Xikita nochi

Tlen kiualika

¿Akin kiyekana ialtepe toTajtsin Dios?

¿Akin kiyekana ialtepe toTajtsin Dios?

“Xikinmilnamikikah n tokniwah tlayakankeh” (HEBREOS 13:7).

TLAKUIKALMEJ: 34 UAN 43

1, 2. ¿Tlen uelis omotlajtlanijkej tlatitlanilmej ijkuak Jesús oyajki iluikak?

TLATITLANILMEJ okatkaj itech Olivostepetl iuan Jesús akin okatka inyolikni uan intlamachti. Pero san niman okitakej ken opejki tlejko iluikak uan opoliuik itech mixtli (Hechos 1:9, 10). Kanaj ome xiuitl, Jesús okinmachti miak tlamantli, okinyolchika uan okinyekanki. Pero ¿tlen kichiuaskiaj ijkuak Jesús ayakmo inmiuan yetoskia?

2 Ijkuak ayamo oyaya iluikak Jesús, okinmilui imachtijkauan: “Nontetlapowitiweh notlajtol itech Jerusalén, Judea, Samaria; iwa itech nochi n tlaltíkpaktli” (Hechos 1:8). ¿Ken kichiuaskiaj nin tekitl? Jesús okinmilui kinpaleuiskia iespíritu santo toTajtsin Dios (Hechos 1:5, TNM). Pero ¿akin kinyekanaskia uan akin kiyekanaskia tetlapouilistli itech nochi Tlaltikpak? Tlatitlanilmej okimatiayaj Jehová okintekitilti tlakamej para kinyekanaskia israelitas. Ik non, uelis omotlajtlanijkej kox Jehová kipejpenaskia se yankuik tlayekanki.

3. (1) ¿Tlen okichijkej tlatitlanilmej ijkuak Jesús oyajki iluikak? (2) ¿Tlen tlajtlanilmej tikinnankiliskej?

3 Satepan ijkuak Jesús oyajki iluikak, imachtijkauan omomachtijkej  iTlajtol toTajtsin Dios, okiluijkej ma kinpaleui uan okipejpenkej Matías para ma kipatkayoti Judas Iscariote. Ijkon oksepa okatkaj 12 tlatitlanilmej (Hechos 1:15-26, TNM). ¿Tleka miak ipati tlen okichijkej para yejuan uan para Jehová? Imachtijkauan Jesús okitakej omonekiaya ma yetokan 12 tlatitlanilmej * (xikita tlajtoli tlen kiualika tlakxitlan). Jesús okinpejpenki itlatitlaniluan uan okinmachti para kichiuaskiaj se tekitl tlen miak ipati itech ialtepe toTajtsin Dios. ¿Tlen tekitl kichiuaskiaj? ¿Ken okinpaleui Jehová uan Jesús ma kichiuakan nin tekitl? ¿Axkan katej akinmej kichiuaj nin tekitl? ¿Ken uelis tikinpaleuiskej akinmej kiyekanaj ialtepe Jehová uan okachi “tlakeuali yolmelajki uan ixtlamatki”? (Mateo 24:45, TNM; Hebreos 13:7).

JESÚS KINYEKANA AKINMEJ POUIJ ITECH CUERPO GOBERNANTE

4. ¿Tlen tekitl okichiuayaj tlatitlanilmej uan oksekimej tlayekankej tlen okatkaj Jerusalén?

4 Tlatitlanilmej opejkej kiyekanaj tlanechikol itech Pentecostés itech xiuitl 33. Biblia kijtoa “Pedro omóketski iwa n májtlakteh iwa n se tlatematiltijkeh” uan okinmachti sekimej ken uelis momakixtiskiaj (Hechos 2:14, 15). Miakej opejkej kichiuaj ken Cristo. Satepan ninmej tokniuan “omochijchikawayah iwa okichiwayah tlan n tlatematiltijkeh okinmachtiayah” (Hechos 2:42). Tlatitlanilmej okijtoayaj ken motekitiltiskia tomin (Hechos 4:34, 35). Noijki okinmachtiayaj tokniuan uan inpatka omotlatlaujtiayaj. Yejuan okijtojkej: “Tejwah [...] timotiotsajtsiliskeh iwa titetlapowiskeh de itlajtol Totajtsi Dios” (Hechos 6:4). Tlatitlanilmej okintitlaniayaj tokniuan ixtlamatkej ma tetlapouitij kanin amo keman omotetlapouiaya (Hechos 8:14, 15). Satepan, oksekimej tlayekankej tlen okatkaj tlapejpenalmej okinpaleuijkej tlatitlanilmej ma kinmaluikan tlanechikolmej. Nochtin yejuan opouiayaj itech cuerpo gobernante tlen okinyekanayaj tlanechikolmej (Hechos 15:2).

Tokniuan itech achto siglo okimatiayaj Jehová okiyekanaya cuerpo gobernante ika Jesús

5, 6. (1) ¿Ken okinpaleui espíritu santo akinmej opouiyaj itech cuerpo gobernante? (Xikita tlaixkopinal tlen ika peua tlamachtil). (2) Ángeles, ¿ken okinpaleuijkej akinmej opouiayaj itech cuerpo gobernante? (3) ¿Ken okiyekanki iTlajtol toTajtsin Dios akinmej opouiayaj itech cuerpo gobernante?

5 Tokniuan itech achto siglo okimatiayaj Jehová okinyekanaya ika Jesús akinmej opouiayaj itech cuerpo gobernante. ¿Ken okimatiayaj? Achto, espíritu santo okinpaleui cuerpo gobernante (Juan 16:13). Nochtin tlapejpenalmej okiselijkej espíritu santo, pero espíritu santo okinpaleui tlatitlanilmej uan tlayekankej tlen okatkaj Jerusalén para kinyekanaskiaj tlanechikolmej. Se neskayotl, itech xiuitl 49 espíritu santo okipaleui cuerpo gobernante ma kiyektlali se ouijkayotl itech circuncisión. Tlanechikolmej okichijkej tlen  okijto cuerpo gobernante, ik non, “okachi okineltokayah Cristo Jesús, iwa ixmostla okachi omomiakiliayah” (Hechos 16:4, 5). Carta tlen okiselijkej tlanechikolmej okiteititiaya cuerpo gobernante otlaneltokaya, otetlasojtlaya uan okipiaya iespíritu santo toTajtsin Dios (Hechos 15:11, 25-29; Gálatas 5:22, 23).

6 Ángeles noijki okipaleuiayaj cuerpo gobernante. Se neskayotl, se ángel okilui se tlakatl tlen omotokayotiaya Cornelio ma kitemo tlatitlanil Pedro. Cornelio amo okatka judío uan amo okichiuilijkej circuncisión. Ijkuak tlatitlanil Pedro okitlapoui Cornelio uan ikalchanejkauan okiselijkej espíritu santo maski tlakamej amo okinchiuilijkej circuncisión. Ijkuakon, Cornelio omochi achto tlakatl tlen opejki kichiua ken Cristo tlen amo okatka judío nion tlen amo okichiuilijkej circuncisión. Ijkuak tlatitlanilmej uan oksekimej tokniuan okimatkej non, okiselijkej itlanekilis toTajtsin Dios uan okinselijkej ika pakilistli akinmej amo okatkaj judíos uan akinmej amo okinchiuilijkej circuncisión (Hechos 11:13-18, TNM). Nin kiteititia ángeles okipaleuiayaj tetlapouilistli tlen okiyekanaya cuerpo gobernante (Hechos 5:19, 20). Uan tokniuan akinmej opouiayaj itech cuerpo gobernante omoyekanayaj ika iTlajtol toTajtsin Dios. Ijkuak okinyekanayaj tlanechikolmej noso ijkuak itlaj okipatlayaj itech tlen otlamachtiayaj, nochipa omomachtiayaj iTlajtol toTajtsin Dios uan ijkon okipejpenayaj tlen kichiuaskiaj (Hechos 1:20-22; 15:15-20).

7. ¿Tleka tikijtoaj Jesús okinyekanaya akinmej okichiuayaj ken Cristo itech achto siglo?

7 Maski akinmej opouiayaj itech cuerpo gobernante okinyekanayaj tlanechikolmej, yejuan okimatiayaj ye Jesús akin otlayekanaya. ¿Ken tikmatij? Tlatitlanil Pablo okijto Cristo okintlali sekimej tlakamej “mayetokah tlatitlánilti”. Noijki okijto “Cristo [...] itsonteko” noso akin tlayekana itech tlanechikol (Efesios 4:11, 15). ToTajtsin Dios okinek ma kinmixmatikan ken “cristianos n tokniwah non kineltokah Cristo” uan amo ma kinmixmatikan ika itoka se tlatitlanil (Hechos 11:26). Pablo okimatiaya omonekiaya kichiuaskej tlen tlatitlanilmej uan tlayekankej okinmachtiayaj, porque tlen okinmiluiayaj okisaya itech iTlajtol toTajtsin Dios. Pero Pablo noijki okijto: “Nikneki xikajsikamatikah Cristo Ye n tlayákanki, itech nochi tlakatl”. Nin kijtosneki noijki okinyekanaya akinmej opouiayaj itech cuerpo gobernante. Uan satepan, Pablo noijki okijto: “Dios kinawatia Cristo” (1 Corintios 11:2, 3). Ken tikitaj, Jehová okitlali Jesucristo ma kinyekana tlanechikolmej.

“NIN TEKITL AMO IAXKA SE TLAKATL”

8, 9. ¿Tlen tekitl miak ipati okichi tokni Russell?

8 Itech xiuitl 1870, tokni Charles Taze Russell uan sekimej iyolikniuan opejkej kiueyichiuaj toTajtsin Dios ijkon ken tlamachtia Biblia. Yejuan okinekiayaj kinpaleuiskej oksekimej ijkon ma kichiuakan uan noijki akinmej otlajtoayaj tlatlamantli tlajtolmej. Ik non, itech xiuitl 1884 okitlalijkej se tlanechikol tlen itoka Zion’s Watch Tower Tract Society uan tokni Russell okiyekanaya * (xikita tlajtoli tlen kiualika tlakxitlan). Tokni kuali omomachtiaya Biblia, ik non, amo omomojti ijkuak okinmilui oksekimej amo melauak tlen otlamachtiayaj itech teopan, ken Trinidad noso ijkuak kijtoaj itlaj ok yoltok ijkuak  timikij. Tokni Russell noijki okajsikamatki ijkuak Cristo ualmokuepaskia amo motaskia uan opejki tlanauatia itech xiuitl 1914 (Lucas 21:24). Tokni Russell okitekitilti itomin uan ichikaualis para kinmachtiskia oksekimej non tlamantli. Jehová uan Jesús okitekitiltijkej tokni para kiyekanaskej tlanechikol itech nonmej tonalmej tlen miak ipati.

9 Tokni Russell amo okinekiaya ma kiueyichiuakan. Itech xiuitl 1896, okijkuilo amo okinekiaya ikaj ma kinueyichiua tokniuan tlayekankej. Noijki amo okinekiayaj ma kintlalilikan se tokayotl tlen ueyititok noso ma kintokayotikan “ruselistas”. Satepan tokni Russell noijki okijto: “Nin tekitl amo iaxka se tlakatl”.

Itech “tlakeuali yolmelajki uan ixtlamatki” yejuan sekimej tokniuan tlapejpenalmej tlen pouij itech Cuerpo Gobernante

10. (1) ¿Keman okitlali Jesús “tlakeuali yolmelajki uan ixtlamatki”? (2) ¿Ken omoijto amo san se tlamantli Cuerpo Gobernante uan Sociedad Watch Tower?

10 Itech xiuitl 1919 Jesús okitlali “tlakeuali yolmelajki uan ixtlamatki”, eyi xiuitl satepan ijkuak omikik tokni Russell. ¿Tleka okitlali? Para kinmakas imachtijkauan “tlakuali ijkuak moneki” (Mateo 24:45, TNM). Itech nonmej tonalmej, sekimej tlapejpenalmej okinmakayaj tlen ika kichikauaskiaj intlaneltokilis tokniuan. Nonmej tlapejpenalmej okatkaj kanin omoyekanaya tetlapouilistli itech Brooklyn (Nueva York). Tlajtoli “cuerpo gobernante” opejki mota itech toamatlajkuiloluan itech xiuitl 1940. Ijkuakon, tokniuan okijtoayaj “cuerpo gobernante” opouiaya iuan tokniuan tlen okiyekanayaj Watch Tower Bible and Tract Society of Pennsylvania. Pero itech xiuitl 1971, omoijto Cuerpo Gobernante amo okatka Sociedad Watch Tower tlen okiyektlaliayaj seki tlamantli inmixpan tekiuajkej. Itech non xiuitl, sekimej tokniuan tlen tlapejpenalmej tlen amo okiyekanayaj Sociedad Watch Tower uelis pouiskiaj itech Cuerpo Gobernante. Satepan, akinmej kiyekanaj Sociedad uan okseki tlen kintekitiltiaj ialtepe Jehová, pouij itech “oksikimeh ichkameh”. Ik non, akinmej pouij itech Cuerpo Gobernante okachi ma kinyekanakan uan ma kinmakakan tlen ika kichikauas itlaneltokilis ialtepe toTajtsin Dios (Juan 10:16; Hechos 6:4). Revista La Atalaya (ika náhuatl del centro Akin Tetlapouijtok) 15 de julio 2013, okiyekijto “tlakeuali yolmelajki uan ixtlamatki” yejuan sekimej tokniuan tlapejpenalmej tlen pouij itech Cuerpo Gobernante.

Yejuan opouiayaj itech cuerpo gobernante itech xiuitl 1950.

11. Akinmej pouij itech Cuerpo Gobernante, ¿ken kipejpenaj tlen kichiuaskej?

11 Tokniuan tlen pouij itech Cuerpo Gobernante sejse semana monechikoaj uan kipejpenaj ken mochiuas seki tlamantli tlen miak ipati. Ken nochipa monechikoaj, kichiua san sekan ma yetokan uan kuali ma motlapouikan (Proverbios 20:18). Nion se tokni tlen poui itech Cuerpo Gobernante okachi ueyititok. Ik non, sejse xiuitl mopatla akin kiyekana nechikol tlen kichiuaj sejse semana (1 Pedro 5:1). Uan noijki ijkon tekitij chikuase comités tlen kipia Cuerpo Gobernante. Nion se tokni tlen poui itech Cuerpo Gobernante kineltoka ye kinyekana ikniuan. Sejse yejuan pouij itech nochtin  itekipanojkauan toTajtsin Dios (xikita recuadro “¿Tlen kijtosneki?”). Ik non, yejuan kiseliaj tlamachtilmej uan kitlakamatij tlakeuali yolmelajki uan ixtlamatki.

Itech xiuitl 1919 tlakeuali yolmelajki opejki kimaka ialtepe toTajtsin Dios tlen ika kichikaua itlaneltokilis. (Xikinmita párrafos 10 uan 11).

“¿AKIN TLAKEUALI YOLMELAJKI UAN IXTLAMATKI?”

12. ¿Tlen tlajtlanilmej tikinnankiliskej?

12 Jehová amo kinmiluia ika kochtemikilistli tlen kichiuaskej akinmej pouij itech Cuerpo Gobernante uan yejuan noijki tlajtlakolejkej. Uelis motlapololtiskej ijkuak kiyekijtoaj se tlamachtil itech Biblia noso ijkuak techiluiaj tlen tikchiuaskej. Se neskayotl, itech amatlajkuilol Índice de las publicaciones Watch Tower kanin kijtoa “Aclaración de nuestras creencias”. Moijtoaj seki tlamachtilmej tlen opejkej moyekijtoaj itech xiuitl 1870 uan mota ken yomopatlak ken tikajsikamatij seki tlamachtilmej * (xikita tlajtoli  tlen kiualika tlakxitlan). Jesús amo okijto tlakeuali yolmelajki amo keman kipatlaskia se tlamachtil. Tla ijkon, ¿akin “tlakeuali yolmelajki uan ixtlamatki” tlen okijto Jesús? (Mateo 24:45, TNM). ¿Tlen kiteititia Cuerpo Gobernante ye tlakeuali yolmelajki? Ma tikitakan eyi tlamantli tlen kipaleuia Cuerpo Gobernante ijkon ken okipaleui cuerpo gobernante itech achto siglo.

13. ¿Ken yokinpaleui espíritu santo akinmej pouij itech Cuerpo Gobernante?

13 Espíritu santo kipaleuia Cuerpo Gobernante. Espíritu santo kinpaleuia akinmej pouij itech Cuerpo Gobernante ma kajsikamatikan tlamachtilmej itech Biblia tlen achto amo kuali omoajsikamatiaya. Se neskayotl, ma timokuayejyekokan ken yomopatlak seki tlamachtilmej tlen omoijto itech párrafo 12. Nion se tlaltikpaktlakatl amo uelis kajsikamatis uan kiyekijtos “tlamantin de Dios katlej mach tiwelij tikmomakaj kuenta” (xiktlajtolti 1 Corintios 2:10, ITlajtol toTajtzin Dios). Cuerpo Gobernante noijki mokuayejyekoa ken okijto tlatitlanil Pablo: “Tejwah titlajtoah ika tlájtolteh non Iespíritu n Dios otechinmajsikamatilti, iwa amo ika tlájtolteh non san tonewiah otikinmomachtijkeh. Ijkó tikinmajsikamatiltiah tlan n Espíritu kimonekiltia” (1 Corintios 2:13). Miak xiuitl tlaneltokalistli tlen amo melauak okinyekanki tlaltikpaktlakamej uan amo kuali okichi. Tla ijkon, ¿tleka okachi kuali moajsikamati Biblia desde 1919? Porque Jehová tlapaleuia ika iespíritu santo.

14. Ijkon ken kijtoa Apocalipsis 14:6, 7, ¿ken kinpaleuiaj ángeles akinmej pouij itech Cuerpo Gobernante uan ialtepe Jehová?

14 Ángeles kipaleuiaj Cuerpo Gobernante. Cuerpo Gobernante kiyekana tetlapouilistli tlen kichiuaj kanaj ocho millones tokniuan itech nochi Tlaltikpak. ¿Tleka kuali kisa nin tekitl? Ángeles tlapaleuiaj (xiktlajtolti Apocalipsis 14:6, 7). Miak uelta ángeles kinyekanaj tokniuan ma kintlapouikan akinmej okitlatlaujtijkej toTajtsin Dios ma kinpaleui * (xikita tlajtoli tlen kiualika tlakxitlan). Tokniuan okachi tetlapouiaj uan tlamachtiaj itech Biblia kanin amo kinkauiliaj. Nin tekitl mochiua porque ángeles tlapaleuiaj.

15. Ika se neskayotl xikyekijto tleka akinmej pouij itech Cuerpo Gobernante amo kichiuaj ken akinmej tlayekankej itech tlaneltokalismej.

15 ITlajtol toTajtsin Dios kiyekana Cuerpo Gobernante (xiktlajtolti Juan 17:17). Ma timokuayejyekokan tlen opanok itech xiuitl 1973. Revista La Atalaya (ika náhuatl del centro Akin Tetlapouijtok) 15 de octubre 1973 okijto: ¿Uelis moapolaktiskej akinmej ok tlachichinaj? Omoijto amo uan non omokixti itech Biblia. Revista okiyekijto ika miakej tlaxelolmej tleka omonekiaya kinkixtiskej itech tlanechikol akinmej otlachichinayaj (1 Corintios 5:7; 2 Corintios 7:1). Revista okiyekijto nin tlanauatil amo uits itech se tlaltikpaktlakatl; uits “itech toTajtsin Dios, akin techtlapouia ika iTlajtol tlen ijkuilitok”. San iTlaixpantijkauan Jehová nochipa moyekanaj ika Biblia. Uan kichiuaj maski ualeua oui. Se amochtli tlen omoijkuilo itech ueyi altepetl Estados Unidos tlen tlajtoa itech tlaneltokilistli, okijto: “Akinmej tlayekankej itech tlaneltokalismej nochipa kipatlaj tlen kineltokaj para oksekimej amo oui kitlakamatiskej uan ijkon miakej inmiuan ma  yetokan”. Akinmej pouij itech Cuerpo Gobernante amo kichiuaj tlen okachi kinpaktia tlaltikpaktlakamej. Okachi kuali, moyekanaj ika iTlajtol toTajtsin Dios. Nin kiteititia Jehová kiyekana ialtepe.

“XIKINMILNAMIKIKAH N TOKNIWAH TLAYAKANKEH”

16. ¿Tlen uelis tikchiuaskej para Jehová ma kiteochiua Cuerpo Gobernante?

16 (Xiktlajtolti Hebreos 13:7). Biblia kijtoa moneki ‘matikinmilnamikikah n tokniwah tlayakankeh’. Uelis ijkon tikchiuaskej tla tiktlatlaujtiaj Jehová ma kinpaleui akinmej pouij itech Cuerpo Gobernante (Efesios 6:18). Yejuan kipiaj miak tekitl. Se neskayotl, techmakaj nochi tlen ika tikchikauaskej totlaneltokilis, kiyekana tetlapouilistli uan kitaj ken motekitiltis tomin tlen kiselia ialtepe Jehová. Ken tikitaj, moneki ma tiktlatlaujtikan Jehová ma kinpaleui.

17, 18. (1) ¿Ken tikpaleuiaj Cuerpo Gobernante? (2) ¿Tleka moneki ma timochijchikauakan ma titetlapouikan?

17 Noijki tikpaleuiaj Cuerpo Gobernante ijkuak tiktlakamatij tlen techiluia uan tikkauiliaj ma techyekana. Cuerpo Gobernante techyekana ika amatlajkuilolmej, nechikolmej uan uejueyij nechikolmej. Noijki kintlalia tlayekankej itech circuito uan yejuan kintlaliaj tlayekankej itech tlanechikolmej. Tlayekankej itech circuito uan tlayekankej kipaleuiaj Cuerpo Gobernante ijkuak kitlakamatij nochi tlen kijtoa. Uan tinochtin tejuan tikteititiaj tiktlakaitaj Jesús akin techyekana, ijkuak tikintlakamatij tokniuan tlen ye kintekitiltia (Hebreos 13:17).

18 Noijki tikpaleuiaj Cuerpo Gobernante tla timochijchikauaj titetlapouiaj. Hebreos 13:7 techyoleua ma tikchiuakan ken tokniuan tlayekankej. Akinmej pouij itech Cuerpo Gobernante yokiteititijkej tlaneltokaj itech Jehová ijkuak tetlapouiaj ika pakilistli uan kipaleuiaj nin tekitl. ¿Tikinpaleuiaj itech nin tekitl? Tla ijkon tikchiuaj, sapanoa tiyolpakiskej ijkuak Jesús techiluis: “Ijkuak nomejwah ijkí ononkinchiwilijkeh nokniwah non okachi amitla impati, Ne ononnechchiwilijkeh” (Mateo 25:34-40).

19. ¿Tleka tiknekij tiktlakamatiskej Jesús akin techyekana?

19 Ijkuak Jesús oyajki iluikak, amo inselti okinkajte imachtijkauan (Mateo 28:20). Jesús okimatiaya okinpaleui espíritu santo, ángeles uan iTlajtol toTajtsin Dios ma kinyekana imachtijkauan ijkuak okatka nikan Tlaltikpak. Uan axkan noijki ijkon kipaleuia tlakeuali yolmelajki. Cuerpo Gobernante “yawih iwan Ichkatsi san kan ik Ye yawi” (Apocalipsis 14:4). Ik non, ijkuak tiktlakamatij Cuerpo Gobernante, noijki tiktlakamatij Jesús akin techyekana. San niman, Jesús techyekanas “kan améyali non kichiwa se mayolito” nochipa (Apocalipsis 7:14-17). Nion se tlayekanki uelis kichiuas non.

^ párr. 3 Jehová okinekiaya ma yetokan 12 tlatitlanilmej para ma yetokan “májtlakteh iwa ome temeh” kanin motlakxilijtoskia yankuik Jerusalén (Apocalipsis 21:14). Ik non, ayakmo okinpatkayotijkej tlatitlanilmej yolmelajkej tlen satepan omikej.

^ párr. 8 Itech 1955 okitokayotijkej nin tlanechikol Watch Tower Bible and Tract Society of Pennsylvania.

^ párr. 12 Noijki xikita tlamachtil “Tlen okachi kuali tikajsikamatij axkan” itech amatlajkuilol Tlen ika momachtiaj iTlaixpantijkauan Jehová.

^ párr. 14 Xikita amochtli “Testimonio cabal” del Reino de Dios, páginas 58 uan 59.