Xikita nochi

Tlen kiualika

 TLAMACHTIL 31

Amo ‘matimosotlawakah’

Amo ‘matimosotlawakah’

Amo ‘matimosotlawakah’ (2 COR. 4:16).

TLAKUIKALI 128 Momakixtis akin nochi kixikos

XIKILNAMIKTO *

1. ¿Tlen moneki tikchiuaskej tla tiknekij tikseliskej yolilistli tlen amo keman tlamis?

AKINMEJ tikchiuaj ken Cristo yetoskia ken timotlaloaj porque timochijchikauaj tikseliskej yolilistli tlen amo keman tlamis. Moneki titlaxikoskej maski yikin otipejkej noso yitikpiaj miak xiuitl tiktekichiuilijtokej Jehová. Tlen Pablo okinmilui tokniuan tlen ochantiayaj Filipos techpaleuis ma titlatlanikan. Miakej tokniuan yimiak xiuitl okitekichiuilijtokaj Jehová ijkuak okiselijkej carta tlen Pablo okinmijkuilili. Kuali okitekichiuilijtokaj Jehová pero Pablo okinyolchika amo keman ma mosotlauakan. Okinekiaya ma kichiuakan ken ye (Filip. 3:14).

2. ¿Ken okinpaleui tokniuan tlen okinmilui Pablo?

2 Sapanoa okinpaleui tokniuan tlen okinmilui Pablo. Porque ompa Filipos sapanoa okintlajyouiltijkej tokniuan ijkuak yikin opejki monechikoaj. Pablo uan Silas opejki tetlapouiaj ompa Filipos kanaj itech xiuitl cincuenta ijkuak toTajtsin Dios okintitlanki Macedonia (Hech. 16:9). Ompa okixmatkej se siuatl tlen omotokayotiaya Lidia uan Jehová “okiyolyamani kuali makikaki” tlen okitlapouijkej (Hech. 16:14). Satepan ye uan nochtin ikalchanejkauan omoapolaktijkej. Pero Satanás opejki kitemoa ken kintlajyouiltis. Sekimej tlakamej okiuikakej Pablo uan Silas inmixpan tekiuajkej uan okijtojkej san okinmouijtiliayaj oksekimej. Ik non, okiuitekej Pablo uan Silas, okintsakej uan okinmiluijkej oksekan ma yakan (Hech. 16:16-40). Pero yejuan amo keman omosotlajkej.  ¿Tlen okichijkej tokniuan tlen yikin opejki monechikoaj? Noijki otlaxikojkej uan sapanoa okinpaleui tlen okichi Pablo uan Silas.

3. (1) ¿Tlen omonekiaya kilnamiktos Pablo? (2) ¿Tlen tlajtlanilmej tikinnankiliskej?

3 Pablo okijto nochipa tlaxikoskia (2 Cor. 4:16). Pero omonekiaya nochipa kilnamiktos tlen kiseliskia tla okinekiaya tlatlanis. ¿Tlen techmachtia tlen okichi? ¿Ken techpaleuia ma titlaxikokan tlen axkan kichiuaj tokniuan? ¿Ken techpaleuis ma titlaxikokan tla tikilnamiktoskej tlen Jehová kichiuas?

¿KEN TECHPALEUIA TLEN OKICHI PABLO?

4. ¿Ken otetlapoui Pablo maski otsaktoka?

4 Ma timokuayejyekokan tlen okipanok Pablo ijkuak okintlajkuilili tokniuan tlen ochantiayaj Filipos. Tekiuajkej amo okikauiliayaj kanaj ma uia, ik non, amo okisaya tetlapouiti. Pero nochipa okintlapoui akinmej oyayaj kitlajpalotiuij uan okintlajkuililiaya tokniuan tlen uejka ochantiayaj. Axkan noijki miakej tokniuan amo ueli kisaj tetlapouitiuij pero kintlapouiaj akinmej yauij kintlajpalotiuij. Noijki kintlajkuililiaj akinmej amo ueli kintlapouiaj.

5. Ijkon ken kijtoa Filipenses 3:12-14, ¿tlen okipaleui Pablo nochipa ma kitekichiuili Jehová?

5 Pablo amo keman omokuayejyeko ayakmo kitekichiuiliskia Jehová porque achto otlajtlakolchi noso ijkuak okatka telpochtli okichi miak tlamantli. Okijto: “Nikilkawa nochi tlan omoka tlakuitlapa” uan ijkon kiseliskia tlen toTajtsin Dios kimakaskia (xiktlajtolti Filipenses 3:12-14). ¿Tlen tlamantli ayakmo kikauiliskia ma kitekichiuili toTajtsin Dios? Ijkuak okatka telpochtli okintlajtlachialti judíos porque okatka sapanoa ixtlamatki. Pero ye okitaya nochi non “kemi tlájsoli” (Filip. 3:3-8). Noijki xamo omoyolkokoaya ijkuak okilnamikiaya okintlajyouilti tokniuan. Pero non amo okitsakuili. Saiktlami, amo keman omokuayejyeko sapanoa yokitekichiuili Jehová uan yomonekiaya moseuis. Pablo nochipa okitekichiuili Jehová maski okitsakej, okiuitekej, okimotlakej ika tetl, oapolaki barco kanin oyaya, ualeua amo okipiaya tlen kikuas nion okipiaya tlen kimokentis. Amo keman omokuayejyeko ayakmo kitekichiuiliskia Jehová uan moseuiskia (2 Cor. 11:23-27). Amo keman omosotla maski okichi miak tlamantli uan otlajyoui. Tejuan noijki moneki ijkon ma tikchiuakan.

6. ¿Ken tikilkauaskej “nochi tlan omoka tlakuitlapa”?

6 ¿Ken tikilkauaskej “nochi tlan omoka tlakuitlapa” ijkon ken okichi Pablo? Xamo timoyolkokoaj porque achto otitlajtlakolchijkej. Tla ijkon techpanoa, ma timomachtikan tleka Jesús topatka omotemakak. Ayakmo okachi timoyolkokoskej, tla timokuayejyekoskej tlen timomachtiaj uan tla tiktlatlaujtiaj toTajtsin Dios ma techpaleui. Ijkon ayakmo timoyolkokoskej tla tikmatokej Jehová yotechtlapojpolui. Ma tikitakan tlen okseki techmachtia Pablo. Miakej tokniuan ayakmo otekipanojkej kanin kuali okintlaxtlauiayaj porque okinekiayaj okachi kitekichiuiliskej Jehová. Ik non, amo ma tikilnamiktokan tlen uelis tikpiaskiaj tla achto kuali otechtlaxtlauiayaj  kanin otitekipanoayaj (Núm. 11:4-6; Ecl. 7:10). Noijki “nochi tlan omoka tlakuitlapa” ompa poui ken yotiktekichiuilijkej Jehová noso nochi ouijkayotl tlen yotikixnamikej. Techyolchikaua ijkuak tikilnamikij Jehová sapanoa yotechteochi uan yotechpaleui. Pero amo ma timokuayejyekokan yitimoseuiskej porque sapanoa yotiktekichiuilijkej (1 Cor. 15:58).

Amitlaj ma techtsakuili tla tiknekij titlatlaniskej. (Xikita párrafo 7).

7. Ijkon ken kijtoa 1 Corintios 9:24-27, xikijto tlen moneki tikchiuaskej tla tiknekij titlatlaniskej.

7 Pablo okajsikamatiaya ijkuak Jesús okijto: “Ximochijchikawakah” (Luc. 13:23, 24). Omonekiaya mochijchikauas tlamis kitekichiuilis Jehová ken okichi Jesús. Ik non, Pablo okijto akinmej tiktekichiuiliaj Jehová yetoskia ken timotlaloaj (xiktlajtolti 1 Corintios 9:24-27). Akinmej motlaloaj san kinekij tlatlaniskej uan amo san kanin tlajtlachiaj. Maski panoaj kanin tlanemakaj, amo kalakij tlajtlachiatiuij itlaj kimokouitiuij. Amo ijkon kichiuaj porque kinekij tlatlaniskej. Tejuan noijki amo ma tikkauakan itlaj ma techtsakuili. Nochipa ma timochijchikauakan uan ma tikilnamiktokan tlen tikseliskej ijkon ken okichi Pablo.

AMO MA TIMOSOTLAUAKAN MASKI TIKPIASKEJ OUIJKAYOTL

8. ¿Tlen eyi tlamantli timomachtiskej?

8 Ma tikitakan eyi tlamantli tlen uelis kichiuas ma timosotlauakan. Ijkuak amo san niman mochiua tlen tiknekij, ijkuak yitikpiaj miak xiuitl uan ijkuak uejkika titlajyouiaj. Techpaleuis tla tikitaskej tlen yokichijkej sekimej tokniuan (Filip. 3:17).

9. ¿Tlen uelis techpanos tla amo san niman mochiua tlen tiknekij?

9 Ijkuak amo san niman mochiua tlen tiknekij. Tinochtin tiknekij ma mochiua tlen yokijto toTajtsin Dios. Ijkuak Habacuc okilui Jehová ma kitlajtlami nochi tlen amo kuali opanotoka ompa Judá, Jehová okilui ma mochia (Hab. 2:3). Pero ayakmo  tiyolpakiskej tla tikmachiliaj amo san niman mochiua tlen tiknekij (Prov. 13:12). Ma tikitakan tlen okinpanok sekimej tokniuan kanaj itech 1914. Miakej okineltokayaj ijkuakon yaskiaj iluikak. Ik non, omoyolkokojkej ijkuak amo ijkon opanok. ¿Tlen okichijkej akinmej okatkaj yolmelajkej?

Tokni Royal uan Pearl Spatz amo oyajkej iluikak 1914. Pero amo omosotlajkej uan nochipa okitekichiuilijkej Jehová. (Xikita párrafo 10).

10. ¿Tlen okichijkej tokniuan ijkuak amo omochi tlen okinekiayaj?

10 Ma tikitakan tlen okipanok tokni Royal uan Pearl Spatz. Tokni Royal omoapolakti 1908 ijkuak okipiaya 20 xiuitl. Okineltokaya san niman yaskia iluikak. Itech 1911 ijkuak okilui Pearl kox okinekiaya iuan monamiktis, okilui: “Yitikmatij tlen panos 1914, ik non, tla tikneki nouan timonamiktis, san niman ma timonamiktikan”. ¿Kox omosotlajkej maski amo oyajkej iluikak itech 1914? Amo. Porque amo san okichixtokaj tlen kiseliskej. Omochijchikajkej kitekichiuiliskej Jehová. Ijkon okichijkej hasta ijkuak oixpolikej uan otlanki okitekichiuilijkej Jehová nikan tlaltikpak. Tinochtin tiknekij ma ajsi tonal ijkuak mochipauas itoka toTajtsin Dios, ijkuak nochtin kimatiskej san ye kinamiki tlanauatis uan ijkuak kichiuas nochi tlen yokijto. Ye kimati keman kichiuas. Ik non, ma tiktekichiuilijtokan uan amo ma timoyolkokojtokan tla amo san niman mochiua tlen tiknekij.

Tokni Arthur Secord nochipa omochijchika kitekichiuilis Jehová maski yokipiaya miak xiuitl. (Xikita párrafo 11).

11, 12. Xikijto tleka uelis timochijchikauaskej tiktekichiuiliskej Jehová.

11 Ijkuak yitikpiaj miak xiuitl. Akin motlaloa moneki yetos chikauak. Pero tejuan amo moneki tiyetoskej tichijchikauakej tla tiknekij tikpiaskej chikauak totlaneltokilis. Miakej tokniuan yikipiaj miak xiuitl pero mochijchikauaj okachi kuali mouikaskej iuan Jehová (2 Cor. 4:16). Ijkon okipanok tokni Arthur Secord. * Se tonal, ijkuak tokni yokipiaya 88 xiuitl uan yokatka 55 xiuitl Betel, tokni tlen okimaluiaya okilui: “Tokni Arthur sapanoa yotiktekichiuili toTajtsin Dios”. Pero tokni Arthur amo san okilnamiktoka tlen achto okichi. Ik non, okixuetskili tokni uan okilui: “Melauak tlen tikijtoa pero okachi miak ipati tlen peuas tikchiuaskej uan amo tlen yotikchijkej”.

12 ¿Yimiak xiuitl tiktekichiuiliaj Jehová uan axkan ayakmo okachi tiktekichiuiliaj porque timokokoaj? Amo ma  timosotlauakan tla ijkon techpanoa. Jehová sapanoa kipatioita timochijchikauaj tiktekichiuiliskej (Heb. 6:10). Jehová amo san kita kox sapanoa tiktekichiuiliaj, ye kita kox tiktlasojtlaj. Tikteititiaj tiktlasojtlaj tla timochijchikauaj tiyolpakij uan tla tikchiuaj tlen tiuelij (Col. 3:23). Kimati tlen uelis tikchiuaskej uan amo technauatia ma tikchiuakan tlen amo tiuelij (Mar. 12:43, 44).

Anatoly uan Lidiya Melnik amo keman okikajkej Jehová maski sapanoa otlajyouijkej. (Xikita párrafo 13).

13. ¿Tlen okipanok tokni Anatoly uan Lidiya uan ken uelis tikchiuaskej ken yejuan maski uejkika titlajyouiskej?

13 Ijkuak uejkika titlajyouiaj. Miakej tokniuan yimiak xiuitl yokintlajyouiltijkej uan yokixnamikej ouijkayotl. Ma tikitakan tlen okipanok tokni Anatoly Melnik * tlen ochantiaya Moldavia. Okipiaya 12 xiuitl ijkuak tekiuajkej okitsakej itajtsin uan okiuikakej Siberia tlen mokaua kanaj 7,000 kilómetros. Opanok se xiuitl, inantsin uan ikojkoluan uan tokni Anatoly noijki okinuikakej Siberia. Satepan opejki monechikoaj pero omonekiaya nejnemiskej kanaj 30 kilómetros. Sapanoa oseuaya uan okatka miak setl. Satepan tokni Anatoly okitsakej eyi xiuitl. Iselti omoka isiua tlen itoka Lidiya uan itakotsin okipiaya san se xiuitl. Sapanoa otlajyouijkej pero amo keman omosotlajkej. Axkan tokni Anatoly kipia 82 xiuitl uan poui iuan akinmej tlayekanaj itech Betel ompa Asia central. Tejuan noijki ma tikchiuakan ken tokni Anatoly uan Lidiya. Ma timochijchikauakan ma tiktekichiuilikan Jehová ken achto otikchiuayaj uan amo ma timosotlauakan (Gál. 6:9).

MA TIKILNAMIKTOKAN TLEN YOKIJTO KICHIUAS JEHOVÁ

14. ¿Tlen omonekiaya kichiuas Pablo tla okinekiaya kiselis tlen toTajtsin Dios okijto kimakaskia?

14 Pablo okimatiaya omonekiaya nochipa kilnamiktos tlen kiseliskia tla okinekiaya tlatlanis. ToTajtsin Dios okipejpenki Pablo, ik non, ye okichiaya yas iluikak. Pero omonekiaya mochijchikauas tla okinekiaya kiselis tlen toTajtsin Dios okijto kimakaskia (Filip. 3:14). Pablo okinekiaya kinpaleuis tokniuan tlen ochantiayaj Filipos, ik non, okinmilui tlen kinpaleuiskia.

15. ¿Ken okinyolchika Pablo tokniuan tlen ochantiayaj Filipos?

 15 Pablo okinmilnamikti tokniuan chantiskiaj iluikak (Filip. 3:20). ¿Tleka omonekiaya ma kilnamiktokan? Ijkuakon sapanoa okipatioitayaj akinmej opouiayaj Roma. * Noijki akinmej opouiayaj Roma omonekiaya kintlakamatiskej tlanauatilmej tlen okintlaliayaj tekiuajkej. Pero tokniuan tlapejpenalmej opouiayaj itech se Tekiuajkayotl tlen okachi kinpaleuiskia. Okachi ipati pouiskiaj itech non Tekiuajkayotl uan amo pouiskiaj Roma. Ik non, Pablo okinyolchika tokniuan ijkuak okinmilui: “Xiyeknemikah kemi akimeh yokiselijkeh n kualitlájtoli” tlen uits itech Cristo (Filip. 1:27). Axkan noijki tokniuan tlapejpenalmej mochijchikauaj kiseliskej yolilistli tlen amo keman tlamis ompa iluikak.

16. Ijkon ken kijtoa Filipenses 4:6, 7, ¿tlen moneki tikchijtoskej maski tiaskej iluikak noso tichantiskej itech xochitlali?

16 Ma timochijchikauakan titlatlaniskej maski tiaskej iluikak noso tichantiskej itech xochitlali. Nochipa ma tiktekichiuilikan Jehová uan amo san ma tikilnamiktokan tlen uelis tikpiaskiaj (Filip. 3:16). Xamo amo san niman mochiua tlen tiknekij, yitikpiaj miak xiuitl noso uejkika titlajyouiaj. Maski san tlen tlamantli techpanos, ma tiktlatlaujtikan Jehová uan ye nochipa techyolseuis (xiktlajtolti Filipenses 4:6, 7).

17. ¿Tlen timomachtiskej itech okse tlamachtil?

17 Tla tiknekij titlatlaniskej, ma tikchiuakan ken akinmej motlaloaj porque yejuan san kilnamiktokej tlen kiseliskej. Ma timochijchikauakan nochipa ma tiktekichiuilikan Jehová tla tiknekij tikseliskej tlen yokijto techmakas. ¿Tlen techpaleuis nochipa kuali ma tiktekichiuilikan Jehová uan amo ma timosotlauakan? Itech okse tlamachtil tikitaskej tlen okachi moneki tikpatioitaskej uan ken tikchiuaskej tlen “okachi kuali” (Filip. 1:9, 10).

TLAKUIKALI 79 Ma kipiakan chikauak intlaneltokilis

^ párr. 5 Maski yiuejkika tiktekichiuiliaj Jehová, tinochtin moneki timochijchikauaskej okachi kuali iuan timouikaskej uan tikpiaskej chikauak totlaneltokilis. Tlatitlanil Pablo okinmilui tokniuan amo keman ma mosotlauakan. Ijkuak okintlajkuilili tokniuan tlen ochantiayaj Filipos, okinmilui ma mochijchikauakan tla okinekiayaj kiseliskej yolilistli tlen amo keman tlamis. Itech nin tlamachtil tikitaskej ken tikchiuaskej tlen okijkuilo Pablo.

^ párr. 11 Itech revista Akin Tetlapouijtok 1 de noviembre 1965 ompa ijkuilitok inemilis tokni Arthur, itoka “Mi participación en adelantar la adoración correcta”.

^ párr. 13 Itech revista ¡Ma titlachixtokan! 22 de octubre 2004, ompa ijkuilitok inemilis tokni. Itoka “Me enseñaron desde niño a amar a Dios”.

^ párr. 15 Altepetsintli Filipos opouiaya Roma uan akinmej ompa ochantiayaj okinkauiliayaj ma kichiuakan seki tlamantli tlen san okichiuayaj akinmej ochantiayaj Roma. Ik non, tokniuan okajsikamatkej tlen Pablo okinmilui.