Xikita nochi

Tlen kiualika

Jehová ma kiteochiua nochi tlen nankinekij nankichiuaskej

Jehová ma kiteochiua nochi tlen nankinekij nankichiuaskej

“Xikajsi pakilistli itech Jehová uan ye mitsmakas tlen kineki moyolo” (SAL. 37:4).

TLAKUIKALMEJ: 11 UAN 140

1. (1) Telpokamej uan ichpokamej, ¿tlen moneki nankipejpenaskej? (2) ¿Tleka amo moneki nanmomojtiskej? (Xikita tlaixkopinal tlen ika peua tlamachtil).

TELPOKAMEJ uan ichpokamej, kuali nankimatij ijkuak tiaskej tipaxialotiuij achto moneki tikitaskej kanin tiaskej. Namonemilis yetoskia ken kanaj nanpaxialotiuij uan moneki nankipejpenaskej kanin nanyaskej. Uelis nankitaskej oui nankipejpenaskej tlen nankichiuaskej. Se ichpochtli tlen itoka Heather kijtoa: “Nimomojtia ijkuak nimokuayejyekoa tlen nikchiuas itech nonemilis”. Tla ijkon namechpanoa, xikilnamikikan tlen kijtoa Jehová: “Amo ximomojti, ne mouan nika. Amo ximotekipacho, ne nimoDios. Ne nimitsyolchikauas, kema, ne nimitspaleuis” (Is. 41:10).

2. ¿Ken nankimatij Jehová kineki xiyolpakikan?

2 Jehová kineki kuali xikpejpenakan tlen nankichiuaskej (Ecl. 12:1; Mat. 6:20). Ye kineki xiyolpakikan. Nin uelis nankitaskej ijkuak nankitaj tlen okichijchi, tlen nankikakij uan ijkuak nankiyekoaj itlaj uelik. Ye noijki techmaluia uan techmachtia ken uelis kuali tiyetoskej. Xikita tlen kinmiluia akinmej amo kitlakamatij: “Opejki nankichiuaj tlen nikkokolia. ¡Xikitakan! Notekipanojkauan yolpakiskej pero namejuan nanmopinatiskej. ¡Xikitakan! Notekipanojkauan  sapanoa yolpakiskej porque kuali yetos inyolo” (Is. 65:12-14). Ijkuak kuali tikpejpenaj tlen tikchiuaskej, tikueyichiuaj Jehová (Prov. 27:11).

¿TLEN NAMECHPALEUIS XIYOLPAKIKAN?

3. ¿Tlen namechiluia Jehová uelis nankichiuaskej?

3 ¿Tlen namechiluia Jehová? Ximokuayejyekokan itech nin tlamantli, okinchijchi yolkamej ma yolpakikan ijkuak tlakuaj, ijkuak konij atl uan ijkuak momiaktiliaj. Pero tejuan otechchijchi para ma tiyolpakikan itech okseki tlamantli ken ijkuak tikixmatij uan tiktekichiuiliaj ika nochi toyolo (Sal. 128:1; Mat. 5:3). Biblia kijtoa toTajtsin Dios sapanoa tetlasojtla uan nochipa yolpaki uan otechchijchi ken ye tlachixtok (2 Cor. 13:11; 1 Tim. 1:11; Gén. 1:27). Tla nantetlasojtlaskej ken ye, okachi nanyolpakiskej. ITlajtol toTajtsin Dios kijtoa: “Okachi yolpaki akin itlaj kitemaka uan amo akin kiselia” (Hech. 20:35TNM). ¿Ijkon yonamechpanok? Nin miak ipati itech namonemilis, ik non, Jehová kineki tlen nankipejpenaskej ma kiteititi nankitlasojtlaj ye uan oksekimej (xiktlajtolti Mateo 22:36-39).

4, 5. ¿Tleka oyolpakiaya Jesús?

4 Jesucristo namechmaka se kuali neskayotl. Ijkuak okatka chokotsin omauiltiaya uan omoyolpaktiaya. Ijkon ken kijtoa Biblia onka “kauitl para tiuetskaskej [...] uan kauitl para timijtotiskej” (Ecl. 3:4). Pero Jesús noijki omomachti iTlajtol toTajtsin Dios uan non okipaleui kuali iuan ma mouika. Ijkuak okipiaya 12 xiuitl, akinmej otlamachtiayaj itech teokali “omotlajtlachialtiayah porke Ye satlawel oixtlamatia, iwa porke kuali okinnankiliaya” (Luc. 2:42, 46, 47).

5 Ijkuak Jesús yokipiaya xiuitl, oyolpakiaya porque okichiuaya tlen iTajtsin okinekiaya. Se neskayotl, iTajtsin okinekiaya ma kintlapouiti akinmej amo itlaj okipiayaj uan ma kinpajti akinmej amo otlachiayaj (Luc. 4:18). Salmo 40:8 kijtoa ken omomachiliaya Jesús: “Nechyolpaktia nikchiuas motlanekilis, oh noTajtsin Dios”. Ye okipaktiaya tlamachtis itech iTajtsin (xiktlajtolti Lucas 10:21). Se tonal okimachti se siuatl ken kiueyichiuas toTajtsin Dios. Satepan okinmilui imachtijkauan: “Notlakual ye manikchiwa tlan kipaktia Akin onechaltítlanki, iwa maniktlami iteki” (Juan 4:31-34). Oyolpakiaya kinpaleuis oksekimej uan noijki okitlasojtlaya toTajtsin Dios. Namejuan noijki uelis ijkon nanyolpakiskej.

6. ¿Tleka miak ipati xikinmiluikan tokniuan tlen kipiaj chikauak intlaneltokilis tlen nankinekij nankichiuaskej?

6 Miakej opejki tekitij ken precursores ijkuak okatkaj telpokamej uan ichpokamej uan non okichi ma yolpakikan. ¿Tleka amo nankinmiluiaj tlen nankinekij nankichiuaskej? Biblia kijtoa: “Itlaj amo kuali kisa ijkuak amo tetlajtlaniaj, pero nochi kuali kisa ijkuak kintlajtlaniaj oksekimej tlen kichiuaskej” (Prov. 15:22). Ninmej tokniuan tlen kipiaj chikauak intlaneltokilis namechiluiskej miak tlamantli tlen namechpaleuis itech nochi namonemilis tla okachi nankitekichiuiliskej Jehová. Jesús omomachti miak tlamantli ijkuak okatka iuan iTajtsin. Pero ok omomachtijtoka miak tlamantli ijkuak otetlapouiko nikan Tlaltikpak. Se neskayotl, okitak okiyolpaktiaya ijkuak otetlapouiaya uan oajsiaya intech inyolo tlaltikpaktlakamej uan noijki ijkuak okixiko ouijkayotl (xiktlajtolti Isaías 50:4; Heb. 5:8; 12:2). ¿Tleka nanyolpakiskej tla okachi nankitekichiuiliskej Jehová? Ma tikitakan.

¿TLEKA TECHYOLPAKTIA TIKINCHIUASKEJ IMACHTIJKAUAN JESÚS?

7. ¿Tleka miakej telpokamej kinyolpaktia kinchiuaskej imachtijkauan Jesús?

7 Jesús okijto akinmej kichiuaj ken Cristo moneki tetlapouitiuij uan ma tlamachtikan tlen melauak (Mat. 28:19, 20). Tla nankinekij  nankichiuaskej nin tekitl, melauak nanyolpakiskej uan nankiueyichiuaskej toTajtsin Dios. Ijkon ken se tekitl moneki timomachtiskej ken tikchiuaskej, nin noijki moneki yolik timomachtijtiaskej ken titetlapouiskej. Ximokuayejyeko tlen okijto se tokni tlen itoka Timothy, ye otekitik ken precursor ijkuak okatka telpochtli: “Nechpaktia okachi niktekichiuilis Jehová uan ijkon nikteititia niktlasojtla. Ijkuak yikin onipe, amo ikaj onikmachtiaya. Pero satepan onia oksekan onitetlapouito uan itech kanaj se metstli opejki miakej nikinmachtia. Se telpochtli tlen onikmachtiaya opejki yaui nechikolmej. Satepan onia itech Tlamachtil ika Biblia tlen kiseliaj Tlakamej tlen Inselti, * uan oksekan onechtitlankej. Ompa opejki nikinmachtia naui. Nechpaktia nikinmachtis tlen tlamachtia Biblia uan nikita ken espíritu santo kinpatilia innemilis” (1 Tes. 2:19).

8. ¿Tlen yokichijkej sekimej telpokamej para okachi tetlapouiskej?

8 Sekimej telpokamej uan ichpokamej yomomachtijkej okse tlajtoli. Se neskayotl, se tokni tlen itoka Jacob uan chanti Norteamérica, okijto: “Ijkuak onikpiaya chikome xiuitl, miakej akinmej iuan onimomachtiaya inchan Vietnam. Oniknekiaya nikintlapouis itech Jehová, ik non, satepan opejki nimomachtia intlajtol. Uan onimomachti ijkuak onikitaya revista Akin Tetlapouijtok ika inglés uan noijki ika vietnamita. Opejki nimouika iuan sekimej tokniuan tlen okatkaj itech se tlanechikol kanin otlajtoayaj vietnamita. Ijkuak onikpiaya 18 xiuitl onimochi precursor. Satepan onia itech Tlamachtil ika Biblia tlen kiseliaj Tlakamej tlen Inselti. Nin tlamachtil nechpaleuia itech nochi tlen nikchiua itech se grupo vietnamita kanin nitekiti ken precursor uan ken tlayekanki. Miakej tlen tlajtoaj vietmanita motlajtlachialtiaj onimomachti intlajtol. Nechiluiaj ma nio inkalijtik uan ualeua ijkon peua nikinmachtia ika Biblia. Sekimej yomoapolaktijkej” (xikita ika Hechos 2:7, 8).

9. ¿Tlen namechmachtis tla nankinchiuaskej imachtijkauan Jesús?

9 Nankinchiuaskej imachtijkauan Jesús namechmachtis miak tlamantli. Namechmachtis kuali xitekitikan, kuali ximotlapouikan iuan oksekimej, namechpaleuis namotech xitlaneltokakan uan noijki kuali nanmouikaskej iuan oksekimej (Prov. 21:5; 2 Tim. 2:24). Nin tekitl noijki kichiua xiyolpakikan uan okachi nankimatiskej tlen nankineltokaj. Noijki nankimatiskej ken okachi kuali nantekitiskej iuan Jehová (1 Cor. 3:9).

10. ¿Tleka uelis nanyolpakiskej nankinchiuaskej imachtijkauan Jesús maski amo miakej namechkakiskej?

10 ¿Uan tla kanin nanchantij amo ikaj kineki kikakis iTlajtol toTajtsin Dios? Maski amo kinekij tlakakiskej, nankinchiuaskej imachtijkauan Jesús kichiuas xiyolpakikan. ¿Tleka? Porque tinochtin titlapaleuiaj ma tikinmajsikan akinmej kinekij kikakiskej iTlajtol toTajtsin Dios. Maski san se tokni ma kajsi ikaj akin kineki kikakis iTlajtol Jehová, tinochtin titlapaleuiaj uan tinochtin tiyolpakij. Se neskayotl, se tokni tlen itoka Brandon otekititoka ken precursor kanaj chiknaui xiuitl kanin amo miakej okikakiayaj iTlajtol Jehová. Ye kijtoa: “Nechpaktia nitetlapouis kuali tlajtolmej porque Jehová techiluia ijkon ma tikchiuakan. Onimochi precursor ijkuak otlanki onimomachti. Nechpaktia nikinyolchikauas telpokamej uan ichpokamej itech tlanechikol uan nikita ken mochikaua intlaneltokilis. Ijkuak otlanki onimomachti itech Tlamachtil ika Biblia tlen kiseliaj Tlakamej tlen Inselti, oksekan onechtitlankej ken precursor. Maski ne ayamo ikaj nikpaleuia ma moapolakti, oksekimej tokniuan kema. Niyolpaki onikpejpenki okachi niktekichiuilis Jehová uan nikinchiuas imachtijkauan Jesús” (Ecl. 11:6).

 ¿TLEN UELIS NANKICHIUASKEJ?

11. ¿Ken uelis okachi kitekichiuiliskej toTajtsin Dios telpokamej uan ichpokamej?

11 Onka okseki tekitl kanin okachi uelis nankitekichiuiliskej Jehová. Miakej tlapaleuiaj kanin mochijchiua se Kali kanin monechikoskej iTlaixpantijkauan Jehová. Moneki miakej kalmej ma mochijchiuakan kanin uelis monechikoskej tokniuan. Sapanoa miak ipati ompa nantekitiskej uan nankiueyichiuaskej Jehová uan nanyolpakiskej. Maski san kanin nankitekichiuiliskej Jehová nanyolpakiskej nanyetoskej iuan tokniuan. Nantlapaleuiskej kanin mochijchiuaj kalmej namechmachtis miak tlamantli, nanmomaluiskej ijkuak nantekitiskej, nankichiuaskej kuali tekitl uan nankimatiskej ken nankintlakamatiskej tlen tlayekanaj.

Akinmej okachi kitekichiuiliaj Jehová okachi kinteochiua. (Xikinmita párrafos 11 a 13).

12. Tla nanmochiuaskej precursores, ¿tlen okseki tekitl uelis nankichiuaskej?

12 Se tokni tlen itoka Kevin kijtoa: “Ijkuak onikatka nichokotsin, oniknekiaya okachi niktekichiuilis Jehová. Uan ijkuak onikpiaya 19 xiuitl onimochi precursor. Para nikpiaskia tlen ika nimopanoltis, onikpaleuiaya se tokni san seki tonalmej tlen okinchijchiuaya kalmej. Onimomachti ken nikinkuatsakuas kalmej, ken nikintlalis ventanas uan kaltlatsakuilmej. Satepan, kanaj ome xiuitl onitlapaleui otikinyankuilijkej kalmej kanin omonechikoayaj tokniuan uan noijki inkaluan tokniuan ijkuak opanok se chikauak ejekakiauitl noso huracán. Ijkuak onikmatki Sudáfrica omonekiaya mochijchiuaskej kalmej kanin monechikoskiaj tokniuan, oniktemiti se amatl uan satepan onechnotskej ma nitekititi. Ompa África seki semanas nitekiti itech se kali uan ijkuak tlami, oksekan nechtitlanij. Akinmej iuan nitekiti nikinmita ken nokalchanejkauan. San sekan tichantij, san sekan timomachtiaj Biblia uan san sekan titekitij. Noijki nechpaktia sejse semana nitetlapouis iuan tokniuan.  Amo keman onimokuayejyeko sapanoa nechyolpaktiskia tlen oniknekiaya ijkuak onikatka nichokotsin”.

13. ¿Tleka telpokamej uan ichpokamej yolpakij kitekichiuiliaj Jehová itech Betel?

13 Miakej tokniuan tlen omochijkej precursores axkan tekitij Betel. Titekitiskej Betel kichiua ma tiyolpakikan porque ompa tiktekichiuiliaj Jehová. Uan akinmej tekitij Betel techpaleuiaj ma tikpiakan tlen ika tikchikauaskej totlaneltokilis. Dustin tlen tekiti Betel kijtoa: “Ijkuak onikpiaya chiknaui xiuitl onikijto okachi niktekichiuilis Jehová. Onimochi precursor ijkuak otlanki onimomachti. Opanok se xiuitl uan tlajko onechnotskej ma nitekititi Betel. Ompa onimomachti nikintekitiltis prensas tlen ika mochijchiuaj amatlajkuilolmej uan nikintekitiltis computadoras. Nechpaktia ijkuak techiluiaj nochi tekitl tlen mochijtok itech nochi Tlaltikpak. Nechpaktia nitekitis Betel porque tikinpaleuiaj oksekimej ma mouikakan iuan Jehová”.

¿TLEN NANKICHIUASKEJ?

14. ¿Tlen uelis nankichiuaskej para okachi nankitekichiuiliskej Jehová?

14 ¿Tlen uelis nankichiuaskej para okachi nankitekichiuiliskej Jehová? Moneki nankichiuaskej tlen toTajtsin Dios kipaktia. Nin namechpaleuis okachi kuali xiktekichiuilikan. Ik non, nochipa ximomachtikan iTlajtol toTajtsin Dios, itech ximokuayejyekokan uan xitlanankilikan itech nechikolmej. Maski tla ok nanyauij escuela, uelis nankitaskej tlen nankichiuaskej para kuali nantetlapouiskej. Ximotekipachokan intech akinmej iuan nanmotlapouiaj uan xikintlajtlanikan tlen mokuayejyekoaj uan xikinkakikan tlen tlanankiliaj. Noijki uelis nantlachipauaskej itech kali kanin nanmonechikoaj noso ijkuak kiyektlaliaj (xiktlajtolti Salmo 110:3; Hech. 6:1-3). Tlatitlanil Pablo okilui Timoteo ma mochiua misionero porque tokniuan kuali itech otlajtoayaj (Hech. 16:1-5).

15. ¿Tlen uelis nankichiuaskej para nankipiaskej tlen ika nanmopanoltiskej?

15 Moneki tekitiskej akinmej okachi kitekichiuiliaj Jehová para kipiaskej tlen ika mopanoltiskej (Hech.18:2, 3). Uelis nanmomachtiskej se tekitl tlen namechpaleuis xiyetokan precursores. Uelis nankintlajtlaniskej precursores uan tlayekanki itech circuito tlen tekitl namechkauilis xiyetokan precursores. Uan ken kijtoa Biblia “xiktlali imak Jehová tlen tikchiuas uan nochi kuali kisas” (Prov. 16:3; 20:18).

16. ¿Ken uelis namechpaleuis tla okachi nankitekichiuiliskej Jehová?

16 Kuali xikmatikan toTajtsin Dios kineki nochipa xiyolpakikan (xiktlajtolti 1 Timoteo 6:18, 19). Ijkuak okachi nankitekichiuiliskej Jehová, nanyetoskej iuan tokniuan tlen noijki okachi kitekichiuiliaj. Nin mitspaleuis ma mochikaua motlaneltokilis. Miakej yokitakej ijkuak ok telpokamej uan ichpokamej kitekichiuiliaj Jehová kinpaleuia ijkuak monamiktiaj. Ijkuak ayamo monamiktiaj akinmej tekitij ken precursores, satepan ijkuak monamiktiskej uelis kinpaleuis san sekan ma kitekichiuilijtokan Jehová (Rom. 16:3, 4).

17, 18. ¿Ken mouika tlen nankinekij nankichiuaskej iuan namoyolo?

17 Tikteititiaj tlen tikpiaj itech toyolo ika tlen tiknekij tikchiuaskej. Salmo 20:4 kijtoa itech Jehová: “Ye ma mitsmaka tlen kineki moyolo uan nochi kuali ma kisa tlen tikneki tikchiuas”. Ik non, kuali ximokuayejyekokan tlen nankinekij nankichiuaskej, ximokuayejyekokan itech tlen toTajtsin Dios kichijtok uan ken okachi nankitekichiuiliskej. Satepan xikpejpenakan uan xikchiuakan tlen kipaktia Jehová.

18 Okachi nankitekichiuiliskej Jehová kichiuas xiyolpakikan uan nankitekitiltiskej namonemilis para ika nankiueyichiuaskej. Ik non, “xikajsi pakilistli itech Jehová uan ye mitsmakas tlen kineki moyolo” (Sal. 37:4).

^ párr. 7 Axkan moixmati ken Tlamachtil para ma tetlapouikan Tekiuajkayotl.