Xikita nochi

Tlen kiualika

 TLAMACHTIL 5

¿Tlen moneki tikteititiskej ijkuak timonechikoaj?

¿Tlen moneki tikteititiskej ijkuak timonechikoaj?

“Nomejwah nonkinextiah imikilis n Toteko Jesús, asta Ye walmuikas” (1 COR. 11:26).

TLAKUIKALI 18 Tiktlasojkamatij imikilis Jesús

XIKILNAMIKTO *

1. ¿Tlen kita Jehová ijkuak timiakej timonechikoaj ijkuak tikilnamikij iCena toTeko? (Xikita foto kanin peua tlamachtil).

¿TLEN kita Jehová ijkuak timiakej timonechikoaj ijkuak tikilnamikij iCena toTeko? Ye sejse kinmita tlen kipiaj itech inyolo. Kimati akinmej sejse xiuitl touan monechikoaj. Sekimej touan monechikoaj maski kintlajyouiltiaj. Sekimej amo chichikometika touan monechikoaj pero kimatij moneki yaskej ijkuak tikilnamikij iCena toTeko. Noijki Jehová kimati akinmej yikin touan monechikoaj. Xamo yauij porque kinekij kimatiskej tlen tikchiuaj.

2. ¿Tlen timomachtiskej?

2 Jehová yolpaki ijkuak miakej touan monechikoaj tikilnamikiskej imikilis Jesús (Luc. 22:19). Pero ye amo kita tleka monechikoaj uan amo kitekipachoa kox miakej monechikoaj. Itech nin tlamachtil tikitaskej itlaj miak ipati. ¿Tleka amo timonechikoaj san ijkuak tikilnamikij iCena toTeko? ¿Tleka noijki timonechikoaj chichikometika para techmachtis Jehová? Ma tikitakan tleka timonechikoaj.

Kuali tikinseliaj akinmej touan monechikoaj ijkuak tikilnamikij iCena toTeko. (Xikita párrafo 1 uan 2).

TIMONECHIKOAJ PORQUE TIYOLYAMANKEJ

3. ¿Tleka timonechikoaj?

3 Timonechikoaj porque tikueyichiuaj toTajtsin Dios. Noijki timonechikoaj porque Jehová techmachtia. Porque akinmej moueyinekij amo kinekij ikaj ma kinmachti (3 Juan 9). Pero tejuan tiknekij ma techmachti Jehová uan noijki ialtepe (Is. 30:20; Juan 6:45).

4. (1) ¿Tlen tlamantli tikteititiaj ijkuak timonechikoaj? (2) ¿Ken techpaleuia 1 Corintios 11:23-26 ma timonechikokan ijkuak tikilnamikij imikilis Cristo?

 4 Tikteititiaj tiyolyamankej ijkuak timonechikoaj porque ijkon tikteititiaj tiknekij ma techmachti toTajtsin Dios. Noijki ijkuak timonechikoaj tikilnamikiskej imikilis Jesús, tikteititiaj tiyolyamankej uan tiknekij tiktlakamatiskej tlen Jesús otlanauati: “Xikchiwakah para nonnechilnamikiskeh” (xiktlajtolti 1 Corintios 11:23-26). Nin okachi techpaleuia ma tikneltokakan tlen Jehová kichiuas uan noijki techilnamiktia Jehová sapanoa techtlasojtla. Pero ye amo kineki san sejse xiuitl ma timoyolchikauakan uan ma timoyolseuikan. Ik non, Jehová techiluia chichikometika ma timonechikokan. Tiktlakamatij porque tiyolyamankej. Sejse semana tiktekitiltiaj miak horas para tikyektlaliskej tlen timomachtiskej ijkuak timonechikoskej.

5. ¿Tleka miakej kinekij touan monechikoskej?

5 Sejse xiuitl miakej kinekij kixmatiskej Jehová porque yolyamankej (Is. 50:4). Ualeua achto touan monechikoaj ijkuak tikilnamikij imikilis Cristo uan satepan chichikometika peua monechikoaj (Zac. 8:20-23). Tejuan uan akinmej yikin touan monechikoaj techyolpaktia ma techyekana toTajtsin Dios uan ma techmachti. Porque ye techpaleuia uan techmakixtia (Sal. 40:17). Okachi ipati timonechikoskej para ma techmachti Jehová uan iKone akin sapanoa kitlasojtla (Mat. 17:5; 18:20; 28:20).

6. ¿Tlen okichi se tlakatl porque okatka yolyamanki?

6 Sejse xiuitl timochijchikauaj tikinyoleuaj oksekimej touan ma kilnamikikan imikilis Jesús. Miakej tlen yolyamankej kiseliaj touan kilnamikiskej imikilis Jesús. Ma tikitakan tlen okipanok se tokni. Tokni okimakak se tlakatl se amatsintli tlen ika titeyoleuaj. Pero nin tlakatl okijto amo uelis yaskia. Pero oajsito ijkuak yomonechikojtokaj kilnamikiskej imikilis Jesús. Tokni omotlajtlachialti ijkuak okitak oajsito nin tlakatl. Tlakatl sapanoa omotlajtlachialti ijkuak okitak kuali okiselijkej uan opejki monechikoa. Se xiuitl san eyi uelta amo omonechikoto. ¿Tlen okipaleui? Tokni tlen okilui touan ma kilnamikiti imikilis Jesús, okijto: “Ye sapanoa yolyamanki”. Ye Jehová okiyoltilanki nin tlakatl para ma poui itech ialtepe. Axkan nin tlakatl iTlaixpantijka Jehová (2 Sam. 22:28; Juan 6:44).

7. ¿Ken techpaleuia ma tiyetokan tiyolyamankej tlen timomachtiaj ijkuak timonechikoaj uan tlen tiktlajtoltiaj itech Biblia?

7 Techpaleuia ma tiyetokan tiyolyamankej tlen timomachtiaj ijkuak timonechikoaj uan tlen tiktlajtoltiaj itech Biblia. Ijkuak yitikilnamikiskej iCena toTeko, timomachtiaj tlen okichi Jesús ijkuak timonechikoaj. Noijki timomachtiaj okatka yolyamanki ijkuak topatka omotemakak. Noijki techiluiaj ma tiktlajtoltikan itech Biblia kanin kijtoa ken okimiktijkej Jesús uan ijkuak okiyolitijkej. Nochi nin tlamantli techpaleuis ma tiktlasojkamatilikan Jesús topatka omotemakak. Ik non, tiknekij tiyetoskej tiyolyamankej ken Jesús uan tiktekichiuiliskej Jehová maski ualeua techtlajyouiltiskej (Luc. 22:41, 42).

 TLA TIYOLCHIKAUAKEJ TECHPALEUIA MA TIMONECHIKOKAN

8. ¿Ken okiteititi Jesús okatka yolchikauak?

8 Tiknekij tiyetoskej tiyolchikauakej ijkon ken Jesús. Ma timokuayejyekokan ken okatka yolchikauak ijkuak yikimiktiskiaj. Jesús yokimatiaya akinmej okikokoliayaj kipinauiskiaj, kiuitekiskiaj uan kimiktiskiaj (Mat. 20:17-19). Ye amitlaj okichi maski yokimatiaya kimiktiskiaj. Ijkuak yikimiktiskiaj, okinmilui imachtijkauan tlen iuan okatkaj itech xochitlali Getsemaní: “¡Ximewakah, tiawih! ¡Ompa wits akin nechtemaktis!” (Mat. 26:36, 46). Ik non, ijkuak okikitskitoj okijto ye okatka Jesús uan okinmilui soldados ma kinkauilikan ma uian imachtijkauan (Juan 18:3-8). ¡Melauak okatka yolchikauak! Ik non, tejuan uan tlapejpenalmej timochijchikauaj tiyetoskej tiyolchikauakej ken Jesús. ¿Ken tikteititiaj tiyolchikauakej?

Tokniuan kipiaj chikauak intlaneltokilis ijkuak kimatij tiktekichiuiliaj Jehová maski tikixnamikij ouijkayotl. (Xikita párrafo 9). *

9. (1) ¿Tleka moneki ma tiyetokan tiyolchikauakej uan ijkon nochipa timonechikoskej? (2) ¿Ken kinpaleuis tokniuan tlen tsaktokej tla tejuan tikpiaj chikauak totlaneltokilis?

9 Xamo ualeua amo nochipa timonechikoaj porque tikixnamikij ouijkayotl. Ik non, moneki ma tiyetokan tiyolchikauakej. Sekimej tokniuan mokokoaj uan moyolkokoaj. Oksekimej inkalchanejkauan kintlajyouiltiaj noso tekiuajkej noijki kintlajyouiltiaj. Noijki ma timokuayejyekokan itech tokniuan tlen tsaktokej porque tlaneltokaj. Yejuan kinpaleuis tla tikpiaj chikauak totlaneltokilis (Heb. 13:3). Yejuan kipiaj chikauak intlaneltokilis ijkuak kimatij tiktekichiuiliaj Jehová maski tikixnamikij ouijkayotl. Ijkon okipanok tlatitlanil Pablo. Ijkuak otsaktoka Roma, omoyolchikauaya porque tokniuan ok okitekichiuiliayaj toTajtsin Dios (Filip. 1:3-5, 12-14). San niman okinmijkuilili se carta tokniuan Hebreos ijkuak yikikixtiskiaj. Okinmilui tokniuan nochipa ma monechikokan uan ‘mamosepantlasojtlakah kemi iknimeh’ (Heb. 10:24, 25; 13:1).

10, 11. (1) ¿Akinmej moneki tikinmiluiskej touan ma monechikotij ijkuak tikilnamikij imikilis Jesús? (2) ¿Ken techpaleuia Efesios 1:7 ijkon ma tikchiuakan?

10 Noijki moneki tiyetoskej tiyolchikauakej ijkuak tikinmiluiskej tokalchanejkauan touan ma monechikotij ijkuak tikilnamikiskej iCena toTeko. Noijki akinmej inmiuan titekipanoaj uan akinmej chantij ik kanin tejuan tichantij. ¿Tleka tikinmiluiaj touan ma monechikotij? Porque tiknekij tiktlasojkamatiliskej Jehová uan Jesús nochi tlen yokichijkej. Tiknekij ma kimatikan Jehová kinmiknomati porque Jesús topatka omotemakak (xiktlajtolti Efesios 1:7; Apoc. 22:17).

 11 Tikteititiaj tikpiaj kuali toyelis ijkuak timonechikoaj. Ijkon ken Jehová uan Jesús kipiaj inyelis.

TLA TITETLASOJTLAJ TECHPALEUIS MA TIMONECHIKOKAN

12. (1) ¿Tleka techpaleuia okachi ma titetlasojtlakan ijkuak timonechikoaj? (2) Ijkon ken kijtoa 2 Corintios 5:14, 15, ¿ken uelis tikchiuaskej ken Jesús?

12 Tla tiktlasojtlaj Jehová uan Jesús techpaleuis ma timonechikokan uan noijki techpaleuis okachi ma titetlasojtlakan. ¿Tleka ijkon tikijtoaj? Porque ijkuak timonechikoaj techilnamiktiaj nochi tlen okichi Jehová uan Jesús (Rom. 5:8). Ijkuak tikilnamikij imikilis Jesús, techilnamiktia Jehová uan Jesús sapanoa tetlasojtlaj. Ik non, sapanoa tikintlasojkamatiliaj uan nochipa tiknekij tikchiuaskej ken Jesús (xiktlajtolti 2 Corintios 5:14, 15). Noijki tiknekij tikueyichiuaskej Jehová porque okitemakak iKone. Ijkon tikteititiaj ijkuak timonechikoaj uan titlanankiliaj.

13. Xikijto ken uelis tikteititiskej tiktlasojtlaj toTajtsin Dios uan iKone.

13 Noijki tikteititiaj tiktlasojtlaj toTajtsin Dios uan iKone ijkuak tikkauaj nochi porque tiknekij tikintlakamatiskej. Xamo noijki tikchiuaj miak tlamantli para tiaskej timonechikotiuij. Sekimej tokniuan monechikoaj tlajko semana pero xamo yosotlauakej porque nochi se tonal otekipanojkej. Itlamian semana noijki timonechikoaj pero sekimej non tonal moseuiaj. ¿Kimati Jehová timonechikoaj maski tisotlauaj? Kema. Jehová kipatioita ijkuak kita tejuan timochijchikauaj tiktekichiuiliskej (Mar. 12:41-44).

14. ¿Tlen otechmachti Jesús ma tikchiuakan?

14 Jesús okika miak tlamantli para kinpaleuiskia oksekimej porque otetlasojtlaya. Pero amo san omotemakak ipatka imachtijkauan. Ye noijki okinekiaya kinpaleuis. Ijkon okiteititi ijkuak omonechiko iuan imachtijkauan maski osotlauatoka uan omotekipachoaya (Luc. 22:39-46). Nochipa okitaya ken kinpaleuiskia oksekimej uan  amo san okinekiaya ma kipaleuikan (Mat. 20:28). Tla ijkon tikintlasojtlaskej tokniuan, timochijchikauaskej timonechikoskej ijkuak tikilnamikiskej imikilis Jesús uan chichikometika timonechikoskej.

15. ¿Akinmej noijki tiknekij tikinpaleuiskej?

15 Tinochtin tiiknimej uan kuali timouikaj. Ik non, timochijchikauaj tikinmiluiaj oksekimej noijki touan ma monechikokan. Pero noijki tiknekij tikinpaleuiskej tokniuan tlen ayakmo okachi tetlapouiaj (Gál. 6:10). Tikteititiaj tikintlasojtlaj ijkuak tikinmiluiaj touan ma monechikokan ijkuak tikilnamikiskej imikilis Jesús. Jehová uan Jesús yolpakij ijkuak touan monechikoaj tokniuan tlen ayakmo tetlapouiaj uan noijki tejuan tiyolpakij (Mat. 18:14).

16. (1) ¿Tlen moneki ma tikchiuakan uan ken techpaleuis ijkuak timonechikoskej? (2) ¿Tleka axkan miak ipati ma tikilnamikikan tlen kijtoa Juan 3:16?

16 Achto tikilnamikiskej imikilis Jesús, miakej ma tikinmiluikan touan ma monechikokan viernes 19 de abril 2019 (xikita recuadro “ Ma tikinmiluikan oksekimej touan ma monechikokan”). Noijki moneki ma timoyolchikauakan ma timonechikokan chichikometika porque ayakmo miak poliui uan tlamis nochi tlen amo kuali. Ik non, moneki nochipa ma timonechikokan uan techpaleuis ma tiyetokan tiyolyamankej, ma tiyetokan tiyolchikauakej uan ma titetlasojtlakan (1 Tes. 5:8-11). Ma tiktlasojkamatilikan Jehová porque okiteititi sapanoa techtlasojtla ijkuak okitemakak iKone (xiktlajtolti Juan 3:16).

TLAKUIKALI 126 Nitlachixtos, nitlaneltokas uan nimoyolchikauas

^ párr. 5 Tikilnamikiskej iCena toTeko 19 de abril 2019 ijkuak yokalak tonaltsin. Nin tonal sapanoa miak ipati. ¿Tleka timonechikoaj nin tonal? Porque tiknekij tikyolpaktiskej Jehová. Itech nin tlamachtil tikitaskej ken moneki tikpiaskej toyelis ijkuak timonechikoaj tikilnamikiskej imikilis toTeko uan ijkuak timonechikoaj chichikometika.

^ párr. 54 FOTOS: Se tokni okitsakej porque tlaneltoka, moyolchikaua ijkuak kitlajtoltia se carta tlen okititlanilijkej ikalchanejkauan. Yolpaki porque ikalchanejkauan amo kilkauaj uan yejuan mochijchikauaj kitekichiuiliskej Jehová maski kixnamikij ouijkayotl kanin chantij.