Xikita nochi

Tlen kiualika

San sekan tikatej ijkuak tikilnamikij imikilis Jesús

San sekan tikatej ijkuak tikilnamikij imikilis Jesús

“¡Sapanoa kuali uan teyolpaktia san sekan ma yetokan tokniuan!” (SAL. 133:1).

TLAKUIKALMEJ: UAN 30

1, 2. (1) Itech 2018, ¿tlen kichiuas san sekan ma tiyetokan? (2) ¿Uan tleka miak ipati? (Xikita tlaixkopinal tlen ika peua tlamachtil).

ITECH 31 de marzo 2018, ijkuak yokalak tonaltsin, sapanoa miakej itekipanojkauan Jehová uan oksekimej monechikoskej para kilnamikiskej iCena toTeko. Sejse xiuitl tikilnamikij imikilis Jesús uan nin kichiua san sekan ma tiyetokan. Amo onka okse nechikol tlen ijkon kichiua.

2 Jehová uan Jesús melauak yolpakij ijkuak kitaj sapanoa miakej monechikoaj itech nochi tlaltikpak maski tlatlamantli hora. Biblia okijto “senmiaktikeh tlaltikpaktlakah” tlen “ayakmaka oweletia okimpoaya” uan “owalajkeh ik nochteh tlalmeh itech nin tlaltíkpaktli, de nochi familiajteh, iwa de nochi altepemeh non tlatlamantli otlachixtokah iwa tlatlamantli intlajtol okipiayah” yejuan kijtoskiaj: “¡Totemakixtilis wits de Todios iwa n Ichkatsi, Akin ewatok ipan weyi yáyantli!”  (Apoc. 7:9, 10). Melauak kualtsin miakej ijkon ma kitlakaitakan Jehová uan noijki Jesús ijkuak kilnamikij imikilis.

3. ¿Tlen tlajtlanilmej tikinnankiliskej?

3 Itech nin tlamachtil tikinnankiliskej naui tlajtlanilmej. Se, ¿ken timoyektlaliskej para ijkuak tikilnamikiskej imikilis Jesús uan ijkon techpaleuis? Ome, ¿tleka ijkuak tikilnamikij imikilis Jesús kichiua san sekan ma tiyetokan? Eyi, ¿ken titlapaleuiskej san sekan ma tiyetokan? Naui, ¿ajsis tonal saiktlami tikilnamikiskej imikilis Jesús? Tla ijkon, ¿keman ayakmo tikilnamikiskej?

¿KEN TIMOYEKTLALISKEJ IJKUAK TIKILNAMIKISKEJ IMIKILIS JESÚS UAN IJKON TECHPALEUIS?

4. ¿Tleka moneki ma timochijchikauakan ma tikilnamikikan imikilis Jesús?

4 ¿Tleka moneki ma tiakan ijkuak tikilnamikij imikilis Jesús? Ma tikilnamikikan ijkuak timonechikoaj noijki tikueyichiuaj Jehová. Uan Jehová uan Jesús kitaj akinmej mochijchikauaj yaskej itech nechikol tlen miak ipati. Tiknekij ompa ma techitakan tla amo sapanoa timokokoaj noso okse tlamantli techpanoa. Ijkuak tikteititiaj tikinpatioitaj nechikolmej, Jehová okachi kinekis kitlalis totoka itech “iamoch [...] itech yolilistli”. Itech nin amochtli tlen noijki kiluiaj “amatlajkuíloli kan machotitokeh non nochipa yolitoskeh” katej intoka akinmej Jehová kineki kinmakas yolilistli tlen amo keman tlamis (Mal. 3:16; Apoc. 20:15).

5. Ijkuak yitikilnamikiskej imikilis Jesús, ¿ken uelis tikitaskej ‘kox milák tikpiah tlaneltokálistli’?

5 Ijkuak yitikilnamikiskej imikilis Jesús, ma timotlatlaujtikan uan ma tikitakan kox kuali timouikaj iuan Jehová (xiktlajtolti 2 Corintios 13:5). ¿Ken tikchiuaskej? Pablo okijto ‘tonewiah matimoyejyekokah kox milák tikpiah tlaneltokálistli’. Ik non, ma timotlajtlanikan: “¿Melauak nikneltoka san nin altepetl kichiua tlen kineki toTajtsin Dios? ¿Nimochijchikaua nitetlapouis uan nitlamachtis kuali tlajtolmej itech Tekiuajkayotl? ¿Tlen nikchiua kiteititia nikneltoka yitikatej itlamian tonalmej uan yiuits tonal ijkuak Satanás ayakmo tlanauatis? ¿Ok nitlaneltoka itech Jehová uan itech Jesús ken ijkuak onimotemakak ixpan Jehová?” (Mat. 24:14, TNM; 2 Tim. 3:1; Heb. 3:14). Tla timokuayejyekoaj itech ninmej tlajtlanilmej, tikitaskej ‘kox milák tikpiah tlaneltokálistli’.

6. (1) ¿Ken uelis tikseliskej yolilistli tlen amo keman tlamis? (2) ¿Ken moyektlalia se tlayekanki uan ken uelis ijkon tikchiuaskej?

6 Uelis timoyektlaliskej ijkuak yitikilnamikiskej imikilis Jesús tla tikintlajtoltiaj amatlajkuilolmej tlen tlajtoaj itech non tonal uan itech timokuayejyekoaj (xiktlajtolti Juan 3:16; 17:3). Moneki tikixmatiskej Jehová uan noijki titlaneltokaskej itech Jesús tla tiknekij tikpiaskej yolilistli tlen amo keman tlamis. Noijki uelis timoyektlaliskej tla timomachtiaj tlen techpaleuis okachi intech ma timotokikan. Ma tikitakan tlen kichiua se tlayekanki ixtlamatki. Yikipia miak xiuitl kintlatijti miakej tlamachtilmej tlen kisaj itech revista Akin Tetlapouijtok tlen tlajtoaj itech imikilis Jesús uan ken techtlasojtla ye uan Jehová. Sejse xiuitl ijkuak yiajsis non tonal, oksepa kintlajtoltia nonmej tlamachtilmej uan mokuayejyekoa tlen opanok itech non tonal. Ualeua ompa kitlalia se noso ome tlamachtilmej. Yokitak ijkuak kinmojpauia  nonmej tlamachtilmej, kintlajtoltiaj tlaxelolmej para itech nonmej tonalmej uan mokuayejyekoa, non kipaleuia ma momachti okseki tlamantli. Pero tlen okachi ipati, kimachilia okachi kitlasojtla Jehová uan Jesús. Tla tikchiuaskej ken nin tokni, techpaleuis okachi ma tiktlasojtlakan Jehová uan Jesús uan noijki tikinpatioitaskej. Nochi nin kichiuas okachi ma tikpatioitakan non tonal.

SAN SEKAN TIKATEJ IJKUAK TIKILNAMIKIJ IMIKILIS JESÚS

7. (1) ¿Tlen okitlajtlanki Jesús ijkuak yikin omochi iCena toTeko? (2) ¿Ken okinankili Jehová Jesús?

7 Ijkuak yikin omochi iCena toTeko, Jesús omotlatlaujti uan okijto san sekan ma yetokan imachtijkauan ijkon ken ye uan iTajtsin (xiktlajtolti Juan 17:20, 21). Jehová kuali okinankili iKone akin sapanoa kitlasojtla. Ijkuak timonechikoaj para tikilnamikiskej imikilis Jesús, tikteititiaj san sekan tikatej tiiTlaixpantijkauan Jehová. Itech non tonal, sapanoa miakej monechikoaj uan kiteititiaj kineltokaj Jehová okiualtitlanki iKone. Uan itech seki altepemej amo monechikoaj akinmej tlatlamantli inmialtepe. Pero Jehová uan Jesús kitaj kualtsin ijkuak ijkon timonechikoaj.

8. ¿Tlen okilui Jehová teotlajtojki Ezequiel ma kijto panoskia?

8 Tiitekipanojkauan Jehová amo techtlajtlachialtia san sekan tikatej. Jehová okitekitilti teotlajtojki Ezequiel para ma kijto ijkon panoskia. Ezequiel okijkuilo okatkaj ome tlakotl se “para Judá” uan okse “para José” tlen mosetiliskiaj uan mochiuaskiaj san se (xiktlajtolti Ezequiel 37:15-17). Revista Akin Tetlapouijtok julio 2016, kanin kijtoa “Sekimej techtlajtlaniaj” okiyekijto: “Jehová okijto itekipanojkauan mokuepaskiaj itech Tlali tlen okijto kinmakaskia uan oksepa yetoskiaj san sekan ken se altepetl. Noijki okijto itlamian tonalmej itekipanojkauan toTajtsin Dios yetoskiaj san sekan ken se altepetl”.

9. ¿Ken mochijtok tlen okijto Ezequiel ijkuak tikilnamikij imikilis Jesús?

9 Itech 1919, Jehová yolik oksepa okinsetilijtia tlapejpenalmej tlen okatkaj ken tlakotl “para Judá”. Satepan tlen mokauaskej tlaltikpak noijki inmiuan omosetilijkej tlen katej ken tlakotl “para José”. Jehová okijto ninmej ome tlakotl mosetiliskiaj uan san se tlakotl mochiuaskia imak (Ezeq. 37:19). Jehová okichi tlapejpenalmej uan “oksikimeh ichkameh” “sansikah” ma yetokan (Juan 10:16; Zac. 8:23). Axkan nochtin yejuan san sekan kitekichiuiliaj Jehová uan san kinyekana Jesucristo akin omoijto okatka itekipanojka David (Ezeq. 37:24, 25). Sejse xiuitl san sekan katej tlapejpenalmej uan oksekimej ichkamej ken okijto Ezequiel, ijkuak kilnamikij imikilis Jesús. Pero ¿ken titlapaleuiskej san sekan ma tiyetokan?

MA TITLAPALEUIKAN SAN SEKAN MA TIYETOKAN

10. ¿Ken titlapaleuiskej san sekan ma tiyetokan?

10 Titlapaleuiskej san sekan ma tiyetokan tla tiyolyamankej. Ijkuak Jesús okatka nikan tlaltikpak okinmilui imachtijkauan ma yetokan yolyamankej (Mat. 23:12). Akinmej amo kitekichiuiliaj Jehová moueyinekij uan kijtoaj okachi inpati ken oksekimej. Pero tla tiyolyamankej, tikintlakaitaskej akinmej kiyekanaj tlanechikol uan tikintlakamatiskej. San ijkon san sekan  tiyetoskej. Uan tla tiyolyamankej tikyolpaktiskej Jehová, porque ye “kinmixnamiki non moweyijkatlaliah, pero kintiochiwa non moiknomatih inawak” (1 Ped. 5:5).

11. ¿Tleka techpaleuia san sekan ma tiyetokan ijkuak timokuayejyekoaj tlen kineskayotia pan uan vino?

11 Noijki titlapaleuiskej san sekan ma tiyetokan tla timokuayejyekoaj tlen kineskayotia pan uan vino tlen motekitiltia ijkuak tikilnamikij imikilis Jesús. Moneki achto timokuayejyekoskej uan noijki itech non yoak (1 Cor. 11:23-25). Pan tlen amo kipia levadura kineskayotia itlalnakayo Jesús tlen amo kipia tlajtlakoli uan vino kineskayotia ieso tlen okinoki. Pero amo san moneki ma tikajsikamatikan tlen kineskayotia non. Ma tikilnamikikan non kiteititia Jehová sapanoa techtlasojtla porque okitemakak iKone para techmakixtis uan Jesús noijki otechtlasojtlak ijkuak okinek topatka kitemakas iyolilis. Tla timokuayejyekoaj yejuan sapanoa techtlasojtlaj, tejuan noijki tikintlasojtlaskej. Uan ken tejuan uan tokniuan tiktlasojtlaj Jehová, non techsetilia uan kuali timouikaj.

San sekan tikatej ijkuak timotlapojpoluiaj. (Xikinmita párrafos 12 uan 13).

12. Itech neskayotl tlen Jesús okijto, ¿ken okiteititi Jehová kineki ma titetlapojpoluikan?

12 Noijki titlapaleuiskej san sekan ma tiyetokan tla titetlapojpoluiaj ika nochi toyolo. Ijkuak titetlapojpoluiaj, tikteititiaj tiktlasojkamatiliaj Jehová techtlapojpoluia porque Jesús topatka omikik. Ma timokuayejyekokan itech se neskayotl tlen okijto Jesús uan ijkuilitok itech Mateo 18:23-34. Ma timotlajtlanikan: “¿Nikmati nimochia uan nikinmajsikamati tokniuan? ¿Nikneki nitetlapojpoluis?”. Sekimej sapanoa tlajtlakolchiuaj uan oksekimej san techchiuiliaj tlen amo kuali. Uan tinochtin titlajtlakolejkej uan oui titetlapojpoluiaj. Pero tlen okijto Jesús kiteititia Jehová kineki ma titetlapojpoluikan (xiktlajtolti Mateo 18:35). Jesús okiteititi tla amo tikintlapojpoluiaj  tokniuan ijkuak melauak moyolkuepaj, Jehová amo techtlapojpoluis. Uan moneki kuali ma timokuayejyekokan itech nin tlamantli. Ijkuak tiktlakamatij Jesús uan titetlapojpoluiaj, titlapaleuiaj san sekan ma tiyetokan.

13. ¿Ken tikteititiaj san sekan tikatej ijkuak timouikaj ika yolseuilistli?

13 Tikatej ika yolseuilistli ijkuak tikintlapojpoluiaj tokniuan. Ma tikilnamiktokan Pablo okijto moneki timochijchikauaskej ika nochi toyolo ‘para n Espíritu maseitito towah, ika n yolsewílistli, non seititok towah’ (Efes. 4:3). Axkan yiajsis tonal ijkuak tikilnamikiskej imikilis Jesús uan okachi ijkuak ajsis non yoak, moneki ma timokuayejyekokan ken timouikaj iuan tokniuan. Ma timotlajtlanikan: “¿Kiteititia tlen nikchiua amo san nikilnamiktok tlen onechchiuilijkej? ¿Kitaj tokniuan nitlapaleuia san sekan ma tiyetokan ika yolseuilistli?”. Ijkon ma timotlajtlanikan nonmej tonalmej.

14. ¿Ken tikteititiskej ‘timosepanxikoah ika tlasojtlálistli’?

14 Noijki titlapaleuiskej san sekan ma tiyetokan tla titetlasojtlaj ken Jehová tetlasojtla (1 Juan 4:8). Amo keman ma tikijtokan: “Nikmati moneki nikintlasojtlas tokniuan pero amo moneki inmiuan nimouikas”. Tla ijkon tikijtoskej, amo tiktlakamatiskej tlen okijto Pablo: “Ximosepanxikokah ika tlasojtlálistli” (Efes. 4:2). Pablo amo okijto san ma ‘timosepanxikokah’, okijto moneki ‘timosepanxikoskeh ika tlasojtlálistli’. Nin amo san se tlamantli kijtosneki. Jehová kinyolinia tlatlamantli tlaltikpaktlakamej ma ualakan itech ialtepe (Juan 6:44). Ye kimati tleka kintlasojtla. Ik non, amo ma tikijtokan akinmej tikintlasojtlaskej uan akinmej amo. Moneki nochtin tikintlasojtlaskej ken Jehová technauatia (1 Juan 4:20, 21).

¿AJSIS TONAL SAIKTLAMI TIKILNAMIKISKEJ IMIKILIS JESÚS?

15. ¿Ken tikmatij ajsis tonal saiktlami tikilnamikiskej imikilis Jesús?

15 Ajsis tonal saiktlami tikilnamikiskej imikilis Jesús. ¿Ken tikmatij? Pablo okinmilui tlapejpenalmej sejse xiuitl ma kilnamikikan imikilis Jesús porque ‘kinextiah imikilis n Toteko Jesús, asta Ye walmuikas’ (1 Cor. 11:26). Ijkuak Jesús otlajto itech itlamian tonalmej, noijki otlajto itech tonal ijkuak ejkoskia. Nin tlen okijto itech ueyi tlajyouilistli: “Motas itech ilwikak noneskayo Ne Non onimochi nitlakatl. Iwa nochteh n tlaltikpaktlakah mawiskeh. Iwa nechitaskeh Ne Non onimochi nitlakatl, niwits ipan mextli de ilwikak ika miak weletílistli iwa mawistílistli. Iwa ijkuak kipitsaskeh n trompeta kintitlanis iangelwah iwa kinmoololos nochteh n tlakah non Ye yokinmopejpenili itech nochi n tlaltíkpaktli” (Mat. 24:29-31). Jesús “kinmoololos nochteh n tlakah non Ye yokinmopejpenili” tlen ok yetoskej nikan tlaltikpak uan kinuikas iluikak. Nin panos satepan ijkuak peuas ueyi tlajyouilistli pero ijkuak ayamo peuas Armagedón. Itech non guerra Jesús uan 144,000 kinmixpoloskej nochtin tekiuajkej (Apoc. 17:12-14). Ijkuak Jesús kinuikas tlapejpenalmej, ijkuakon saiktlami tikilnamikiskej imikilis.

16. ¿Tleka timochijchikauas tias ijkuak tikilnamikiskej imikilis Jesús?

16 Ma timochijchikauakan timonechikoskej uan tikilnamikiskej imikilis Jesús 31 de marzo 2018. Uan ma tiktlatlaujtikan Jehová ma techpaleui san sekan ma tiyetokan iuan ialtepe (xiktlajtolti Salmo 133:1). Amo ma tikilkauakan ajsis tonal saiktlami tikilnamikiskej imikilis Jesús. Pero axkan ma tikteititikan tikpatioitaj san sekan tikatej ijkuak tikilnamikij imikilis Jesús.