Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok (tlen ika timomachtiaj)  |  Agosto  2017

¿Tlen techpaleuis ma tikpatlakan toyelis?

¿Tlen techpaleuis ma tikpatlakan toyelis?

“Ximoyolpatlakah, ika se yankuik nomonemilis” (EFES. 4:24).

TLAKUIKALMEJ: 43 UAN 27

1, 2. (1) ¿Ken tikmatij uelis tikpatlaskej toyelis? (2) ¿Ken uelis tikpiaskej toyelis ijkon ken kijtoa Colosenses 3:10-14NHY?

ITECH Biblia nesi tlajtoli “yankuik nomonemilis” (Efes. 4:24; Col. 3:10). Nin tlajtoli kijtosneki tikpiaskej tonemilis ken toTajtsin Dios kineki. ¿Uelis tikpatlaskej toyelis? Kema, porque Jehová otechchijchi ken ye. Ik non, uelis tikpiaskej toyelis ken toTajtsin Dios (Gén. 1:26, 27; Efes. 5:1).

2 Adán uan Eva otechkajteuilijkej tlajtlakoli, ik non, ualeua tiknekij tikchiuaskej tlen amo kuali. Noijki akinmej iuan timouikaj uelis techijtlakoskej. Pero uelis tikpiaskej toyelis ken Jehová kineki porque ye kineki techpaleuis. Para uelis ijkon tikpiaskej toyelis, axkan timomachtiskej itech iyelis Jehová tlen tlatitlanil Pablo okijkuilo (xiktlajtolti Colosenses 3:10-14NHY). Noijki tikitaskej ken uelis tikteititiskej toyelis ijkuak titetlapouiaj.

 SAN SEKAN MA TIYETOKAN

3. ¿Tlen moneki tikchiuaskej tla tiknekij tikpatlaskej toyelis?

3 Ijkuak Pablo okijto ma tikpatlakan toyelis, noijki okijto se tlamantli miak ipati: amo ma titechikoitakan. Okijto: “Dios mach ok techita kox tijudiojtin o noso amo tijudiojtin, kox tisirkunsidadojtin o noso amo tisirkunsidadojtin. Noijki in Dios mach kita kox se witz de oksekan, o noso kox se amaixmaj, kox se tlanamaktle o noso amo”. Nion se tokni amo moneki moueyinekis porque ixchipauak, ialtepe okachi ipati noso kipia miak tomin. ¿Tleka? Porque iTlaixpantijkauan Jehová san sekan katej (Col. 3:11NHY; Gál. 3:28).

4. (1) ¿Ken moneki tikinmitaskej oksekimej? (2) ¿Tlen uelis kichiuas amo san sekan ma yetokan tokniuan?

4 Ijkuak tikpatlaj toyelis, nochtin tikintlakaitaj, amo tikinmitaj kox ixchipajkej noso amo, noso kox kipiaj tomin (Rom. 2:11). Itech seki altepemej ualeua oui ijkon kichiuaskej. Se neskayotl, yiuejkika itech Sudáfrica tekiuajkej okinxelojkej ixchipajkej uan akinmej amo. Noijki ompa ochantiayaj iTlaixpantijkauan Jehová. Uan Cuerpo Gobernante okinmilui tokniuan ma kichiuakan tlen kijtoa 2 Corintios 6:13 kanin kijtoa okachi ma tetlasojtlakan. Ik non, itech octubre 2013 okichijkej seki tlamantli para nochtin tokniuan okachi ma moixmatikan. ¿Tlen okichijkej?

5. ¿Tlen okichijkej itech se altepetl para tokniuan okachi ma moixmatikan? (Xikita tlaixkopinal tlen ika peua tlamachtil).

5 Okinmiluijkej tokniuan tlen opouiayaj itech ome tlatlamantli tlanechikolmej uan tlatlamantli intlajtol, ixchipajkej uan akinmej amo, san sekan ma yetokan itlamian semana. San sekan otetlapouiayaj uan oyayaj nechikolmej uan okinyoleuayaj sekimej tokniuan ma yakan inkalijtik. Miakej tlanechikolmej ijkon okichijkej uan itech kali kanin tekitij iTlaixpantijkauan Jehová okimatkej miak tlamantli kuali tlen okijtojkej akinmej amo iTlaixpantijkauan Jehová. Se neskayotl, se teopixki okijto: “Amo niitlaixpantijka Jehová pero namoteki kuali nankichiuaj uan amo nantechikoitaj”. ¿Tlen opanok?

6. ¿Tlen okinpaleui tokniuan okachi ma moixmatikan?

6 Se tokni tlen itoka Noma uan tlajtoa xhosa amo okachi okinekiaya kinyoleuas ikalijtik tokniuan ixchipajkej tlen okatkaj itech se tlanechikol kanin tlajtoaj inglés. Pero ijkuak inmiuan otetlapoui uan okiyolejkej inkalijtik, okijto: “Yejuan noijki ken tejuan”. Ik non, otlakualchi uan okinmilui tokniuan tlen tlajtoaj inglés ma yakan ikalijtik uan ompa okatka se tlayekanki ixchipauak. Noma okijto: “Onechtlajtlachialti ijkuak onikitak omotlali maski san ipan se caja”. Tlen okijto Cuerpo Gobernante ok mochijtok. Ika nin tlamantli miakej tokniuan kuali mouikaj uan kinekij okachi kinmixmatiskej tokniuan ixchipajkej uan akinmej amo.

XITEIKNOMATIKAN UAN XITETLASOJTLAKAN

7. ¿Tleka moneki titeiknomatiskej?

7 Ken Satanás ok tlayekana itech Tlaltikpak, ok titlajyouiskej, timokokoskej, techtojtokaskej, panos tlaxixinilistli, techtlachtekiskej uan tikixnamikiskej okseki ouijkayotl. Ik non, moneki titeiknomatiskej para tikinpaleuiskej oksekimej. Iknomatilistli techpaleuis ma titetlasojtlakan (Efes. 4:32). Nin techpaleuis ma tikchiuakan ken  toTajtsin Dios uan ma titeyolchikauakan (2 Cor. 1:3, 4).

8. ¿Tlen panos tla titeiknomatij uan titetlasojtlaj itech tlanechikol? Xikijto se neskayotl.

8 Uelis itech totlanechikol katej tokniuan tlen oualajkej itech okse altepetl noso amo kipiaj tomin. ¿Ken tikteititiskej tikintlasojtlaj? Inmiuan ma timouikakan uan ma tikinmiluikan tikinpatioitaj itech totlanechikol (1 Cor. 12:22, 25). Ma tikitakan tlen okipanok Dannykarl ye ochantiaya Filipinas uan satepan ochantito Japón. Ompa itech iteki okichikoitayaj porque amo okatka japonés. Pero se tonal oyajki se nechikol iuan iTlaixpantijkauan Jehová. Uan okijto: “Nochtin okatkaj japoneses. Uan onechselijkej ika tlasojtlalistli ken yotimoixmatiayaj”. Tokniuan okitlasojtlayaj uan non okipaleui ma mouika iuan toTajtsin Dios. Omoapolakti uan axkan tlayekanki. Oksekimej tlayekankej kitaj nin tokni sapanoa tlapaleuia itech tlanechikol uan noijki isiua tlen itoka Jennifer. Kijtoaj: “Yejuan precursores uan amo kitemoaj miak tomin uan kitemakaj se kuali neskayotl porque yejuan achto kitemoaj Tekiuajkayotl” (Luc. 12:31).

9. Xikijto se neskayotl tlen panoa tla titeiknomatij ijkuak titetlapouiaj.

9 Ijkuak titetlapouiaj uelis tikteititiskej tiktechiuiliaj tlen kuali (Gál. 6:10). Miakej tokniuan momachtijtokej okse tlajtoli porque kimiknomatij akinmej uitsej itech okseki altepemej (1 Cor. 9:23). Nin sapanoa tlapaleuia. Se neskayotl, se precursora tlen itoka Tiffany tlen chanti Australia okinekiaya tlapaleuis itech se tlanechikol kanin tlajtoaj suajili ompa itech altepetl Brisbane. Maski oui omomachti nin tlajtoli, kijtoa kipia tlateochiualistli. Kijtoa: “Akin kineki ma kipano tlamantli kuajkualtsin, moneki ma tlapaleuiti itech se tlanechikol ika okse tlajtoli”. Yetoskia ken tinemiti itech okse altepetl. Uan uelis timouikas iuan tokniuan itech nochi Tlaltikpak”.

¿Tlen kinpaleuia tokniuan ma kinpaleuikan akinmej uitsej itech okseki altepemej? (Xikita párrafo 10).

10. Xikijto tlen okse tlamantli panoa tla titeiknomatij ijkuak titetlapouiaj.

10 Ma tikitakan tlen okinpanok sekimej kalchanejkej tlen chantij Japón. Inmichpoch tlen itoka Sakiko, kijtoa: “Itech 1990, otikinmajsiayaj miakej tlen oualayaj itech Brasil. Uan ijkuak otikintlajtoltiliayaj Apocalipsis 21:3, 4 uan Salmo 37:10, 11, 29, ika inBiblia portugués, kuali otechkakiayaj uan ualeua hasta ochokayaj”. Pero ken ninmej  tokniuan oteiknomatiayaj okichijkej okseki tlamantli. Sakiko kijtoa: “Ijkuak otikitakej kinekij kixmatiskej Jehová, otikijtojkej timomachtiskej tlajtoli portugués”. Satepan otlapaleuijkej ma yeto se tlanechikol ika tlajtoli portugués. Yokinpaleuijkej miakej tlen uitsej itech okseki altepemej ma mochiuakan iTlaixpantijkauan Jehová. Sakiko kijtoa: “Sapanoa otimochijchikajkej timomachtiskej nin tlajtoli, pero miak ipati otimochijchikajkej. Melauak tiktlasojkamatiliaj Jehová” (xiktlajtolti Hechos 10:34, 35).

MA TIYETOKAN TIYOLYAMANKEJ

11. ¿Tleka amo timoueyinekiskej ijkuak tikpatlaj toyelis?

11 Ijkuak tikpatlaj toyelis moneki tikchiuaskej porque tiknekij tiktlakaitaskej Jehová uan amo para ma techueyichiuakan. Ma tikilnamiktokan se ángel opejki moueyineki uan satepan otlajtlakolchi (xikita ika Ezequiel 28:17). Ken titlajtlakolejkej okachi totoka timoueyinekij. Pero uelis tiyetoskej tiyolyamankej. ¿Tlen techpaleuis?

12. ¿Tlen techpaleuis ma timokuayejyekokan ken Jesús okatka yolyamanki uan kuali otlamachti?

12 Moneki mojmostla tiktlajtoltiskej Biblia uan itech timokuayejyekoskej (Deut. 17:18-20). Techpaleuis ma timokuayejyekokan ken otlamachti Jesús uan ken okatka yolyamanki (Mat. 20:28). Ye sapanoa okatka yolyamanki hasta okinmikxipajpakak itlatitlaniluan (Juan 13:12-17). Noijki nochipa ma tiktlajtlanilikan Jehová ma techmaka iespíritu santo para amo ma timoueyinekikan (Gál. 6:3, 4; Filip. 2:3).

13. ¿Tlen tikseliskej tla tiyetoskej tiyolyamankej?

13 (Xiktlajtolti Proverbios 22:4). Jehová kineki tinochtin ma tiyetokan tiyolyamankej. Tla tiyetoskej tiyolyamankej, tikseliskej miak tlateochiualistli. Se neskayotl, titlapaleuiaj ijkuak san sekan tikatej uan ika yolseuilistli kajki tlanechikol. Jehová melauak techteochiuas. Tlatitlanil Pedro okijto: “Nonnochteh ximosepanyekwikakah. Porke itlajtol Dios kijtoa: Dios kinmixnamiki non moweyijkatlaliah, pero kintiochiwa non moiknomatih inawak (1 Ped. 5:5).

MA TIMOCHIAKAN UAN AMO SAN NIMAN MA TIKUALANIKAN

14. ¿Akin okachi kimati mochias uan amo san niman kualani?

14 Itech ninmej tonalmej, sekimej kijtoaj amo yolchikauakej akinmej amo san niman kualanij uan kimatij mochiaskej. Pero non amo melauak. Porque ijkon kipia iyelis toTajtsin Dios akin kipia sapanoa chikaualistli. Ye akin okachi kuali neskayotl techmaka porque amo san niman kualani uan kimati mochias (2 Ped. 3:9). Ijkon tikitaj ijkuak Jehová okinankili Abrahán uan Lot (Gén. 18:22-33; 19:18-21). Noijki Jehová amo san niman okualanki ijkuak kanaj mil quinientos xiuitl israelitas amo okitlakamatkej (Ezeq. 33:11).

15. ¿Tlen neskayotl otechmakak Jesús?

15 Jesús amo san niman okualaniaya (Mat. 11:29). Ye okinmajsikamatiaya imachtijkauan. Ijkuak okatka nikan Tlaltikpak, ye otlaxiko ijkuak teopixkej okitenejkej uan okiteluijkej. Noijki okatka yolyamanki uan otlaxiko hasta okimiktijkej. Ijkuak otlajyouijtoka itech kuauitl, okilui Jehová ma kintlapojpolui akinmej okitlajyouiltijtokaj. Okijto: “Mach kimatih tlan kichiwah” (Luc. 23:34). Ken yotikitakej, Jesús amo san niman  okualaniaya uan okimatiaya mochias maski okitlajyouiltijkej. ¡Melauak se kuali neskayotl! (Xiktlajtolti 1 Pedro 2:21-23).

16. ¿Ken uelis tikteititiskej tikmatij timochiaskej uan amo san niman tikualanij?

16 ¿Ken uelis tikteititiskej tikmatij timochiaskej uan amo san niman tikualanij? Ma titetlapojpoluikan. Pablo okijto: “Moneki xiyetokah nonkualtentlakah iwa xiteiknomatikah. Ximosepantlapojpolwikah ijkó kemi Dios otechtlapojpolwi por Cristo” (Efes. 4:32). Ik non, amo san niman tikualaniskej uan tikmatiskej timochiaskej. Tla ijkon tikchiuaskej, titlapaleuiskej san sekan ma yeto tlanechikol.

17. ¿Tleka miak ipati amo san niman ma tikualanikan uan ma tikmatikan ma timochiakan?

17 Jehová techiluia amo san niman ma tikualanikan uan ma tikmatikan ma timochiakan. Melauak moneki ijkon ma tikchiuakan para uelis tichantiskej itech Xochitlali (Mat. 5:5; Sant. 1:21). Tlen okachi ipati, tikueyichiuaskej Jehová uan tikinpaleuiskej oksekimej ma kichiuakan tlen tlamachtia Biblia (Gál. 6:1; 2 Tim. 2:24, 25).

XITETLASOJTLAKAN

18. ¿Tla titetlasojtlaj tikinchikoitaskej oksekimej?

18 Nochi tlen axkan otimomachtijkej mouika iuan tlasojtlalistli. Se neskayotl, Santiago okinnojnotski sekimej tokniuan porque otechikoitayaj. Okachi okintlasojtlayaj akinmej okipiayaj tomin. Okinyekilui non okixnamikiaya itlanauatil toTajtsin Dios kanin kijtoa: “Xiktlasojtla mokni kemi te timotlasojtla”. Satepan okijto: “Tla nomejwah san sikimeh nonkintlanekliah iwa oksikimeh amó, nonkichijtokeh tlajtlákoli” (Sant. 2:8, 9). Tla titetlasojtlaj, amo san tikinpatioitaskej akinmej okachi ixtlamatkej, kox ixchipajkej noso kox kipiaj miak tomin. Amo san tikijtoskej titetlasojtlaj moneki tikteititiskej itech tonemilis.

19. ¿Tleka miak ipati ma titetlasojtlakan?

19 Akin tetlasojtla tlajyouia uan amo moueyineki (1 Cor. 13:4). Ik non, amo san niman ma tikualanikan, ma titetlasojtlakan, ma tiyetokan tiyolyamankej para uelis tikintlapouiskej oksekimej itech Tekiuajkayotl (Mat. 28:19TNM). Nin techpaleuis ma timouikakan iuan nochtin tokniuan. Tla tinochtin titetlasojtlaj, san sekan yetoskej tlanechikolmej uan tikueyichiuaskej Jehová. Noijki oksekimej kinekiskej kixmatiskej Jehová. Ik non, Biblia techiluia: “Okachi ipati, iwa weyi kijtosneki: ximotlasojtlakah iwan oksikimeh, porke n tlasojtlálistli, ye tlan techyekseitilia” (Col. 3:14).

MONEKI NOCHIPA MA TIKPATLATOKAN TOYELIS

20. (1) ¿Tlen moneki timotlajtlaniskej uan tleka? (2) ¿Tlen tikchiaj satepan?

20 Tinochtin ma timotlajtlanikan: “¿Tlen okseki tlamantli nikchiuas para sepa nikpatlas noyelis?”. Moneki tiktlatlaujtiskej Jehová ma techpaleui. Uan moneki timochijchikauaskej ayakmo timokuayejyekoskej tlen amo kuali porque non amo techpaleuis tiyetoskej itech Xochitlali (Gál. 5:19-21). Noijki ma timotlajtlanikan: “¿Nikpatlatok noyelis para nikyolpaktis toTajtsin Dios?”. Ken titlajtlakolejkej ok moneki tikpatlatiaskej toyelis (Efes. 4:23, 24). ¡Sapanoa kualtsin yetos ijkuak ayakmo tikpiaskej tlajtlakoli uan nochipa tikpiaskej kuali toyelis!