlen tikmachiliaj. Techyolchikaua tikmatiskej Jehová techajsikamati ijkuak titlajyouiaj uan techyolchikaua. Pero ¿ken kichiua?

6 Kichiua “ika iweletilis n Espíritu Santo” (Hech. 9:31). Jesús okijto: “Nomotajtsi non kajki ilwikak nomechmakas n Espíritu Santo tla nonkitlajtlaniliskeh” (Luc. 11:13). Susi tlen achto itech otimotlapouijkej, kijtoa: “Miak uelta hasta otimotlankuaketskej otiktlatlaujtiayaj Jehová ma techyolchikaua. Uan otikmachiliayaj otechyolseuiaya” (xiktlajtolti Filipenses 4:6, 7).

JESÚS SE TEOPIXKI TLEN TEAJSIKAMATI

7, 8. ¿Tleka uelis tikneltokaskej Jesús techyolchikauas?

7 Tlen Jesús okijto uan okichi okiteititi otetlasojtlaya, oteajsikamatiaya uan oteiknomatiaya ken iTajtsin (Juan 5:19). ToTajtsin Dios okiualtitlanki iKone ‘makinyolchikawaki akimeh moyolkokoah’ uan ma kinyolseui “akinmej moyolkokoaj” (Is. 61:1, 2; Luc. 4:17-21). Miakej okitayaj Jesús sapanoa oteiknomatiaya, okinmajsikamatiaya akinmej otlajyouijtokaj uan melauak okinekiaya kinpaleuis (Heb. 2:17).

8 Ijkuak Jesús okatka telpochtli noijki otlajyoui ijkuak omikej ikalchanejkauan uan iyolikniuan. Uelis itlakpatajtsin Jesús, akin omotokayotiaya José, omikik ijkuak Jesús okipiaya kanaj 20 xiuitl. * Ken ye sapanoa otetlasojtlaya, okitak oui ijkuak itajtsin omikik uan noijki okitak ken inantsin uan ikniuan omoyolkokoayaj.

9. Ijkuak omikik Lázaro, ¿ken okiteititi Jesús kajsikamati tlen kimachiliaj oksekimej?

9 Ijkuak Jesús nikan okatka oteiknomatiaya uan oteajsikamatiaya. Se neskayotl, ijkuak Lázaro omikik, Jesús okimatiaya kiyolitis. Pero ijkuak okitak María uan Marta sapanoa omoyolkokoayaj, okajsikamatki ken okimachiliayaj uan noijki opejki choka (Juan 11:33-36).

10. ¿Tleka tikmatij Jesús kuali kajsikamati tlen techpanoa ijkuak titlajyouiaj?

10 ¿Ken techpaleuia itech ninmej tonalmej tlen Jesús okichi? Biblia kijtoa: “Cristo Ye inewia, yala, axa iwa nochipa” (Heb. 13:8). Jesús ye “Akin weleti kichiwa se mayolito  nochipa” uan kajsikamati ijkuak titlajyouiaj, ik non, ueli techpaleuia ijkuak sapanoa timoyolkokoaj (Hech. 3:15; Heb. 2:10, 18). Ik non, ma tikmatokan techajsikamati ijkuak kita titlajyouiaj. Uan kajsikamati tlen techyolkokoa uan techyolseuia ijkuak okachi moneki (xiktlajtolti Hebreos 4:15, 16).

“MATIKCHIAKAH IKA YOLSEWÍLISTLI TLAN YE YOKIJTO TECHMAKAS”

11. ¿Tlen tlaxelolmej mitsyolchikauaj?

11 Amo san tlen okipanok Lázaro uelis techyolchikauas, onka itech Biblia okseki tlaxelolmej tlen noijki uelis techyolchikauaskej. Uan nin amo techtlajtlachialtia porque “nochi tlan yowejka omoijkuilo itech tiotlajkuíloli, omoijkuilo para matimoixtlamachtikah, para matikchiakah ika yolsewílistli tlan Ye yokijto techmakas” (Rom. 15:4). ¿Yomikik ikaj akin sapanoa tiktlasojtla? Tla ijkon ninmej tlaxelolmej mitsyolchikauaskej:

  • “Jehová kajki inmiuan akinmej moyolkokoaj; ye kinmakixtia akinmej yolpatlachitokej” (Sal. 34:18, 19).

  • “Ijkuak opejki sapanoa nimotekipachoa, Te otinechyolchika uan otinechyolseui” (Sal. 94:19).

  • “Inewia n Toteko Cristo Jesús, sansikah iwa n Totajtsi Dios, Akin techtlasojtla iwa kichiwa matimochiakah ika pakílistli para tiaskeh inawak, kichiwa porke de milajka techiknomati, manomechyolchikawa iwa manomechmaka chikawálistli para xikijtokah iwa xikchiwakah nochipa tlan kuali” (2 Tes. 2:16, 17). *

ITECH TLANECHIKOL NOIJKI UELIS TECHYOLCHIKAUASKEJ

12. ¿Ken uelis titeyolchikauaskej?

12 Itech tlanechikol noijki uelis kinpaleuiskej akinmej moyolkokoaj porque yomikik ikaj akin sapanoa kitlasojtlaj (xiktlajtolti 1 Tesalonicenses 5:11). ¿Ken uelis tikinyolchikauaskej uan tikinyolseuiskej akinmej moyolkokoaj? (Prov. 17:22). Ma tikilnamikikan onka “kauitl para amo itlaj se tikijtos uan onka kauitl para se tlajtos” (Ecl. 3:7). Ma tikitakan tlen kijtoaj sekimej tokniuan. Se tokni tlen itoka Dalene akin ayakmo kipia inamik, okijto: “Akinmej moyolkokoaj moneki kijtoskej tlen mokuayejyekoaj uan tlen kimachiliaj. Ik non, moneki ma tikinkakikan uan ma tikinkauakan ma kijtokan tlen kimachiliaj”. Se tokni tlen itoka Junia okipiaya se ikni tlen omomikti, Junia okijto: “Maski amo nochi tikajsikamatiskej tlen kimachilia akin moyolkokoa, miak ipati moneki timochijchikauaskej tikajsikamatiskej”.

13. ¿Tlen moneki ma tikilnamiktokan?

13 Ma tikilnamiktokan tlatlamantli tikteititiaj tlen tikmachiliaj ijkuak titlajyouiaj. Ualeua san akinmej tlajyouiaj kajsikamatij tlen kimachiliaj, pero amo kimatij ken kijtoskej. Non tlen kijtoa Biblia: “Toyolo kimati ijkuak itlaj kikokoa uan amo ikaj ueli kitsakuilia ijkuak paki” (Prov. 14:10). Uan maski akin moyolkokoa kijtoa tlen kimachilia, uelis oksekimej amo kajsikamatiskej tlen kineki kijtos.

14. ¿Tlen okse tlamantli uelis tikchiuaskej para tikinyolchikauaskej akinmej moyolkokoaj?

14 Ik non, uelis amo tikmatij tlen tikinmiluiskej akinmej moyolkokojtokej. Pero Biblia  kijtoa: “Akin amo mokuayejyekoa ijkuak tlajtoa tetsopitia ken se espada, pero innenepil ixtlamatkej tepajtia” (Prov. 12:18). Miakej tokniuan kitekitiltiaj amatlajkuilol Cuando muere un ser querido * uan ijkon kitaj tlen uelis kiluiskej akin sapanoa moyolkokoa. Pero ualeua miak ipati tikchiuaskej nin tlamantli: “Xichokakah inwah akimeh chokah” (Rom. 12:15). Se tokni tlen itoka Gaby, tlen ayakmo kipia inamik kijtoa: “Ijkuak nichoka nikteititia tlen nikmachilia. Ik non, ijkuak nimoyolkokoa uan noselti nimomachilia, nechyolchikaua nouan ma chokakan noyolikniuan”.

15. Tla tikmachiliaj oui tikyolchikauaskej se tokni, ¿tlen uelis tikchiuaskej? (Xikita recuadro “ ¿Ken uelis titeyolchikauaskej?”).

15 Tla tikmachiliaj oui tikyolchikauaskej se tokni, uelis tikijkuililiskej se amatsintli, se correo, se mensaje noso se carta. Uelis tiktemoskej se tlaxelol tlen kiyolchikauas, tikiluiskej itlaj tlen tikilnamikij itech akin omikik noso itlaj tlen kualtsin iuan otikchijkej. Tokni Junia kijtoa: “Amo nikmati ken uelis nikijtos tlen nikmachilia ijkuak ikaj nechmaka se amatsintli tlen nechyolchikaua noso se tokni nechiluia iuan ma nipaxialoti. Non nechilnamiktia katej akinmej nechtlasojtlaj uan nechmaluiaj”.

16. ¿Tlen okse tlamantli techpaleuis ma titeyolchikauakan?

16 Noijki kinpaleuia tokniuan ijkuak tejuan intech timotlatlaujtiaj noso inmiuan timotlatlaujtiaj. Uelis oui yetos ijkuak ikaj sapanoa moyolkokoa iuan timotlatlaujtiskej. Uelis hasta tichokaskej uan ayakmo  uelis titlajtoskej. Pero timotlatlaujtiskej ika nochi toyolo uelis kichiuas ayamo ma moyolkoko tokni. Dalene akin itech otimotlapouijkej itech párrafo 12 kijtoa: “Ualeua ijkuak tokniuan nechyolchikauakiuij nikinmiluia kox uelis motlatlaujtiskej. Ijkuak peuaj amo ueli tlajtoaj. Pero yolik peua kuali tlajtoaj uan motlatlaujtiaj ika nochi inyolo. Nechpaleuiaj ma nikpia chikauak notlaneltokilis ijkuak nikita kipiaj chikauak intlaneltokilis, nechtlasojtlaj uan noijki notech motekipachoaj”.

MA TIKINYOLCHIKAJTOKAN TOKNIUAN

17-19. ¿Tleka moneki ma tikinyolchikajtokan tokniuan?

17 Sekimej uejkauaj moyolkokojtoskej. Ik non, amo moneki tikinyolchikauaskej san ijkuak moyolkokoaj, ijkuak inkalchanejkauan inmiuan katej uan inyolikniuan. Noijki moneki tikinyolchikauaskej maski yopanok seki metstli, ijkuak akinmej okinyolchikajtokaj ayakmo inmiuan katej. Proverbios 17:17 kijtoa: “Se melauak toyolikni nochipa kiteititia techtlasojtla uan ye se tokni tlen kajki ijkuak timoyolkokoaj”. Nochipa ma tikinyolchikauakan akinmej moyolkokoaj (xiktlajtolti 1 Tesalonicenses 3:7).

18 Ma tikilnamiktokan ualeua oksepa moyolkokoskej. Uelis ijkon kinpanos ijkuak kilnamikiskej keman omonamiktijkej, ijkuak kikakiskej se tlakuikali, ijkuak kitaskej se tlaixkopinal, ijkuak kichiuaskej itlaj tlen san sekan okichiuayaj, ijkuak itlaj kijnekuiskej, ijkuak itlaj kikakiskej noso hasta tla seua noso tona. Ikaj akin omikik inamik, uelis oui kichiuas itlaj san iselti, ken ijkuak yas ueyi nechikol noso yas ijkuak tikilnamikij imikilis Jesús. Se tokni tlen ayakmo kipia isiua, okijto: “Otimokuayejyekoaya ijkuak nikilnamikiskia keman onimonamikti yetoskia sapanoa oui uan ijkon opanok. Pero sekimej tokniuan okinyolejkej sekimej noyolikniuan para amo san noselti ma niyeto itech non tonal”.

19 Kuali ma tikilnamiktokan akin moyolkokoa amo san moneki iuan tiyetoskej ijkuak itlaj kilnamiki tlen miak ipati. Tokni Junia kijtoa: “Sapanoa nechpaleuia ijkuak ikaj nouan kajki maski amo ma yeto se tonal tlen miak ipati. Ijkuak ijkon panoa sapanoa nikpatioita uan nechyolchikaua”. Amo uelis tikchiuaskej ayakmo ma moyolkokokan tokniuan. Pero uelis tikchiuaskej seki tlamantli para tikinyolchikauaskej (1 Juan 3:18). Gaby kijtoa: “Niktlasojkamatilia Jehová porque tlayekankej onechpaleuijkej ika tlasojtlalistli uan amo keman onechkajkej ijkuak onimoyolkokoaya. Okichijkej ma nikmachili Jehová nochipa nouan kajki”.

20. ¿Tleka techyolchikaua tlen okijto Jehová kichiuas?

20 Sapanoa techyolchikaua Jehová kitlajtlamis tlajyouilistli “ijkuak nochteh non yomikkeh iwa tooktokeh kikakiskeh itlajtol [Jesús]. Iwa kisaskeh de inmiketekochwah” (Juan 5:28, 29). ToTajtsin Dios yokijto: “Ye sepa kitlajtlamis mikilistli” uan “melauak kinmixayouajuatsas tlaltikpaktlakamej” (Is. 25:8). Ijkuak ajsis non tonal amo tichokaskej “inwah akimeh chokah”, okachi kuali, tiyolpakiskej “inwah akimeh pakih” akinmej tichantiskej itech Tlaltikpak (Rom. 12:15).

^ párr. 8 Biblia kijtoa José ayamo omikiaya ijkuak Jesús okipiaya 12 xiuitl. Pero ayakmo itlaj moijtoa itech José ijkuak Jesús okichi achto milagro nion satepan. Ijkuak Jesús okipilojkej okilui tlatitlanil Juan ma kimaluili inantsin. Amo ijkon kiluiskia tla itajtsin ok yoltoskia (Juan 19:26, 27).

^ párr. 11 Ninmej okseki tlaxelolmej noijki yokinyolchika miakej tokniuan: Salmo 20:1, 2; 31:7; 38:8, 9, 15; 55:22; 121:1, 2; Isaías 57:15; 66:13; 2 Corintios 4:7; 1 Pedro 5:7.

^ párr. 14 Xikita tlamachtil “Jesús supo consolar a sus amigos”, itech revista La Atalaya 1 de noviembre 2010.