Xikita nochi

Tlen kiualika

Nochipa ma titekipanokan iuan Jehová

Nochipa ma titekipanokan iuan Jehová

“Tejwah san titlapalewijkeh itech iteki Dios” (1 COR. 3:9).

TLAKUIKALMEJ: 64 UAN 111

1. ¿Ken uelis titekipanoskej iuan Jehová?

IJKUAK Jehová otechchijchi ye okinekiaya iuan ma titekipanokan. Axkan maski titlajtlakolejkej ok uelis titekipanoskej iuan Jehová. Biblia kijtoa tejuan “titlapalewijkeh itech iteki Dios” ijkuak titetlapouiaj uan ijkuak titlamachtiaj (1 Cor. 3:5-9). Se tlateochiualistli toTajtsin Dios otechpejpenki iuan ma titekipanokan. Pero amo kijtosneki san titetlapouiskej uan titlamachtiskej para titekipanoskej iuan Jehová. Moneki tikchiuaskej okseki tlamantli. Itech nin tlamachtil tikitaskej ken uelis tikinpaleuiskej tokalchanejkauan uan tokniuan, ken kuali tikinseliskej tokniuan, ken titlapaleuiskej itech ialtepe Jehová uan tlen tikchiuaskej para okachi tiktekichiuiliskej (Col. 3:23).

2. ¿Tleka amo ma tikitakan akinmej okachi uelis kitekichiuiliskej Jehová?

2 Ijkuak timomachtijtiaskej amo tikitaskej akinmej okachi uelis kitekichiuiliskej Jehová. Ma tikilnamiktokan sekimej yikipiaj miak xiuitl, mokokoaj uan amo san se tlamantli kimatij kichiuaskej uan noijki kinpanoa okseki tlamantli.  Tlatitlanil Pablo okijto: “San tejwah matimoyejyekokah kox kuali tinemih, iwa tla tikmachiliah kuali tiyeknemih, matipakikah iwa amo matikimitakah kox kuali noso amo kuali tlan kichiwah oksikimeh” (Gál. 6:4).

MA TIKINPALEUIKAN TOKALCHANEJKAUAN UAN TOKNIUAN

3. ¿Tleka akinmej kinmaluiaj inkalchanejkauan noijki kipaleuiaj Jehová?

3 Jehová kineki ma tikinmaluikan tokalchanejkauan. Ik non, sekimej tekipanoaj uan ijkon kipiaskej tlen ika mopanoltiskej. Uan sekimej siuamej mokauaj inkalijtik kinmaluiaj inkonetsitsiuan. Oksekimej tokniuan moneki kinmaluiskej intatajuan tlen yokokoxkatikej. Nochi nin tlamantli moneki kichiuaskej. Biblia kijtoa: “Porke tla aka amo kimpalewia non ken kimita, iwa okachi tla amo kimpalewia non de icha, non tlakatl inewia kitenextia mach milák tlaneltoka iwa okachi amokuali kichijtok ke non amo kineltokah n Toteko Dios” (1 Tim. 5:8). Tla tikinmaluiaj tokalchanejkauan xamo tikmachiliaj amo okachi tiktekichiuiliaj Jehová. Pero amo ma timoyolkokokan porque toTajtsin Dios kipaktia ma tikinmaluikan tokalchanejkauan (1 Cor. 10:31).

4. (1) ¿Ken kinyolchikauaj tetajmej inkoneuan? (2) ¿Ken momachiliaj tetajmej ijkuak inkoneuan kitekichiuiliaj Jehová?

4 Tetajmej noijki kipaleuiaj Jehová ijkuak kinyolchikauaj inkoneuan okachi ma kitekichiuilikan Jehová. Satepan inkoneuan kitekichiuiliskej Jehová uan yaskej oksekan tlapaleuitiuij. Sekimej mochiuaj misioneros, precursores uan yauij tlapaleuitiuij kanin okachi moneki uan oksekimej yauij tekipanotiuij Betel. Maski uejka katej uan amo nochipa kinmitaj inkalchanejkauan, tetajmej kinyolchikauaj inkoneuan ma kitekichiuilikan Jehová maski san kanin yetoskej. ¿Tleka? Porque yolpakij inkoneuan kitekichiuiliaj Jehová (3 Juan 4). Miakej tetajmej momachiliaj ken Ana porque ye okitemakak Samuel ma kitekichiuili Jehová. Ijkon kita se tlateochiualistli tekipanoskej iuan Jehová (1 Sam. 1:28).

5. ¿Ken uelis tikinpaleuiskej tokniuan? (Xikinmita fotos kanin peua tlamachtil).

5 ¿Tlen tikchiuaskej tla amo ikaj tikmaluiaj? Ma tikinpaleuikan tokniuan tlen yikipiaj miak xiuitl, akinmej mokokoaj uan akinmej kinpanoa okseki tlamantli. Noijki ma tikinpaleuikan akinmej kimaluiaj se inkalchanejka. ¿Uelis timokuayejyekoskej kox onka se tokni tlen moneki ma tikpaleuikan. Ma tikijtokan se tokni kimaluia itajtsin tlen yikipia miak xiuitl. ¿Uelis tikmaluiskej itajtsin para ye ok itlaj ma kichiua? Noso ikaj ma tikpaleuikan ma uia nechikol, ma tiktlajpalotij tla se tokni kajki hospital noso ma tikinkouilitij tlen kinpoloa. Ijkon tikteititiskej titekipanoaj iuan Jehová. Uan ijkuak tokniuan motlatlaujtiaj, Jehová techtekitiltia para kinnankilis (xiktlajtolti 1 Corintios 10:24).

KUALI MA TIKINSELIKAN TOKNIUAN

6. ¿Tlen kijtosneki kuali tikinseliskej oksekimej?

6 Akinmej titekipanoaj iuan toTajtsin Dios techixmatij kuali tikinseliaj oksekimej. Ijkuak Biblia kijtoa “xitekalotikah” kijtosneki ma tikinselikan akinmej amo tikinmixmatij (Heb. 13:2). Itech Biblia kijtoa akinmej otekalotijkej uan noijki ijkon  uelis tikchiuaskej (Gén. 18:1-5). Moneki tikinpaleuiskej tokniuan ijkuak monekis uan akinmej amo tikinmixmatij (Gál. 6:10).

7. ¿Ken techpaleuis tla tikinkalotiskej tokniuan tlen okachi kitekichiuiliaj Jehová?

7 Tikpaleuiskej Jehová tla kuali tikinseliaj akinmej okachi kitekichiuiliaj (xiktlajtolti 3 Juan 5, 8). Yejuan noijki moyolchikauaj ijkuak kuali tikinseliaj uan tejuan noijki techyolchikauaj (Rom. 1:11, 12). Ma tikitakan tlen okipanok se tokni itoka Olaf. Yikipia miak xiuitl, ijkuak okatka telpochtli, se tlayekanki itech circuito okitlajpaloto itlanechikol Olaf uan amo ikaj okinekiaya kikalotis. Itatajuan Olaf amo okitekichiuiliayaj Jehová pero okintlajtlani kox uelis mokalotiskia inkalijtik tlayekanki itech circuito. Okiluijkej uelis ompa mokauaskia pero ye kochiskia ipan sillón. Olaf okipaleui ompa omoka tokni. Okijto okipakti nochi non chikome tonal. Okijto: “Kualkan otimeuayaj uan ijkuak otitlakuayaj otimotlapouiayaj itech miak tlamantli tlen otechyolchikauaya. Uan non onechyolchika okachi ma niktekichiuili Jehová”. Axkan Olaf yikipia cuarenta xiuitl tekiti ken misionero uan yotlapaleuito itech miakej altepemej.

8. Xikijto tleka kuali ma tikinselikan oksekimej maski amo motlasojkamatij.

8 Uelis kuali tikinseliskej akinmej amo tikinmixmatij maski amo techtlasojkamatiliskej. Ma tikitakan tlen okipanok se tokni tlen chanti España, ye okimachtiaya Yésica tlen ichan Ecuador. Se tonal, ijkuak okimachtijtoka opejki choka. Tokni okitlajtlani tlen okipanoaya. Uan Yésica okilui achto amo itlaj okipiaya nion tlen kikuaskia. Itakotsin san okimakaya atl. Ye opejki motlatlaujtia ijkuak okikochtekatoka itakotsin. Satepan ome tokniuan okitlajpalotoj. Pero Yésica amo kuali okinseli uan inmixpan okitsomoni revista tlen okimakakej. Okinmilui: “¿Nin revista nikmakas notakotsin ma kikua?”. Tokniuan okinekiayaj kiyolseuiskej pero amo omoyolseui. Satepan tokniuan okikauilitoj miak tlakuali itech ipuerta. Axkan kilnamiki tlen okichijkej tokniuan maski ye amo kuali okinseli. Uan toTajtsin Dios okintekitilti tokniuan para kinankilis. Yésica yokijto kitekichiuilis Jehová porque tokniuan okimakakej tlen okipiayaj (Ecl. 11:1, 6).

MA TITLAPALEUIKAN ITECH IALTEPE JEHOVÁ

9, 10. (1) ¿Keman okinmiluijkej israelitas omonekiaya ma tlapaleuikan? (2) ¿Ken uelis titlapaleuiskej itech tlanechikol?

9 Yiuejkika ijkuak okatkaj israelitas miak uelta okinmiluijkej omonekiaya ma tlapaleuikan (Éx. 36:2; 1 Crón. 29:5; Neh. 11:2). Axkan uelis titlapaleuiskej itech ialtepe Jehová, uelis tiktemakaskej totomin uan tikinpaleuiskej tokniuan. Sapanoa tiyolpakiskej uan Jehová techteochiuas tla ijkon tikchiuaskej.

10 Jehová kinmiluia tokniuan tlakamej ma mochijchikauakan ma mochiuakan siervos ministeriales uan tlayekankej (1 Tim. 3:1, 8, 9; 1 Ped. 5:2, 3). Akinmej mochiuaj siervos ministeriales uan tlayekankej kinpaleuiaj tokniuan ma kipiakan chikauak intlaneltokilis uan kinpaleuiaj itech okseki tlamantli (Hech. 6:1-4). ¿Yomitstlajtlanijkej tlayekankej kox uelis tikinselis tokniuan ijkuak timonechikoaj? ¿Kox uelis tikinxelos amatlajkuilolmej?  ¿Kox uelis tikitas kanin tetlapouiskej tokniuan? Noso ¿uelis titlapaleuis ijkuak moyektlalis kali kanin timonechikoaj uan tikchiuas okseki tlamantli? Akinmej kichiuaj non tekitl melauak yolpakij kinpaleuiaj oksekimej.

Tokniuan tlen okachi tlapaleuiaj itech ialtepe Jehová kinmajsij akinmej iuan mouikaskej. (Xikita párrafo 11).

11. ¿Ken okipaleui se tokni porque mouika iuan akinmej kinchijchiuaj kalmej?

11 Akinmej tlapaleuiaj itech ialtepe Jehová, kinmajsij akinmej iuan mouikaskej. Ma tikitakan tlen okipanok tokni Margie, ye dieciocho xiuitl otlapaleui okinchijchi kalmej kanin monechikoaj tokniuan. Ye okinmachti miakej tokniuan siuamej. Ijkuak okinmachtiaya inmiuan omoyolchikauaya para okachi chikauak kipiaskej intlaneltokilis (Rom. 1:12). Uan tokniuan okiyolseuijkej ijkuak okipixki ouijkayotl. ¿Uelis titlapaleuiskej ijkuak kinchijchiuaj kalmej kanin monechikoskej tokniuan? Ma titlapaleuikan maski amo tikmatij itlaj tikchiuaskej.

12. ¿Ken titlapaleuiskej ijkuak tlaxixini?

12 Noijki ma tikinpaleuikan tokniuan ijkuak kanaj tlaxixini. Ma tiktemakakan totomin uan ika ma kinpaleuikan akinmej nochi okipolojkej (Juan 13:34, 35; Hech. 11:27-30). Noijki ma titlapaleuikan ma titlachipauakan uan ma tikinyektlalikan kalmej. Se tokni itoka Gabriela tlen chanti Polonia otlatenki itech ialtepe uan oxixinki ikal. Pero omoyolseui ijkuak tokniuan okipaleuitoj. Ye okijto: “Amo nikneki nikilnamikis nochi tlen onikpolo. Porque ok nikpia okseki tlamantli tlen okachi ipati. Nipoui itech se tlanechikol uan non melauak se tlateochiualistli uan niyolpaki”. Miakej tokniuan tlen noijki yokinpaleuijkej kijtoaj melauak kipatioitaj. Uan melauak yolpakij tokniuan tlen kipaleuiaj Jehová (xiktlajtolti Hechos 20:35; 2 Corintios 9:6, 7).

13. Xikijto ken okachi tiktlasojtlaj Jehová ijkuak tikinpaleuiaj tokniuan.

13 Se tokni tlen itoka Stephanie uan oksekimej  tokniuan san sekan otekipanojkej iuan Jehová ijkuak okinpaleuijkej tokniuan tlen oualajkej Estados Unidos porque itech inmialtepe opanotoka guerra. Ye okintemoli kanin chantiskiaj uan okintemoli nochi tlen kitekitiltiskiaj. Stephanie okijto: “Otiyolpakej porque tokniuan okitakej tikintlasojtlaj uan otechtlasojkamatilijkej. Yejuan okimachilijkej otikinpaleuijkej pero yejuan okachi otechpaleuijkej. Okachi tiktlasojtlaj Jehová porque san sekan tikatej, timotlasojtlaj uan san se tlamantli tikneltokaj. Ik non, okachi tikpatioitaj tlen techmaka Jehová ika ialtepe”.

OKACHI MA TIKTEKICHIUILIKAN JEHOVÁ

14. ¿Tlen okichi profeta Isaías?

14 ¿Techpaktiskia okachi titekitiskej iuan Jehová? ¿Uelis tiaskej kanin okachi moneki titlapaleuiskej? Para tiktlasojkamatiliskej Jehová amo moneki uejka tiaskej tiktekichiuilitiuij. Pero sekimej tokniuan yauij uejka tlapaleuitiuij kanin okachi moneki. Yejuan kichiuaj ken profeta Isaías. Ijkuak Jehová otlajtlanki: “¿Akin niktitlanis uan akin topatka yas?”. Uan ye okijto: “¡Nikan nika! Techtitlani” (Is. 6:8). ¿Noijki tiknekij tikchiuaskej ken Isaías? ¿Uelis titlapaleuitiuij kanin okachi moneki?

15. ¿Ken uelis tikchiuaskej ken profeta Isaías?

15 Ok moneki titetlapouiskej uan titlamachtiskej, ik non, Jesús okijto: “Onka miak tekitl para mopixkas, pero amo onkateh miakeh akimeh pixkaskeh. Yika, xiktlajtlanilikah Dios n Tekowa de kan se pixkas, makintitlani miakeh tekitkeh para mapixkakih” (Mat. 9:37, 38). ¿Uelis oksekan titetlapouitiuij ken precursores? Noso ¿uelis ikaj tikpaleuiskej oksekan ma tetlapouiti? Miakej tokniuan kiteititiaj kitlasojtlaj Jehová uan oksekimej ijkuak yauij tetlapouitiuij kanin okachi moneki. ¿Timochijchikauaskej okachi tiktekichiuiliskej Jehová? Tiyolpakiskej tla ijkon tikchiuaj.

16, 17. ¿Ken okachi uelis tiktekichiuiliskej Jehová?

16 ¿Techpaktiskia titekipanoskej Betel, tikinchijchiuaskej kalmej noso techpaktiskia titlapaleuiskej san seki metstli? Nochipa moneki ma titlapaleuikan maski san kanin uan san tlen tekitl techmakaskej. Maski ualeua yitikmatij itlaj tikchiuaskej xamo moneki titlapaleuitiuij kanin moneki okse tlamantli tikchiuaskej. Maski san kanin titlapaleuiskej, Jehová kipatioita ma titlapaleuikan kanin okachi moneki (Sal. 110:3).

17 Tla tiknekij okachi timomachtiskej uan ijkon tiktekichiuiliskej Jehová, xamo yiuelis tiaskej Tlamachtil para ma tetlapouikan Tekiuajkayotl. Ompa kinmachtiaj nochtin tokniuan akinmej okachi kitekichiuiliaj Jehová uan ijkon okachi tlapaleuiskej. Akinmej kinekij yaskej momachtitiuij moneki tlapaleuitiuij san kanin kintitlaniskej. ¿Techpaktiskia timomachtitiuij uan okachi titlapaleuiskej? (1 Cor. 9:23).

18. ¿Tlen tlateochiualistli tikseliskej tla nochipa tikpaleuiskej Jehová?

18 Akinmej tipouij itech ialtepe Jehová tiktemakaj tlen tikpiaj, tikintlasojtlaj tokniuan uan timotekipachoaj intech oksekimej. Nin kichiua ma tiyolpakikan uan ma tikpiakan yolseuilistli (Gál. 5:22, 23). Maski san kanin tiktekichiuilijtoskej Jehová, uelis tiyolpakiskej porque tikchiuaj ken Jehová ijkuak tiktemakaj tlen tikpiaj (Prov. 3:9, 10).