Xikita nochi

Tlen kiualika

Techpaleuis tla titlaneltokaj

Techpaleuis tla titlaneltokaj

TLA titlaneltokaj, techpaleuis ma tikchiuakan miak tlamantli. Ma tikitakan tleka ijkon tikijtoaj. Satanás amo kineki ma timouikakan iuan Jehová. Pero tla titlaneltokaj, ‘tiktsakuiliskeh ijkuak n diablo techmojmotlas ika kuawitl non xotlatokʼ (Efes. 6:16). Noijki uelis tikixnamikiskej ouijkayotl maski yetos ken se tepetl. Jesús okinmilui imachtijkauan: “Tla nonkipiaskiah tlaneltokálistli maya san kemi se xínatsintli de mostaza, nonkiliskiah nin tepetl: ‘Ximoachiwa iwa nepa ximomanati.’ N tepetl moijkuaniskia” (Mat. 17:20). Okachi kuali timouikaskej iuan Jehová tla titlaneltokaj. Ik non, ma timotlajtlanikan: “¿Tlen kijtosneki titlaneltokaj? ¿Ken tikteititiskej tikpatioitaj tlen tlamachtia Biblia? ¿Ken uelis okachi titlaneltokaskej? ¿Akin moneki itech titlaneltokaskej?” (Rom. 4:3).

¿TLEN KIJTOSNEKI TITLANELTOKAJ?

Titlaneltokaskej amo san kijtosneki tikpatioitaskej tlen tlamachtia Biblia. Porque Biblia kijtoa amo kuali ejekamej noijki kineltokaj kajki toTajtsin Dios uan momojtiaj (Sant. 2:19). Pero ¿tlen kijtosneki titlaneltokaj?

Tikmatij mojmostla tlanesis uan tlayoas. Nin techititia Jehová kichiuas tlen kijtoa.

Biblia kijtoa ome tlamantli ijkuak kijtoa tlen kijtosneki titlaneltokaj. Se tlamantli, kijtoa “tlaneltokálistli ye tlan se kichia ika nochi iyolo” noso tikneltokaj mochiuas (Heb. 11:1a). Kijtosneki tikneltokaj tlen kijtoa Jehová uan melauak kichiuas. Ma tikitakan tleka ijkon tikijtoaj. Jehová okinmilui israelitas: “Tla uelis nankichiuaskej ayakmo ma tlanesi uan tla uelis nankichiuaskej ayakmo ma tlayoa, ijkon ayakmo tlanesis nion tlayoas ijkuak monekis, san ijkon ayakmo nikchiuas tlen onikilui notekipanojka David” (Jer. 33:20, 21). ¿Se tonal yotimokuayejyeko ayakmo tlanesis nion kalakis tonaltsin noso amo keman tlanesis nion tlayoas? Amo. Tla tikmatokej mojmostla tlanesis uan tlayoas, ¿amo tikneltokaj Jehová kichiuas nochi tlen yokijto? (Is. 55:10, 11; Mat. 5:18).

Okse tlamantli, tikneltokaj mochiuas tlen tikchiaj maski ‘amo tikitah’ (Heb. 11:1b). Ma tikitakan itlaj tlen techpaleuis okachi ma tikajsikamatikan. Ma tikijtokan se chokotsin techtlajtlaniaj ken tikmatij onka ejekatl. Moneki tikiluiskej maski amo tikitaj ejekatl, ika timijyotiaj, tikkakij ijkuak ejeka uan okseki tlamantli. Chokotsin kineltoka tlen otikiluijkej porque yotikititijkej melauak onka ejekatl (Rom. 1:20).

MONEKI TIKTEITITISKEJ TIKPATIOITAJ TLEN TLAMACHTIA BIBLIA

Moneki yetos itlaj tlen techpaleuis ma titlaneltokakan, ik non, moneki achto ‘matikixmatikah tlan milák’ (1 Tim. 2:4). Pero amo san non moneki tikchiuaskej. Tlatitlanil Pablo okijkuilo tikteititiaj titlaneltokaj ‘ika toyolo’ (Rom. 10:10). Moneki tikpatioitaskej tlen tlamachtia Biblia uan amo san ma tikneltokakan. Ijkon tikteititiskej tikneltokaj tlen tlamachtia Biblia uan tikchiuaskej tlen timomachtiaj (Sant. 2:20). Ijkuak  ikaj amo kipatioita tlen tlamachtia Biblia, xamo kixtopeuas tlen kiluiaj porque kineki tlajtlakolchiuas (2 Ped. 3:3, 4; Jud. 18). Ik non, akinmej yiuejkika okitakej milagros amo nochtin otlaneltokakej (Núm. 14:11; Juan 12:37). Iespíritu santo Jehová san kinpaleuia akinmej kipatioitaj tlen tlamachtia Biblia uan kitlauelitaj tlen amo melauak (Gál. 5:22; 2 Tes. 2:10, 11).

¿KEN OPEJKI OKACHI TLANELTOKA DAVID?

David sapanoa otlaneltokak (Heb. 11:32, 33). Pero ikalchanejkauan amo otlaneltokakej. Ma tikitakan tleka ijkon tikijtoaj. David okipiaya se ikni tlen omotokayotiaya Eliab, ye amo otlaneltokaya porque okajuak David ijkuak okitlajtlani tleka Goliat okinmixnamiktoka (1 Sam. 17:26-28). Ijkuak tinesij amo titlaneltokaj itech toTajtsin Dios nion techpanoltiliaj totatajuan. David okipiaya chikauak itlaneltokilis porque kuali omouikaya iuan toTajtsin Dios.

Itech Salmo 27 itech versículo 1 kijtoa David okiteititi ken okachi opejki tlaneltoka itech Jehová. Versículo 2 uan 3 kijtoa ye omokuayejyekoaya tlen okipanok uan tlen okinchiuili Jehová akinmej okikokoliayaj. Versículo 4 kijtoa David okipatioitaya itabernáculo Jehová. Versículo 6 kijtoa okiueyichiuaya Jehová iuan oksekimej israelitas. Versículo 7 uan 8 kijtoa nochipa okitlatlaujtiaya Jehová ma kiyekana. Versículo 11 kijtoa David okiluiaya Jehová ma kimachti tlen ojtli kitokaskia. Versículo 13 kijtoa sapanoa okipatioitaya tlaneltokas porque tlamo amo okimatiaya kanin yetoskia.

¿KEN UELIS OKACHI TITLANELTOKASKEJ?

Titlaneltokaskej ken David tla tikchiuaskej ken ye ijkon ken kijtoa Salmo 27. Tlen tikmatij techpaleuia ma titlaneltokakan, ik non, amo okachi oui tikchiuaskej tlen poui itech espíritu santo tla timomachtiaj iTlajtol toTajtsin Dios uan amatlajkuilolmej (Sal. 1:2, 3). Ma timokuayejyekokan itech tlen timomachtiaj uan ijkon timotlasojkamatiskej. Tla okachi tiktlasojkamatiliskej Jehová, okachi tikteititiskej itech titlaneltokaj ijkuak timonechikoskej uan tikintlapouiskej oksekimej tlen kichiuas (Heb. 10:23-25). Noijki tikteititiskej itech titlaneltokaj tla nochipa tiktlatlaujtiaj uan amo timosotlauaj (Luc. 18:1-8). Ik non, nochipa ma tiktlatlaujtikan Jehová uan ma tikneltokakan tiktekipachoaj (1 Tes. 5:17; 1 Ped. 5:7). Ijkuak titlaneltokaj tikchiuaj tlen moneki uan non sapanoa techyolchikaua (Sant. 2:22).

MA TITLANELTOKAKAN ITECH JESÚS

Se yoak ijkuak yikimiktiskiaj Jesús, okinmilui imachtijkauan: “Xikneltokakah Dios iwa techneltokakah Ne noiwa” (Juan 14:1). Nikan tikitaj moneki titlaneltokaskej itech Jesús uan  amo san itech Jehová. ¿Ken tikchiuaskej? Ma tikitakan eyi tlamantli tlen techpaleuis.

¿Tlen kijtosneki titlaneltokaskej itech Jesús?

Se tlamantli, imikilis Jesús yetoskia ken se tetliokolil tlen otechmakak toTajtsin Dios. Pablo okijto: “Niyolitok porke onikneltokak Ikone n Totajtsi Dios, Akin satlawel onechtlasojtlak iwa omotemák makimiktikah nopatka” (Gál. 2:20). Ijkuak titlaneltokaj itech imikilis Jesús, tikmatij topatka omotemakak, tikmatij ijkon toTajtsin Dios techtlapojpoluia, uelis tikpiaskej yolilistli tlen amo keman tlamis uan kiteititia techtlasojtla (Rom. 8:32, 38, 39; Efes. 1:7). Nin techpaleuis amo ma timokuayejyekokan amitlaj topati (2 Tes. 2:16, 17).

Ome tlamantli, ma tiktlatlaujtikan Jehová ika imikilis Jesús. Uelis tiktlatlaujtiskej Jehová porque Jesús topatka omotemakak uan ijkon ‘techiknomatis ika ikualtilis iwa matechpalewi keman itla techpoloa’ (Heb. 4:15, 16; 10:19-22). Ma timotlatlaujtikan uan non techpaleuis amo ma titlajtlakolchiuakan (Luc. 22:40).

Eyi tlamantli, ma tiktlakamatikan Jesús. Juan okijkuilo: “Akin kineltoka Ikone Dios, yolitos nochipa [tlaltikpak]. Pero akin amo kineki kitlakitas Ikone Dios, amo yolitos [tlaltikpak] yej kiselis ikualanilis Dios” (Juan 3:36). Ma tikitakan tleka Juan otlajto itech akinmej tlaneltokaj uan akinmej amo tetlakamatij. Tikteititiaj titlaneltokaj itech Jesús ijkuak tiktlakamatij. Noijki tiktlakamatij ijkuak tikchiuaj “tlan kijtoa itlanawatil Cristo”. Nin kijtosneki ma tikchiuakan tlen otlamachti uan tlen otlanauati (Gál. 6:2). Noijki tiktlakamatij ijkuak tikchiuaj tlen technauatia “tlakeuali yolmelajki uan ixtlamatki” (Mat. 24:45TNM). Tla ijkon tikchiuaskej, uelis tikixnamikiskej nochi ouijkayotl (Luc. 6:47, 48).

“NOCHIPA XIKNELTOKAKAH DIOS. NON TLANELTOKÁLISTLI MIAK IPATI”

Se tonal, se tlakatl okilui Jesús: “¡Nitlaneltoka, pero techpalewi para okachi manitlaneltoka!” (Mar. 9:24). Nin tlakatl okatka yolyamanki uan okijto omonekiaya okachi tlaneltokaskia. Ijkon ken ye ualeua tinochtin monekis okachi titlaneltokaskej uan tinochtin uelis axkan okachi ijkon tikchiuaskej. Ijkon ken yotikitakej, titlaneltokaj ijkuak timomachtiaj iTlajtol toTajtsin Dios uan ijkuak itech timokuayejyekoaj. Non techpaleuis okachi ma tiktlasojkamatilikan Jehová. Noijki okachi titlaneltokaj ijkuak tikueyichiuaj Jehová iuan tokniuan, ijkuak tikintlapouiaj oksekimej tlen kichiuas uan ijkuak nochipa timotlatlaujtiaj. ToTajtsin Dios techteochiuas tla okachi titlaneltokaj. Biblia kijtoa: “Nochipa xikneltokakah Dios. Non tlaneltokálistli miak ipati” uan techpaleuis ma tiyetokan itech itlasojtlalis Jehová (Jud. 20, 21).