Xikita nochi

Tlen kiualika

¿Tlen kichiua melauak ma tiyolpakikan?

¿Tlen kichiua melauak ma tiyolpakikan?

“¡Yolpaki altepetl akin iDios ye Jehová!” (SAL. 144:15).

TLAKUIKALMEJ: 28 UAN 25

1. ¿Tlen panotok itech ninmej tonalmej?

ITECH ninmej tonalmej panotok itlaj tlen amo keman opanoaya. Ijkon ken kijtoa Biblia, Jehová kinnechikojtok akinmej uitsej ‘ik nochteh tlalmeh itech nin tlaltíkpaktli, de nochi familiajteh, iwa de nochi altepemeh non tlatlamantli tlachixtokeh iwa tlatlamantli intlajtol kipiah’. Nochtin yejuan katej kanaj ocho millones uan yejuan katej “se altepetl chikauak” uan yolpakij kiueyichiuaj Jehová itech iteokal (Apoc. 7:9, 15; Is. 60:22). Amo keman ijkon okitlasojtlayaj toTajtsin Dios uan oksekimej.

2. ¿Tlen kichiuaj akinmej amo kitekichiuiliaj toTajtsin Dios? (Xikita tlaixkopinal tlen ika peua tlamachtil).

2 Pero Biblia noijki kijtoa itech ninmej tonalmej akinmej amo kitekichiuiliaj Jehová san yejuan motlasojtlaskiaj uan san intech motekipachoskiaj. Tlatitlanil Pablo okijto “iyakatlanka tonaltin” yetoskiaj “tzotzokamej”, akinmej “kiwelitaskej tomin” uan akinmej “kinekiskej san puro mopaktiskej iwan mach kinekiskej kiweyikixtiskej in toTajtzin Dios” (2 Tim. 3:1-4, ITlajtol toTajtzin  Dios [NHY]). Amo kipaktiaj toTajtsin Dios akinmej san intech motekipachoaj uan amo melauak yolpakij. San yejuan kinekij moyolpaktiskej uan kintlajyouiltiaj oksekimej.

3. ¿Tlen timomachtiskej uan tleka?

3 Pablo okimatiaya miakej san intech motekipachoskiaj uan akinmej tikchiuaj ken Cristo uelis noijki ijkon techpanoskia. Ik non, okijto amo inmiuan ma timouikakan (2 Tim. 3:5). Non amo kijtosneki amo tikinnotsaskej. Pero ¿tlen tikchiuaskej uan ijkon amo san totech timotekipachoskej uan tikyolpaktiskej Jehová akin tetlasojtla? Ma tikitakan ken kineki toTajtsin Dios ma tikpiakan toyelis uan ken kipiaj inyelis akinmej amo kitekichiuiliaj ken kijtoa 2 Timoteo 3:2-4NHY. Nin techpaleuis ma tikitakan ken tikpiaj toyelis uan tlen moneki tikchiuaskej para melauak tiyolpakiskej.

¿TIKTLASOJTLAJ TOTAJTSIN DIOS NOSO SAN TEJUAN TIMOTLASOJTLAJ?

4. ¿Kijtosneki amo kuali tla timotlasojtlaj?

4 Yotikitakej Pablo okijkuilo: “Tlakaj yeskej tzotzokamej”. ¿Kijtosneki non amo kuali totech ma timotekipachokan? Amo, porque noijki moneki ma timotlasojtlakan. Jesús okijto: “Xiktlasojtla mokni kemi te timotlasojtla” (Mar. 12:31). Tla tejuan amo timotlasojtlaj, amo uelis titetlasojtlaskej. Porque Biblia noijki kijtoa: “Tlakatl makitlasojtla isiwa, kemi ye inewia kitlasojtla ikuerpo. Porke akin kitlasojtla isiwa, noiwa ye motlasojtla. Porke amaka kikokolia ikuerpo, yej kimalwia iwa kitlakualtia” (Efes. 5:28, 29). Ken tikitaj, moneki ma timotlasojtlakan.

5. ¿Tlen kichiuaj akinmej sapanoa motlasojtlaj?

5 Pero amo kuali sapanoa ma timotlasojtlakan noso ma tiyetokan “tzotzokamej” ken kijtoa 2 Timoteo 3:2NHY. Akinmej ijkon kichiuaj sapanoa moueyinekij (xiktlajtolti Romanos 12:3). San intech motekipachoaj uan amo kitaj ken katej oksekimej. Uan ijkuak itlaj amo kuali kisa, kintlajtlakoltiaj oksekimej uan amo kiseliaj intlajtlakol. Se amatlajkuilol tlen tlajtoa itech Biblia kijtoa akin san ye motlasojtla kichiua ken uitstlakua. Nin yolkatl “motonoloa uan tlen yamankitsin kipia mokaua tlaijtik” uan “san mota nochi iuitsyo”. Ijkon kipiaj inyelis akinmej san yejuan motlasojtlaj uan amo melauak yolpakij.

6. ¿Ken kipiaj inyelis akinmej kitlasojtlaj toTajtsin Dios?

6 Sekimej ixtlamatkej kijtoaj Pablo xamo okijto achto san inneuian motlasojtlaskiaj tlaltikpaktlakamej uan satepan kichiuaskiaj ken kijtoaj okseki tlaxelolmej. Pero akinmej kitlasojtlaj toTajtsin Dios okse tlamantli inyelis. Biblia kijtoa akin kitlasojtla toTajtsin Dios “kipia pakílistli, kipia yolsewílistli, nochi kixikoa, kuali tlakatl, teiknomati, tlaneltokak, yolyamanki” uan “kuali monawatia” (Gál. 5:22, 23). Se salmista okijto: “¡Yolpaki altepetl akin iDios ye Jehová!” (Sal. 144:15). Jehová yolpaki uan noijki itekipanojkauan. Akinmej san yejuan motlasojtlaj san kinekij ma kinmakakan miak tlamantli, pero itekipanojkauan Jehová yolpakij porque kinmakaj oksekimej tlen kinpoloa (Hech. 20:35).

¿Tlen techpaleuis amo san tejuan ma timotlasojtlakan? (Xikita párrafo 7).

7. ¿Tlen moneki timotlajtlaniskej tla tiknekij tikmatiskej kox melauak tiktlasojtlaj toTajtsin Dios?

7 ¿Ken tikmatiskej kox okachi timotlasojtlaj noso okachi tiktlasojtlaj toTajtsin Dios? Ma timokuayejyekokan itech tlen kijtoa Filipenses 2:3, 4. Ompa kijtoa: “Amitla xikchiwakah san por aka nonkinekih nonkixpanawiskeh, noso para manomechweyilikah, yej ximoiknomatikah tenawak, iwa xikinmitakah  n oksikimeh kemi okachi weyijkatitokeh”. Uan noijki kijtoa: “Amaka makimotemoli san tlan ye kipalewia, yej makitemo tlan ika weletis kimpalewis oksikimeh”. Ik non, ma timotlajtlanikan: “¿Nikintlakamati ninmej tlanauatilmej? ¿Melauak nikchiua tlen kineki toTajtsin Dios? ¿Nikita ken nikinpaleuis tokniuan uan noijki ijkuak nitetlapouia?”. Ualeua oui tiktemakaskej tlen tikpiaj. Xamo moneki timochijchikauaskej uan tikmoxikoltiskej seki tlamantli tlen techpaktia. Pero tiyolpakiskej porque techselia Jehová, akin ueyi tekiua itech nochi semanauak.

8. ¿Tlen kichiuaj sekimej tokniuan tlen sapanoa kitlasojtlaj toTajtsin Dios?

8 Sekimej tokniuan tlen sapanoa kitlasojtlaj toTajtsin Dios uan kinekij okachi kitekichiuiliskej, okikajkej tekitl kanin kitlaniskiaj miak tomin. Ma tikitakan tlen okichi se tokni tlen itoka Ericka tlen tlapajtia. Ye amo okinek sapanoa ma kixmatikan itech iteki. Okachi kuali, omochi precursora regular uan oyajki iuan inamik otetlapouijtoj itech okseki altepemej. Tokni okijto: “Otechpanok miak tlamantli kuali kanin otitetlapouitoj uan tikinpiaj toyolikniuan. Ik non, sapanoa tiyolpakij. Uan ok nitlapajtia pero okachi niyolpaki ijkuak nitetlapouia uan nitlapaleuia itech tlanechikol”.

¿KANIN TIKNEKIJ TIKPIASKEJ TLEN OKACHI IPATI?

9. ¿Tleka amo yolpakij akinmej sapanoa kinpaktia tomin?

9 Pablo noijki okijto yetoskiaj akinmej sapanoa “kiwelitaskej tomin”. Yimiak xiuitl se precursor tlen chanti Irlanda okitlapoui se tlakatl itech toTajtsin Dios. Pero nin tlakatl okikixti itomin uan okijto: “¡Nin ye nodios!”. Maski sekimej amo kijtoaj, pero noijki mokuayejyekoaj ken nin tlakatl. Sapanoa kinpaktia tomin porque uelis kimokouiskej miak tlamantli. Pero Biblia kijtoa: “Akin sapanoa kipaktia kipias plata amo keman yolpakis san ika plata nion akin okachi kipatioita kitlanis miak tomin amo yolpakis ika tlen kitlanis” (Ecl. 5:10). Akinmej sapanoa kinpaktia tomin san kinekij okachi kipiaskej uan nochipa kitemojtokej. Pero “innewiah kimotetemiliah intlaijyowilis” (1 Tim. 6:9, 10).

10. ¿Tlen kijtoa Biblia ijkuak tikpiaj tomin uan ijkuak amo tikpiaj?

10 Tinochtin tiktekitiltiaj tomin porque techpaleuia (Ecl. 7:12). Pero ¿kox tiyolpakiskej tla san tikpiaskej tlen ika timopanoltiskej? Kema (xiktlajtolti Eclesiastés 5:12). Agur ikone Jaqué okilui toTajtsin Dios: “Amo xikchiua sepa amo itlaj ma nikpia nion xikchiua ma nikpia miak tlamantli. San techmaka tlen nikkuas”. Amo okinekiaya sepa amo itlaj kipias. Ye okiyekijto tlamo tlachtekiskia uan non amo kipaktiskia toTajtsin Dios. Pero ¿tleka amo okilui toTajtsin Dios ma kimaka miak tlamantli? Ye okijto: “Uan ijkon amo niixuis uan amo nimitsixmatis uan nikijtos: “¿Akin Jehová?’” (Prov. 30:8, 9). Xamo tikinmixmatij akinmej sapanoa kinpaktia tomin uan amo tlaneltokaj itech toTajtsin Dios.

11. ¿Tlen okijto Jesús itech tomin?

11 Akinmej sapanoa kinpaktia tomin amo uelis kiyolpaktiskej toTajtsin Dios. Jesús okijto: “Amaka tlakatl weletis kintekitilis ome inteko, porke se kitlawelitas iwa non ok se kitlasojtlas, noso se kitlakitas iwa non ok se mach kitlakitas. Amaka weletis kimopantis Dios tla satlawel momijmiktia para kitlawelpias tomi”. Pero achto okijto: “Amo xikoololokah miak tomi itech nin tlaltíkpaktli kan tlakuakualoa iwa tlapoxkawi, iwa n ichtekeh techankalakih iwa tetlachtekiah. Yej  xikoololokah itech ilwikak tlan milák ipati. Ompa amo weletis kuakualos iwa amo poxkawi, nion ichtekeh weleti kalakih” (Mat. 6:19, 20, 24).

12. ¿Tleka okachi timajxiliskej tiktekichiuiliskej toTajtsin Dios tla amo tikpiaj miak tlamantli? Xikijto se neskayotl.

12 Miakej tokniuan yokitakej yolpakij ijkuak amo kipiaj miak tlamantli porque okachi majxiliaj kitekichiuiliskej Jehová. Se tokni tlen itoka Jack tlen chanti Estados Unidos iuan isiua okipiayaj se kualtsin kali uan ueyi pero okinemakakej uan ye okika iteki uan omochijkej precursores. Tokni okijto: “Oui otechchiuili tiknemakaskej kualtsin kali tlen otikpiayaj uan noijki totlal. Pero miak xiuitl sapanoa onisotlauaya porque onikpiaya ouijkayotl kanin onitekitiaya. Pero nosiua okatka precursora uan nochipa oyolpakiaya. Ye okijtoaya: ‘Niktekichiuilia noteko tlen okachi yolkuali’. Uan ken axkan ne noijki niprecursor, san Jehová tiktekichiuiliaj”.

¿Tlen techpaleuis amo sapanoa ma techpakti tomin? (Xikita párrafo 13).

13. ¿Tlen techpaleuis ma tikmatikan ken tikitaj tomin?

13 ¿Tlen techpaleuis ma tikmatikan ken tikitaj tomin? Moneki ma timotlajtlanikan: “¿Melauak nikneltoka tlen kijtoa Biblia itech tomin? ¿Okachi nechpaktia niktlanis tomin? ¿Okachi nechpaktia tomin uan okseki tlamantli uan amo nikpatioita nimouikas iuan Jehová uan tokniuan? ¿Melauak nikneltoka toTajtsin Dios nechmakas tlen ika nimopanoltis?”. Ma tikilnamiktokan Jehová nochipa techpaleuis tla itech titlaneltokaj (Mat. 6:33).

¿TIKTLASOJTLAJ JEHOVÁ NOSO ‘TLAN AMO KUALI KELEWIA TOKUERPO’?

14. ¿Ken moneki timoyolpaktiskej?

14 Ken omoijto, miakej “kinekiskej san puro mopaktiskej”. Ijkon ken timotlasojtlaj uan kuali tiktekitiltiaj tomin, noijki uelis timoyolpaktiskej ika seki tlamantli. Sekimej kijtoaj sepa amo ma timoyolpaktikan nion amo itlaj ma tikpiakan. Pero Jehová amo ijkon kijtoa. Biblia kinmiluia itekipanojkauan toTajtsin Dios: “Xio, xikkua motlakual ika pakilistli uan xikoni movino ika yolpakilistli” (Ecl. 9:7).

15. ¿Tlen kijtosneki akinmej san kinekij moyolpaktiskej?

 15 Ijkuak 2 Timoteo 3:4NHY tlajtoaj itech akinmej “kinekiskej san puro mopaktiskej”, kijtosneki amo kitekichiuiliaj toTajtsin Dios. Ken tikitaj, nin tlaxelol amo kijtoa okachi kinekiskej moyolpaktiskej uan amo kiyolpaktiskej toTajtsin Dios, porque tla ijkon kijtoskia, kijtosneki tepitsin kitlasojtlaskiaj. Tlaxelol kijtoa yejuan “kinekiskej san puro mopaktiskej iwan mach kinekiskej kiweyikixtiskej in toTajtzin Dios”. Se ixtlamatki kijtoa nin tlaxelol “amo kijtosneki yejuan noijki tepitsin kitlasojtlaj toTajtsin Dios, nin kijtosneki amo kitlasojtlaj”. Nin kinnejmachtia akinmej san kinekij moyolpaktiskej. Akinmej “kinekiskej san puro mopaktiskej” nochipa kichiuaj tlen yejuan kinekij (Luc. 8:14).

16, 17. ¿Ken okitaya Jesús ijkuak omoyolpaktiaya?

16 Ualeua Jesús noijki omoyolpaktiaya. Oyajki “se ilwitl kan monamiktilo” uan noijki oyajki itech okse “weyi ilwitl” (Juan 2:1-10; Luc. 5:29). Ijkuak otlanki vino kanin omonamiktijkej, ye okichi se milagro uan atl okikuepki vino. Uan se tonal ijkuak okitenejkej porque otlakuaya uan itlaj okonik, okijto amo kuali ijkon ken yejuan omokuayejyekoayaj (Luc. 7:33-36).

17 Pero Jesús amo san omoyolpaktijtinemiaya. Nochipa omochijchika kichiuas tlen Jehová kineki uan noijki okinpaleui oksekimej. Noijki okipilojkej itech se kuauitl uan omotekauili ma kimiktikan para techmakixtis. Akinmej okinekiayaj kichiuaskej ken ye okinmilui: “Mapakikah ijkuak fiero kintenewah, kintotojtokaskeh iwa kinwikaltiskeh por nechtlakitah. Ijkuakó xipakikah porke nonkiseliskeh se weyi tlatliokólili kan ilwikak. Ijkó noiwa okintlaijyowiltijkeh n profetas non yonenkeh ijkuak nomejwah ayamó ononkatkah” (Mat. 5:11, 12).

¿Tlen techpaleuis amo san ma tiknekikan timoyolpaktiskej? (Xikita párrafo 18).

18. ¿Tlen moneki ma timotlajtlanikan uan ijkon para tikmatiskej kox sapanoa techpaktia timoyolpaktiskej?

18 ¿Ken tikmatiskej kox sapanoa timoyolpaktiaj? Ma timotlajtlanikan: “¿Okachi nikpatioita nimoyolpaktis uan amo nias nechikolmej nion nitetlapouiti? ¿Nikneki nikkauas seki tlamantli tlen nechpaktia para niktekichiuilis toTajtsin Dios? Ijkuak nikpejpena tlen ika nimoyolpaktis, ¿nimotlajtlania kox kipaktis Jehová?”. Tla melauak tiktlasojtlaj, amo tikchiuaskej tlen amo kipaktia uan noijki tlen timokuayejyekoaj amo kipaktis (xiktlajtolti Mateo 22:37, 38).

¿KEN UELIS TIYOLPAKISKEJ?

19. ¿Akinmej amo keman yolpakiskej?

19 Yikanaj 6,000 xiuitl Satanás uan nochi tlen kiyekantok tetlajyouiltijtok. Axkan tikatej itlamian tonalmej uan san kanin katej akinmej san intech motekipachoaj, akinmej sapanoa kinpaktia tomin uan san kinekij moyolpaktiskej. San kintekipachoa tlen kinekij uan ken uelis kipiaskej non tlamantli. Pero non amo keman kinyolpaktis. San yolpakiskej akinmej kichiuaj ken kijtoa Biblia: “Yolpaki akin mopaleuia itech iDios Jacob, akin mochia itech Jehová uan kipia ken iDios” (Sal. 146:5).

20. ¿Kox tiyolpaki porque tiktlasojtla toTajtsin Dios?

20 Tejuan mojmostla okachi tiktlasojtlaj Jehová. Uan sejse xiuitl miakej kixmatij uan noijki kitlasojtlaj. Nin kiteititia iTekiuajkayo toTajtsin Dios yitlanauatijtok uan ayakmo miak poliui techteochiuas miak uan techmakas tlen axkan amo ueli timokuayejyekoaj. Okachi tiyolpakiskej axkan uan satepan tla tikchiuaj tlen Jehová kineki uan tla tikyolpaktiaj. Chikome timomachtiskej ken kipiaj inyelis akinmej san intech motekipachoaj uan ken kipiaj inyelis itekipanojkauan Jehová.