Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok (tlen ika timomachtiaj)  |  Enero de 2017

¿Tleka miak ipati ma tiyetokan tiyolyamankej?

¿Tleka miak ipati ma tiyetokan tiyolyamankej?

“Ixtlamatilistli kajki iuan akinmej yolyamankej” (PROVERBIOS 11:2).

TLAKUIKALMEJ: 38 UAN 11

1, 2. ¿Tleka Jehová ayakmo okiseli Saúl? (Xikita tlaixkopinal tlen ika peua tlamachtil).

SAÚL okatka yolyamanki ijkuak Jehová okipejpenki ken ueyi tekiua (1 Samuel 9:1, 2, 21; 10:20-24). Pero satepan omoueyineki ijkuak okitlalijkej ken ueyi tekiua. Se tonal, omonechikojkej miakej filisteos pampa moteuiskiaj iuan israelitas. Saúl omonekiaya kichiaskia teotlajtojki Samuel pampa kitlamaniliskia Jehová. Pero amo omochixki ijkuak okinmitak israelitas omomojtiayaj uan oyajkej. Ik non, Saúl opejki kitlamanilia Jehová uan amo okichixki teotlajtojki Samuel. Tlen okichi Saúl amo okipakti Jehová (1 Samuel 13:5-9).

2 Ijkuak Samuel oajsito kanin okatka Saúl, okajuak ijkuak amo okitlakamatki Jehová. Pero Saúl amo okiseli itlajtlakol, okijto kuali tlen okichi uan oksekimej okintlajtlakolti (1 Samuel 13:10-14). Ijkuakon, opejki moueyineki. Ik non,  Jehová ayakmo okiseli uan okilui ayakmo tlanauatiskia (1 Samuel 15:22, 23). Saúl kuali okipiaya inemilis, pero satepan otlajyoui (1 Samuel 31:1-6).

3. (1) ¿Tlen kijtoaj miakej itech yolyamanilistli? (2) ¿Tlen tlajtlanilmej tikinnankiliskej?

3 Axkan miakej mokuayejyekoaj amo uelis yetoskej yolyamankej tla kinekij kuali kipiaskej innemilis. Kijtoaj okachi ueyititokej uan amo oksekimej. Se neskayotl, se político tlen miakej kixmatij okijto: “Yolyamanilistli amo poui itech noyelis uan ijkon nikneki ma yeto”. Pero ¿tleka moneki ma tiyetokan tiyolyamankej akinmej tikchiuaj ken Cristo? ¿Tlen kijtosneki ma tiyetokan tiyolyamankej? Axkan tikinnankiliskej ninmej tlajtlanilmej. Uan chikome timomachtiskej ken uelis tiyetoskej tiyolyamankej maski titlajyouiskej.

¿TLEKA MONEKI MA TIYETOKAN TIYOLYAMANKEJ?

4. ¿Tlen kichiuaj akinmej moueyinekij?

4 Biblia kijtoa akin moueyineki amo yolyamanki (xiktlajtolti Proverbios 11:2). * David okilui Jehová: “Amo xikkauili motekipanojka ma kichiua tlen kichiuaj akinmej moueyinekij” (Salmo 19:13). ¿Tlen kichiuaj akinmej moueyinekij? Ijkuak ikaj moueyineki kichijtikisa itlaj tlen amo itech poui uan amo moneki ye kichiuas, noijki amo kimati mochias. Ken tinochtin titlajtlakolejkej, ualeua ijkon tikchiuaj. Pero tla nochipa ijkon tikchiuaj, Jehová ayakmo techselis ijkon ken ueyi tekiua Saúl. Salmo 119:21 kijtoa Jehová kinmajua akinmej moueyinekij. ¿Tleka ijkon kichiua?

Tla tiyolyamankej tiktlakaitaj Jehová

5. ¿Tleka sapanoa tlajtlakoli ma timoueyinekikan?

5 Sapanoa tlajtlakoli ma timoueyinekikan. ¿Tleka? Achto, tla timoueyinekij, amo tiktlakaitaj Jehová, akin toTajtsin Dios uan totekiua. Ome, tla tikchiuaj itlaj tlen amo totech poui, timokualaniskej iuan oksekimej (Proverbios 13:10). Uan eyi, timopinatiskej ijkuak oksekimej kimatiskej timoueyinekij (Lucas 14:8, 9). Ik non, Jehová kijtoa ma tiyetokan tiyolyamankej.

¿TLEN KIJTOSNEKI MA TIYETOKAN TIYOLYAMANKEJ?

6, 7. ¿Tlen kijtosneki ma tiyetokan tiyolyamankej?

6 Itech Biblia tlajtoli yolyamanilistli kijtosneki ikaj akin amo moueyineki. Uan kinmitaj oksekimej “kemi okachi weyijkatitokeh” (Filipenses 2:3). Se tlakatl yolyamanki kimati tlen uelis kichiuas uan tlen amo, noijki kiselia itlajtlakol, kinkaki oksekimej uan kineki momachtis tlen oksekimej kimatij. Jehová kintlasojtla akinmej yolyamankej.

7 Biblia kijtoa akin yolyamanki moixmati uan kimati tlen tlamantli uelis kichiuas uan tlen amo. Ijkon kintlakaita oksekimej uan kinpaleuia ika tlasojtlalistli.

8. ¿Tlen amo moneki tikchiuaskej tla tiknekij tiyetoskej tiyolyamankej?

8 Tla amo timomaluiaj, amo tikitaskej  ijkuak peuas timoueyinekiskej. ¿Ken uelis ijkon techpanos? Ijkuak timokuayejyekoaj okachi topati. Uelis pampa tikpiaj okachi tekitl itech tlanechikol noso toyolikniuan okachi kitekichiuiliaj Jehová (Romanos 12:16). Noso ijkuak tiknekij oksekimej kuali ma techitakan (1 Timoteo 2:9, 10). Hasta peuas tikinmiluiskej oksekimej tlen moneki kichiuaskej uan tlen amo (1 Corintios 4:6).

9. ¿Tleka moueyinekij sekimej tlaltikpaktlakamej? Xikijto se neskayotl.

9 Tla tiknekij tikchiuaskej tlen amo kuali, noijki peuas timoueyinekiskej. Miakej moueyinekij pampa oksekimej kinueyichiuaj, tenexikolitaj uan kualanij. Ijkon okinpanok sekimej tlaltikpaktlakamej ken Absalón, Uzías uan Nabucodonosor. Jehová okiteititi omonekiaya ma yetokan yolyamankej (2 Samuel 15:1-6; 18:9-17; 2 Crónicas 26:16-21; Daniel 5:18-21).

10. ¿Tleka amo ma tikinteneuakan oksekimej? Xikijto se neskayotl.

10 Onka okseki tlamantli tlen kichiuaj tlaltikpaktlakamej ma moueyinekikan. Ma timokuayejyekokan itech Abimélec uan Pedro (Génesis 20:2-7; Mateo 26:31-35). ¿Omoueyinekej? ¿Amo okimatiayaj seki tlamantli? ¿Noso amo kuali omokuayejyekojkej tlen kichiuaskiaj? Ken amo tikmatij tlen mokuayejyekoaj oksekimej, amo ma tikinteneuakan (xiktlajtolti Santiago 4:12).

TLATLAMANTLI TEKITL TIKCHIUAJ ITECH IALTEPE TOTAJTSIN DIOS

11. Akin kichiua ken Cristo, ¿tlen kiselia tla yolyamanki?

11 Akin kichiua ken Cristo tlen yolyamanki kiselia san tlen tekitl kimakaj itech ialtepe toTajtsin Dios. Ken Jehová nochi kuali kichiua, tinochtin tlatlamantli tekitl techmaka itech tlanechikol. Tinochtin moneki titlapaleuiskej. Jehová kuali otechchijchi, ik non, ueli tikchiuaj miak tlamantli uan techkauilia ma tikpejpenakan tlen tikchiuaskej. Tla tiyolyamankej, tikchiuaskej nochi tlen ye kineki (Romanos 12:4-8). Jehová kineki ma tikueyichiuakan uan oksekimej ma tikinpaleuikan (xiktlajtolti 1 Pedro 4:10, TNM). *

¿Ken techpaleuia ineskayo Jesús ijkuak techmakaskej se yankuik tekitl? (Xikinmita párrafos 12 a 14).

12, 13. ¿Tlen tikilnamikiskej tla mopatlas seki tlamantli itech ken tiktekichiuiliaj Jehová?

12 Uelis satepan mopatlas ken tiktekichiuiliaj Jehová. Ma timokuayejyekokan ken omopatlak seki tlamantli itech inemilis Jesús. Achto san ye okatka iuan iTajtsin (Proverbios 8:22). Satepan, okipaleui iTajtsin ijkuak okinchijchijkej ángeles, semanauak uan tlaltikpaktlakamej (Colosenses 1:16). Satepan Jesús okiualtitlankej nikan Tlaltikpak. Oneski ken se konetl uan omoskalti (Filipenses 2:7). Satepan ijkuak okimiktijkej, omokuepki iluikak uan itech xiuitl 1914 okitlalijkej ken ueyi tekiua itech iTekiuajkayo toTajtsin Dios (Hebreos 2:9). Ijkuak tlamis tlanauatis mil xiuitl, kimaktilis Tekiuajkayotl iTajtsin. Ijkuakon, toTajtsin “Dios, kinawatijtos nochi tlan onka” (1 Corintios 15:28).

13 Noijki uelis mopatlas seki tlamantli  itech tonemilis. Ualeua mopatla ijkuak tikpejpenaj tikchiuaskej seki tlamantli. Se neskayotl, uelis toselti otikatkaj uan axkan yotimonamiktijkej. Noso yitikinpiaj tokoneuan. Noso axkan okachi tiktekichiuiliaj Jehová. Ualeua mopatla tonemilis ijkuak panoa seki tlamantli tlen amo otikchiayaj. Uelis axkan okachi tiktekichiuiliaj Jehová noso amo. Pero maski yitikpiaj miak xiuitl noso amo, maski kuali tikatej noso timokokoaj, Jehová kimati ken okachi kuali tiktekichiuiliskej. Ye amo kichia okachi ma tiktekichiuilikan tla amo tiuelij. Okachi kuali, yolpaki ijkuak kita timochijchikauaj pampa tiktekichiuiliskej (Hebreos 6:10).

14. Tla tiyolyamankej, ¿tiyolpakiskej maski san tlen tekitl tikchiuaskej itech tlanechikol?

14 Jesús okichi nochi tlen iTajtsin okinauati uan tejuan noijki ijkon uelis tikchiuaskej (Proverbios 8:30, 31). Tla tiyolyamankej, tiyolpakiskej maski san tlen tekitl tikchiuaskej itech tlanechikol. Amo tikitaskej tlen oksekimej kichiuaj. Okachi kuali, tiyolpakiskej ika tekitl tlen otikselijkej itech tlanechikol pampa tikmatij Jehová otechmakak. Tla tiyolyamankej, tikintlakaitaskej uan tikinpaleuiskej tokniuan. Uan tikmatiskej Jehová okinmakak tekitl itech tlanechikol (Romanos 12:10).

¿KEN MONEKI TIKITASKEJ YOLYAMANILISTLI?

15. ¿Tlen techmachtia ineskayo Gedeón?

15 Gedeón okatka se tlakatl yolyamanki. Se tonal, Jehová okilui kinmakixtiskia israelitas inmak madianitas. ¿Tlen okichi Gedeón? Okijto ikalchanejkauan  amo okachi oueyititokaj uan ye amo okachi oueyititoka itech ikalijtik itajtsin (Jueces 6:15). Pero Gedeón otlaneltokak itech Jehová uan okichi tlen okinauati. Kuali okajsikamatki tlen Jehová okinekiaya ma kichiua uan okilui ma kiyekana (Jueces 6:36-40). Gedeón okatka chikauak uan yolchikauak, pero noijki okatka ixtlamatki uan nochi kuali okichiuaya (Jueces 6:11, 27). Ye amo okinek yetos ueyi tekiua ijkuak tlaltikpaktlakamej okinekiayaj ma tlanauati. Ijkuak okichi tlen Jehová okinauati, omokuepki ikalijtik (Jueces 8:22, 23, 29).

16, 17. ¿Tlen achto moneki kitas se tokni tlen kineki okachi kitekichiuilis Jehová?

16 ¿Kijtosneki amo tiyolyamankej tla okachi tiktekichiuiliskej Jehová noso okachi titlapaleuiskej itech tlanechikol? Amo. Biblia kijtoa kuali kajki tla tiknekij okachi tiktekichiuiliskej Jehová uan tikinpaleuiskej tokniuan (1 Timoteo 4:13-15). Pero amo moneki ma techmakakan okse tekitl pampa okachi tiktekichiuiliskej Jehová. Tinochtin uelis tikpiaskej okachi kuali toyelis uan okachi kuali tikchiuaskej toteki. Ijkon okachi kuali tiktekichiuiliskej Jehová uan tikinpaleuiskej oksekimej.

17 Ijkuak se tokni kimakaskej se yankuik tekitl, tla yolyamanki achto kitas tlen moneki kichiuas. Kitlatlaujtis Jehová uan kitas kox uelis kichiuas non tekitl. Uelis motlajtlanis kox majxilis kichiuas okseki tlamantli tlen miak ipati. Tla amo majxilis, se tokni uelis kipaleuis ma kichiua tekitl tlen kichijtok. Tla nin tokni kita amo uelis kichiuas non tekitl uan tla yolyamanki, kijtos amo uelis kichiuas.

18. (1) Tla tiyolyamankej, ¿tlen tikchiuaskej ijkuak techmakaskej se yankuik tekitl? (2) ¿Ken techpaleuia Romanos 12:3 ma tiyetokan tiyolyamankej?

18 Jehová kineki iuan ma tinemikan ika yolyamanilistli (Miqueas 6:8). Ik non, tla techmaka se yankuik tekitl, ma tikchiuakan ken Gedeón uan ma tikiluikan Jehová ma techyekana uan ma techpaleui. Kuali ma timokuayejyekokan tlen techiluia Jehová ika Biblia uan ialtepe. Amo ma tikilkauakan tiktekichiuiliaj Jehová pampa ye yolyamanki uan techpaleuia uan amo san toselti tikchiuaj (Salmo 18:35). Tla tiyolyamankej, amo timokuayejyekoskej okachi topati (xiktlajtolti Romanos 12:3).

19. ¿Tleka moneki ma tiyetokan tiyolyamankej?

19 Ken yotikitakej, moneki ma tiyetokan tiyolyamankej pampa san Jehová kinamiki ma tikueyichiuakan, ye okichijchi nochi tlen onka uan tlanauatia itech nochi semanauak (Apocalipsis 4:11). Tla tiyolyamankej tiyolpakiskej maski san tlen tekitl tikchiuaskej. Noijki, san sekan tiyetoskej tla tiktlakaitaskej tlen tokniuan mokuayejyekoaj uan kimachiliaj. Tla tiyolyamankej, kuali timokuayejyekoskej tlen tikchiuaskej uan ijkon amo tikpiaskej ouijkayotl. Jehová kintlasojtla akinmej yolyamankej. Nochi nin kiteititia miak ipati tiitekipanojkauan Jehová ma tiyetokan tiyolyamankej. Chikome timomachtiskej ken uelis tiyetoskej tiyolyamankej maski titlajyouiskej.

^ párr. 4 Proverbios 11:2 kijtoa: “Ijkuak ikaj peua moueyineki, satepan kipinatiskej, pero ixtlamatilistli kajki iuan akinmej yolyamankej”.

^ párr. 11 1 Pedro 4:10 itech Traducción del Nuevo Mundo kijtoa: “Ken sejse onankiselijkej tetliokolil, xiktekitiltikan ijkuak nanmopaleuiskej ken akinmej tlamaluiaj itech tlamantli kuali tlen amo technamiki tikpiaskej tlen tlatlamantli techititia toTajtsin Dios”.