Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok (tlen ika timomachtiaj)  |  Julio de 2017

Sekimej techtlajtlaniaj

Sekimej techtlajtlaniaj

¿Kuali yetoskia akin kichiua ken Cristo ma kipia se pistola, se escopeta noso okse tepostli para ika mopaleuis?

Akinmej kichiuaj ken Cristo moneki kuali mokuayejyekoskej ken momaluiskej. Moneki moyekanaskej ika principios bíblicos. Ijkon kajsikamatiskej amo kuali kipiaskej se pistola, se escopeta noso okse tepostli para ika mopaleuis. Ma tikitakan tlen uelis techpaleuis kuali ma tikpejpenakan tlen tikchiuaskej.

Jehová sapanoa kipatioita toyolilis. David kuali okimatiaya itech Jehová “uits yolilistli” (Sal. 36:9). Ik non, akin kichiua ken Cristo moneki kuali ma mokuayejyeko ken momaluis noso kimaluis tlen iaxka para amo ikaj kimiktis (Deut. 22:8; Sal. 51:14).

AIkaj uelis kitekitiltis san tlen tlamantli para ika temiktis. Pero okachi totoka uelis ikaj temiktis ika se tepostli, maski kinekis noso amo. * Noijki tla se ichteki peua momojtia porque kita akin kitlachtekia kipia se tepostli, non uelis kichiuas ikaj ma miki.

Ijkuak Jesús yikimiktiskiaj, okinmilui imachtijkauan ma kimotemolikan se espada, pero amo para ika mopaleuiskiaj (Luc. 22:36, 38). Ijkon okinmilui porque okinekiaya kinmachtis se tlamantli tlen miak ipati: amo omonekiaya moteuiskej iuan oksekimej maski kinchiuiliskiaj  tlen amo kuali (Luc. 22:52). Ijkuak Pedro okinakasteki itlakeual ueyi teopixki, Jesús okilui: “Xiktlaati moespada”. Satepan okiteititi se tlamantli tlen sapanoa miak ipati, se principio tlen techyekana noijki itech ninmej tonalmej: “Akimeh kiwikah iespada, noiwa ika espada kinmiktiskeh” (Mat. 26:51, 52).

Ken kijtoa Miqueas 4:3 itekipanojkauan toTajtsin Dios “kinkuepaskej inmiespadas tlen ika tlameuaskej uan inlanzas kikuepaskej tlen ika kitekiskej xiuitl”. Akinmej kichiuaj ken Cristo kinmixmatij ken amo teuan moteuiaj. Kichiuaj tlen okijto tlatitlanil Pablo: “Nomejwah xiktemolikah kenijki nonmoyekwikaskeh ika yolsewílistli iwan nochteh” (Rom. 12:17, 18). Pablo sapanoa otlajyoui uan ualeua okinnamikiaya ichtekej (2 Cor. 11:26). Nochipa omoyekanki ika principios uan amo ikaj okiteui. Ye nochipa otlaneltokak itech toTajtsin Dios uan itech Biblia uan non okachi kuali uan amo timopaleuiskej ika tepostli (Ecl. 9:18).

Akinmej kichiuaj ken Cristo okachi kipatioitaj inyolilis uan amo tlamantli tlen kipiaj. Kuali tikmatij “tlakatl amo kipia nemílistli san por kipia miak tomi” (Luc. 12:15). Tla ikaj techtlachtekia uan kiuika se tepostli, amo ma tikualanikan. Tla nin tlamantli amo techpaleuia okachi kuali ma tikchiuakan tlen okijto Jesús: “Amo xikmokopilikah ijkuak itla amo kuali nomechtoktiah”. Nin kijtosneki ma tikkauilikan ichteki ma kiuika tlen kinekis (Mat. 5:39, 40; Luc. 6:29). * Pero ma timomaluikan. Amo techtlachtekiskej tla amo tikteititiaj tlen tikpiaj uan tla kanin tichantij kimatij tejuan tiiTlaixpantijkauan Jehová uan kimatij amo timoteuiaj iuan oksekimej (Prov. 18:10; 1 Juan 2:16 ).

Akinmej tikchiuaj ken Cristo tiktlakaitaj tlen oksekimej mokuayejyekoaj (Rom. 14:21). Tla momatis se tokni kipia se tepostli tlen kitekitiltia para ika momaluis, sekimej tokniuan uelis kualaniskej noso mokuejsoskej. Tla tikintlasojtlaj amo tikchiuaskej tlen san tejuan techpaktia, maski tekiuajkej kitekauiliaj ma tikpiakan se tepostli (1 Cor. 10:32, 33; 13:4, 5).

Akinmej tikchiuaj ken Cristo timochijchikauaj ma techitakan ken se kuali neskayotl (2 Cor. 4:2; 1 Ped. 5:2, 3). Ma tikijtokan se tokni kipia se tepostli tlen kitekitiltia para ika mopaleuis. Tla amo kineki kikauas maski yokitlapouijkej ika Biblia, amo kitaskej ken se kuali neskayotl. Ik non, amo uelis kimakaskej se tekitl itech tlanechikol. Noijki ijkon panos tla se tokni kipia se tekitl kanin moneki kiuikatinemis se tepostli para ika tekitis. Okachi kuali, moneki kitemos okse tekitl kanin amo moneki kiuikatinemis se tepostli. *

Ik non, sejse tejuan moneki tikpejpenaskej ken timomaluiskej, ken tikinmaluiskej tokalchanejkauan, ken tikmaluiskej tlen tikpiaj uan tlen tekitl tikseliskej. Pero ijkuak tikpejpenaskej tlen tikchiuaskej moneki timoyekanaskej ika principios bíblicos tlen kiteititiaj ixtlamatilis uan itlasojtlalis toTajtsin Dios. Akinmej kipiaj chikauak intlaneltokilis kitaj okachi kuali amo kipiaskej se tepostli tlen kitekitiltiskej para ika mopaleuiskej. Yejuan kuali kimatij se tonal ayakmo momojtiskej nion itlaj kinpanos tla tlaneltokaj itech toTajtsin Dios uan kintlakamatij principios bíblicos (Sal. 97:10; Prov. 1:33; 2:6, 7).

Ijkuak uits ueyi tlajyouilistli, akinmej kichiuaj ken Cristo tlaneltokaskej itech Jehová uan amo itlaj kichiuaskej para mopaleuiskej.

^ párr. 3 Uelis akin kichiua ken Cristo kinekis kipias se escopeta noso okse tepostli para kinmiktis yolkamej noso para ika mopaleuis amo itlaj ma kichiuilikan yolkamej. Ijkuak amo kitekitiltis itepos, ma kikixtili nochi tlen kipia uan ma kitlati. Tla kanin tichantij tekiuajkej amo kitekauiliaj ma tikinpiakan teposmej noso onka tlanauatilmej tlen kijtoaj uelis san se tikpiaskej, akinmej tikchiuaj ken Cristo moneki tikintlakamatiskej nonmej tlanauatilmej (Rom. 13:1).

^ párr. 2 Xikita tlamachtil “Cómo evitar una violación”, itech revista ¡Despertad! del 8 de marzo 1993.

^ párr. 4 Para uelis tikmatis kox tikselis se tekitl noso amo kanin monekis tikuikatinemis se tepostli, xikita revista La Atalaya del 1 de noviembre 2005, página 31 uan revista La Atalaya del 1 de noviembre 1983, páginas 25 uan 26.