Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok (tlen ika timomachtiaj)  |  Diciembre  2017

¿Tikilnamiki?

¿Tikilnamiki?

¿Yotikintlajtolti saiktlami revistas Akin Tetlapouijtok? Xikita kox uelis tikinnankilis ninmej tlajtlanilmej:

¿Tleka tetajmej tlen uitsej itech okseki altepemej moneki kitaskej tlen tlajtoli okachi kajsikamatij inkoneuan uan ijkon kipiaskej chikauak intlaneltokilis?

Mokoneuan uelis momachtiskej tlajtoli tlen oksekimej kitekitiltiaj noso itech escuela. Ijkuak titlajtoaj okse tlajtoli techpaleuia ma tiyetokan tiixtlamatkej. Tetajmej moneki kipejpenaskej itech tlen tlanechikol moneki yaskej, kox ika intlajtol noso ika tlajtoli tlen tlajtoaj kanin ochantitoj. Ik non, tetajmej moneki kitaskej ika tlen tlajtoli okachi kajsikamatij inkoneuan iTlajtol Jehová para ijkon uelis kipiaskej chikauak intlaneltokilis. Tetajmej moneki motekipachoskej itech inkoneuan uan amo san itech tlen yejuan kinekij kipejpenaskej (w17.05, páginas 10 a 13).

Jesús okitlajtlani Pedro: “¿Techtlasojtla okachi ke ninteh?”. ¿Tlen okinekiaya kijtos ika “ninteh”? (Juan 21:15)

Nesi Jesús otlajto itech michimej tlen ompa okatkaj noso porque Pedro okipaktiaya michkitskis. Ijkuak Jesús omikik, Pedro oksepa opejki michkitskia. Akinmej tikchiuaj ken Cristo moneki tikitaskej kox okachi tikpatioitaj titekitiskej (w17.05, páginas 22 uan 23).

¿Tlen moneki kilnamikis akin kichiua ken Cristo ijkuak kipejpenas kox kipias noso amo se pistola, se escopeta noso okse tepostli para ika mopaleuis?

Jehová sapanoa kipatioita yolilistli. Jesús amo okinmilui imachtijkauan ma kitemokan se espada para ika mopaleuiskej (Luc. 22:36, 38). Tiitekipanojkauan toTajtsin Dios ‘tikinkuepaj toespadas tlen ika titlameuaj’. Okachi tikpatioitaj inyolilis oksekimej uan amo tlen tikpiaj. Tiktlakaitaj tlen oksekimej mokuayejyekoaj uan timochijchikauaj ma techitakan ken se kuali neskayotl (2 Cor. 4:2) (w17.07, páginas 31 uan 32).

¿Tleka amochtli Mateo uan Lucas tlatlamantli tlajtoaj itech Jesús ijkuak okatka tsikitsin?

Mateo otlajto itech José. Se neskayotl, okijto tlen okichi ijkuak okimatki María kipiaskia ikonetsin uan ijkuak se ángel okilui José itech se kochtemikilistli, ma yakan Egipto uan satepan oksepa ualmokuepaskiaj. Lucas okachi otlajto itech María. Se neskayotl, okijto tlen opanok ijkuak okitato Elisabet uan tlen okijto ijkuak Jesús omoka itech teokali (w17.08, página 32).

¿Tlen tlamantli okichiuaya amo ma tikpiakan Biblia?

Se, tlajtolmej tlen omotekitiltiayaj itech Biblia ayakmo motekitiltiaj porque omopatlatia. Ome, tlanauatiaj tlatlamantli tekiuajkej, ik non, mopatla intlajtol tlaltikpaktlakamej. Eyi, miakej amo kitekauiliaj ma motlajtolkuepa Biblia ika intlajtol tlaltikpaktlakamej (w17.09, páginas 19 a 21).

¿Ken uelis tikteititiskej titetlasojtlaj?

Tlasojtlalistli agápe moyekana ika principios. Nin tlasojtlalistli amo san kijtosneki tlen tikmachiliaj, kijtosneki tikteititiaj ika tlen tikchiuaj para tikinpaleuiskej oksekimej (w17.10, página 7).