Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok (tlen ika timomachtiaj)  |  Diciembre  2017

¿Kox opouik Jacob itech ikalchanejkauan Mesías ijkuak omoka ken tlayekankonetl ipatka Esaú?

Sekimej techtlajtlaniaj

Sekimej techtlajtlaniaj

Ijkuak okatkaj israelitas, ¿omonekiaya ikaj yetos tlayekankonetl uan ijkon pouiskia itech ikalchanejkauan Mesías?

Ualeua ijkon yotikijtojkej. Nesi ijkon omoajsikamatiaya ika tlen kijtoa Hebreos 12:16 kanin kijtoa Esaú ‘okajawilmatki tlan Dios tlanawatia’ uan “okawilo tlan ita kimakaskia kemi teteachka, san por siki tlákuali” okipatili Jacob. Ik non, Jacob akin okatka ikni ye akin omoka tlayekankonetl uan pouiskia itech ikalchanejkauan Mesías (Mat. 1:2, 16; Luc. 3:23, 34).

Pero yotikinmitakej seki tlaxelolmej uan otikitakej amo omonekiaya ikaj yetos tlayekankonetl uan ijkon pouiskia itech ikalchanejkauan Mesías. Ma tikitakan tleka.

Itlayekankone Jacob okatka Rubén tlen okipixki iuan Lea. Satepan Jacob uan Raquel okipixkej José. Ijkuak Rubén otlajtlakolchi, José omoka ken tlayekankonetl (Gén. 29:31-35; 30:22-25; 35:22-26; 49:22-26; 1 Crón. 5:1, 2). Pero Mesías amo ouala itech ikalchanejkauan Rubén nion José, ouala itech ikalchanejkauan Judá, ikone Jacob tlen okipixki iuan Lea uan ye amo okatka tlayekankonetl (Gén. 49:10).

Itech Lucas 3:32 moijtoa makuili tlakamej tlen opouiayaj itech ikalchanejkauan Mesías.  Nesi nochtin okatkaj tlayekankonemej. Boaz okatka itajtsin Obed uan Obed okatka itajtsin Jesé (Rut 4:17, 20-22; 1 Crón. 2:10-12).

Mesías ouala itech ikalchanejkauan David pero amo okatka itlayekankone Jesé, ye okatka xokoyotl (1 Sam. 16:10, 11; 17:12; Mat. 1:5, 6). Noijki ijkon opanok iuan Salomón, tlen amo okatka itlayekankone David (2 Sam. 3:2-5).

Non amo kijtosneki amo ipati tla ikaj okatka tlayekankonetl. Akin okatka tlayekankonetl oueyititoka uan ijkuak itajtsin ayakmo okatka, ye okinyekanaya ikalchanejkauan. Noijki okachi miak tlamantli okikajteuiliayaj itatajuan (Gén. 43:33; Deut. 21:17; Jos. 17:1).

Pero akin okatka tlayekankonetl uelis kipanoltiliskia ikni tlen kikajteuiliskiaj. Se neskayotl, ijkuak Abrahán okititlanki Ismael ma uia, Isaac omoka ken tlayekankonetl. Uan ken yotikijtojkej, José omoka ken tlayekankonetl uan amo ye Rubén (Gén. 21:14-21; 22:2).

Oksepa ma tikitakan Hebreos 12:16: “Nion se de nomejwah mamomekati, nion makajawilmati tlan Dios tlanawatia, porke ijkó okichi Esaú, akin okawilo tlan ita kimakaskia kemi teteachka, san por siki tlákuali”. ¿Tlen okinekiaya kijtos?

Tlatitlanil Pablo amo otlapojtoka itech ikalchanejkauan Mesías. Achto okinmilui tokniuan ‘ma kitemokah n ojtli milaktik’ uan ijkon ‘nonnochteh kajsiskiah ikualtilis Dios’. Uan uelis kipoloskiaj tla oauilnemiskiaj (Heb. 12:12-16). Tla auilnemiskiaj, kichiuaskiaj ken Esaú akin ‘okajawilmatki tlan Dios tlanawatia’ uan okipejpenki kichiuas “tlen amo itlaj ipati” (Kingdom Interlinear).

Yiuejkika ijkuak okatka Esaú, xamo noijki okitlamaniliaya Jehová (Gén. 8:20, 21; 12:7, 8; Job 1:4, 5). Pero satepan san okipatioitak moyolpaktis, ik non, okachi okinek kikuas tlakuali uan ayakmo yetos tlayekankonetl. Xamo amo okinekiaya tlajyouis ken omoijto kinpanoskia ikalchanejkauan Abrahán (Gén. 15:13). Esaú noijki okiteititi okipejpenki tlen amo itlaj ipati ijkuak omonamikti iuan ome siuamej tlen amo okitekichiuiliayaj Jehová uan itatajuan sapanoa omoyolkokojkej (Gén. 26:34, 35). Pero Jacob omonamikti iuan se siuatl tlen okitekichiuiliaya Jehová (Gén. 28:6, 7; 29:10-12, 18).

Ik non, ¿tlen techmachtia nochi nin? Ualeua ikalchanejkauan Mesías opouiayaj itech tlayekankonemej pero amo nochipa ijkon opanoaya. Judíos okimatiayaj non uan okajsikamatiayaj Mesías ualaskia itech ikalchanejkauan David, ikone Jesé akin okatka xokoyotl (Mat. 22:42).