Xikita nochi

Tlen kiualika

 TLAMACHTIL 32

Okachi ma tikintlasojtlakan tokniuan

Okachi ma tikintlasojtlakan tokniuan

“Ne niktlajtlanilia Dios keman nimotiotsajtsilia xikpiakah okachi miak tlasojtlálistli” (FILIP. 1:9).

TLAKUIKALI 106 Okachi ipati ma nitetlasojtla

XIKILNAMIKTO *

1. ¿Akinmej otlapaleuijkej ma mochiua se tlanechikol ompa Filipos?

MIAKEJ tlen ochantiayaj Filipos okinekiayaj kimatiskej kuali tlajtolmej itech Tekiuajkayotl ijkuak ompa oajsito Pablo, Silas, Lucas uan Timoteo. Ninmej naui tokniuan otlapaleuijkej ma mochiua se tlanechikol ompa Filipos. Akinmej opejki momachtiaj nesi opejki monechikoaj ikalijtik Lidia porque ye okipaktiaya kinselis tokniuan (Hech. 16:40).

2. ¿Tlen ouijkayotl okixnamikej tokniuan?

2 Pero nonmej tokniuan kipiaskiaj ouijkayotl. Satanás okichi ma kinkokolikan nonmej naui tokniuan uan amo okinekiaya ma tetlapouikan. Tekiuajkej okikitskijkej Pablo uan Silas, okinuitekej uan okintsakej. Mostlatika okinkajkajkej. ¿Tlen okichijkej? Okintlajpalotoj tokniuan uan okinyolchikajkej. Satepan Pablo, Silas uan Timoteo oksekan oyajkej uan nesi Lucas ompa omoka. ¿Tlen okichijkej tokniuan tlen ompa ochantiayaj? Omoyekankej ika espíritu santo uan okitekichiuilijkej Jehová (Filip. 2:12). Pablo okiyolpakti tlen okichijkej tokniuan.

3. Ijkon ken kijtoa Filipenses 1:9-11, ¿tlen okijto Pablo ijkuak omotlatlaujti?

3 Opanok majtlaktli xiuitl uan Pablo okijkuilo se carta. Ijkuak tiktlajtoltiaj san niman tikitaj Pablo sapanoa okintlasojtlayaj tokniuan. Okinmilui okinmilnamikiaya uan noijki okintlasojtlaya ‘ika nochi iyolo  kemi Cristo Jesús okintlasojtlaya’ (Filip. 1:8). Okinmilui inpatka omotlatlaujtiaya. Noijki okinmilui okachi ma motlasojtlakan, ma kitakan tlen okachi omonekiaya kipatioitaskej, amo ma kichiuakan tlen amo kuali, amo ma kichiuakan oksekimej ma tlajtlakolchiuakan uan noijki omonekiaya ma kinchiuilikan tlen kuali oksekimej. Axkan noijki sapanoa techpaleuia tlen okijkuilo Pablo (xiktlajtolti Filipenses 1:9-11). Itech nin tlamachtil tikitaskej tlen okijto uan ken uelis tikchiuaskej.

OKACHI MA TIKINTLASOJTLAKAN TOKNIUAN

4. (1) Ijkon ken kijtoa 1 Juan 4:9, 10, ¿ken yokiteititi Jehová sapanoa techtlasojtla? (2) ¿Ken moneki tiktlasojtlaskej toTajtsin Dios?

4 Jehová okiteititi sapanoa techtlasojtla ijkuak okiualtitlanki iKone topatka ma kimiktikan uan ijkon techtlapojpoluiskia (xiktlajtolti 1 Juan 4:9, 10). Non techyolinia noijki ma tiktlasojtlakan (Rom. 5:8). ¿Ken moneki tiktlasojtlaskej toTajtsin Dios? Jesús okijto ken tikchiuaskej ijkuak okinankili se fariseo: “Xiktlasojtla Moteko Dios ika nochi moyolo, ika nochi moalma iwa ika nochi motlalnamikilis” (Mat. 22:36, 37). Ik non, tiknekij tiktlasojtlaskej Jehová ika nochi toyolo. Mojmostla tiknekij okachi tiktlasojtlaskej. Pablo okinmilui tokniuan tlen ochantiayaj Filipos omonekiaya okachi kitlasojtlaskej Jehová. ¿Tlen tikchiuaskej tla tiknekij okachi tiktlasojtlaskej toTajtsin Dios?

5. ¿Tlen tikchiuaskej tla tiknekij okachi tiktlasojtlaskej toTajtsin Dios?

5 Moneki tikixmatiskej toTajtsin Dios tla tiknekij tiktlasojtlaskej. Biblia kijtoa: “Akin amo tetlasojtla ayamó kixmati Dios, porke Dios Ye n tlasojtlálistli” (1 Juan 4:8). Pablo okijto okachi tiktlasojtlaj Jehová ijkuak tikmatij tlen kijtoa iTlajtol uan ken mokuayejyekoa (Filip. 1:9). Opejki tiktlasojtlaj toTajtsin Dios ijkuak otikmatkej akin ye uan ijkuak opejki timomachtiaj Biblia. Pero opejki okachi tiktlasojtlaj ijkuak otikmatiajkej ken iyelis. Ik non, moneki ma timomachtikan iTlajtol uan itech ma timokuayejyekokan (Filip. 2:16).

6. Ijkon ken kijtoa 1 Juan 4:11, 20, 21, ¿akinmej moneki ma tikintlasojtlakan?

6 ToTajtsin Dios sapanoa techtlasojtla uan non techyolinia ma tikintlasojtlakan tokniuan (xiktlajtolti 1 Juan 4:11, 20, 21). Xamo timokuayejyekoaj amo oui tikintlasojtlaskej tokniuan porque tiktekichiuiliaj Jehová uan tikteititiaj ken iyelis. Noijki tikchiuaj ken Jesús porque techtlasojtla uan topatka omotemakak. Pero ualeua oui tikitaj tikintlasojtlaskej tokniuan. Ma tikitakan tlen okinpanok tokniuan tlen ochantiayaj Filipos.

7. ¿Ken techpaleuia tlen Pablo okilui Evodia uan Síntique?

7 Evodia uan Síntique okipiayaj kuali inyelis uan san sekan okitekichiuilijkej Jehová iuan Pablo. Pero nesi omokualanijkej, ik non, ayakmo kuali omouikayaj. Ijkuak Pablo okijkuilo carta, okilui Evodia uan Síntique amo ma mokualanijtokan. Okinmilui “mamoyekwikakah kemi iknimeh inawak Toteko” (Filip. 4:2, 3). Pablo noijki okinmilui nochtin tokniuan: “Xikyekchiwakah nomotekih iwa amo ximoixtokatokah” (Filip. 2:14). Tlen  okinmilui Pablo nonmej ome tokniuan okinpaleui nochtin ma motlasojtlakan.

¿Tleka moneki ma tikitakan tlen kuali kichiuaj tokniuan? (Xikita párrafo 8). *

8. ¿Tleka ualeua oui tikintlasojtlaskej tokniuan uan tlen uelis tikchiuaskej?

8 Ualeua oui tikintlasojtlaskej tokniuan porque xamo san tikitaj tlen amo kuali kichiuaj ken okipanok Evodia uan Síntique. Tinochtin tikchiuaj itlaj amo kuali. Ayakmo tikintlasojtlaskej tokniuan tla san tikitaskej tlen amo kuali kichiuaj. Ma tikitakan tlen uelis panos. Ma tikijtokan se tokni okilka techpaleuis titlachipauaskej kanin timonechikoaj, ik non, otechkualani. Pero okachi tikualaniskej tla peuas tikilnamikiskej tlen amo kuali yokichi uan ayakmo tiktlasojtlaskej. ¿Tlen tikchiuaskej tla ijkon techpanos? Ma tikilnamiktokan Jehová tinochtin techtlasojtlaj maski titlajtlakolejkej. Ik non, ma titetlasojtlakan ken Jehová uan ma tikitakan tlen kuali kichiuaj tokniuan. Ijkon san sekan tiyetoskej tla timochijchikauaj tikintlasojtlaskej (Filip. 2:1, 2).

MA TIKCHIUAKAN “TLAN OKACHI KUALI”

9. ¿“Tlan okachi kuali” okinmilui Pablo tokniuan ma kichiuakan?

9 Jehová okilui Pablo ma kinmilui tokniuan tlen ochantiayaj Filipos ma kichiuakan “tlan okachi kuali” (Filip. 1:10). “Tlan okachi kuali” kijtosneki mochipauas itoka toTajtsin Dios, tlen kichiuas uan tinochtin moneki tiyetoskej ika yolseuilistli (Mat. 6:9, 10; Juan 13:35). Tikteititiskej tiktlasojtlaj Jehová tla tikpatioitaj nochi tlen yotikijtojkej.

10. ¿Tlen moneki tikchiuaskej tla tiknekij tikpiaskej “nemílistli chipawak”?

10 Pablo okinmilui tokniuan ma kipiakan “nemílistli chipawak”. Nin amo kijtosneki amo keman tikchiuaskej tlen amo kuali. Amo uelis tikchiuaskej nochi kuali ken Jehová porque ye amo tlajtlakole. Pero ye amo san kitas tlen amo kuali tikchiuaj tla timochijchikauaj okachi tikintlasojtlaskej tokniuan uan tla tikchiuaj tlen kuali. Tikteititiskej tikintlasojtlaj tokniuan tla amo tikchiuaj ma tlajtlakolchiuakan.

11. ¿Tleka amo ma tikchiuakan oksekimej ma tlajtlakolchiuakan?

11 Timoouijtiliskej tla tikchiuaskej oksekimej ma tlajtlakolchiuakan. Xamo tlajtlakolchiuaskej tokniuan tla timoyolpaktiaj ika tlen amo kuali, tla amo kualtsin timotlakentiaj noso titekipanoaj kanin amo moneki. Xamo timokuayejyekoaj amo titlajtlakolchiuaj. Pero tlen tikpejpenaj tikchiuaskej uelis kinkuejsos intlalnamikilis oksekimej uan tlajtlakolchiuaskej. Ik non, Jesús okijto akin ijkon kichiua, “okachi kuali makilpilikah itech ikech se weyi tetl iwa makonkajkawakah kan weyi atl kan okachi tlawejkatla” (Mat. 18:6).

12. ¿Tlen techmachtia tlen okichijkej sekimej precursores?

12 Ma tikitakan tlen okichijkej sekimej precursores. Se tokni uan isiua amo okinekiayaj kichiuaskej oksekimej ma tlajtlakolchiuakan. Kanin monechikoaj, okatka se tokni uan isiua tlen yikin omoapolaktijkej uan yejuan okinmiskaltijkej kanin amo okinkauiliayaj ma kichiuakan seki tlamantli. Yejuan omokuayejyekoayaj akinmej tikchiuaj ken Cristo amo kuali ma tiakan cine maski tikitaskiaj se película tlen amo kipia itlaj pitsotik. Ik non,  omokuejsojkej ijkuak tokni uan isiua tlen okatkaj precursores okitatoj se película. Ik non, precursores amo oyajkej cine hasta ijkuak tokniuan kuali okimachtijkej intlalnamikilis uan okajsikamatkej tlen kuali uan tlen amo kuali (Heb. 5:14). Amo oyajkej cine porque okinekiayaj kiteititiskej kintlasojtlaj tokniuan (Rom. 14:19-21; 1 Juan 3:18).

13. ¿Ken uelis tikchiuaskej ikaj ma tlajtlakolchiua?

13 Noijki ualeua xamo tikchiuaskej ikaj ma tlajtlakolchiua. Ma tikitakan ken uelis panos. Ma timokuayejyekokan ikaj momachtijtok Biblia uan mochijchikaua ayakmo tlauanas. Kimati ayakmo keman tlakonis. Okipatlak inemilis uan omoapolakti. Pero se tonal, se tokni okilui ma tlakuati ikalijtik iuan oksekimej tokniuan. Ijkuak yotlakuajtokaj tokni okilui kox koniskia alcohol. Okilui: “Yotimoapolakti uan mitsyekana iespíritu santo Jehová. Xikilnamiki timonauatis poui itech espíritu santo. Amo sapanoa titlakonis tla tikmati san tepitsin moneki tikonis”. Itlajtlakol yetos non tokni tla ye oksepa tlauanas.

14. ¿Tlen techilnamiktia Filipenses 1:10 ijkuak timonechikoaj?

14 Ijkuak timonechikoaj tikkakij ken tikchiuaskej tlen kijtoa Filipenses 1:10. Techilnamiktia tlen okachi kipatioita Jehová. Okse, techilnamiktia ma tikchiuakan tlen timomachtiaj uan ijkon amo tikchiuaskej tlen amo kuali. Noijki  techilnamiktia ma titetlasojtlakan uan ma tikinpaleuikan oksekimej (Heb. 10:24, 25). Ijkuak tokniuan techyolchikauaj, okachi tikintlasojtlaj uan noijki toTajtsin Dios. Amo tikchiuaskej ma tlajtlakolchiuakan tokniuan tla tiktlasojtlaj Jehová.

MA TIMOCHIJCHIKAUAKAN TIKCHIUASKEJ “TLAN KUALI”

15. ¿Tlen kijtosneki tikchiuaskej “tlan kuali”?

15 Pablo okilui Jehová ma kinpaleui tokniuan tlen ochantiayaj Filipos ma kichiuakan “tlan kuali” (Filip. 1:11). Nin kijtosneki omonekiaya kitlasojtlaskej Jehová uan noijki inmikniuan. Noijki tetlapouiskiaj otlaneltokayaj itech Jesús uan tlen okichiayaj. Pablo okinmilui: “Nomejwah nontlawiah kemi n sítlalteh ixpa n tlaltikpaktlakah” (Filip. 2:15). Okinpaleui tlen okinmilui porque Jesús okijto imachtijkauan yetoskiaj ken “tláwilteh itech nin tlaltíkpaktli” (Mat. 5:14-16). Noijki okinnauati ma kinmachtikan oksekimej porque yetoskiaj “itech nochi n tlaltíkpaktli” (Mat. 28:18-20; Hech. 1:8). Tikchiuaj tlen kuali ijkuak timochijchikauaj titetlapouiskej.

Ijkuak Pablo okitsakej ikalijtik ompa Roma, okinmijkuilili se carta tokniuan tlen ochantiayaj Filipos. Noijki okintlapoui akinmej okimaluiayaj uan akinmej oyayaj kitlajpalotiuij. (Xikita párrafo 16).

16. Ijkon ken kijtoa Filipenses 1:12-14, ¿ken uelis tikteititiskej tikatej ken “tláwilteh” maski tikixnamikiskej ouijkayotl? (Xikita ixko revista).

16 Uelis tiyetoskej ken “tláwilteh” maski san kanin tiyetoskej. Ualeua tikitaj itlaj techtsakuilia ijkuak titetlapouiaj pero satepan techpaleuis ma techkakikan. Pablo ijkon okipanok. Tekiuajkej okitsakej ikalijtik ompa Roma ijkuak okintlajkuilili tokniuan tlen ochantiayaj Filipos. Pero nochipa okintlapoui akinmej okimaluiayaj uan akinmej oyayaj kitlajpalotiuij.  Tokniuan sapanoa “omoyolchikajkeh tetlapowiskeh de itlajtol Dios” (xiktlajtolti Filipenses 1:12-14; 4:22).

Ma timochijchikauakan nochtin ma tikintlapouikan. (Xikita párrafo 17). *

17. Xikijto ken tetlapouiaj tokniuan maski kixnamikij ouijkayotl.

17 Miakej tokniuan yolchikauakej ken Pablo. Sekimej chantij kanin amo kinkauiliaj ma tetlapouitij tekalijtik pero yejuan kitemoaj ken kichiuaskej (Mat. 10:16-20). Itech se altepetl, se tlayekanki itech circuito okinmilui tokniuan ma kintlapouikan inkalchanejkauan, akinmej ik ompa chantij, akinmej inmiuan momachtiaj, akinmej inmiuan tekipanoaj uan nochtin tlen okinmixmatiayaj. Opanok ome xiuitl uan omomiaktilijkej tokniuan itech non circuito. Xamo tejuan techkauiliaj ma titetlapouikan. Pero ninmej tokniuan techititiaj miak ipati ma timochijchikauakan nochtin ma tikintlapouikan uan ma tikneltokakan Jehová techpaleuis maski tikixnamikiskej ouijkayotl (Filip. 2:13).

18. ¿Tlen moneki ma tikchiuakan?

18 Axkan moneki ma tikchiuakan tlen Pablo okinmilui tokniuan tlen ochantiayaj Filipos. Ma tikitakan tlen okachi moneki tikpatioitaskej, amo ma tikchiuakan tlen amo kuali, amo ma tikchiuakan oksekimej ma tlajtlakolchiuakan uan ma tikinchiuilikan tlen kuali oksekimej. Ijkon okachi tikintlasojtlaskej tokniuan uan tikueyichiuaskej Jehová akin sapanoa techtlasojtla.

TLAKUIKALI 17 Nikneki nikchiuas

^ párr. 5 Axkan okachi moneki tikintlasojtlaskej tokniuan. Sapanoa techpaleuia carta tlen Pablo okinmijkuilili tokniuan tlen ochantiayaj Filipos. Porque moneki okachi tikintlasojtlaskej tokniuan maski ualeua techkualaniskej.

^ párr. 54 FOTOS: Tokniuan tlachipauaj kanin timonechikoaj pero se tokni motlapouia uan ayakmo tlachipaua. Ik non, tokni Mike kualani porque mokuayejyekoa tokni Joe moneki tlachipauas uan amo san ma motlapouijto. Pero satepan kita tokni Joe kipaleuia se tokni tlen yikipia miak xiuitl. Non kilnamiktia Mike ma kita tlen kuali kichiua tokni Joe.

^ párr. 58 FOTOS: Se tokni chanti kanin amo kinkauiliaj ma tetlapouikan pero ye kitlapouia se tlakatl maski san ichtaka. Satepan kanin tekipanoa kitlapouia se tlakatl ijkuak omoseuijkej.