Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok (tlen ika timomachtiaj)  |  Julio de 2017

Ma tiktemokan tlamantli tlen miak ipati

Ma tiktemokan tlamantli tlen miak ipati

“Xiktekitiltikah tlan onka itech nin tlaltíkpaktli” (LUC. 16:9).

TLAKUIKALMEJ: 32 UAN 154

1, 2. ¿Tleka itech ninmej tonalmej miakej amo itlaj kipiaj?

ITECH ninmej tonalmej ayakmo onka tomin. Telpokamej uan ichpokamej amo kajsij tekitl. Miakej maski itlaj uelis kinpanos yauij tekititiuij itech okseki altepemej. Ualeua itech uejueyij altepemej noijki amo onka tomin. Sekimej kipiaj tomin uan oksekimej sepa amo itlaj kipiaj. Sekimej ixtlamatkej yokitakej kox kipiaj tomin tlaltikpaktlakamej uan kijtoaj miakej sapanoa kipiaj miak tomin. Maski nin amo kuali momati. Pero mota sapanoa miakej amo kipiaj tomin uan oksekimej kipiaj miak hasta para kinkajteuiliskej inmixuiuan. Jesús kuali okimatiaya non tlamantli, ik non, okijto: “Próbesteh nochipa nonkimpixtoskeh nomowah” (Mar. 14:7). ¿Tleka ijkon panoa?

2 Jesús kuali okimatiaya san iTekiuajkayo toTajtsin Dios uelis kipatlas nochi tlen axkan panoa. Itech Apocalipsis 18:3 kijtoa “tlasemankeh” kineskayotia nochi tlen poui itech política uan tlaneltokalismej tlen Satanás kiyekana. Itekipanojkauan toTajtsin Dios amo mokajkalakiaj itech política nion itech tlaneltokalistli tlen amo melauak. Pero miakej amo ueli kikauaj tlen kiyekana Satanás.

3. ¿Tlen tlajtlanilmej tikinnankiliskej?

 3 Akinmej tikchiuaj ken Cristo moneki timokuayejyekoskej ken tikitaj nochi tlen kichiua ma tiktlanikan tomin. Ma timotlajtlanikan: “¿Ken uelis niktekitiltis tlen nikpia para nikteititis niyolmelajki ixpan Jehová? ¿Tlen uelis nikchiuas para amo sapanoa niktemos tomin? ¿Tlen neskayomej kiteititiaj melauak titlaneltokaj itech Jehová?”.

INESKAYO SE TLAKATL TLEN OTLAMALUIAYA

4, 5. (1) ¿Tlen okipanok tlakatl tlen Jesús itech otlajto? (2) ¿Tlen okinmilui Jesús ma kichiuakan imachtijkauan?

4 (Xiktlajtolti Lucas 16:1-9). Tlen okijto Jesús itech nin tlakatl tlen otlamaluiaya kichiua ma timokuayejyekokan. Nin tlakatl kipoloskia iteki porque okiteluijkej amo kuali okitekitiltiaya tlen amo iaxka. * Nin tlakatl kuali omokuayejyeko tlen uelis kichiuas ijkuak ayakmo kipiaskia tekitl, ik non, opejki mouika iuan akinmej uelis kipaleuiskiaj. ¿Jesús okinmiluijtoka imachtijkauan noijki ijkon ma kichiuakan para uelis kuali yetoskiaj? Amo. Ye okijto ijkon kichiuaj akinmej amo kitekichiuiliaj toTajtsin Dios. Jesús okijto nin neskayotl para tlamachtis se tlamantli tlen miak ipati.

5 Oui tlen okipanok nin tlakatl. Uan Jesús kuali okimatiaya imachtijkauan noijki oui kipiaskej tlen ika mopanoltiskej. Ik non, okinmilui: “Xiktekitiltikah tlan onka itech nin tlaltíkpaktli, para nonkimpalewiskeh n próbesteh iwa ijkó nonkimpiaskeh akimeh nomechmoiknitiskeh”. ¿Tlen techmachti tlen okijto Jesús?

6. ¿Tleka tikijtoaj amo opouiaya itech itlanekilis Jehová ma titlanemakakan?

6 ¿Tleka Jesús okijto “xiktekitiltikah tlan onka itech nin tlaltíkpaktli”? Biblia amo kiyekijtoa, pero amo opouiaya itech itlanekilis Jehová ma titlanemakakan. ¿Tleka ijkon tikijtoaj? Porque itech xochitlali Jehová okimakak nochi tlen okipoloaya Adán uan Eva (Gén. 2:15, 16). Noijki, ijkuak toTajtsin Dios okinmakak espíritu santo tokniuan itech achto siglo, “amaka okijtoaya san ye iaxka tlan okipiaya, yej okimosepanxejxeliliayah” (Hech. 4:32). Teotlajtojki Isaías okijto ajsiskia tonal ijkuak nochtin tlaltikpaktlakamej moyolpaktiskej ika tlen onka itech Tlaltikpak (Is. 25:6-9; 65:21, 22). Pero imachtijkauan Jesús omonekiaya kimatiskej ken kitekitiltiskej tlen onka itech nin Tlaltikpak uan noijki mochijchikauaskiaj kiyolpaktiskej toTajtsin Dios.

MA TIKMATIKAN KEN TIKTEKITILTISKEJ TLEN ONKA ITECH TLALTIKPAK

7. ¿Tlen techmachtia Lucas 16:10-13?

7 (Xiktlajtolti Lucas 16:10-13). Tlakatl tlen otlamaluiaya opejki mouika iuan oksekimej para uelis kipaleuiskiaj. Pero Jesús okinmilui imachtijkauan ma mouikakan iuan Jehová uan amo ma kichiakan itlaj kipiaskej. Ika okseki tlaxelolmej Jesús okinekiaya ma tikajsikamatikan ken tiktekitiltiaj tlen onka itech Tlaltikpak uelis kiteititis kox melauak tiyolmelajkej ixpan Jehová.

8, 9. ¿Ken kitekitiltiaj sekimej tokniuan tlen onka itech Tlaltikpak?

8 Tikteititiskej tiyolmelajkej tla tiktekitiltiaj tlen tikpiaj para titlapaleuiskej okachi ma motetlapoui ijkon ken okijto Jesús (Mat. 24:14TNM). Ma tikitakan tlen kichiuaj sekimej tokniuan. Se takotsin tlen chanti itech altepetl India okipiaya se cajita uan ompa okitlaliaya itomin. Uan ayakmo okinkoaya auilmej. Ijkuak cajita otenki, okitemakak tomin ika nochi iyolo para ika ma motetlapoui. Noijki itech nin altepetl, se tokni kipia cocos kuajyo  uan noijki kimati ken kitekitiltis tlen onka itech Tlaltikpak. Nin tokni okintemakak cocos ika nochi iyolo para tokniuan akinmej tlajtolkuepaj ika tlajtoli malayálam. Ye kijtoa amo kitemaka tomin pero okintemakak cocos para ayakmo ma kinkoakan. Noijki tokniuan tlen chantij Grecia kitemakaj ika nochi inyolo aceite, queso uan okseki tlamantli para akinmej tekitij Betel.

9 Ma tikitakan tlen kichiua se tokni tlen ichan Sri Lanka pero chanti itech okse altepetl. Ompa Sri Lanka kipia se kali uan se tlali, kintlanetia tokniuan para ompa ma monechikokan uan ma kinchiuakan uejueyij nechikolmej uan ompa ma chantikan akinmej okachi kitekichiuiliaj Jehová. Maski moneki kitlaxtlauas seki tlamantli, ijkon kinpaleuia tokniuan tlen amo kipiaj miak tlamantli. Kanin amo kinkauiliaj ma tetlapouikan, sekimej tokniuan kintekitiltiaj inkaluan para ompa ma monechikokan.

10. ¿Ken techpaleuia tiktemakaskej tlen tikpiaj?

10 Ninmej neskayomej kiteititiaj itekipanojkauan Jehová yolmelajkej itech tlamantli tlen amo miak, nin kijtosneki, okachi kipatioitaj tlamantli tlen miak ipati uan amo tlen onka itech Tlaltikpak (Luc. 16:10). ¿Ken momachiliaj iyolikniuan Jehová ijkuak mochijchikauaj kitemakaskej tlen kipiaj? Yejuan kuali kimatij tla kitemakaskej tlen kipiaj, okachi kipiaskej tlen melauak miak ipati (Luc. 16:11). Se tokni tlen kitemaka tomin ika nochi iyolo para ma motetlapoui kijtoa kipia se tlateochiualistli. Ye okijto: “Ijkuak niktemaka ika nochi noyolo tlen nikpia, okachi totoka nitetlapojpoluia, nikmati nimochias uan amo nimoyolkokoa ijkuak itlaj nechchiuiliaj uan nikselia tlen oksekimej nechiluiaj tlen moneki nikchiuas”. Oksekimej tokniuan tlen noijki kitemakaj tlen kipiaj, kijtoaj kinpaleuia okachi kuali ma mouikakan iuan Jehová (Sal. 112:5; Prov. 22:9).

11. (1) ¿Tleka tikteititiaj tiixtlamatkej tla kuali tiktekitiltiaj tlen tikpiaj? (2) ¿Tlen kichijtok ialtepe toTajtsin Dios itech ninmej tonalmej? (Xikita tlaixkopinal tlen ika peua tlamachtil).

11 Ijkuak tiuelij tikinpaleuiaj oksekimej, non okse tlamantli tlen kiteititia kuali tiktekitiltiaj tlen tikpiaj. Sekimej tokniuan tlen kipiaj tomin amo ueli yauij tetlapouitiuij itech okseki altepemej. Pero yolpakij ijkuak kitemakaj tomin ika nochi inyolo uan kinpaleuiaj oksekimej tokniuan tlen okachi kitekichiuiliaj Jehová (Prov. 19:17). Tomin tlen tiktemakaj ika nochi toyolo tlapaleuia ma mochijchiuakan uan ma moxexelokan amatlajkuilolmej uan titlapaleuiaj ma motetlapoui kanin amo onka tomin kanin miakej kinekij momachtiskej iTlajtol toTajtsin Dios. Itech Congo, Madagascar uan Ruanda, miakej tokniuan omonekiaya kipejpenaskej kox kinkouiliskiaj tlakuali inkalchanejkauan noso kinkoaskiaj biblias uan uelis kikoaskiaj se Biblia ika tomin tlen okitlaniayaj itech se semana noso se metstli. Pero tlapaleuia tomin tlen kitemakaj tokniuan ika nochi inyolo. Ika nin tomin ialtepe Jehová okitlajtolkuepki Biblia uan nochtin  tokniuan kipiaj inBiblia uan noijki akinmej kinekij kixmatiskej toTajtsin Dios (xiktlajtolti 2 Corintios 8:13-15). Ijkon akinmej tlapaleuiaj uan akinmej kinpaleuiaj uelis mouikaskej iuan Jehová.

¿KEN TIKKAUASKEJ AYAKMO TIKTEKITILTISKEJ TLEN ONKA ITECH TLALTIKPAK?

12. ¿Ken okiteititi Abrahán otlaneltokaya itech toTajtsin Dios?

12 Tla amo okachi tiktekitiltiskej tlen onka itech Tlaltikpak, techpaleuis ma timouikakan iuan Jehová uan ma tiktemokan tlen okachi miak ipati. Abrahán ijkon okichi, se tlakatl tlen okipiaya chikauak itlaneltokilis. Ye okinekiaya kuali mouikas iuan Jehová, ik non, otetlakamatki uan okiski itech altepetl Ur kanin okatka miak tomin uan ochantito itech mantajkalmej (Heb. 11:8-10). Ye kuali okimatiaya tlen melauak ipati kitemaka Jehová. Ik non, amo keman okinek sapanoa kipias miak tomin, porque non kiteititiskia amo melauak tlaneltoka itech Jehová (Gén. 14:22, 23). Satepan Jesús noijki okilui se telpochtli tlen okipiaya miak tomin ma kipia chikauak itlaneltokilis, okilui: “Tla de milajka tikneki ti yetos ti kuali tlakatl, xiknamaka nochi tlan tikpia iwa n tomi xikintliokoli n próbesteh. Ijkó tiktlawelpias weyi tlaxtláwili kan ilwikak. Iwa tias nowa” (Mat. 19:21). Nin telpochtli amo otlaneltokaya ken Abrahán, pero oksekimej okiteititijkej tlaneltokaj itech Jehová.

13. (1) Pablo, ¿tlen okilui Timoteo? (2) ¿Ken uelis timoyekanaskej ika nin principio?

13 Timoteo noijki okiteititi okipiaya chikauak itlaneltokilis. Tlatitlanil Pablo okilui Timoteo okatka “kemi se kuali soldado de Cristo Jesús”. Uan satepan noijki okilui: “Nion se soldado weleti mokalakia itech ok se tekitl, porke sa mochixtok kichiwas tlan kinawatis akin kiyakana” (2 Tim. 2:3, 4). Axkan akinmej kichiuaj ken Cristo mochijchikauaj moyekanaskej ika nin principios. Uan katej kanaj se millón akinmej okachi kitekichiuiliaj Jehová. Uan mochijchikauaj amo kipiaskej tlamantli tlen onka itech Tlaltikpak, yejuan kilnamiki “akin kitlaneui tomin mochiua itlakeual akin kitetlanetia” (Prov. 22:7). Satanás kineki ma timotonalpolokan uan ma tiktemokan tlen onka itech Tlaltikpak. Sekimej kitlaneuij miak tomin para kichijchiuaskej noso para kitlaxtlauaskej se kali, para kitlaxtlauaskej se carro, para momachtiskej noso para ika monamiktiskej. Tla amo kuali tikpejpenaskej tlen tikchiuaskej uelis satepan tikteuikiliskej miak tomin. Tla kuali timokuayejyekoskej tlen tikchiuaskej, tikpiaskej san tlen ika timopanoltiskej uan amo tikteuikiliskej miak tomin. Ijkon tiktekichiuiliskej toTajtsin Dios uan amo tlen onka itech Tlaltikpak (1 Tim. 6:10).

14. ¿Tlen moneki tikchiuaskej? Xikijto se neskayotl.

14 Tla tiknekij tikpiaskej san tlen ika timopanoltiskej, achto moneki tikchiuaskej tlen okachi miak ipati. Sekimej tokniuan okipiayaj se tekitl tlen okinpaleuiaya ma kitlanikan miak tomin. Pero yejuan okinekiayaj oksepa okachi kitekichiuiliskej Jehová. Ik non, okinemakakej inlancha uan okseki tlamantli tlen ika otekitiayaj. Uan oyajkej otlapaleuitoj Warwick (Nueva York). Okitakej ken se ueyi tlateochiualistli, porque otekitikej Betel uan ompa noijki otekitikej iuan inmichpoch uan inamik. Uan noijki miak semanas otekitikej ompa Warwick iuan itatajuan inamik inmichpoch. Itech Colorado (Estados Unidos) se precursora opejki tekiti san seki tonalmej itech se banco. Akinmej okinpaleuiaya sapanoa kuali omomachiliayaj iuan tokni, ik non, okiluijkej kox okinekiaya tekitis nochi semana uan sapanoa kuali kitlaxtlauiskiaj. Nin precursora  amo okiseli tekitl, porque okimatiaya ayakmo majxiliskia tetlapouis. Ninmej san seki neskayomej tlen kiteititiaj tlen kichiuaj iTlaixpantijkauan Jehová. Tla yotikpejpenkej tiktlaliskej achto itech tonemilis iTekiuajkayo toTajtsin Dios, tikteititiskej tikpatioitaj iuan timouikaskej uan tlamantli tlen miak ipati techmaka uan amo tikpatioitaj tlen onka itech Tlaltikpak.

IJKUAK AYAKMO YETOS TLAMANTLI TLEN ONKA ITECH TLALTIKPAK

15. ¿Tlen tlamantli sapanoa techyolpaktia?

15 Tla ikaj kipia miak tlamantli amo kijtosneki toTajtsin Dios kiteochijtok. Jehová kinteochiua akinmej kitekichiuiliaj (xiktlajtolti 1 Timoteo 6:17-19). Ma tikitakan tlen okichi se tokni tlen itoka Lucia tlen chanti Italia. * Ijkuak okimatki itech altepetl Albania omonekiaya ma kinpaleuitij tokniuan ma tetlapouikan, ye otlaneltokak itech Jehová uan oyajki itech 1993 maski amo okimatiaya tlen itech tekitiskia. Omomachti tlajtoli albanés uan yokinpaleui kanaj 60 ma moapolaktikan. Maski ijkuak titetlapouiaj amo miakej techkakij. Ma timochijchikauakan ma tikinpaleuikan oksekimej ma kimatikan tlen melauak uan yetos ken itlaj sapanoa miak ipati uan amo keman tikpoloskej (Mat. 6:20).

16. (1) ¿Tlen kipanos tlen onka itech Tlaltikpak? (2) ¿Ken moneki tikitaskej nochi nin tlamantli?

16 Jesús amo okijto nochi tlen onka itech Tlaltikpak uelis tlamis, ye okijto tlamis (Luc. 16:9). Itech ninmej tonalmej amo tetlajtlachialtia kintsakuaj bancos uan ayakmo onka tomin porque satepan okachi miak tlamantli panos. Nochi tlen kiyekana Satanás tlamis, nochi tlen kichiua ma tikpiakan tomin uan noijki política uan tlaneltokalismej. Teotlajtojki Ezequiel uan Sofonías okijtojkej oro uan plata ayakmo kipias ipati maski sapanoa okintekitiltijkej (Ezq. 7:19; Sof. 1:18). ¿Ken timomachiliskiaj tla yitimikiskiaj uan tikitaskiaj okachi otikpatioitakej tlamantli tlen onka itech Tlaltikpak uan amo tlen melauak miak ipati? Uelis timomachiliskiaj ken akin sapanoa miak tekiti uan satepan kita tomin tlen kipia amo melauak (Prov. 18:11). Nochi tlen onka itech nin Tlaltikpak tlamis. Ik non, moneki ma timochijchikauakan ma tiktekitiltikan tlen tikpiaj para tiktekichiuiliskej Jehová uan kuali iuan ma timouikakan. Nochi tlen tikchiuaskej para tikpaleuiskej Tekiuajkayotl, kichiuas kuali ma timouikakan iuan Jehová.

17, 18. ¿Tlen kiseliskej akinmej mouikaj iuan Jehová uan Jesús?

17 Ijkuak ualtlanauatis iTekiuajkayo toTajtsin Dios, amo ikaj kitlaxtlauas kanin chantis, amo ikaj kitlaneuis tomin nion ikaj kitekitiltis pajtli. Nochtin kipiaskej sapanoa miak tlakuali uan amo ikaj kitlaxtlauas. Nochtin ikalchanejkauan Jehová tlen yetoskej itech Tlaltikpak yolpakiskej uan kipiaskej miak tlamantli tlen sapanoa kuajkuali. Ijkuakon, oro, plata uan okseki tlamantli tlen sapanoa kualtsitsintin, ika timoyektlaliskej. Tinochtin tikinchijchiuaskej kualtsitsintin kalmej ika kuauitl, tetl uan tepostli tlen sapanoa kuajkuali. Uan toyolikniuan kinekiskej techpaleuiskej uan amo porque tikintlaxtlauiskej. Oksekimej tikinmakaskej nochi tlen kitemaka tlali.

18 Nin san seki tlateochiualistli kipiaskej akinmej kuali mouikaj iuan Jehová uan Jesús. Nochtin itekipanojkauan Jehová sapanoa yolpakiskej ijkuak Jesús kijtos: “Xiwikih nomejwah, non Notajtsi onomechtiochi. Xikselikah nochi tlan nomechaxkatiliskeh [...] non Dios onomechmajmanili desde ijkuak okichijchi n tlaltíkpaktli” (Mat. 25:34).

^ párr. 4 Ken kijtoa Lucas 16:1 Jesús amo okijto nin tlakatl amo kuali okitekitiltiaya tlen amo iaxka, nin tlakatl san okiteluijkej. Uelis ikaj okijto tlen amo melauak itech nin tlakatl. Pero Jesús okijto tlen san niman okichi nin tlakatl uan amo okijto tleka okipolo iteki.

^ párr. 15 Inemilis Lucia Moussanett kajki itech revista ¡Despertad! del 22 de junio 2003, páginas 18 a 22.