Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok (tlen ika timomachtiaj)  |  Enero de 2017

“Xikinmachti n tokniwah non milák motemaktiah inawak Dios”

“Xikinmachti n tokniwah non milák motemaktiah inawak Dios”

“Xikinmachti n tokniwah non milák motemaktiah inawak Dios, ijkó yejwah noiwa kinmachtiskeh oksikimeh” (2 TIMOTEO 2:2).

TLAKUIKALMEJ: 42 UAN 53

1, 2. ¿Ken kitaj miakej inteki?

MIAKEJ kijtoaj tekitl tlen kipiaj kiteititia kox miak inpati noso amo. Itech miakej altepemej, ijkuak sekimej yikin moixmatij, motlajtlaniaj itech tlen tekitij.

2 Ijkuak Biblia tlajtoa itech sekimej tlaltikpaktlakamej, ualeua kijtoa tlen tekitl okichiuayaj. Se neskayotl, kijtoa Mateo okatka “tominoololo”, Simón okintekiaya “kuítlaxteh” uan Lucas otlapajtiaya (Mateo 10:3; Hechos 10:6; Colosenses 4:14). Biblia noijki kijtoa tlen tekitl okichiuayaj akinmej okitekichiuiliayaj Jehová. Ma timokuayejyekokan itech ueyi tekiua David, teotlajtojki Elías uan tlatitlanil Pablo. Yejuan okipatioitakej tekitl tlen toTajtsin Dios okinmakak. Tejuan noijki moneki tikpatioitaskej tekitl tlen Jehová techmaka.

3. ¿Tleka moneki tokniuan tlen yikipiaj miak xiuitl ma kinmachtikan telpokamej? (Xikita tlaixkopinal tlen ika peua tlamachtil).

3 Tiitekipanojkauan toTajtsin Dios tiyolpakij tiktekichiuiliaj  uan tikpatioitaj tekitl tlen techmaka itech ialtepe. Miakej sapanoa kinpaktia tlen kichiuaj uan kinekiskiaj kichiuaskej itech nochi innemilis. Pero ijkuak yitikpiaj miak xiuitl, ayakmo ueli tikchiuaj miak tekitl ken achto otikchiuayaj (Eclesiastés 1:4). Nin ualeua kichiua ma tikpiakan ouijkayotl tiiTlaixpantijkauan Jehová. ¿Tleka? Pampa okachi motetlapouijtok uan ialtepe Jehová kitekitiltia miak tlamantli yankuik pampa okachi motetlapouis. Pero tokniuan tlen yikipiaj miak xiuitl ualeua oui kinchiuilia kitekitiltiskej yankuik tlamantli (Lucas 5:39). Uan noijki ijkuak tiueuejtij noso tikokoxkatij, ayakmo titlaxikoaj ken achto (Proverbios 20:29). Ik non, tokniuan tlen yikipiaj miak xiuitl moneki ma kinmachtikan telpokamej ma kichiuakan okseki tekitl itech tlanechikol (xiktlajtolti Salmo 71:18). *

4. ¿Tleka sekimej tokniuan oui kinchiuilia kinmakaskej oksekimej inteki? (Xikita recuadro “ ¿Tleka sekimej tokniuan oui kinchiuilia kinmakaskej oksekimej inteki?”).

4 Tokniuan tlen kichiuaj seki tekitl itech tlanechikol, ualeua oui kinchiuilia kinmakaskej inteki telpokamej (xikita recuadro “¿Tlen kijtosneki?”). Uelis moyolkokoaj pampa ayakmo kichiuaskej se tekitl tlen sapanoa kinpaktia. Uelis noijki kinyolkokoa oksekimej kichiuaskej tekitl tlen yejuan sapanoa kipatioitaj. Noijki uelis mokuayejyekoaj tekitl tlen mochiuas amo kuali kisas tla yejuan amo kitaskej ken kichiuaskej. Noso mokuayejyekoaj amo majxiliaj oksekimej kinmachtiskej. Uan tokniuan telpokamej noijki amo ma mosotlauakan tla amo san niman kiseliaj okseki tekitl.

5. ¿Tlen tlajtlanilmej tikinnankiliskej?

5 Pero ¿tleka moneki tokniuan tlen yikipiaj miak xiuitl ma kinmachtikan tokniuan telpokamej ma kichiuakan okseki tekitl? ¿Ken uelis kinpaleuiskej? (2 Timoteo 2:2). ¿Uan tleka moneki telpokamej ma yolpakikan ijkuak tokniuan tlen yikipiaj miak xiuitl kinmachtiskej? Achto ma tikitakan ken ueyi tekiua David okipaleui ikone ma kichiua se tekitl tlen miak ipati.

DAVID OKIPALEUI SALOMÓN

6. ¿Tlen okinekiaya kichiuas ueyi tekiua David, pero tlen okilui Jehová?

6 David okitojtokakej miak xiuitl uan san ocholojtinemiaya. Pero ijkuak omochi ueyi tekiua, ochantiaya itech se kualtsin kali. Ik non, okilui teotlajtojki Natán: “Ne nichanti itech kali tlen chijchitok ika cedro, pero arca itech tlajtolsenkaualistli tlen iaxka Jehová kajki itech mantajkali”. David ika nochi iyolo okinekiaya kichijchiuilis Jehová se kualtsin teokali. Ijkuakon, Natán okilui David: “Xikchiua tlen kineki moyolo pampa mouan kajki akin melauak toTajtsin Dios”. Pero Jehová amo omokuayejyekoaya ken Natán. Ik non, okinauati ma kilui David: “Te amo tikchijchiuas kali kanin nichantis”. Jehová okilui David ok kiteochiuaskia, pero se ikone kichijchiuaskia teokali. ¿Ken omomachili David? (1 Crónicas 17:1-4, 8, 11, 12; 29:1).

7. ¿Ken okitlakaitak David tlen okijto Jehová?

7 Ken David ika nochi iyolo okinekiaya kichijchiuas iteokal Jehová, uelis sapanoa omoyolkoko pampa amo kichijchiuaskia. Pero David okipaleui Salomón ika tekitl  tlen mochiuaskia. Okijto ken tekitiskiaj tlakamej uan okitemo kuauitl, tepostli, cobre, plata uan oro. David amo okitekipachoaya ma kimatikan akin okichijchi teokali, tlen satepan okitokayotijkej teokali tlen okichijchi Salomón. Okachi kuali, ijkin okiyolchika Salomón: “Jehová mouan ma yeto uan kuali ma kisa tlen tikchiuas uan moneki tikchijchiuas ikalijtik Jehová moDios, ijkon ken motech yokijto” (1 Crónicas 22:11, 14-16).

8. ¿Tleka David uelis mokuayejyekoskia Salomón amo uelis kichijchiuaskia teokali, pero tlen okichi?

8 (Xiktlajtolti 1 Crónicas 22:5). * Uelis David mokuayejyekoskia Salomón amo uelis kichijchiuaskia teokali. David okinekiaya teokali ma yeto “sapanoa kuali uan ueyititok” pero Salomón okatka ‘ok telpochtli uan amo okimatiaya tlen kichiuas’. David okimatiaya Jehová kipaleuiskia Salomón ma kichijchiua nin teokali tlen miak ipati. Pero noijki omochijchika kipaleuis ikone ika nin tekitl tlen miak ipati.

XIKINMACHTI OKSEKIMEJ IKA PAKILISTLI

Tiyolpakij ijkuak tikinmitaj telpokamej kiseliaj okachi tekitl itech tlanechikol. (Xikita párrafo 9).

9. ¿Tlen neskayotl kinpaleuis tokniuan tlen yikipiaj miak xiuitl ma yolpakikan ijkuak oksekimej kichiuaj inteki?

9 Tokniuan tlen yikipiaj miak xiuitl amo ma moyolkokokan ijkuak telpokamej kichiuaskej tekitl tlen yejuan okichiuayaj. Tinochtin tikmatij okachi miak ipati ma tikchiuakan tekitl tlen Jehová techmaka. Ik non, moneki ma tikinmachtikan telpokamej. Ma timokuayejyekokan itech nin neskayotl. Ijkuak otikatkaj tikonemej, uelis otikitayaj ken otokaya totajtsin. Ijkuak otimoskaltijtiajkej  ye otechyekiluiaya ken otokaya. Satepan, tejuan otipejkej tikyektlaliaj tlali uan otitokayaj. Pero totajtsin ok otechiluiaya ken okachi kuali titokaskiaj. Ualeua otimopatlayaj titokaskej. Uan ijkuak okipiaya miak xiuitl, san toselti otitokayaj. ¿Okikualaniaya nin totajtsin? Amo. Ye oyolpakiaya kitas kuali otitokayaj. Noijki ijkon, tokniuan tlen yikipiaj miak xiuitl yolpakij ijkuak kinmitaj telpokamej tlen okinmachtijkej kuali tekitij.

10. ¿Okinekiaya Moisés san ye ma kiueyichiuakan?

10 Amo ma tichauatikan ijkuak oksekimej kiseliaj tekitl itech tlanechikol. Ijkon ken Moisés, akin otechmakak se kuali neskayotl. Ma tikitakan tlen okichi ijkuak sekimej israelitas opejkej kichiuaj ken teotlajtojkej (Números 11:24-29). Josué okinekiaya ayakmo ijkon ma kichiuakan, pero Moisés okilui: “¿Nopatka tichauati? Amo, ¡ne nikneki nochtin itech ialtepe Jehová ma yetokan teotlajtojkej uan Jehová ma kitlali iespíritu itech yejuan!”. Moisés okimatiaya ye Jehová akin otlayekanaya. Uan Moisés amo okinekiaya oksekimej ma kiueyichiuakan. Okinekiaya nochtin itekipanojkauan toTajtsin Dios ma yetokan teotlajtojkej. ¿Uan tejuan tiyolpakij ijkuak oksekimej kinmakaj okseki tekitl itech tlanechikol?

11. ¿Tlen okijto Peter ijkuak okse tokni opejki kichiua iteki?

11 Miakej tokniuan miak xiuitl kitekichiuilijtokej Jehová ika nochi inyolo. Noijki yokinmachtijkej telpokamej pampa okachi tekitiskej itech tlanechikol. Ma tikitakan tlen okichi se tokni tlen itoka Peter. Itech 74 xiuitl okachi okitekichiuili Jehová uan itech nonmej xiuitl, 35 xiuitl otekitik itech se kali kanin tekitij iTlaixpantijkauan Jehová itech ueyi altepetl Europa. Ye otekitiaya kanin moyekana tetlapouilistli. Pero satepan iteki okimakakej se tokni tlen okachi telpochtli, tlen itoka Paul. Peter okimachti Paul. ¿Omoyolkoko Peter ijkuak okipatlakej? Amo. Ye okijto: “Niyolpaki ma kinmachtikan oksekimej tokniuan okachi ma tekitikan uan kuali kichiuaj inteki”.

MA TIKINTLAKAITAKAN TOKNIUAN AKINMEJ YIKIPIAJ MIAK XIUITL

12. ¿Tlen techmachtia tlen okipanok Rehoboam?

12 Ijkuak Salomón omikik, ikone akin omotokayotiaya Rehoboam omochi ueyi tekiua. Rehoboam okinekiaya kimatis ken tlanauatiskia. Ik non, okintlajtlani tlen kichiuaskia sekimej tlakamej tlen yokipiayaj  miak xiuitl. Pero ye amo okintlakamatki. Okichi tlen okiluijkej telpokamej tlen iuan omoskalti. Uan amo kuali okiski tlen okichi (2 Crónicas 10:6-11, 19). ¿Tlen techmachtia tlen okipanok? Moneki tikintlajtlaniskej tokniuan tlen yikipiaj miak xiuitl tlen tikchiuaskej uan moneki kuali tikinkakiskej. Nin amo kijtosneki telpokamej kichiuaskej seki tlamantli ken achto omochiuaya. Pero telpokamej amo san niman ma kijtokan amo kuali ken kichiuaj seki tlamantli tokniuan tlen yikipiaj miak xiuitl.

13. ¿Tlen moneki kichiuaskej telpokamej ijkuak tekitiskej iuan tokniuan tlen yikipiaj miak xiuitl?

13 Ualeua sekimej telpokamej kitaj ken kichiuaj inteki tokniuan ixtlamatkej tlen yikipiaj miak xiuitl. Telpokamej moneki ma momachtikan ken kichiuaj inteki tokniuan tlen yikipiaj miak xiuitl. Ma tikilnamikikan tokni Paul akin moijtoa itech párrafo 11. Ijkuak opejki kichiua iteki tokni Peter kanin kiyekana tetlapouilistli, okijto: “Nochipa oniktlajtlaniaya Peter ken nikchiuaskia noteki uan okinmiluiaya oksekimej tokniuan ijkon ma kichiuakan”.

Pablo okimachti Timoteo miak tlamantli uan Timoteo kuali omomachti

14. ¿Tlen techmachtia tlatitlanil Pablo ijkuak san sekan otekitiaya iuan Timoteo?

14 Timoteo uan tlatitlanil Pablo san sekan otekitikej miak xiuitl maski Timoteo okatka okachi telpochtli (xiktlajtolti Filipenses 2:20-22). Se tonal, Pablo okinmilui tokniuan akinmej ochantiayaj Corinto: “Nomechtitlanilia n Timoteo, nokone akin niktlasojtla itech Toteko. Ye nomechilnamiktis kenijki onínenki ixpa n Cristo, ijkó kemi niktemachtia kan moololoah n tokniwah” (1 Corintios 4:17). Tlen Pablo okijto techmachtia san sekan otekitiaya iuan Timoteo. Pablo okimachti Timoteo miak tlamantli itech Cristo uan Timoteo kuali omomachti. Pablo okipatioitaya Timoteo uan okimatiaya kuali kinmaluiskia tokniuan tlen ochantiayaj Corinto. Tlayekankej uelis kichiuaskej ken Pablo ijkuak kinmachtiskej oksekimej tokniuan ma tlayekanakan itech tlanechikol.

MIAK IPATI TEKITL TLEN TIKCHIJTOKEJ

15. ¿Ken techpaleuia Romanos 12:3-5 ijkuak moneki tikpatlaskej seki tlamantli itech tonemilis?

15 Sapanoa tiyolpakij itech ninmej tonalmej. Ialtepe Jehová okachi moskaltijtok. Ik non, seki tlamantli mopatlas uan tikpatlaskej seki tlamantli itech tonemilis. ¿Tlen uelis tikchiuaskej? Amo san totech ma timokuayejyekokan. Okachi kuali, ma tiyetokan tiyolyamankej uan ma tikpaleuikan iTekiuajkayo Jehová. Ijkon san sekan tiyetoskej. Pablo okinmilui akinmej okichiuayaj ken Cristo tlen ochantiayaj Roma itech se carta: “Nomechilia ayik xikmolikah nomejwah okachi nonkualteh ke oksikimeh”. Satepan okinyekilui ijkon ken “se kuerpo sasalitok ika miakeh iomiowah, amo nochteh kichiwah san se tekitl”, tejuan noijki tlatlamantli tekitl tikpiaj itech tlanechikol (Romanos 12:3-5).

Tinochtin tiitekipanojkauan Jehová tiknekij tiktlakamatiskej uan tikpaleuiskej iTekiuajkayo

16. ¿Tlen uelis tikchiuaskej pampa san sekan yetos ialtepe toTajtsin Dios uan ika yolseuilistli?

 16 Tinochtin tiitekipanojkauan Jehová tiknekij tiktlakamatiskej uan tikpaleuiskej iTekiuajkayo. Tokniuan tlen yikipiaj miak xiuitl uelis kinmachtiskej telpokamej. Uan telpokamej uelis okachi kitekichiuiliskej Jehová ika yolyamanilistli. Noijki tokniuan kintlasojkamatiliaj insiuauan ijkuak kinpaleuiaj maski seki tlamantli mopatlas. Ijkon kichiuaj ken okichi tokni Priscila, ye okipaleui inamik tlen omotokayotiaya Áquila (Hechos 18:2).

17. ¿Tleka Jesús okinmachti imachtijkauan?

17 Jesús okipaktiaya kinmachtis oksekimej uan techmaka se kuali neskayotl. Ye okimatiaya oksekimej kichiuaskiaj iteki. Noijki okimatiaya imachtijkauan okatkaj tlajtlakolejkej. Pero okineltokaya yejuan okachi tetlapouiskiaj (Juan 14:12). Jesús okinmachti ken tetlapouiskiaj san kanin ueliskiaj uan imachtijkauan kuali otetlapouijkej (Colosenses 1:23).

18. (1) ¿Tlen tekitl tikchiuaskej satepan? (2) ¿Tlen moneki tikchiuaskej axkan?

18 Ijkuak Jehová okiyoliti Jesús okimakak okachi tekitl uan “okiweyijkatlali ipan nochteh n tekiwajkeh, n tlanawatijkeh, iwa ipan nochi tlan onka” (Efesios 1:19-21). Tla timikiskej tiyolmelajkej achto uits Armagedón, Jehová techyolitis itech Xochitlali uan tikpiaskej miak tekitl tlen techyolpaktis. Pero axkan moneki ma titetlapouikan uan ma tikinmachtikan oksekimej. Ik non, maski yitikpiaj miak xiuitl noso amo, ma tikchijtokan “iteki n Toteko” (1 Corintios 15:58).

^ párr. 3 Salmo 71:18 kijtoa: “Maski niueuejtis uan nikuaistayas, oh Dios, amo xinechkaua. Xinechkauili ma niktematilti tlen tikchiua uan ma nikinmilui nochi mochikaualis akinmej satepan nesiskej”.

^ párr. 8 1 Crónicas 22:5 kijtoa: “Uan David okijto: ‘Nokone Salomón ok telpochtli uan amo kimati tlen kichiuas, uan kali tlen kichijchiuiliskej Jehová moneki yetos sapanoa kuali uan ueyititok, noijki sapanoa kuajkualtsin uan moixmatis itech nochtin uejueyij altepemej. Ik non, ma nikyektlali tlen motekitiltis’. Ik non, David opejki sapanoa tlayektlalia achto mikiskia”.