Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok (tlen ika timomachtiaj)  |  Julio de 2017

¿Tleka moneki tikijtoskej “xikueyichiuakan Jah”?

¿Tleka moneki tikijtoskej “xikueyichiuakan Jah”?

“Xikueyichiuakan Jah, miak ipati ma tikueyichiuakan toTajtsin Dios ika tlakuikalmej; ¡ye yolpaki uan kinamiki ma tikueyichiuakan!” (SAL. 147:1).

TLAKUIKALMEJ: UAN 152

1-3. (1) ¿Keman uelis okijkuilojkej Salmo 147? (2) ¿Tlen techmachtia Salmo 147?

UALEUA akinmej itlaj kuali kichiuaj noso kipiaj kuali inyelis tikinmiluiaj kuali tlen kichiuaj. Ken tikmatij san Jehová kinamiki tikueyichiuaskej. Moneki ijkon ma tikchiuakan porque ye okichijchi nochi tlen onka uan noijki sapanoa otechtlasojtlak ijkuak okiualtitlanki iKone topatka ma mikiki.

2 Akin okijkuilo Salmo 147 okinekiaya ika nochi iyolo kiueyichiuas Jehová. Uan noijki okinmilui oksekimej noijki iuan ma kiueyichiuakan (xiktlajtolti Salmo 147:1, 7, 12).

3 Amo tikmatij akin okijkuilo nin salmo, pero uelis okatka ijkuak Jehová okinkixti israelitas itech Babilonia uan oksepa okinuikak Jerusalén (Sal. 147:2). Nin salmista okiueyichi Jehová porque okichi oksepa ma mokuepakan israelitas uan itech ialtepe ma kiueyichiuakan. Pero noijki okatka okseki tlamantli tleka okiueyichi. ¿Tlen tlamantli? ¿Tleka  moneki tikijtoskej “xikueyichiuakan Jah”? (Sal. 147:1).

JEHOVÁ “KINPAJTIJTOK AKINMEJ MOYOLKOKOAJ”

4. ¿Ken omomachilijkej israelitas ijkuak Ciro okinkixti uan tleka?

4 Ma timokuayejyekokan ken omomachiliayaj israelitas tlen okatkaj Babilonia. Babilonios okinpinauiayaj uan okinmiluiayaj: “Xitechtlakuikilikan se itlakuikal Sión”. Pero yejuan amo okinekiayaj tlakuikaskej, porque Jerusalén okipojpolojkej, ik non, ayakmo oyolpaktokaj (Sal. 137:1-3, 6). Sapanoa omoyolkokoayaj uan okinekiayaj ikaj ma kinyolchikaua. Pero ijkon ken okijto Jehová, tekiua Ciro okimoaxkati Babilonia uan okinkixti israelitas. Okijto itech Jehová: “Jehová akin kajki iluikak, onechinmakak nochtin tekiuajkayomej itech Tlaltikpak uan ye ineuian onechnauati ma nikchijchiuili se kali ompa Jerusalén, tlen kajki Judá. Akinmej pouij itech ialtepe uelis mokuepaskej uan Jehová inmiuan ma yeto” (2 Crón. 36:23). Nin melauak okinyolchika israelitas ijkuak okatkaj Babilonia.

5. Ijkon ken kijtoa Salmo 147:3, ¿ken kitekitiltia Jehová ichikaualis?

5 Jehová amo san okinyolchika israelitas, noijki sejse intech omotekipacho. Ijkon ken axkan panoa. Salmista okijkuilo itech Jehová: “Ye kinpajtijtok akinmej moyolkokoaj uan kinmilpia kanin kinkokoa” (Sal. 147:3). Ijkuak timokokoaj noso timoyolkokoaj, ma tikmatokan Jehová kineki techyolchikauas uan techpaleuis (Sal. 34:18; Is. 57:15). Techyolchikaua uan kichiua ma tiyetokan tiixtlamatkej uan ijkon tikixnamikiskej san tlen ouijkayotl (Sant. 1:5).

6. ¿Tlen techmachtia Salmo 147:4? (Xikita tlaixkopinal tlen ika peua tlamachtil).

6 Nin salmista oajkotlachixki uan okijto Jehová “kinpojtok sitlalimej uan nochtin kinnotsa ika intoka” (Sal. 147:4). ¿Tleka salmista opejki tlajtoa itech sitlalimej? Ma timokuayejyekokan itech nin tlamantli: salmista ueli okinmitaya sitlalimej, pero amo okimatiaya keski okatkaj. Axkan akinmej ixtlamatkej okachi miakej kinmitaj sitlalimej. Akinmej ixtlamatkej kineltokaj katej sapanoa miakej sitlalimej itech semanauak. Pero amo ueli kinpoaj. San akin okichijchi nochi ueli kinpoa uan ye kintokayotia. Nin kijtosneki nochtin kinmixmati (1 Cor. 15:41). ¿Tlen techmachtia nin? Ijkon ken toTajtsin Dios kimati kanin katej sitlalimej, noijki kimati kanin tikatej, ken timomachiliaj uan tlen moneki techmakas.

7. ¿Tlen kuali kimatok Jehová?

7 Jehová kuali kimati tlen ouijkayotl tikixnamikij uan uelis techpaleuis porque kipia chikaualistli (xiktlajtolti Salmo 147:5). Ualeua uelis tikitaskej amo uelis tikixnamikiskej ouijkayotl tlen tikpiaj. Pero toTajtsin Dios kimati hasta kanin uelis titlaxikoskej “porque ye kuali kimati ken tichijchitokej uan kilnamiki tejuan titlali” (Sal. 103:14). Titlajtlakolejkej, ik non, ualeua oksepa tikchiuaj tlen amo kuali. Uelis timoyolkokoaj porque itlaj amo kuali otikijtojkej, otimokuayejyekojkej itlaj amo kuali noso tichauatij. Maski Jehová amo ijkon kichiua kuali techajsikamati (Is. 40:28).

8. ¿Tlen neskayotl kiteititia Jehová techajsikamati?

 8 Uelis yotikitakej ken Jehová kitekitiltia ichikaualis ijkuak otechpaleui ma tikixnamikikan se ouijkayotl (Is. 41:10, 13). Ma tikitakan tlen okipanok se tokni precursora tlen itoka Kyoko. Ijkuak okititlankej oksekan ma tetlapouiti sapanoa omoyolkoko. ¿Ken okitak Kyoko okajsikamatiaya Jehová tlen okipanotoka? Itech tlanechikol miakej tokniuan okajsikamatiayaj tlen okipanotoka Kyoko. Okimachili ken kiluiskia Jehová: “Nimitstlasojtla, amo porque tiprecursora, nimitstlasojtla porque tinokone uan tinechtekichiuilia. Nikneki xiyolpaki porque tinoTlaixpantijka”. ¿Ken mitsititia Jehová ixtlamatilis okachi ueyititok?

JEHOVÁ TECHMAKA TLEN TECHPOLOA

9, 10. ¿Tlen achto techmaka toTajtsin Dios? Xikijto se neskayotl.

9 Ualeua uelis techtekipachos tlen tikkuaskej. ToTajtsin Dios okichijchi Tlaltikpak ma kitemaka tlakuali tlen moneki uan hasta kakalomej kipiaj tlen kikuaskej (xiktlajtolti Salmo 147:8, 9). Tla Jehová kintlamaka ninmej kakalomej, kuali ma tikmatokan noijki techmakas tlen techpoloa (Sal. 37:25).

10 Tlen okachi ipati, Jehová techmaka tlen ika tikpiaskej chikauak totlaneltokilis uan noijki techmaka “iyolsewilis [...] non amaka weleti kajsikamati” (Filip. 4:6, 7). Ma timokuayejyekokan tlen okipanok tokni Mutsuo uan isiua, yejuan okitakej ken okinpaleui Jehová ijkuak opanok se tsunami ompa Japón itech 2011. Omomakixtijkej porque otlejkokej ikuapak inkalijtik, pero okipolojkej nochi tlen okipiayaj. Itech non yoak oseuaya uan okochkej ompa ikuapak kali kanin okatka se cuarto tlen ayakmo okatka kuali. Ijkuak otlaneski okitemojkej itlaj tlen kichikauaskia intlaneltokilis. Okajsikej se Anuario del 2006. Mutsuo san niman okitak se tlamachtil tlen itoka “Los tsunamis más mortíferos de la historia”. Ompa otlajtoaya ijkuak otlalolinki itech isla de Sumatra itech 2004 uan non okichi ma mochiuakan tsunamis tlen sapanoa otlaxixinijkej. Mutsuo uan isiua ochokakej ijkuak okitlajtoltijkej tlen opanok. Okimachilijkej okinyolchikauaya toTajtsin Dios ijkuak okachi omonekiaya ikaj ma kinpaleui. Noijki okimachilijkej ken toTajtsin Dios okintlasojtlaya ijkuak tokniuan tlen ochantiayaj Japón okinuikilijkej tlakuali uan tlakemitl. Pero okachi omoyolchikajkej ijkuak sekimej tokniuan tlayekankej itech Betel okintlajpalotoj itech intlanechikol. Mutsuo kijtoa: “Onikmachili Jehová touan okatka uan otechmaluijtoka. Sapanoa otechyolchika”. Ken tikitaj, toTajtsin Dios achto techmaka tlen ika tikpiaskej chikauak totlaneltokilis uan satepan techmaka tlen techpoloa.

¿KEN TECHPALEUIA TOTAJTSIN DIOS?

11. ¿Tlen tikchiuaskej para techpaleuis toTajtsin Dios?

11 Jehová nochipa kineki kinpaleuis “akinmej yolkualmej” (Sal. 147:6a). Pero ¿tlen uelis tikchiuaskej para uelis techpaleuis? Moneki kuali iuan timouikaskej. Ik non, moneki tiyetoskej tiyolmelauakej (Sof. 2:3). Akinmej yolmelauakej kichixtokej toTajtsin Dios ma kitlajtlami nochi tlen amo kuali uan noijki tlajyouilistli. Jehová kinselia akinmej ijkon kichiuaj.

12, 13. (1) ¿Tlen amo tikchiuaskej tla tiknekij ma techpaleui toTajtsin Dios? (2) ¿Tlen moneki tikchiuaskej para tikyolpaktiskej toTajtsin Dios?

 12 ToTajtsin Dios “kintlamotla akinmej amo yolkualmej” (Sal. 147:6b). Nin amo san ma tikajauilmatikan. Tla tiknekij toTajtsin Dios ma techtlasojtla uan amo touan ma kualani, moneki tikkokoliskej tlen amo kuali (Sal. 97:10). Moneki tikkokoliskej nochi tlen poui itech auilnemilistli. Nin kijtosneki amo itlaj tikchiuaskej tlen uelis kichiuas ma tiauilnemikan, ik non, amo ma tikitakan pornografía (Sal. 119:37; Mat. 5:28). Moneki timochijchikauaskej uan toTajtsin Dios techteochiuas.

13 Para uelis titlatlaniskej, moneki tikiluiskej Jehová ma techpaleui. Ye amo kipaktia ma timopaleuikan itech “ichikaualis caballo” nion ma titlaneltokakan itech “imetsuan tlakatl”. Nin kijtosneki Jehová amo techselis tla san totech titlaneltokaj noso itech oksekimej (Sal. 147:10). Moneki ma tiktlatlaujtikan ma techpaleui. Ye nochipa techkaki amo ken tlaltikpaktlakamej san niman mosotlauaj. Salmo 147:11 kijtoa: “Jehová kiyolpaktia akinmej kimauiliaj, akinmej kichiaj itlasojtlalis yolmelajki”. Ik non, uelis tikneltokaskej techpaleuis ma tiktlanilikan tlen amo kuali tiknekij tikchiuaskej.

14. ¿Tlen okiyolchikauaya salmista?

14 Jehová techiluia nochipa techpaleuis ijkuak tikpiaskej ouijkayotl. Akin okijkuilo Salmo 147 omokuayejyekojtoka itech israelitas ijkuak omokuepkej Jerusalén uan okijto itech Jehová: “Ye kichiua ma yetokan chikauakej kaltlatsakuilmej uan kinteochiua mokoneuan tlen mouan katej. Ye kichiua ma kipia yolseuilistli moaltepe” (Sal. 147:13, 14). Okiyolchikauaya kimatis toTajtsin Dios okinyektlalijtoka ikaltlatsakuiluan Jerusalén uan ijkon amo itlaj kinpanoskia itekipanojkauan.

¿Ken techpaleuia iTlajtol toTajtsin Dios ijkuak titlajyouiaj? (Xikinmita párrafos 15 a 17).

15. (1) ¿Ken uelis timomachiliskej? (2) ¿Ken kitekitiltia toTajtsin Dios iTlajtol?

15 Uelis tikixnamikij ouijkayotl tlen kichiua ma timotekipachokan. Pero Jehová uelis techmakas ixtlamatilistli. Salmista okijto toTajtsin Dios “kiualtitlantok itlanauatil itech Tlaltikpak; itlajtol totoka motlaloa”. Noijki okijto: “Ye kiualtitlani nieve ken ichkatsojmitl; kixitinia setl ken tlikonextli” uan “kiualtitlani tesiuitl”. Satepan salmista otlajtlanki: “¿Akin uelis kixikos ijkuak sapanoa seua?”. Uan satepan okijto itech Jehová “kiualtitlani itlajtol uan kipatiltia” (Sal. 147:15-18). ¿Tlen techmachtia nin? ToTajtsin Dios kinauatia nieve uan tesiuitl uan ye kixmati nochi tlen okichijchi porque ye kipia sapanoa miak chikaualistli. Ik non, uelis techpaleuis ma tikixnamikikan san tlen ouijkayotl.

16, 17. Xikijto se neskayotl tlen kiteititia toTajtsin Dios totoka techpaleuia ika iTlajtol.

16 Itech ninmej tonalmej, Jehová techyekana ika iTlajtol. Uelis tikijtoskej iTlajtol “totoka motlaloa” porque ika techyekana ijkuak okachi moneki. Ma timokuayejyekokan ken techpaleuia Biblia, amatlajkuilolmej tlen techmaka “tlakeuali yolmelajki uan ixtlamatki”, JW Broadcasting, jw.org, tlayekankej uan oksekimej tokniuan (Mat. 24:45TNM). ¿Amo melauak toTajtsin Dios totoka techyekana ijkon ken kijtoa salmo?

17 Se tokni tlen itoka Simona omokuayejyekoaya amo itlaj ipati uan amo keman  iuan mouikaskia toTajtsin Dios. Maski omoyolkokoaya, nochipa okilui toTajtsin Dios ma kipaleuia. Noijki omochijchika momachtis Biblia. ¿Kimachilia okipaleui iTlajtol toTajtsin Dios? Simona kijtoa: “Maski san tlen tlamantli nechpanoa, nochipa nikmachilia Jehová nechmaka chikaualistli uan nechyekana”. Non kipaleuia amo ma motekipacho.

18. ¿Tleka tikmachilia toTajtsin Dios omitsmakak se tlateochiualistli uan tleka tikijtoa “xikueyichiuakan Jah”?

18 Salmista okimatiaya israelitas okipiayaj se tlateochiualistli porque Jehová okinpejpenki kinmakas iTlajtol uan itlanauatiluan (xiktlajtolti Salmo 147:19, 20). Noijki tikpiaj se tlateochiualistli porque Jehová san tejuan otechpejpenki ma tikpiakan itoka. Tikixmatij uan techyekana ika iTlajtol. Ik non, tiktlasojkamatilia iuan timouikaj. Ijkon ken salmista tlen okijkuilo Salmo 147, onka miak tlamantli tlen kiteititia moneki tikijtoskej “xikueyichiuakan Jah” uan noijki ma tikinmiluikan oksekimej ijkon ma kijtokan.