Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok (tlen ika timomachtiaj)  |  Febrero de 2017

Jehová okitemakak iKone para techmakixtis

Jehová okitemakak iKone para techmakixtis

“Nochi tlan kuali iwa yekmilajka [...] Dios techmaka” (SANTIAGO 1:17).

TLAKUIKALMEJ: 148 UAN 5

1. ¿Tlen ueli kichiua imikilis Jesús?

IMIKILIS Jesucristo kichiua ma tikpiakan miak tlateochiualistli. Se neskayotl, nochtin ikoneuan Adán tlen kichiuaj tlen kuali pouiskej itech ikalchanejke toTajtsin Dios (xikita recuadro “¿Tlen kijtosneki?”). Imikilis Jesucristo noijki kichiuas nochipa ma tiyoltokan uan ma tiyolpakikan. Pero imikilis Jesús okachi miak tlamantli kijtosneki. Kipia tlen kitas iuan nochtin tlen katej iluikak uan Tlaltikpak (Hebreos 1:8, 9).

2. (1) ¿Tlen tlamantli miak ipati itech iluikak uan Tlaltikpak okijto Jesús itech padrenuestro? (Xikita tlaixkopinal tlen ika peua tlamachtil). (2) ¿Tlen timomachtiskej?

2 Kanaj ome xiuitl achto mikiskia Jesús, okinmilui imachtijkauan ken motlatlaujtiskej: “ToTajtsin tlen tika iluikak, ma mochipaua motoka. Ma uiki moTekiuajkayo. Ma mochiua motlanekilis, ken itech iluikak, noijki itech Tlaltikpak” (Mateo 6:9, 10, TNM). Axkan timomachtiskej eyi tlamantli itech imikilis Jesús: 1) ma mochipaua itoka Jehová, 2) iTekiuajkayo toTajtsin Dios uan 3) ma mochiua itlanekilis toTajtsin Dios.

 “MA MOCHIPAUA MOTOKA”

3. (1) ¿Tlen kineskayotia itoka toTajtsin Dios? (2) ¿Ken okisokioti Satanás itoka Jehová?

3 Itech padrenuestro, Jesús achto okitlajtlanki ma mochipaua itoka toTajtsin Dios. Nin kijtosneki okitlajtlanki ma kitlakaitakan itoka toTajtsin Dios porque ye santo. Nin tokayotl kineskayotia Jehová uan kijtoa ken iyelis. Ye akin okachi kipia chikaualistli uan yolmelauak itech nochi Tlaltikpak uan semanauak. Biblia kijtoa: “¡Santo, Santo, Santísimo, Toteko Dios non semi weletini [...]!” (Apocalipsis 4:8). Ken Jehová santo, nochi tlen kichiua santo uan noijki itlanauatiluan. Pero itech xochitlali Edén, Satanás otlakajkaya uan okijto toTajtsin Dios amo kinamiki ma kinnauati tlaltikpaktlakamej. Okijto tlen amo melauak itech Jehová uan ijkon okisokioti itoka (Génesis 3:1-5).

4. ¿Ken okichipa Jesús itoka toTajtsin Dios?

4 Jesús okitlakaitak itoka Jehová ika nochi iyolo, amo okichi ken Satanás. Jesús omochijchika kichipauas itoka Jehová (Juan 17:25, 26). ¿Ken okichipa? Ika tlen okichi uan ika tlen otlamachti. Ijkon okinpaleui oksekimej ma kimatikan itlanauatiluan Jehová melauakej uan nochipa techpaleuiaj (xiktlajtolti Salmo 40:8-10). * Jesús okatka yolmelajki maski Satanás sapanoa okitlajyouilti ijkuak okimiktijkej. Jesús okiteititi se tlakatl tlen amo kipia tlajtlakoli uelis nochipa kitlakamatis Jehová.

5. ¿Ken uelis tikchipauaskej itoka toTajtsin Dios?

5 ¿Uan tejuan ken tikteititiaj tiktlakaitaj itoka Jehová? Ika tlen tikchiuaj. Jehová kineki ma tiyetokan santos (xiktlajtolti 1 Pedro 1:15, 16). Ik non, san ye tikueyichiuaj uan tiktlakamatij ika pakilistli. Uan maski techtojtokaskej, timochijchikauaskej tikchiuaskej tlen Jehová kineki. Uan Ijkuak tikintlakamatij itlanauatiluan, tikueyichiuaj itoka (Mateo 5:14-16). Noijki, tikteititiaj techpaleuiaj itlanauatiluan Jehová uan Satanás tlakajkayaua. Uan ken titlajtlakolejkej ualeua tikchiuaj itlaj amo kuali. Pero timoyolkuepaj uan ayakmo tikchiuaj nochi tlen kisokiotia itoka Jehová (Salmo 79:9).

6. ¿Tleka Jehová uelis techitas tiyolmelajkej maski titlajtlakolejkej?

6 Maski tipouij iuan akinmej yaskej iluikak noso tipouij iuan “oksikimeh ichkameh”, Jehová techtlapojpoluia tla titlaneltokaj itech imikilis Jesús. Jehová kinselia akinmej ixpan motemakaj. Jehová kinmita tlapejpenalmej ken yolmelajkej uan kinselia ken ikoneuan. Noijki kinmita yolmelajkej “oksikimeh ichkameh” uan inmiuan mouika (Juan 10:16; Romanos 5:1, 2, TNM; Santiago 2:21-25). Ika imikilis Jesús, axkan uelis timouikaskej iuan toTajtsin Dios uan tikchipauaskej itoka.

“MA UIKI MOTEKIUAJKAYO”

7. ¿Ken tlapaleuia imikilis Jesús ma techteochiua iTekiuajkayo toTajtsin Dios?

7 Itech padrenuestro Jesús okijto: “Ma uiki motekiuajkayo”. ¿Ken mouika imikilis Jesús iuan Tekiuajkayotl? Tikmatij itech iTekiuajkayo toTajtsin Dios poui Jesús uan 144,000 tlen okinkojkej itech tlaltikpaktlakamej. Ika imikilis Jesús tlapejpenalmej kinyolitiaj uan yauij iluikak  (Apocalipsis 5:9, 10; 14:1). Ompa yetoskej tekiuajkej uan teopixkej uan ualtlanauatiskej iuan Jesús 1,000 xiuitl. Itech nochi non xiuitl, Jehová kitekitiltis iTekiuajkayo para kikuepas Tlaltikpak se Xochitlali uan kinpaleuis nochtin tlaltikpaktlakamej ayakmo ma kipiakan tlajtlakoli. Ijkuakon, itekipanojkauan Jehová tlen yetoskej iluikak uan Tlaltikpak yetoskej san se kalchanejke (Apocalipsis 5:13; 20:6). Jesús kixpolos Satanás uan kipojpolos nochi tlen amo kuali yokichi (Génesis 3:15).

8. (1) ¿Ken okinpaleui Jesús imachtijkauan ma kajsikamatikan tleka miak ipati iTekiuajkayo toTajtsin Dios? (2) ¿Ken tikpaleuiaj Tekiuajkayotl?

8 Jesús okinpaleui imachtijkauan ma kajsikamatikan miak ipati iTekiuajkayo toTajtsin Dios. ¿Ken okichi? Ijkuak omoapolakti, san niman opejki tetlapouia itech “kuali tlajtolmej itech iTekiuajkayo toTajtsin Dios” itech miakej altepemej (Lucas 4:43, TNM). Noijki okinmilui ma tetlapouikan “itech nochi n tlaltíkpaktli” (Hechos 1:6-8). Axkan, noijki titetlapouiaj, miakej noijki uelis kimatiskej itech imikilis Jesús uan kikauaskej ma kinyekana iTekiuajkayo toTajtsin Dios. Tikteititiaj tikpaleuiaj Tekiuajkayotl ijkuak titetlapouiaj yankuik kuali tlajtolmej itech nochi Tlaltikpak uan ijkon tikinpaleuiaj tlapejpenalmej (Mateo 24:14, TNM; 25:40).

“MA MOCHIUA MOTLANEKILIS”

9. ¿Tleka uelis tikneltokaskej mochiuas tlen Jehová kineki kichiuas para tlaltikpaktlakamej?

9 Itech padrenuestro Jesús noijki okijto: “Ma mochiua motlanekilis”. ¿Tlen okinekiaya kijtos? Ijkuak Jehová kijtoa itlaj panos, melauak mochiua (Isaías 55:11). Maski Satanás amo otetlakamatki, non amo okipatlak tlen Jehová kineki kichiuas. ¿Tlen okinekiaya toTajtsin Dios kichiuas itech Tlaltikpak? Okinekiaya ikoneuan Adán uan Eva tlen amo okipiayaj tlajtlakoli ma momiaktilikan itech nochi Tlaltikpak (Génesis 1:28). Tla Adán uan Eva amo kinpiaskiaj inkoneuan, amo mochiuaskia itlanekilis toTajtsin Dios. Ik non, Jehová okinkauili ma kinpiakan inkoneuan. Ika imikilis Jesús nochtin akinmej tlaneltokaj uelis yoltoskej nochipa uan amo kipiaskej tlajtlakoli. Jehová techtlasojtla uan kineki ma tiyolpakikan ijkon ken achto okinekiaya.

10. ¿Ken kinpaleuis imikilis Jesús akinmej yomikej?

10 Sapanoa miakej tlen yomikej amo okixmatkej Jehová. ¿Tlen kinpanos? Ken toTajtsin Dios kineki ma yoltokan, kinyolitis akinmej yomikej. Uelis kinyolitis porque Jesús topatka omikik. Ijkuak kinyolitiskej, uelis momachtiskej itech Jehová uan nochipa yoltoskej (Hechos 24:15). Ken Jehová techmaka toyolilis, yetos inTajtsin nochtin akinmej kinyolitis (Salmo 36:9). Ik non, Jesús okijto itech padrenuestro Jehová toTajtsin akin kajki iluikak (Mateo 6:9, TNM). Jehová yokinauati Jesús kinyolitis akinmej yomikej. Ik non, Jesús okijto: “Ne niktemaka nemílistli iwa yolílistli” (Juan 6:40, 44; 11:25).

11. ¿Tlen kineki kichiuas Jehová para “senmiaktikeh tlaltikpaktlakah”?

11 Jesús noijki okijto: “Nochteh akimeh kichiwah tlan Dios kimonekiltia, ye nokni, nowelti iwa nomamá” (Marcos 3:35). Jehová kineki nochtin ma kiueyichiuakan. Biblia kijtoa ninmej “senmiaktikeh tlaltikpaktlakah non ayakmaka oweletia okimpoaya”. Yejuan tlaneltokaj itech imikilis Jesús uan kijtoaj: “¡Totemakixtilis wits de Todios iwa n Ichkatsi,  Akin ewatok ipan weyi yáyantli!” (Apocalipsis 7:9, 10).

12. ¿Tlen techmachtia padrenuestro tlen kineki kichiuas Jehová para tlaltikpaktlakamej?

12 Padrenuestro techmachtia miak tlamantli itech Jehová uan tlen kineki para tlaltikpaktlakamej. Achto, timomachtiaj moneki timochijchikauaskej tikchipauaskej itoka toTajtsin Dios uan tiktlakaitaskej (Isaías 8:13). Imikilis Jesús kichiua ma timomakixtikan uan kiueyichiua itoka toTajtsin Dios. Uan itoka Jesús kijtosneki “Jehová temakixtia”. Ome, timomachtiaj Jehová kitekitiltis Tekiuajkayotl para nochtin tlen tetlakamatij uelis mopaleuiskej ika imikilis Jesús. Uan eyi, amo itlaj uelis kichiuas ayakmo ma mochiua tlen kineki Jehová (Salmo 135:6; Isaías 46:9, 10).

MA TIKTLASOJKAMATILIKAN JEHOVÁ IMIKILIS JESÚS

13. ¿Tleka timoapolaktiaj?

13 Uelis tikteititiskej tiktlasojkamatij imikilis Jesús ijkuak timotemakaj ixpan Jehová uan timoapolaktiaj. Ijkon tikteititiaj titlaneltokaj itech imikilis Jesús uan tiiaxkauan Jehová (Romanos 14:8, TNM). Noijki ijkuak timoapolaktiaj tiktlajtlaniliaj Jehová ma techmaka ‘chipawak totlalnamikilis’ (1 Pedro 3:21). Uan Jehová technankilia ijkuak techmaka tlateochiualistli tlen kitemaka imikilis Jesús. Ik non, kuali tikmatij ye techmakas nochi tlen yokijto kichiuas (Romanos 8:32).

¿Ken tiktlasojkamatij imikilis Jesús? (Xikinmita párrafos 13 uan 14).

14. ¿Tleka Jehová technauatia ma titetlasojtlakan?

14 Nochi tlen Jehová kichiua, kichiua porque techtlasojtla uan noijki kineki ijkon ma timotlasojtlakan (1 Juan 4:8-11). Ijkuak titetlasojtlaj tikteititiaj tiknekij tiyetoskej tiikoneuan toTajtsin Dios akin kajki iluikak (Mateo 5:43-48). Biblia kijtoa achto tlanauatil tlen okachi miak ipati nin: ma tiktlasojtlakan Jehová. Uan tlanauatil ome tlen okachi miak ipati nin: ma tikintlasojtlakan oksekimej (Mateo 22:37-40). Uan tikteititiaj titetlasojtlaj ijkuak titetlapouiaj itech kuali tlajtolmej itech Tekiuajkayotl. Tla tiktlakamatij itlanauatil toTajtsin Dios tlen kijtoa ma titetlasojtlakan uan okachi akinmej tokniuan, okachi tikteititiskej tiktlasojtlaj Jehová (Juan 4:12, 20).

 JESÚS TOPATKA OMIKIK UAN IJKON JEHOVÁ TECHTEOCHIUA

15. (1) ¿Ken techteochiua Jehová axkan? (2) ¿Ken techteochiuas satepan?

15 Jehová techiluia uelis “kilkawas” totlajtlakol tla titlaneltokaj itech imikilis Jesús. Nin kijtosneki uelis sepa techtlapojpoluis (xiktlajtolti Hechos 3:19-21). Ken yotikitakej, imikilis Jesús kichiua Jehová ma kinseli ken ikoneuan sekimej tlaltikpaktlakamej para ma yetokan iluikak uan ninmej yejuan tlapejpenalmej (Romanos 8:15-17). Uan noijki kinyoleua “oksikimeh ichkameh” ma pouikan itech ikalchanejke itech Tlaltikpak. Ijkuak ninmej ayakmo kipiaskej tlajtlakoli, oksepa kinyejyekoskej. Tla yetoskej yolmelajkej ixpan Jehová, noijki yetoskej ikoneuan (Romanos 8:20, 21; Apocalipsis 20:7-9). Jehová nochipa kintlasojtlas nochtin ikoneuan. Uan ika imikilis Jesús uelis nochipa techteochiuas (Hebreos 9:12). Jehová techmaka nin tetliokolil tlen miak ipati uan amo ikaj uelis techkixtilis.

16. ¿Ken techmakixtia imikilis Jesús?

16 Tla timoyolkuepaj, Diablo amo uelis itlaj kichiuas para amo ma tiyetokan itech ikalchanejke Jehová. Jesús amo “mikiskia miak welta” para techmakixtis (Hebreos 9:24-26). Adán otechkauili tlajtlakoli, pero imikilis Jesús techmakas yolilistli tlen amo keman tlamis. Imikilis Jesús uelis techmakixtis itech tlen kiyekantok Satanás uan itech mikilistli (Hebreos 2:14, 15).

17. ¿Tlen tikmachiliaj ijkuak tikmatij Jehová techtlasojtla?

17 Nochi tlen kijtoa Jehová melauak mochiuas. Ijkon ken amo mopatla tlanauatilmej tlen okitlalili nochi tlen okichijchi. Ye amo keman kipatlas iyelis (Malaquías 3:6). Jehová amo san techmaka tonemilis, noijki techtlasojtla. Biblia kijtoa: “Tejwah yotikixmatkeh iwa yotikneltokakeh Dios techtlasojtla. Dios Ye tlasojtlálistli” (1 Juan 4:16). Ken Jehová nochipa kichiua tlen kijtoa, ayakmo miak poliui uan Tlaltikpak yetos se Xochitlali. Nochtin kichiuaskej ken Jehová uan motlasojtlaskej. Ijkuakon, itekipanojkauan toTajtsin Dios tlen katej iluikak uan Tlaltikpak kiueyichiuaskej uan kijtoskej: “Matikyektenewakah, matikweyilikah, iwa matikmatikah Ye ixtlamati iwa matimotlasojkamatikah inawak, iwa sanwel Ye kipia weletílistli iwa chikawálistli. Yika, matiktlakitakah Todios axa iwa nochipa. ¡Ijkó mamochiwa!” (Apocalipsis 7:12).

^ párr. 4 Salmo 40:8-10 kijtoa: “Ijkuak nikchiua motlanekilis, oh noTajtsin Dios, nechyolpaktia, uan motlanauatil kajki noijtik. Oniktematilti kuali tlajtolmej itech melajkayotl itech ueyi tlanechikol. ¡Xikita! Amo nimokamatsakua. Oh Jehová, ijkon ken te kuali tikmati. Amo niktlatia momelajkayo itech noyolo. Niktematiltia momelajkayo uan momakixtilis. Amo niktlatia itech ueyi tlanechikol motlasojtlalis yolmelajki nion tlen melauak”.