Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok (tlen ika timomachtiaj)  |  Diciembre  2017

Tetajmej xikinpaleuikan namokoneuan ma yetokan ixtlamatkej para momakixtiskej

Tetajmej xikinpaleuikan namokoneuan ma yetokan ixtlamatkej para momakixtiskej

“Desde tiselekonetl tikmatok tlan kijtoa itlajkuilol Dios. Ayik xikilkawa tlan kijtoa, porke mitsixtlamachtis” (2 TIM. 3:15).

TLAKUIKALMEJ: 141 UAN 134

1, 2. ¿Tleka sekimej tetajmej motekipachoaj ijkuak inkoneuan kinekij motemakaskej ixpan Jehová uan kinekij moapolaktiskej?

SEJSE xiuitl miakej motemakaj ixpan Jehová uan moapolaktiaj. Miakej telpokamej, ichpokamej uan konemej. Melauak kuali okipejpenkej tlen kichiuaj. Xamo okinmachtijkej intatajuan tlen katej iTlaixpantijkauan Jehová (Sal. 1:1-3). Tetajmej kinpaktiskia inkoneuan ma moapolaktikan (xikita ika 3 Juan 4).

2 Pero xamo kintekipachoa seki tlamantli. Xamo kinmixmatij sekimej telpokamej noso ichpokamej tlen omoapolaktijkej uan axkan ayakmo kitekichiuiliaj Jehová. Ik non, tetajmej momojtiaj tla inkoneuan moapolaktiskej uan satepan kikauaskej Jehová. Ijkon opanok itech tlanechikol tlen okatka Éfeso itech achto siglo. Jesús okinmilui: “Yotikka n  tlasojtlalístli non achto otikpiaya” (Apoc. 2:4). Ik non, ¿tlen kichiuaskej tetajmej para amo ijkon ma kinpano inkoneuan uan ijkon momakixtiskej? (1 Ped. 2:2). Ma tikitakan tlen okichi Timoteo.

“TIKMATOK TLAN KIJTOA ITLAJKUILOL DIOS”

3. (1) ¿Keman opejki kichiua Timoteo ken Jesús uan tlen okichi ika tlen okimatiaya? (2) ¿Tlen eyi tlamantli okilui Pablo Timoteo?

3 Uelis Timoteo opejki momachtia tlen Jesús otlamachtiaya ijkuak tlatitlanil Pablo otetlajpaloto ompa Listra itech xiuitl 47. Ijkuakon Timoteo okatka telpochtli pero opejki kichiua tlen omomachtiaya uan ome xiuitl satepan uejka otetlapouitoj iuan Pablo. Opanok dieciséis xiuitl uan Pablo okijkuilili Timoteo: “Nochipa xikneltoka tlan omitsmachtijkeh, non te yotikyekneltokak. Te kuali tikmatok akin omitsixtlamachti, desde tiselekonetl tikmatok tlan kijtoa itlajkuilol Dios. Ayik xikilkawa tlan kijtoa, porke mitsixtlamachtis iwa mitsmakixtis ken titlaneltoka itech Cristo Jesús” (2 Tim. 3:14, 15). Ma tikinmitakan ninmej eyi tlamantli, se “tikmatok tlan kijtoa itlajkuilol Dios”, ome “yotikyekneltokak” uan eyi “mitsixtlamachtis iwa mitsmakixtis ken titlaneltoka itech Cristo Jesús”.

4. ¿Ika tlen tlamantli uelis tlamachtiskej tetajmej? (Xikita tlaixkopinal tlen ika peua tlamachtil).

4 Tetajmej tlen kichiuaj ken Cristo kinekij inkoneuan kuali ma kixmatikan “itlajkuilol Dios” nochi tlen poui itech Escrituras Hebreas uan Escrituras Griegas Cristianas. Konemej uelis kinmachtijtiaskej itech akinmej tlajtoa Biblia uan nochi tlen opanotia. Ialtepe Jehová techmaka miakej amochmej, amatlajkuilolmej, videos ika miakej tlajtolmej para tetajmej ma kinmachtikan inkoneuan. ¿Tikilnamikij tlen amatlajkuilolmej tikinpiaj ika totlajtol? Ma tikilnamiktokan moneki timomachtiskej Biblia para kuali timouikaskej iuan Jehová.

“YOTIKYEKNELTOKAK”

5. (1) ¿Tlen kijtosneki ‘titlayekneltokaskej’? (2) ¿Tleka tikijtoaj Timoteo okineltokaya Jesús okatka Mesías?

5 Tetajmej amo san moneki kinmachtiskej inkoneuan itech akinmej tlajtoa Biblia uan nochi tlen opanotia. Timoteo ‘okiyekneltokak’ iTlajtol toTajtsin Dios. Ika tlajtoli griego non kijtosneki “itlaj tlen melauak tikneltokaj” uan “ika nochi toyolo tikneltokaj non tlen melauak”. Timoteo okimatiaya tlen kijtoa Escrituras Hebreas ijkuak okatka chokotsin. Pero satepan tlen omomachti okipaleui ma kineltoka Jesús okatka Mesías. Ik non, omoapolakti uan oyajki iuan Pablo otetlapouito.

6. ¿Ken kinpaleuiskej tetajmej inkoneuan ma tlaneltokakan itech tlen Biblia tlamachtia?

6 ¿Ken kinpaleuiskej tetajmej inkoneuan ma tlaneltokakan ijkon ken Timoteo? Achto moneki ma kimatikan mochiaskej. Inkoneuan yolik tlaneltokatiaskej uan amo kichiuaskej san porque intatajuan tlaneltokaj. Moneki sejse konemej ma ‘kikakikah tlan kinmatiltiah’ uan ijkon kipiaskej chikauak intlaneltokilis ika tlen Biblia tlamachtia (xiktlajtolti 1 Tesalonicenses 5:21). Tetajmej moneki ma kinpaleuikan inkoneuan, okachi ijkuak kintlajtlaniaj seki tlamantli. Ma tikitakan se neskayotl.

7, 8. (1) ¿Ken kiteititia se teta kimati mochias ijkuak kimachtia itakotsin? (2) ¿Tejuatsin ken yotikteititi tikmati timochia ijkuak tikinmachtia mokoneuan?

 7 Se tokni tlen itoka Thomas kipia itakotsin tlen kipia 11 xiuitl. Tokni okijto itakotsin kitlajtlania seki tlamantli ken: “¿Kox Jehová okitekitilti se yolkatl ijkuak okichijchi nochi tlen onka?” uan “¿Tleka amo tikchiuaj votaciones uan tikchiuaj okseki tlamantli para titepaleuiskej?”. Tokni moneki kuali mokuayejyekos ken kinankilis itakotsin. Kimati okachi kuali tla yolik kititijtias ika seki tlamantli uan amo san se uelta nochi kiluis.

8 Tinochtin moneki tikmatiskej timochiaskej. Uan tokni Thomas kimati non moneki para tetajmej kinmachtiskej konemej (Col. 3:12). Kimati moneki majxilis para motlapouis iuan itakotsin. Moneki kuali iuan motlapouis para kineltokas tlen kijtoa Biblia. Tokni okijto: “Nosiua uan ne tiknekij tikmatiskej kox totakotsin melauak kineltoka tlen momachtijtok uan kox kuali kajsikamati tlen okachi ipati. Uan moneki ma techtlajtlani seki tlamantli. Nechtekipachoskia tla tlaneltoka pero amo itlaj techtlajtlanis”.

9. ¿Ken uelis kinmachtiskej tetajmej inkoneuan tlen Biblia tlamachtia?

9 Tla tetajmej kimatij mochiaskej, inkoneuan yolik kajsikamatiskej tlaneltokilistli tlen “saikpanoa patlawak weyak wejkatla iwa wejkapa” (Efes. 3:18). Tetajmej moneki kitaskej kox inkoneuan yiuejueyij noso ok tsikitsitsintin uan ijkon kinmachtiskej tlen moneki. Tla inkoneuan kipiaj chikauak intlaneltokilis, okachi kuali kimatiskej tlen tlanankiliskej ijkuak itlaj kintlajtlaniskej itech escuela noso oksekimej (1 Ped. 3:15). Tetajmej uelis motlajtlaniskej: “¿Nokoneuan uelis kiyekijtoskej ika Biblia tlen techpanoa ijkuak timikij? ¿Melauak kineltokaj tlen Biblia kijtoa itech non?”. * Para tetajmej kinmachtiskej inkoneuan tlen Biblia tlamachtia, moneki yolik kinmachtiskej uan ijkon kipiaskej chikauak intlaneltokilis (Deut. 6:6, 7).

10. ¿Tlen moneki ma kichiuakan tetajmej?

10 Tla tetajmej kinekij inkoneuan ma kineltokakan tlen Biblia tlamachtia, moneki noijki ijkon ma kineltokakan. Se tokni tlen itoka Stephanie akin kinpia eyi ichpokauan okijto: “Ijkuak nokoneuan ok okatkaj tsikitsitsintin, ne nochipa onimotlajtlaniaya: ‘¿Nikinmiluia tleka nikneltoka onka Jehová uan noijki yolmelauak uan tetlasojtla? ¿Kitaj nokoneuan melauak niktlasojtla Jehová?’. Tla ne amo nikpia chikauak notlaneltokilis, amo uelis nikchias ijkon ma tlaneltokakan”.

“MITSIXTLAMACHTIS IWA MITSMAKIXTIS”

11, 12. ¿Ken moteititia ikaj ixtlamatki uan tleka uelis tikijtoskej amo porque kipia miak xiuitl?

11 Yotimomachtijkej Timoteo (1) okimatiaya tlen kijtoa iTlajtol toTajtsin Dios uan (2) itech otlaneltokaya. ¿Pero tlen okinekiaya kiluis Pablo ijkuak okilui iTlajtol toTajtsin Dios uelis ‘kixtlamachtis iwa kimakixtis’?

12 Amochtli Perspicacia volumen 2 kijtoa akin ixtlamatki “noijki kuali kitekitiltia  tlen kimati, kuali kajsikamati nochi ijkuak itlaj kiyektlalia, ijkuak kipia se ouijkayotl, ijkuak kineki itlaj kichiuas noso ijkuak ikaj kinojnotsa”. Biblia kijtoa: “Telpochtli kichiua tlen tepinati” (Prov. 22:15). Akin ixtlamatki amo xoxo porque kipia chikauak itlaneltokilis. Ik non, kimauilia Jehová uan kintlakamati itlanauatiluan, amo porque yikipia miak xiuitl (xiktlajtolti Salmo 111:10).

13. ¿Ken kiteititiskej telpokamej uan ichpokamej ixtlamatkej uan kinekij momakixtiskej?

13 Telpokamej uan ichpokamej tlen ixtlamatkej amo “san kipapatlah intlalnamikilis ijkuak kikakih itla ok se yankuik tlamachtílistli” noso tlen oksekimej kinmiluiaj nion kichiuaj san tlen yejuan kinekij (Efes. 4:14). Yejuan “kuali kimatih kiyejyekoliah tlan kuali iwa tlan amokuali” (Heb. 5:14). Kiteititiaj ixtlamatkej ijkuak kuali kipejpenaj tlen kichiuaskej maski amo kinmitaj intatajuan noso oksekimej (Filip. 2:12). Ik non, moneki yetoskej ixtlamatkej para momakixtiskej (xiktlajtolti Proverbios 24:14). ¿Ken kinpaleuiskej tetajmej inkoneuan para ma yetokan ixtlamatkej? Konemej moneki kitaskej tlen okachi kipatioitaj intatajuan. Tlen kichiuaj uan tlen kijtoaj moneki kiteititis kintlakamatij itlanauatiluan Jehová (Rom. 2:21-23).

¿Tleka tetajmej moneki nochipa ma kinpaleuikan inkoneuan? (Xikinmita párrafos 14 a 18).

14, 15. (1) ¿Tleka moneki kuali ma mokuayejyeko akin kineki moapolaktis? (2) ¿Ken kinyekiluiskej tetajmej inkoneuan kinpaleuis tla kintlakamatiskej itlanauatiluan Jehová?

14 Para konemej kipiaskej chikauak intlaneltokilis, intatajuan amo san moneki kinmiluiskej tlen kuali uan tlen amo kuali. Moneki kinpaleuiskej kuali ma mokuayejyekokan uan ma kintlajtlanikan: “¿Tleka Biblia kijtoa amo ma tikchiuakan tlen tejuan tikitaj kualtsin? ¿Tleka tikneltoka itlanauatiluan Biblia nochipa mitspaleuiskej?” (Is. 48:17, 18).

 15 Tetajmej ijkuak se namokone kinekis moapolaktis, xikyekiluikan non sapanoa miak ipati. Xiktlajtlanikan kox yokajsikamatki tlen okachi ipati, kox kipaleuis, tlen ouijkayotl kixnamikis uan ken kiteochiuas Jehová (Mar. 10:29, 30). Achto moapolaktis namokone moneki kuali ma mokuayejyeko. Xikpaleuikan ma mokuayejyeko ken kiteochiuas Jehová tla kitlakamatis uan ken tlajyouis tla amo kitlakamatis. Ijkon okachi kineltokas nochipa kipaleuis kintlakamatis itlanauatiluan Biblia (Deut. 30:19, 20).

¿TLEN KICHIUASKEJ TETAJMEJ TLA INKONE AYAKMO OKACHI TLANELTOKA?

16. ¿Tlen kichiuaskej tetajmej tla inkoneuan peua motlajtlaniaj seki tlamantli ijkuak yomoapolaktijkej?

16 ¿Tlen kichiuaskej tetajmej tla inkoneuan ayakmo okachi tlaneltokaj? Se neskayotl, namokone uelis kipaktis tlen kinpaktia akinmej amo kitekichiuiliaj Jehová uan xamo motlajtlanis kox kipaleuis moyekanas ika principios bíblicos (Sal. 73:1-3, 12, 13). Tlen kichiuaj tetajmej noso tlen kijtoaj, kinyolinis inkoneuan ma kitekichiuilikan Jehová noso amo. Amo ximokualanikan iuan namokoneuan. Moneki kimatiskej nankitlasojtlaj uan nankinekij nankinpaleuiskej.

17, 18. ¿Tlen kichiuaskej tetajmej tla inkoneuan ayakmo okachi tlaneltokaj?

17 Ijkuak namokone moapolaktis, kijtosneki yomotemakak ixpan Jehová. Uan non tlen okachi miak ipati, porque okilui Jehová kitlasojtlas uan nochipa kitekichiuilis (xiktlajtolti Marcos 12:30). Jehová amo san kajauilmati uan tejuan noijki amo ma tikajauilmatikan (Ecl. 5:4, 5). Xikinmilnamiktikan nin tlamantli namokoneuan. Pero achto xikintlajtoltikan uan ximomachtikan amatlajkuilolmej tlen techmaka ialtepe Jehová. Kualtsin xikinyekiluikan tla motemakaskej ixpan Jehová uan moapolaktiskej, ye kinteochiuas.

18 Se neskayotl, tetajmej uelis kinpaleuis tlen kijtoa tlamachtilmej “Los padres preguntan” tlen kipia amochtli Los jóvenes preguntan, volumen 1. Ompa kijtoa: “Amo san niman xikijto mokone ayakmo itlaj kineki kimatis itech tlaneltokalistli. Xamo san moneki kuali mokuayejyekos”. Xamo akinmej inmiuan momachtia kiluiaj ma kichiua seki tlamantli, xamo iselti momachilia noso kinmita oksekimej okachi kitekichiuiliaj Jehová. Amochtli noijki kijtoa: “Nochi non amo kichiuas ayakmo ma tlaneltoka itech Jehová. Uelis oui kichiuilia kintlakamatis itlanauatiluan Biblia”. Noijki kijtoa tlen kichiuaskej tetajmej tla inkoneuan ayakmo okachi tlaneltokaj.

19. ¿Ken kinpaleuiskej tetajmej inkoneuan ma yetokan ixtlamatkej para momakixtiskej?

19 Tetajmej, moneki namokoneuan ‘nankinyekiskaltiskeh ika tlanonotsálistli iwa ika itlajtol n Toteko’ (Efes. 6:4). Ken yotimomachtijkej, amo san moneki nankimachtiskej tlen kijtoa Biblia, okachi kuali xikinpaleuikan ma kineltokakan tlen momachtiaj. Ijkuak kipiaskej chikauak intlaneltokilis, non kinyolinis ma motemakakan ixpan Jehová uan ma kitekichiuilikan ika nochi inyolo. ITlajtol toTajtsin Dios uan iespíritu santo ma namechpaleui porque nankinpaleuiaj namokoneuan ma yetokan ixtlamatkej para momakixtiskej.

^ párr. 9 Ika miakej tlajtolmej katej tlamachtilmej “¿Qué enseña realmente la Biblia?” uan nin kinpaleuia telpokamej, ichpokamej uan akinmej kipiaj miak xiuitl ma kajsikamatikan uan ma kiyekijtokan tlen melauak tlamachtia Biblia. Ninmej tlamachtilmej katej itech ENSEÑANZAS BÍBLICAS > AYUDAS PARA ESTUDIAR LA BIBLIA tlen kajki itech jw.org.