Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok (tlen ika timomachtiaj)  |  Febrero de 2017

Sekimej techtlajtlaniaj

Sekimej techtlajtlaniaj

Tlatitlanil Pablo okijkuilo Jehová amo kitekauilis ma techyejyekokan hasta kanin amo uelis titlaxikoskej (1 Corintios 10:13, TNM). ¿Kijtosneki Jehová kita hasta kanin titlaxikoaj uan satepan kipejpena tlen ouijkayotl tikpiaskej?

Tla ijkon, ¿tlen panoskia itech tonemilis? Ma tikitakan se neskayotl. Se tokni sapanoa omoyolkoko ijkuak ikone omomikti. Opejki motlajtlania kox Jehová yokimatiaya tlen panoskia uan kox okinpejpenki ye uan isiua para ijkon kinpanoskia. Maski teyolkoko, itech ninmej tonalmej miakej sapanoa titlajyouiskej. Pero ¿moneki timokuayejyekoskej Jehová kichiua ijkon ma techpano?

Tla kuali timomachtiskej tlen kijtoa 1 Corintios 10:13, tikmatiskej Jehová amo kita hasta kanin titlaxikoskej uan satepan kipejpena tlen ouijkayotl tikpiaskej. Tikitaskej naui tlamantli tleka ijkon tikijtoaj.

Achto, Jehová kinkauilia nochtin ma kipejpenakan tlen kichiuaskej. Ye kineki tejuan ma tikpejpenakan tlen tikchiuaskej (Deuteronomio 30:19, 20; Josué 24:15). Ye techyekanas tla tikchiuaj tlen Jehová kipaktia (Proverbios 16:9). Pero titlajyouiskej tla tikchiuaj tlen amo kuali (Gálatas 6:7). Tla Jehová kipejpenaskia tlen ouijkayotl tikpiaskej, ¿melauak techkauiliskia ma tikpejpenakan tlen tikchiuaskej?

Ome, Jehová amo techmakixtia ijkuak techpanoa “tlamantli tlen amo tikchiaj” (Eclesiastés 9:11). Ikaj uelis itlaj kipanos tla kajki kanin amo moneki yetos noso ijkuak amo moneki ompa yetos. Jesús otlajto itech se torre tlen ouetsiko ipan 18 tlaltikpaktlakamej uan omikej. Pero noijki otlamachti amo itlajtlakol toTajtsin Dios tlen okinpanok (Lucas 13:1-5). Amo ma timokuayejyekokan Jehová kinpejpena akinmej mikiskej uan akinmej yoltoskej ijkuak itlaj panoa.

Eyi, tinochtin moneki tikteititiskej kox tiyolmelajkej ixpan Jehová. Satanás okijto tiktekichiuiliaj Jehová san ijkuak techteochiua uan amo tiktlakamatiskej ijkuak titlajyouiskej (Job 1:9-11; 2:4; Apocalipsis 12:10). Tla Jehová san niman techmakixtiskia itech ouijkayotl, moteititiskia melauak tlen okijto Satanás.

Naui, Jehová amo kineki kimatis nochi tlen satepan techpanos. Ye uelis kimatis nochi tlen satepan panos (Isaías 46:10). Pero Biblia kijtoa seki tlamantli tlen panos amo kineki kimatis (Génesis 18:20, 21; 22:12). ¿Tleka? Jehová techtlasojtla uan yolmelajki, ik non, kitlakaita nochi tlen tikpejpenaj tikchiuaskej (Deuteronomio 32:4; 2 Corintios 3:17).

¿Tlen okinekiaya kijtos Pablo ijkuak okijto Jehová amo kitekauilis ma techyejyekokan hasta kanin amo uelis titlaxikoskej? Pablo okinekiaya kijtos Jehová techpaleuia ijkuak titlajyouiaj, amo kijtosneki tlen ye kichiua ayamo titlajyouiskej * (xikita tlajtoli tlen kiualika tlakxitlan). Tla titlaneltokaj itech Jehová, ye techpaleuis ma tikxikokan san tlen ouijkayotl (Salmo 55:22). Ma tikinmitakan ome tlamantli tlen kiteititia tleka Pablo okijto Jehová amo kitekauilis ma techyejyekokan hasta kanin amo uelis titlaxikoskej.

Achto, Pablo ijkon okijto porque nochi ouijkayotl tlen onka “uelis kixikoskej”. Nin kijtosneki Satanás tlanauatijtok itech Tlaltikpak, ik non, tikpiaskej ouijkayotl. Tinochtin  titlajyouiskej, pero uelis titlaxikoskej uan tiyetoskej tiyolmelajkej tla titlaneltokaj itech Jehová (1 Pedro 5:8, 9). Ijkuak peua 1 Corintios tlakotonal 10, Pablo okijkuilo seki ouijkayotl tlen okipixkej israelitas kanin tlauaki (1 Corintios 10:6-11). Israelitas tlen otlaneltokakej itech Jehová okixikojkej ouijkayotl. Pero akinmej amo otlaneltokakej itech Jehová otlajtlakolchijkej uan amo okatkaj yolmelajkej.

Ome, Pablo noijki okijto ninmej tlajtolmej porque “toTajtsin Dios yolmelajki”. ¿Tlen kijtosneki nin? Tla tikilnamikij Jehová nochipa kinmaluia itekipanojkauan, tikmatiskej ye yolmelajki uan kinpaleuis “akinmej kitlasojtlaj uan kitlakamatij” (Deuteronomio 7:9). Noijki Jehová nochipa kichiua tlen kijtoa (Josué 23:14). Ik non, moneki nochipa ma tikilnamiktokan ome tlamantli. Achto, Jehová amo kitekauilis ma tikpiakan se ouijkayotl tlen amo uelis tikxikoskej. Uan ome, ye ‘techmakixtis’.

Jehová “nochipa techyolchikawa ijkuak titlaijyowiah”.

¿Ken ‘techmakixtis’ Jehová tla itech titlaneltokaj? Ye uelis techkixtilis nochi ouijkayotl tlen tikpiaj. Pero Pablo okijto Jehová ‘techmakixtis uan ijkon titlaxikoskej’. Nin techmachtia Jehová techyolchikaua para tiyetoskej tiyolmelajkej. Techpaleuia ika miak tlamantli. Ma tikitakan.

  • Jehová “nochipa techyolchikawa ijkuak titlaijyowiah” (2 Corintios 1:3, 4). Ye techyolseuia ika Biblia, iespíritu santo uan ika “tlakeuali yolmelajki uan ixtlamatki” (Mateo 24:45, TNM; Juan 14:16; Romanos 15:4).

  • Jehová techyekana ika iespíritu santo (Juan 14:26). Iespíritu santo uelis techpaleuis ma tikilnamikikan tlen kijtoa Biblia uan principios bíblicos tlen techpaleuiskej kuali ma tikpejpenakan tlen tikchiuaskej.

  • Jehová techpaleuia ika ángeles (Hebreos 1:14).

  • Jehová techpaleuia ika tokniuan. Yejuan techyolchikauaj ika tlen kichiuaj uan kijtoaj (Colosenses 4:11).

¿Tlen techmachtia tlen okijto Pablo itech 1 Corintios 10:13? Jehová amo kipejpena tlen ouijkayotl tikpiaskej. Noijki otimomachtijkej tikxikoskej san tlen ouijkayotl tla titlaneltokaj itech Jehová. Ye nochipa techpaleuis ma tiyetokan tiyolmelajkej.

^ párr. 7 Tlajtoli griego tlen motlajtolkuepa “tlayejyekolistli” noijki kijtosneki “ouijkayotl”.