Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok (tlen ika timomachtiaj)  |  Diciembre  2017

Sekimej techtlajtlaniaj

Sekimej techtlajtlaniaj

¿Uelis kitekitiltiskej dispositivo intrauterino (DIU) siuamej tlen kichiuaj ken Cristo para amo kinpiaskej inkoneuan?

Akinmej yomonamiktijkej moneki kimatiskej ken tekiti DIU (tlen noijki moixmati ken “T”) uan ika tlen principios bíblicos moyekanaskej. Non kinpaleuis ma kipejpenakan tlen kichiuaskej uan kipiaskej kuali intlalnamikilis ken kipaktia toTajtsin Dios.

Ijkuak san okatka Adán uan Eva, Jehová okinnauati: “Ximomiaktilikan uan ximochiuakan nanmiakej”. Uan ijkuak otlanki otlatenki, noijki ijkon okinauati Noé uan ikalchanejkauan (Gén. 1:28; 9:1). Pero Biblia amo kijtoa axkan noijki ijkon ma tikchiuakan. Ik non, akinmej yomonamiktijkej moneki kipejpenaskej tlen ika momaluiskej para amo kinpiaskej miakej inkoneuan. Pero ¿tlen moneki kimatiskej?

Akinmej tikchiuaj ken Cristo timoyekanaj ika principios bíblicos ijkuak tikpejpenaj tlen tikchiuaskej. Ik non, amo tikinmayauij konemej san porque amo tiknekij miakej tikinpiaskej. Amo ijkon tikchiuaj porque Biblia kijtoa ma tiktlakaitakan yolilistli. Tikkauiliaj ma moskalti uan ma nesi (Éx. 20:13; 21:22, 23; Sal. 139:16; Jer. 1:5). Ik non, ¿kox uelis tiktekitiltiskej DIU?

Nin tlamachtil yomoijto itech La Atalaya del 15 de septiembre 1979, páginas 31 uan 32. Ijkuakon, DIU san ochijchitoka ika plástico tlen okintlaliliayaj siuamej para amo ma kinpiakan inkoneuan. Non revista okijto amo omomatiaya ken otekitiaya DIU. Sekimej ixtlamatkej okijtoayaj DIU okitsakuiliaya espermatozoide para amo ma ajsiti kanin kajki óvulo uan amo ijtik ma kalaki. Ik non, amo okipiayaj inkone.

 Pero satepan omotak espermatozoide ualeua oajsiaya kanin kajki óvulo uan ijtik okalakiaya. Nin san omoskaltiaya itech trompa de Falopio. Uan tla ompa okatka DIU, amo okikauiliaya óvulo ma yeto ijtik matriz uan ma moskalti se konetl. Uan tla kimayauiskiaj non, yetoskia ken okimiktiayaj se konetl. Saiktlami non revista okijto: “Akinmej kichiuaj ken Cristo kuali mokuayejyekoaj kox itlaj kimotlaliliskej para amo kinpiaskej inkoneuan. Noijki kilnamikij moneki kitlakaitaskej yolilistli ijkon ken kijtoa Biblia” (Sal. 36:9).

Non revista okiski itech 1979 uan axkan ixtlamatkej uan akinmej tlapajtiaj yikimatij okseki tlamantli.

Axkan onka ome tlamantli DIU. Se kipia cobre uan ompa Estados Unidos san kanin opejki kinemakaj itech 1988. Okse DIU kipia se hormona uan opejki monemaka itech 2001. ¿Ken tekiti non DIU?

DIU tlen kipia cobre. Ken yotikijtojkej DIU kitsakuilia espermatozoide para amo ma pano ijtik matriz uan amo ma kalakiti ijtik óvulo. Nesi noijki kimiktia espermatozoide porque cobre kijtlakoa. * Sekimej kijtoaj DIU kijtlakoa tlen ika kimilitok matriz.

DIU tlen kipia hormonas. Onka miakej DIU tlen kipiaj hormonas ken tlen kipiaj seki pastillas tlen konij siuamej para amo kinpiaskej inkoneuan. Ninmej DIU tekitij ken tlen kinchijchiuaj ika plástico pero noijki kixitinia hormona ijtik matriz. Nesi non kichiua sekimej siuamej amo ma kipiakan ovulación. Uan tla amo mochiuas óvulación, amo uelis moskaltis se konetl. Noijki sekimej kijtoaj DIU kipia hormona tlen kikanaua tlen ika kimilitok matriz. * Uan noijki amo kikauilia espermatozoide ma pano ijtik vagina uan matriz porque kitilaua flujo.

Ken yotikitakej, nesi ninmej ome DIU kikanauaj tlen ika kimilitok matriz. Pero tla onka óvulación uan espermatozoide kajsi se óvulo, uelis moskaltis uan kalakis ijtik matriz pero amo uelis ompa mokauas porque kanauak. Nin uelis kichiuas ayakmo ma moskalti konetl. Pero ixtlamatkej kijtoaj san ualeua ijkon panoa uan noijki ijkon panoa ika seki pastillas tlen konij siuamej para amo kinpiaskej inkoneuan.

Ik non, amo ikaj uelis kijtos kox DIU tlen kipia cobre noso tlen kipia hormona uelis kichiuas espermatozoide ma ajsiti kanin kajki óvulo. Pero ixtlamatkej noijki kiteititiaj akinmej kintekitiltiaj nonmej DIU amo kinpiaj inkoneuan.

Akinmej yomonamiktijkej tla kinekij kitekitiltiskej DIU, uelis motlapouiskej iuan akin kimati tepajtis itech non tlamantli para kimatiskej tlen okachi kinpaleuis noso kinmijtlakos siuamej. Pero amo ma kichiakan ikaj ma kinmilui, nion akin tlapajtia, tlen moneki kichiuaskej (Rom. 14:12; Gál. 6:4, 5). Akinmej yomonamiktijkej yejuan moneki kipejpenaskej tlen kichiuaskej uan ijkon kiyolpaktiskej toTajtsin Dios uan kuali kipiaskej intlalnamikilis (noijki xikita 1 Tim. 1:18, 19; 2 Tim. 1:3).

^ párr. 4 Se amatlajkuilol tlen kijtoa ken moneki timomaluiskej kijtoa: “DIU tlen okachi kipia cobre tlapaleuia kanaj noventa y nueve por ciento. Non kijtosneki, tla kanaj 100 siuamej kitekitiltiskej, itech se xiuitl xamo san kanaj se siuatl kipias ikone. DIU tlen amo kipia okachi cobre amo okachi tlapaleuia”.

^ párr. 5 Ken DIU tlen kipia hormona kikanaua tlen ika kimilitok matriz, akinmej tlapajtiaj kinmiluiaj siuamej tlen yomonamiktijkej uan tlen amo, ma kintekitiltikan ijkuak kinpanoa sejse metstli tla sapanoa eskisaj.