Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok (tlen ika timomachtiaj)  |  Febrero de 2017

Jehová kiyekana ialtepe

Jehová kiyekana ialtepe

“Jehová nochipa mitsyekanas” (ISAÍAS 58:11).

TLAKUIKALMEJ: 152 UAN 22

1, 2. (1) ¿Tleka tiiTlaixpantijkauan Jehová amo tikchiuaj ken oksekimej tlaneltokalismej? (2) ¿Tlen timomachtiskej axkan uan chikome?

MIAKEJ techtlajtlaniaj akin techyekana tiiTlaixpantijkauan Jehová. ¿Tleka ijkon techtlajtlaniaj? Porque miakej tlaneltokalismej ikaj kinyekana uan uelis yetoskej siuamej noso tlakamej. Pero tejuan tikijtoaj ika pakilistli amo techyekana se tlaltikpaktlakatl. Tejuan techyekana Jesucristo. Uan ye kichiua nochi tlen kinauatia iTajtsin (Mateo 23:10).

2 “Tlakeuali yolmelajki uan ixtlamatki” noijki kiyekana ialtepe toTajtsin Dios itech ninmej tonalmej (Mateo 24:45, TNM). Tla ijkon, ¿ken tikmatij Jehová techyekana ika iKone? Axkan uan chikome, tikitaskej tleka uelis ijkon tikneltokaskej. Noijki tikitaskej maski Jehová okintekitilti sekimej tlakamej para kiyekanas ialtepe, ye akin melauak kiyekantok ialtepe (Isaías 58:11).

OKISELIJKEJ ESPÍRITU SANTO

3. ¿Tlen okipaleui Moisés ma kinyekana israelitas?

3 Espíritu santo okinmakak chikaualistli akinmej otlayekanayaj ipatka toTajtsin Dios (xikita recuadro “¿Tlen kijtosneki?”). ToTajtsin Dios okipejpenki Moisés para kinyekanaskia israelitas. ¿Tlen okipaleui Moisés ma kichiua nin tekitl tlen miak ipati? Jehová “okimakak iespíritu santo” (Isaías  63:11-14). Ken Jehová okipaleui Moisés ika iespíritu santo, ye Jehová akin okiyekanki ialtepe.

4. ¿Ken okiteititi Moisés okipiaya iespíritu santo toTajtsin Dios? (Xikita tlaixkopinal tlen ika peua tlamachtil).

4 ¿Okitayaj oksekimej Moisés okipiaya iespíritu santo Jehová? Kema. Moisés okichi milagros ika espíritu santo uan okimatilti faraón itoka toTajtsin Dios (Éxodo 7:1-3). Espíritu santo noijki okipaleui Moisés ma kinyekana israelitas ika tlasojtlalistli uan amo san niman ma kualani. Moisés amo okichiuaya ken tlayekankej itech okseki altepemej, yejuan okatkaj amo yolkualmej uan san intech omotekipachoayaj (Éxodo 5:2, 6-9). Jehová okitlali Moisés ma kiyekana ialtepe.

5. ¿Akinmej noijki okiselijkej espíritu santo para ma kiyekanakan ialtepe Jehová?

5 ¿Akinmej noijki okiselijkej espíritu santo para ma kiyekanakan ialtepe Jehová? Biblia kijtoa “Josué ikone Nun otentoka ika espíritu tlen kitemaka ixtlamatilistli” (Deuteronomio 34:9). Noijki “iespíritu Jehová ouala ipan Gedeón” (Jueces 6:34). Uan “iespíritu Jehová opejki tekiti itech David” (1 Samuel 16:13). Nochtin yejuan okineltokayaj iespíritu santo Jehová kinpaleuiskia ma kichiuakan tlen yejuan inselti amo uelis kichiuaskiaj (Josué 11:16, 17; Jueces 7:7, 22; 1 Samuel 17:37, 50). Jehová okinmakak chikaualistli para ma kichiuakan miak tlamantli tlen tetlajtlachialtia. Ik non, san ye omonekiaya ma kiueyichiuakan.

Ijkuak israelitas okitlakamatiayaj Moisés, Josué, Gedeón uan David okitlakamatiayaj Jehová akin okinyekanaya

6. ¿Tleka Jehová okinekiaya israelitas ma kintlakaitakan akinmej okintlali ma tlayekanakan?

6 ¿Tlen omonekiaya kichiuaskiaj israelitas ijkuak okitakej Moisés, Josué, Gedeón uan David okipiayaj iespíritu santo toTajtsin Dios? Omonekiaya ma kintlakaitakan. Se tonal, ijkuak israelitas okitenejtokaj Moisés, Jehová okijto: “¿Hasta keman amo nechtlakaitas nin altepetl [...]?” (Números 14:2, 11). Jehová okintlali nonmej tlakamej ma kiyekanakan ialtepe. Ijkuak israelitas okintlakamatiayaj, ijkon okitlakamatiayaj Jehová akin okinyekanaya.

ÁNGELES OKINPALEUIJKEJ AKINMEJ OTLAYEKANAYAJ IPATKA TOTAJTSIN DIOS

7. Ángeles, ¿ken okipaleuijkej Moisés?

7 Ángeles okinpaleuijkej akinmej otlayekanayaj ipatka toTajtsin Dios (xiktlajtolti Hebreos 1:7, 14). Jehová okiyekanki Moisés ika ángeles. Ma tikitakan ken okichi. Achto, okititlanki se ángel tlen “okimonextili kan tlátsmoli non otlatlatoka” uan okinauati ma kinmakixti israelitas uan ma kinyekana (Hechos 7:35). Satepan, Jehová okintekitilti ángeles uan ijkon okimakak Moisés Tlanauatil tlen ika kinmachtiskiaj israelitas (Gálatas 3:19). Uan Jehová okilui Moisés: “Xikyekana altepetl kanin ne yonimitsilui. ¡Xikita! Noángel yas moixpan” (Éxodo 32:34). Biblia amo kijtoa kox israelitas okitakej se ángel ma kichiua nochi non. Pero Moisés kuali okinyekanki uan okinmachti israelitas uan non okiteititi ángeles okipaleuiayaj.

8. Ángeles, ¿ken okipaleuijkej Josué uan Ezequías?

 8 ¿Akinmej noijki okinpaleuijkej ángeles? Biblia kijtoa se ángel tlen “tlayekanki itech isoldados Jehová” okipaleui Josué ma kintlanili cananeos (Josué 5:13-15; 6:2, 21). Biblia noijki kijtoa tlen opanok ijkuak otlanauatiaya ueyi tekiua Ezequías. Sapanoa miakej soldados asirios okijtojkej kipojpoloskiaj Jerusalén. Pero san itech se yoak, “iángel Jehová okiski uan okinmikti ciento ochenta y cinco mil tlakamej asirios” (2 Reyes 19:35).

9. Maski akinmej otlanauatiayaj ipatka toTajtsin Dios okatkaj tlajtlakolejkej, ¿tlen omonekiaya ma kichiuakan israelitas?

9 Ángeles amo kipiaj tlajtlakoli. Pero nochtin tlaltikpaktlakamej tlajtlakolejkej. Se neskayotl, se tonal Moisés amo okiueyichi Jehová (Números 20:12). Noijki Josué amo okitlajtlani Jehová kox uelis kichiuaskia se tlajtolsenkaualistli iuan gabaonitas (Josué 9:14, 15). Uan satepan, ueyi tekiua Ezequías omoueyineki (2 Crónicas 32:25, 26). Maski nochtin yejuan okatkaj tlajtlakolejkej, israelitas omonekiaya ma kintlakamatikan. Uan kimatiskiaj ika ángeles Jehová okinyekanaya nonmej tlakamej. Nochi okiteititiaya Jehová okiyekantoka ialtepe.

OMOYEKANKEJ IKA ITLAJTOL TOTAJTSIN DIOS

10. ¿Ken omoyekanki Moisés ika iTlanauatil toTajtsin Dios?

10 ITlajtol toTajtsin Dios okinyekanki akinmej ipatka otlanauatijkej. Ijkuak Biblia tlajtoa itech Tlanauatil tlen okiselijkej israelitas, kitokayotia “tlanauatil tlen okijkuilo Moisés” (1 Reyes 2:3). Pero Biblia kiteititia non Tlanauatil Jehová okinmakak israelitas. Ik non, Moisés noijki okitlakamatiaya (2 Crónicas 34:14). Se neskayotl, ijkuak Jehová okilui Moisés ken kichijchiuaskiaj tabernáculo, ye “okichi nochi tlen Jehová okinauati. Melauak ijkon okichi” (Éxodo 40:1-16).

11, 12. (1) ¿Tlen omonekiaya ma kichiua Josías uan tekiuajkej tlen okinauatiayaj ialtepe toTajtsin Dios? (2) ¿Ken okinpaleui iTlajtol toTajtsin Dios akinmej otlayekanayaj itech altepetl Israel?

11 Ijkuak Josué okinyekanki israelitas, amo ajsitok okipiaya iTlajtol toTajtsin Dios. Ik non, Jehová okilui: “Nin amochtli itech Tlanauatil moneki amo keman tikkauas, uan tonal uan yoak moneki ichtakatsin tiktlajtoltis, uan ijkon kuali tikchiuas nochi tlen itech ijkuilitok” (Josué 1:8). Tekiuajkej tlen satepan okiyekanayaj ialtepe toTajtsin Dios noijki omonekiaya mojmostla kitlajtoltiskej Tlanauatil. Uan omonekiaya kichiuaskej se copia uan kitlakamatiskiaj nochi tlen ompa oijkuilitoka (xiktlajtolti Deuteronomio 17:18-20). *

12 ¿Ken okinpaleui iTlajtol toTajtsin Dios akinmej otlayekanayaj itech altepetl Israel? Ma timokuayejyekokan tlen okipanok ueyi tekiua Josías. Ijkuak okajsikej amochtli kanin okatka tlanauatil tlen okijkuilo Moisés, isecretario Josías opejki kitlajtoltilia * (xikita tlajtoli tlen kiualika tlakxitlan). ¿Tlen okichi Josías? “Ijkuak ueyi tekiua okikak tlen okijtoaya amochtli itech Tlanauatil, san niman okitsayanki itlaken”. ITlajtol toTajtsin Dios okiyolini  ma kinpojpolo nochtin teotsitsintin tlen okatkaj itech altepetl uan ma kichiua se ueyi Pascua tlen amo keman omochiuaya (2 Reyes 22:11; 23:1-23). Josías uan oksekimej tlayekankej yolmelajkej omoyekankej ika iTlajtol toTajtsin Dios. Ik non, yejuan okipatlakej seki tlamantli uan ijkon okachi kuali okiyekankej ialtepe toTajtsin Dios. Ijkuak okipatlakej seki tlamantli, okipaleuijkej ialtepe toTajtsin Dios ma kichiua tlen ye kipaktia.

13. ¿Tleka akinmej otlayekanayaj itech ialtepe toTajtsin Dios amo okichiuayaj ken tekiuajkej tlen okatkaj itech okseki altepemej?

13 Tekiuajkej tlen okatkaj itech okseki altepemej omoyekanayaj ika inmixtlamatilis tlaltikpaktlakamej, tlen amo ajsitok. Se neskayotl, tlaltikpaktlakamej uan tekiuajkej itech Canaán okichiuayaj tlen temomojti. Omotekayaj iuan yolkamej, tlakamej omotekayaj iuan tlakamej, siuamej omotekayaj iuan siuamej noso omotekayaj iuan inkalchanejkauan. Noijki okinueyichiuayaj teotsitsintin uan okinmiktiayaj konemej (Levítico 18:6, 21-25). Noijki tekiuajkej babilonios uan egipcios amo okinpiayaj tlanauatilmej para yetoskej chipauakej, pero ialtepe toTajtsin Dios okinpiaya tlanauatilmej (Números 19:13). Akinmej otlayekanayaj itech ialtepe toTajtsin Dios amo okichiuayaj ken oksekimej. Yejuan okinmiluiayaj nochtin ma kiueyichiuakan Jehová ken ye kineki, ma yetokan chipauakej uan amo ma auilnemikan. Melauak ye Jehová akin okinyekanaya.

14. ¿Tleka Jehová okintlajyouilti sekimej tlayekankej itech ialtepe?

14 Amo nochtin akinmej otlanauatiayaj itech ialtepe toTajtsin Dios okitlakamatkej tlen toTajtsin Dios okinnauatiaya. Amo okitlakamatkej uan amo okikauilijkej ma kinyekana ika iespíritu santo, iTlajtol uan ika ángeles. Jehová okintlajyouilti noso okinpatlak sekimej tlayekankej (1 Samuel 13:13, 14). Pero satepan, Jehová okitlali se tlayekanki tlen amo kipia tlajtlakoli.

JEHOVÁ OKITLALI SE TLAYEKANKI TLEN AMO KIPIA TLAJTLAKOLI

15. (1) ¿Ken okiteititijkej teotlajtojkej yetoskia se tlayekanki tlen amo kipia tlajtlakoli? (2) ¿Akin yetoskia non tlayekanki?

15 Miak xiuitl, Jehová okijto kitlaliskia itech ialtepe se tlayekanki tlen amo kipia tlajtlakoli. Se neskayotl, Moisés okinmilui israelitas Jehová kitlaliskia se teotlajtojki ken ye uan omonekiaya kikakiskiaj (Deuteronomio 18:15). Isaías okijto nin teotlajtojki yetoskia se “tlayekanki uan [...] tlanauati” (Isaías 55:4). Daniel okijkuilo ualaskia “Mesías akin Tlayekanki” (Daniel 9:25). Uan Jesús okijto ye okatka tlayekanki itech ialtepe toTajtsin Dios (xiktlajtolti Mateo 23:10). Imachtijkauan Jesús okichiuayaj ken ye uan okineltokayaj Jehová okitlali ma kiyekana ialtepe (Juan 6:68, 69). ¿Tleka ijkon okineltokayaj?

Jehová okitlali Jesús ken se tlayekanki tlen amo kipia tlajtlakoli

16. ¿Ken okiteititi Jesús okipiaya espíritu santo?

16 Espíritu santo okimakak chikaualistli Jesús. Ijkuak Jesús omoapolakti, Juan akin oteapolaktiaya “okitak owalmotlapo n ilwikak iwa n Espíritu owaltemotiwalaya ipan Ye [Jesús] kemi se palomatsi”. Uan “satepa n Espíritu okiwík  n Jesús kan amaka chanti” (Marcos 1:10-12). Ijkuak Jesús okatka Tlaltikpak, espíritu santo okipaleui kuali ma tlamachti uan ma kinchiua milagros (Hechos 10:38). Noijki okipaleui ma kipia chikauak itlaneltokilis, pakilistli uan ma kintlasojtla oksekimej (Juan 15:9; Hebreos 12:2, TNM). San ye Jesús kuali okiteititi okipiaya iespíritu santo toTajtsin Dios. Melauak Jehová okitlali Jesús ma tlayekana.

¿Ken okipaleuijkej Jesús sekimej ángeles ijkuak omoapolakti? (Xikita párrafo 17).

17. ¿Ken okipaleuijkej ángeles Jesús?

17 Ángeles okipaleuijkej Jesús. Satepan ijkuak Jesús omoapolakti, sekimej ángeles “okitekichiwilikoh” (Mateo 4:11). Uan achto kimiktiskiaj, “okimonextili se ángel de ilwikak non okiyolchikawako” (Lucas 22:43). Jesús kuali okimatiaya Jehová kinmiluiskia ángeles ma kipaleuikan ijkuak okachi monekiskia (Mateo 26:53).

18, 19. ¿Ken omoyekanki uan otlamachti Jesús ika iTlajtol toTajtsin Dios?

18 Jesús omoyekanki ika iTlajtol toTajtsin Dios. Desde ijkuak opejki tetlapouia hasta ijkuak okimiktijkej itech se kuauitl, Jesús omoyekanki ika iTlajtol toTajtsin Dios. Achto mikiskia, okichi tlen yomoijtojka kipanoskia (Mateo 4:4; 27:46; Lucas 23:46). Pero akinmej tlayekanaj itech tlaneltokalismej amo okichiuayaj ken Jesús. Yejuan amo okitlakamatiayaj iTlajtol toTajtsin Dios ijkuak okixnamikiaya tlen otlamachtiayaj. Jesús okijto itech yejuan tlen kijtoa iTlajtol toTajtsin Dios: “Ninteh tlakah ika inkamak kijtoah nechtlakitah, pero amo nechtlakitah ika inyolo. Sanenka nechweyijkatlaliah, porke tlan kitemachtiah, san intlanawatil n tlakah” (Mateo 15:7-9). Jehová amo keman kinpejpenaskia tlakamej tlen amo kitlakamatij iTlajtol para ma kiyekanakan ialtepe.

 19 Jesús nochipa okinmachti oksekimej iTlajtol toTajtsin Dios. Ijkuak akinmej tlayekanaj itech tlaneltokalismej itlaj okitlajtlaniayaj para kiyejyekoskiaj, ye amo okinnankiliaya tlen omokuayejyekoaya. Okachi kuali, nochipa okinnankiliaya ika iTlajtol toTajtsin Dios (Mateo 22:33-40). Jesús uelis kintlajtlachialtiskia tla kinmiluiskia ken okatka inemilis itech iluikak noso ijkuak okichijchijkej nochi tlen onka. Pero ken okipatioitaya iTlajtol toTajtsin Dios, okinekiaya ika nochi inyolo nochtin kinmachtis. Ye “okinmajsikamatilti tlan okijtoaya itlajkuilol Dios” (Lucas 24:32, 45).

20. (1) Jesús, ¿ken okiueyichi Jehová? (2) ¿Tleka Jesús amo okatka ken Herodes Agripa I?

20 Ijkuak Jesús otlajtoaya, akinmej okikakiayaj omotlajtlachialtiayaj (Lucas 4:22). Pero ye nochipa okiueyichiuaya Jehová, porque ye okimachti. Se tonal, se tlakatl tlen okipiaya miak tomin okinekiaya kiueyichiuas Jesús uan okilui “kuali tlamachti”. Pero Jesús okatka yolyamanki uan okilui: “¿Tleka techilia nikuali? Sanwel onka se Akin kuali, iwa Ye Dios” (Marcos 10:17, 18). Kanaj chikueyi xiuitl satepan ijkuak omikik Jesús, ueyi tekiua Herodes Agripa I opejki tlanauatia itech Judea. Pero ye amo okichi ken Jesús. Se tonal ijkuak okichijkej se nechikol tlen miak ipati, Herodes okonaki itlaken tlen sapanoa patio. Ijkuak miakej okitakej uan okikakej, chikauak okijtojkej: “¡Akin tlajtojtok amo san se tlakatl, yej se dios!”. ¿Tlen okipanok satepan? Biblia kijtoa “se iángel Toteko Dios okichi mamokokojtiwetsi n Herodes Agripa Primero, porke amo okiweyijkachi Dios, ookuiloak iwa omikki” (Hechos 12:21-23). Nin okiteititi Jehová amo okitlali ma tlayekana. Pero Jesús okiteititi toTajtsin Dios okipejpenki uan nochipa okiueyichiuaya Jehová ken se ueyi tlayekanki.

21. ¿Tlen tlajtlanilmej tikinnankiliskej chikome?

21 Jehová amo okinekiaya Jesús ma kiyekana ialtepe san seki kauitl. Ijkuak okiyolitijkej Jesús, okinmilui imachtijkauan: “Notajtsi onechmaktili nochi para Ne manitlanawati itech ilwikak iwa itech tlaltíkpaktli”. Uan satepan okijto: “Xikilnamiktokah Ne nochipa niyetos nomowah” (Mateo 28:18-20). Pero tla Jesús kajki iluikak, ¿ken uelis kiyekanas ialtepe Jehová tlen kajki itech Tlaltikpak? ¿Akinmej kinpejpenaskia Jehová para ma yetokan ipatka Jesús itech Tlaltikpak? Uan ¿ken uelis tikmatiskej akinmej yokintlali toTajtsin Dios ipatka ma tlanauatikan? Chikome tikinnankiliskej ninmej tlajtlanilmej.

^ párr. 11 Deuteronomio 17:18-20 kijtoa: “Ijkuak ye motlalis ipan trono itech itekiuajkayo, moneki kimoijkuililis itech se amochtli se copia itech nin Tlanauatil tlen kipiaj teopixkej levitas. Uan nin moneki nochipa kipixtos uan itech iyolilis moneki nochipa kitlajtoltis, ijkon kimauilis Jehová akin iDios uan kitlakamatis nochi tlen kijtoa nin tlanauatil uan ninmej tlanauatilmej para ijkon kichiuas. Uan ijkon iyolo amo moueyinekis ixpan ikniuan uan amo moxelos itech tlanauatil ik ipochma noso iyekma, tla ijkon kichiuas, uejkauas miak xiuitl itech itekiuajkayo, ye uan ikoneuan itlajkotia Israel”.

^ párr. 12 Uelis nin amochtli okijkuilo Moisés.