Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok (tlen ika timomachtiaj)  |  Agosto  2017

Miak ipati tlasojtlalistli

Miak ipati tlasojtlalistli

TLATITLANIL Pablo okijto chiknaui tlamantli tlen kisa itech espíritu santo (Gál. 5:22, 23). Nochi nin tlamantli pouij itech espíritu santo * uan poui itech “nemilistle yankuik” (Col. 3:10NHY). Ijkon ken se kuauitl tlen kitemaka tlakilotl, noijki moneki ma timoyekanakan ika espíritu santo (Sal. 1:1-3).

Pablo otlajto achto itech tlasojtlalistli. ¿Sapanoa kipia ipati tlasojtlalistli? Pablo okijto tla amo otetlasojtlaya “amitla” ipati okipiaya (1 Cor. 13:2). ¿Tlen kijtosneki tlasojtlalistli, ken uelis titetlasojtlaskej uan ken uelis tikteititiskej?

¿TLEN KIJTOSNEKI TLASOJTLALISTLI?

Maski oui tikijtoskej tlen kijtosneki tlasojtlalistli, Biblia kijtoa ken uelis tikteititiskej titetlasojtlaj. Se neskayotl, Biblia kijtoa “akin tetlasojtla, kimati texikoa; semi yolyámanki”, “paki ijkuak pankisa tlan milák” uan “akin tetlasojtla nochi kijyowia, nochi kineltoka, kimati moyekchia iwa nochi kixikoa”. Akin tetlasojtla motekipachoa itech oksekimej uan yolmelajki ijkuak mouika iuan oksekimej. Pero akin amo tetlasojtla chauati, moueyineki, kichijtikisa tlen amo kuali, san itech motekipachoa uan amo tetlapojpoluia. Tejuan amo tiknekij ijkon tikchiuaskej. Tiknekij titetlasojtlaskej uan amo tiktemoskej tlen techpaktia (1 Cor. 13:4-8).

JEHOVÁ UAN JESÚS TECHMAKAJ SE KUALI NESKAYOTL

ToTajtsin “Dios Ye n tlasojtlálistli”. Ik non, ye techititia ken titetlasojtlaskej (1 Juan 4:8). Kiteititia ika nochi tlen okichijchi. Okiteititi techtlasojtla ijkuak okiualtitlanki iKone ma tlajyouiki uan topatka ma mikiki. Tlatitlanil Juan okijkuilo: “Dios otechnextili techtlasojtla, ijkuak okwaltítlanki Cristo itech nin tlaltíkpaktli non san Ye se Ikone, para matikpiakah yolílistli por Cristo. Ye n tlasojtlálistli: amo tejwah otiktlasojtlakeh Dios, Ye otechtlasojtlak iwa okualtítlanki Ikone para kitemaktis kemi se tlamánali para matechtlapojpolwi de totlajtlakolwah” (1 Juan 4:9, 10). Ken toTajtsin Dios techtlasojtla, techtlapojpoluia, techmaka se chialistli uan uelis tikpiaskej yolilistli tlen amo keman tlamis.

Jesús okiteititi techtlasojtla ijkuak okinek uits kichiuaki tlen kineki toTajtsin Dios. Pablo okijkuilo: “Cristo okichij tlan Dios okinekia. Tejwan yotichipawikej de totlajtlakol porke Cristo omotemaktij ma kimiktikan. Iwan omotemaktij san se buelta para iktlanke (ik tlami) iwan mach ok moneki oksemi ijkón kichiwas” (Heb. 10:9, 10NHY). Nion se tlaltikpaktlakatl amo uelis ijkon kiteititis techtlasojtla. Jesús okijto: “Akin motemakas makimiktikah ipatka itlakaikniwah, saikpanoa kintlasojtla. Saikpanoa kintlasojtla itlakaikniwah tla motemakas makimiktikah impatka” (Juan 15:13). ¿Uelis  titetlasojtlaskej ken Jehová uan Jesús maski titlajtlakolejkej? Kema. Ma tikitakan ken tikchiuaskej.

“NOCHIPA XITETLASOJTLAKAH”

Pablo okijto: “Nomejwah akimeh ya nontepilwah de Dios, ximilajkanemikah kemi Ye yekmilajka. Nochipa xitetlasojtlakah kemi Cristo otechtlasojtlak, iwa omotemakti para makimiktikah topatka” (Efes. 5:1, 2). Para titetlasojtlaskej, moneki itech nochi tonemilis tikchiuaskej ken toTajtsin Dios. Moneki tikteititiskej titetlasojtlaj uan amo san tikijtoskej. Juan okijkuilo: “Nopilwantsitsiwah, amo matitetlasojtlakah san ika tokamak noso tonenepil, yej matimosepantlasojtlakah ika tlan tikchiwah” (1 Juan 3:18). Se neskayotl, tlasojtlalistli tlen tikpialiaj Jehová uan tlaltikpaktlakamej kichiuas ma tikintlapouikan “kuali tlajtolmej itech Tekiuajkayotl” (Mat. 24:14, TNM; Luc. 10:27). Noijki tikteititiskej titetlasojtlaj tla tikmatij timochiaskej uan titetlapojpoluiaj. Ik non, Biblia techiluia: “Ximoxikojtokan uan sepa ximotlapojpoluikan tla ikaj amo kuali okichiuilijkej. Ijkon ken Jehová sepa onamechtlapojpolui, noijki ijkon namejuan moneki xikchiuakan” (Col. 3:13TNM).

Ijkuak tikinyektlaliaj oksekimej, amo kijtosneki amo tikintlasojtlaj. Se neskayotl, tetajmej tlen amo kinyektlaliaj inkoneuan kinkauiliaj ma kichiuakan san tlen kinekij para ayakmo ma chokakan. Pero tetajmej tlen kintlasojtlaj inkoneuan amo kinkauiliaj ma kichiuakan san tlen kinekij. Ijkon noijki Jehová “kimilawa akin kitlasojtla” (Heb. 12:6). Nin kiteititia techtlasojtla ijkuak techyektlalia (Prov. 3:11, 12). Pero ma tikilnamiktokan titlajtlakolejkej uan amo nochipa titetlasojtlaj. Ik non, moneki okachi timochijchikauaskej tikpatlaskej toyelis. Ma tikitakan eyi tlamantli tlen techpaleuis.

¿KEN UELIS TITETLASOJTLASKEJ?

Se tlamantli. Ma tiktlajtlanilikan Jehová iespíritu santo. Jesús okijto tla tiktlajtlaniliskej Jehová iespíritu santo, ye techmakas (Luc. 11:13). Okachi titetlasojtlaskej tla tiktlajtlaniliaj Jehová iespíritu santo uan tla tikkauiliaj ma techyekana (Gál. 5:16). Se neskayotl, tlayekankej uelis kitlajtlaniliskej Jehová iespíritu santo ma kinpaleui ma tenojnotsakan ika Biblia uan ika tlasojtlalistli. Noijki tetajmej uelis kitlajtlaniliskej Jehová iespíritu santo ijkuak kinyektlaliskej inkoneuan uan ijkon kichiuaskej ika tlasojtlalistli.

Ome tlamantli. Ma timokuayejyekokan ken Jesús otetlasojtlak maski okitlajyouiltijkej (1 Ped. 2:21, 23). Non techpaleuis ijkuak techchiuiliskej tlen amo kuali uan ijkuak techtlajyouiltiaj. Ijkuak ijkon techpanos ma timotlajtlanikan: “¿Tlen kichiuaskia Jesús?”. Se tokni tlen itoka Leigh ijkon motlajtlania achto itlaj kichiuas uan sapanoa kipaleuia. Ye kijtoa: “Se tonal, se siuatl tlen iuan onitekitiaya okintitlanili oksekimej se correo kanin amo kuali notech otlajtoaya uan noijki itech noteki. Sapanoa onimoyolkoko. Pero onimotlajtlani: ‘¿Tlen kichiuaskia Jesús?’. Ijkuak onimokuayejyeko tlen kichiuaskia Jesús, onikijto nikilkauaskia uan amo san nikilnamiktoskia tlen onechchiuili. Satepan onikmatki non siuatl omokokoaya uan omotekipachoaya. Onikajsikamatki amo ijkon okinekiaya nechchiuilis. Onimokuayejyeko ken otetlasojtlaya Jesús maski sapanoa otlajyoui, non onechpaleui ma nikchiua ken ye uan ma niktlasojtla akin iuan onitekitiaya”. Nochipa titetlasojtlaskej tla tikchiuaskej ken Jesús.

Eyi tlamantli. Ma tikinpaleuikan oksekimej maski ualeua oui. Porque ika tlasojtlalistli moixmatij akinmej kichiuaj ken Cristo (Juan 13:34, 35). Biblia techiluia ma timokuayejyekokan ken Jesús. Ijkuak ouala Tlaltikpak, okika nochi tlen okipiaya iluikak uan topatka omikiko (Filip.  2:5-8). Tla tikinpaleuiskej oksekimej uan titetlasojtlaskej ken Jesús, timokuayejyekoskej ken ye uan okachi timotekipachoskej intech oksekimej. ¿Ken techpaleuia titetlasojtlaskej?

¿TLEN TLATEOCHIUALISTLI TIKPIASKEJ?

Tla titetlasojtlaj tikpiaskej tlateochiualistli. Ma tikitakan ome tlamantli:

¿Tlen tlateochiualistli tikseliskej tla titetlasojtlaj?

  • KUALI TIMOUIKAJ IUAN TOKNIUAN ITECH NOCHI TLALTIKPAK. Ken tinochtin timotlasojtlaj, ijkuak tiauij tikintlajpalotiuij tokniuan kuali techseliaj. Melauak se tlateochiualistli nochtin tokniuan ma techtlasojtlakan (1 Ped. 5:9). Nin san uelis tikajsiskej itech ialtepe Jehová.

  • YOLSEUILISTLI. Ijkuak ‘timosepanxikoah ika tlasojtlálistli’ tikteititiaj ‘yolsewílistli, non seititok towah’ (Efes. 4:2, 3). Tinochtin tikmachiliaj nin yolseuilistli itech nechikolmej uan itech uejueyij nechikolmej maski itech nin Tlaltikpak amo tetlasojtlaj (Sal. 119:165; Is. 54:13). Ijkuak kuali timouikaj iuan oksekimej, tikteititiaj tikintlasojtlaj uan noijki tikyolpaktiaj toTajtsin Dios (Sal. 133:1-3; Mat. 5:9).

TLASOJTLALISTLI TLAPALEUIA

Pablo okijto tlasojtlalistli tlapaleuia (1 Cor. 8:1). ¿Tlen kijtosneki tlasojtlalistli tlapaleuia? Primera a los Corintios tlakotonal 13 miakej kitokayotiaj “tlakuikali tlen tlajtoa itech tlasojtlalistli” uan Pablo okiyekijto tlen kijtosneki ijkuak Biblia kijtoa tlasojtlalistli tlapaleuia. Ijkuak titetlasojtlaj, timotekipachoaj itech oksekimej (1 Cor. 10:24; 13:5). Noijki tla titetlasojtlaj, tikmatiskej timochiaskej, titetlakaitaskej, non techpaleuis ma motlasojtlakan tokalchanejkauan uan san sekan ma yetokan tlanechikolmej (Col. 3:14).

Miak ipati tlasojtlalistli tlen tikpialiaj toTajtsin Dios. Non tlasojtlalistli techpaleuia san sekan ma tiktekichiuilikan Jehová ika yolpakilistli maski tlatlamantli toaltepe uan tlatlamantli totlajtol (Sof. 3:9). Ma timochijchikauakan nochipa ma titetlasojtlakan uan ma tikteititikan nin tlamantli miak ipati tlen poui itech espíritu santo.

^ párr. 2 Itech nin tlamachtil timotlapouiskej itech tlasojtlalistli uan satepan kisaskej okseki tlamachtilmej tlen tlajtoskej itech okseki tlamantli tlen pouij itech espíritu santo.