Xikita nochi

Tlen kiualika

 TLAMACHTIL 33

Jehová kinmakixtis akinmej techkakij

Jehová kinmakixtis akinmej techkakij

“Ximotlachili te monewia iwa kuali xikita tlan tiktemachtia, iwa ayik ximosojsotlawa. Tla ijkó tikchiwas, amo san te timomakixtis, yej noiwa momakixtiskeh akimeh mitskakiskeh” (1 TIM. 4:16).

TLAKUIKALI 67 ToTajtsin Dios kineki ma nitetlapoui

XIKILNAMIKTO *

1. ¿Tlen techpaktiskia ma kichiuakan tokalchanejkauan?

SE TOKNI tlen itoka Pauline * okijto: “Ijkuak opejki nimomachtia Biblia, onimokuayejyeko sapanoa kualtsin tla niyetoskia iuan nochtin nokalchanejkauan itech xochitlali. Noijki onimokuayejyeko kualtsin yetoskia tla nonamik tlen itoka Wayne, tochokotsin uan ne san sekan tiktekichiuiliskej Jehová”. Xamo noijki ijkon timokuayejyekoaj tla tokalchanejkauan amo kixmatij Jehová nion kitlasojtlaj.

2. ¿Tlen tlajtlanilmej tikinnankiliskej?

2 Amo uelis tikinchiualtiskej tokalchanejkauan ma momachtikan Biblia. Pero uelis tikchiuaskej kuali ma techkakikan (2 Tim. 3:14, 15). ¿Tleka moneki ma tikintlapouikan tokalchanejkauan? ¿Tleka moneki ma tikinmajsikamatikan? ¿Tlen tikchiuaskej tla tiknekij noijki ma kitlasojtlakan Jehová? ¿Ken uelis techpaleuiskej tokniuan?

¿TLEKA MONEKI MA TIKINTLAPOUIKAN TOKALCHANEJKAUAN?

3. Ijkon ken kijtoa 2 Pedro 3:9, ¿tleka moneki ma tikintlapouikan tokalchanejkauan?

3 Ayakmo miak poliui uan Jehová kipojpolos nochi tlen Satanás kiyekana. Jehová san kinmakixtis akinmej kinekij kipiaskej yolilistli tlen amo keman tlamis (Hech. 13:48). Timochijchikauaj tikintlapouiskej akinmej chantij ik kanin tichantij. Ik non, noijki tiknekij tokalchanejkauan  ma kitekichiuilikan Jehová. Ye sapanoa techtlasojtla uan ‘amo kineki aka mamoixpolo, yej nochteh mamoyolpatlakah’ (xiktlajtolti 2 Pedro 3:9).

4. ¿Ualeua tlen amo kuali tikchiuaj ijkuak tikintlapouiaj tokalchanejkauan?

4 Ma tikilnamiktokan uelis kualtsin titetlapouiskej noso amo. Titetlakaitaj ijkuak tikintlapouiaj akinmej amo tikinmixmatij pero xamo amo tikintlakaitaj tokalchanejkauan ijkuak tikintlapouiaj.

5. ¿Tlen moneki tikilnamiktoskej ijkuak tikintlapouiskej tokalchanejkauan?

5 Xamo timoyolkokoaj porque ijkuak opejki tikintlapouiaj, amo otikchijkej ken omonekiaya uan axkan timokuayejyekoaj uelis okachi kuali tikchiuaskiaj. Pablo okinmilui tokniuan: “Nomotlajtol nochipa mateyolpakti iwa amo xikinsojsotlawakah, iwa xikmatikah kenomi nontlanankiliskeh ijkuak itla nomechtlajtlaniskeh” (Col. 4:5, 6). Moneki tikilnamiktoskej non tlamantli ijkuak tikintlapouiskej tokalchanejkauan. Tlamo tikinyolkokoskej uan ayakmo techkakiskej.

¿TLEN MONEKI TIKCHIUASKEJ TLA TIKNEKIJ MA TECHKAKIKAN TOKALCHANEJKAUAN?

Tikchiuaj tlen timomachtiaj ijkuak tikinmajsikamatij oksekimej uan tikpiaj kuali toyelis. (Xikita párrafo 6 a 8). *

6, 7. Xikijto ken uelis okachi tikajsikamatiskej tonamik tla amo kitekichiuilia Jehová.

6 Ma tikinmajsikamatikan. Pauline tlen itech yotimotlapouijkej, okijto: “Achto san oniknekiaya niktlapouijtos nonamik itech iTlajtol toTajtsin Dios. Amo onikiluiaya okseki tlamantli”. Pero Wayne amo okachi okimatiaya tlen tlamachtia Biblia uan amo okajsikamatiaya tlen okitlapouiaya. Ye omokuayejyekoaya Pauline san okinekiaya kitlapouijtos itech ireligión. Wayne omomojtiaya porque omokuayejyekoaya  xamo isiua okalak itech se secta temomojti uan san okikajkayajkej.

7 Pauline okijto okachi okatka iuan tokniuan itlamian semana uan seki tiotlak ijkuak omonechikoaya uan ijkuak itlaj okichiuayaj. Okijto: “Ijkuak Wayne oejkoya kalijtik amikaj ompa okatka uan iselti omomachiliaya”. Okilnamikiaya isiua uan ikonetsin. Amo okinmixmatiaya akinmej omouikayaj iuan Pauline uan omokuayejyeko okachi okintlasojtlaya. Ik non, okilui kikajkauaskia inmixpan tekiuajkej. Nin techititia Pauline uelis okachi kajsikamatiskia inamik.

8. Ijkon ken kijtoa 1 Pedro 3:1, 2, ¿tlen uelis kitaskej tokalchanejkauan?

8 Ma tikchiuakan tlen timomachtiaj. Ualeua tokalchanejkauan okachi kitaj tlen tikchiuaj uan amo tlen tikinmiluiaj (xiktlajtolti 1 Pedro 3:1, 2). Satepan Pauline okajsikamatki tlen omonekiaya kichiuas. Okijto: “Wayne otechtlasojtlaya uan amo okinekiaya ma timokajkauakan inmixpan tekiuajkej. Pero tlen onechilui onechpaleui ma nikajsikamati omonekiaya nikchiuas tlen Jehová techiluia ma tikchiuakan akinmej yotimonamiktijkej. Omonekiaya nikchiuas tlen onimomachtiaya uan amo san niktlapouiskia tlen nikneltoka”. Ik non, Pauline ayakmo okichiualti inamik ma kikaki tlen tlamachtia Biblia uan opejki kitlapouia tlen mojmostla okinpanoaya. Wayne okitak isiua okipiaya okachi kualtsin iyelis uan ichokotsin otetlakamatiaya (Prov. 31:18, 27, 28). Okitak okipatlakej inyelis, ik non, okachi opejki  kikaki tlen tlamachtia Biblia (1 Cor. 7:12-14, 16).

9. ¿Tleka amo ma timosotlauakan ijkuak tikintlapouiaj tokalchanejkauan?

9 Amo ma timosotlauakan ijkuak tikintlapouiaj tokalchanejkauan. Jehová ijkon kichiua. Ik non, technauatia miak uelta ma tikintlapouikan oksekimej uan ye uelis kinmakas yolilistli tlen amo keman tlamis (Jer. 44:4). Pablo okilui Timoteo nochipa ma kintlapoui oksekimej porque ijkon uelis kimakixtiskia toTajtsin Dios uan noijki akinmej okikakiayaj (1 Tim. 4:16). Tikintlasojtlaj tokalchanejkauan, ik non, tiknekij ma kimatikan tlen tlamachtia Biblia. Tlen okichi Pauline okipaleui inamik uan ichokotsin. Axkan yolpakij porque san sekan kitekichiuiliaj Jehová ken precursores uan Wayne omochi tlayekanki.

10. ¿Tleka moneki tikmatiskej timochiaskej?

10 Ma tikmatikan timochiaskej. Ijkuak peua tiktlakamatij tlen kijtoa iTlajtol toTajtsin Dios xamo tokalchanejkauan amo kajsikamatiskej tlen tikneltokaj uan tlen tikchiuaj. Yejuan kitaj ayakmo inmiuan tiiluichiuaj nion timokajkalakiaj itech política. Ik non, ualeua kualanij (Mat. 10:35, 36). Pero amo ma timokuayejyekokan amo keman kipatlaskej inyelis. Tla ayakmo tikintlapouiskej, yetoskia ken yotikinmiluijkej amo kinnamiki kipiaskej yolilistli tlen amo keman tlamis. Pero Jehová yokitlali Jesús ye ma tlaixkomaka uan amo tejuan (Juan 5:22). Tla tikmatij timochiaskej, xamo satepan kinekiskej kixmatiskej Jehová (xikita recuadro “ Ma tiktekitiltikan página tlen tikpiaj itech Internet”).

11-13. ¿Tlen techmachtia tlen okichi Alice?

11 Kualtsin ma tikintlapouikan pero amo ma tikchiuakan tlen techiluiaj (Prov. 15:2). Ma tikitakan tlen okichi Alice. Opejki momachtia Biblia ijkuak uejka ochantito pero itatajuan amo otlaneltokayaj itech toTajtsin Dios uan okinpaktiaya política. Alice okimatiaya omonekiaya kintlapouis tlen omomachtijtoka. Okijto: “Tla timokuayejyekoaj satepan tikintlapouiskej tokalchanejkauan, okachi kualaniskej”. Ik non, okintlajkuililiaya itatajuan uan okintlajtlaniaya tlen omokuayejyekoayaj ijkuak moijtoa ma titetlasojtlakan uan okseki tlamantli (1 Cor. 13:1-13). Okintlasojkamatiliaya kuali okiskaltijkej uan itlaj okintitlaniliaya. Ijkuak oyaya kintlajpaloti, okipaleuiaya inantsin. Pero itatajuan amo okinpakti ijkuak yikin okintlapoui tlen ye okineltokaya.

12 Alice nochipa okitlajtoltiaya Biblia ijkuak oyaya kintlajpaloti itatajuan. Ijkon inantsin okitak okipatioitaya iTlajtol toTajtsin Dios. Noijki itajtsin okijto momachtiskia Biblia uan ijkon kimatiskia tleka ichpoch okse tlamantli kineltoka uan noijki kiluiskia amo melauak tlen kineltoka. Alice okijto: “Oniktliokoli se Biblia uan ompa onikijkuilili itlaj kualtsin”. ¿Tlen okichi itajtsin? Amo okajsik itlaj tlen amo melauak uan okitlajtlachialti tlen okitlajtolti.

13 Moneki tikteititiskej kuali toyelis pero amo ma tikinkauilikan ma kipatlakan tlen tikneltokaj (1 Cor. 4:12b). Alice otlaxiko ijkuak inantsin amo okipaktiaya tlen kineltoka. Okijto: “Ijkuak onimoapolakti nonantsin onechilui amo kuali noyelis”.  ¿Tlen okichi Alice? Ye okijto: “San niman onikyekilui yonikijto niyetoskia iTlaixpantijka Jehová uan amo nikkauaskia. Pero onikilui sapanoa oniktlasojtlaya. San sekan otichokakej uan satepan oniktlakualchiuili. Ijkuakon nonantsin okitak Biblia onechpaleui ma nikpia kuali noyelis”.

14. ¿Tleka amo kuali tla tikchiuaskej tlen techiluiaj tokalchanejkauan?

14 Xamo tokalchanejkauan amo san niman kajsikamatiskej tleka tikpatioitaj tiktekichiuiliaj toTajtsin Dios. Ma tikitakan tlen okachi okipanok Alice. Ye omochi precursora uan inantsin oksepa ochokak porque ayakmo omomachti tlen yejuan okinekiayaj. Pero Alice okinyekilui tleka ayakmo momachtiskia. Okijto: “Tla tikchiuaskej tlen techiluiaj tokalchanejkauan, satepan kinekiskej ma tikchiuakan nochi tlen yejuan kinekij. Pero tla kuali tikinyekiluiskej tlen tikneltokaj xamo satepan techkakiskej ijkuak tikintlapouiskej”. Ijkon okipanok Alice. Axkan itatajuan tlapaleuiaj ken precursores uan noijki itajtsin tlayekanki.

¿KEN UELIS TECHPALEUISKEJ TOKNIUAN?

¿Ken uelis kinpaleuiskej tokniuan tokalchanejkauan tlen amo kitekichiuiliaj Jehová? (Xikita párrafo 15 uan 16). *

15. Ijkon ken kijtoa Mateo 5:14-16 uan 1 Pedro 2:12, ¿ken uelis kinpaleuiskej tokniuan tokalchanejkauan?

15 Jehová kinpaleuia itekipanojkauan ma kichiuakan tlen kuali uan ijkon kinyoltilanas oksekimej (xiktlajtolti Mateo 5:14-16; 1 Pedro 2:12). Tla monamik amo kitekichiuilia Jehová, ¿yikinmixmati tokniuan tlen inmiuan timonechikoa? Pauline tlen itech yotimotlapouijkej, okinmiluiaya tokniuan ma tlakuatij ikalijtik uan ijkon Wayne  kinmixmatiskia. Wayne okijto se tokni okipaleui amo ma kinchikoita tokniuan. Ye okijto: “Se tonal, se tokni amo otekipanoto uan nouan okitak se partido. Ijkon onikajsikamatki noijki okipaktiaya kichiuas okseki tlamantli”.

16. ¿Tleka moneki tikinmiluiskej tokalchanejkauan touan ma monechikokan?

16 Noijki uelis tikinmiluiskej tokalchanejkauan touan ma monechikokan (1 Cor. 14:24, 25). Wayne opejki monechikoa ijkuak otikilnamikej imikilis Jesús porque non nechikol amo uejkaua uan mochiua tiotlak. Ye okijto: “Amo nikilnamiki tlen otechiluijkej non tonal pero nikilnamiki kuali onechselijkej. Kuali onechtlajpalojkej. Onikitak kuali inyelis”. Se tokni uan isiua okipaleuijkej Pauline okimaluiayaj ichokotsin ijkuak oyaya tetlapouiti uan ijkuak omonechikoaya. Ik non, ijkuak Wayne okinek kimatis tlen tlamachtia Biblia okilui non tokni ma kimachti.

17. (1) ¿Tleka amo ma timoyolkokokan tla tokalchanejkauan amo kinekij momachtiskej tlen kijtoa Biblia? (2) ¿Tleka moneki nochipa ma tikintlapouikan tokalchanejkauan?

17 Tiyolpakiskej tla se tonal nochtin tokalchanejkauan kitekichiuiliskej Jehová. Ualeua maski timochijchikauaskej tikintlapouiskej xamo amo keman kinekiskej momachtiskej tlen kijtoa Biblia. Amo ma timoyolkokokan tla ijkon techpanos. Amikaj uelis tikchiualtiskej ma kineltoka tlen tikneltokaj. Xamo uelis tikinpaleuiskej tla kitaj tiyolpakij tiktekichiuiliaj toTajtsin Dios. Ma tiktlatlaujtikan Jehová ma kinpaleui, kualtsin ma tikintlapouikan uan ma tikinpaleuikan (Hech. 20:20). Noijki ma tikmatokan Jehová techteochiuas tla timochijchikauaj tikintlapouiskej. Ye kinmakixtis tokalchanejkauan tla kikakiskej iTlajtol.

TLAKUIKALI 57 Tiknekij nochtin ma kixmatikan Jehová

^ párr. 5 Tinochtin techpaktiskia tokalchanejkauan ma kixmatikan Jehová. Pero yejuan kijtoskej kox kinekij ijkon kichiuaskej. Axkan timomachtiskej tlen tikchiuaskej tla tiknekij okachi ma techkakikan tokalchanejkauan.

^ párr. 1 Itech nin tlamachtil sekimej otikinpatilijkej intoka.

^ párr. 53 FOTO: Se tokni kipaleuia itajtsin tlen amo kitekichiuilia Jehová ijkuak kiyektlaliaj se carro. Pero ijkuak omajxili okititi se video tlen kajki itech jw.org®.

^ párr. 55 FOTOS: Se tokni kikaki tlen kitlapouia inamik maski amo kitekichiuilia Jehová. Satepan kajki iuan inamik uan ichokotsin.

^ párr. 57 FOTOS: Tokni okinmilui sekimej tokniuan ma tlakuatij ikalijtik. Tokniuan motlapouiaj iuan inamik tokni. Satepan oyajki ijkuak otikilnamikej imikilis Jesús.