Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok (tlen ika timomachtiaj)  |  Agosto  2017

 MA TIKILNAMIKIKAN TLEN OPANOK

“¿Keman oksepa tikpiaskej toueyi nechikol?”

“¿Keman oksepa tikpiaskej toueyi nechikol?”

ITLAMIAN noviembre itech 1932 okintlalijkej semáforos México uan kanaj se millón ochantiayaj itech nin altepetl. Pero axkan non ayakmo tetlajtlachialtia. Ijkuakon akinmej otekitiayaj itech noticias okinekiayaj kimatiskej tlen panoskia non semana. Kanin moketsa tren okichiatoj Joseph F. Rutherford uan miakej okinpixtokaj cámaras porque ajsiskia tokni tlen okatka presidente de la Sociedad Watch Tower. Tokniuan tlen ochantiayaj itech nin altepetl noijki okichiatoj tokni porque mochiuaskia se ueyi nechikol tlen uejkauaskia eyi tonal.

Revista The Golden Age (axkan moixmati ken ¡Despertad!) okijto: “Nin ueyi nechikol melauak miak ipati uan amo keman kilkauaskej ken opejki momiaktiliaj iTlaixpantijkauan Jehová México”. ¿Pero tleka non ueyi nechikol sapanoa otetlajtlachialti tla san oyajkej 150?

Ijkuakon ayamo miakej omomachtiayaj Biblia. Opejkej mochiuaj seki uejueyij nechikolmej itech 1919 maski satepan ayakmo miakej okatkaj tlanechikolmej. Itech 1929 okitlalijkej kali kanin tekitij iTlaixpantijkauan Jehová. Omoijtoaya nin tlapaleuiskia pero opejki ouijkayotl. Se neskayotl, otlanauatijkej amo ma tlanemakakan ijkuak tetlapouiskej pero se colportor tlen axkan moixmati ken precursor, okualanki uan okika ialtepe Jehová uan okitlali itlanechikol. Noijki okipatlakej akin otlayekanaya itech Betel porque okichi itlaj amo kuali. Omonekiaya ikaj ma kinyolchikaua tokniuan itech nin altepetl.

Ijkuak tokni Rutherford okintlajpaloto tokniuan, sapanoa okinyolchika. Itech ueyi nechikol okintemakak ome tlapoualismej tlen sapanoa okinyolchika uan ok makuili okinpanoltijkej itech radio. Ijkuakon yikin se uelta okinpanoltijkej tlapoualismej itech radio itech nochi México. Yankuik tlayekanki opejki kiyekana tekitl tlen omochiuaya itech nin altepetl. Desde ijkuakon tokniuan okimachilijkej Jehová okinteochi uan okitekichiuilijkej ika pakilistli.

1941 omochi se ueyi nechikol México

Se xiuitl satepan, omochi se ueyi nechikol Veracruz uan okse México. Tokniuan omochijchikajkej tetlapouiskej uan opejki mota ken momiaktiliaj. Itech 1931 okatkaj 82 tokniuan tlen otetlapouiayaj pero majtlaktli xiuitl satepan yokatkaj kanaj 1,000. Uan itech 1941 kanaj mil omonechikojkej itech ueyi nechikol tlen omochi México.

“OPEJKEJ TETLAPOUIAJ ITECH OJTLI”

Itech 1943 iTlaixpantijkauan Jehová opejki tetlapouiaj itech ojtli ika carteles para kitematiltiskiaj ueyi nechikol tlen omotokayoti “Nación  Libre”, tlen omochi itech 12 altepetsitsintin. * Okinuikayaj carteles inkuitlapan uan inmielpan. Ijkon opejki kichiuaj desde 1936.

Itech 1944 se revista okiteititi ompa México tokniuan okinmopililiayaj carteles.

Revista tlen itoka La nación okijto kuali okichijkej nin tekitl ika carteles itech nin altepetl. Okijto: “Ijkuak yikin opejkej, okinmiluijkej ma kinuikakan miakej. Uan mostlatika ayakmo okatka kanin kinkalakiskej”. Teopixkej católicos okualankej uan noijki opejki kinnechikoaj miakej para kinmixnamikiskiaj iTlaixpantijkauan Jehová. Pero tokniuan okatkaj yolchikauakej uan ok otetlapouiayaj ika carteles itech ojtli. Revista La nación noijki okijto nochi ninmej tlakamej uan siuamej okinmopililiayaj carteles. Ijkuak otlajtojkej itech tokniuan okitlalijkej se tlaixkopinal kanin omotaya ken otetlapouiayaj. Uan tlalchixitlan okijtoaya: “Invasión por las calles”.

“OKACHI KUALI OTIKOCHKEJ IPAN CAJAS”

Yiuejkika, tokniuan omonekiaya kichiuaskej miak tlamantli para yaskiaj uejueyij nechikolmej tlen omochiuayaj México. Sekimej sapanoa uejka ochantiayaj kanin amo opanoaya tren nion okatkaj carreteras. Sekimej tokniuan otlajkuilojkej uan okijtojkej: “Amo okatka se tren tlen yaui México”. Tokniuan oyayaj ipan mulas noso onejnemiayaj hasta kanin opanoaya tren uan ijkon oyayaj México.

Miakej tokniuan san okipiayaj tomin para ika yaskej. Miakej omokalotiayaj iuan tokniuan tlen ochantiayaj ik kanin omochiuaya ueyi nechikol uan nonmej tokniuan ika pakilistli otekalotiayaj. Sekimej okochiayaj itech kali kanin omonechikoayaj. Se tonal, kanaj noventa tokniuan omokajkej kanin tekitij iTlaixpantijkauan Jehová uan “okinnenepanojkej cajas” uan ompa okochkej. Noijki Anuario okijto ninmej tokniuan sapanoa omotlasojkamatkej uan okijtojkej “okachi kuali otikochkej ipan cajas”.

Tokniuan sapanoa okipatioitayaj yaskej ueyi nechikol uan okichiuayaj miak tlamantli para yaskiaj. Hasta axkan ijkon kichijtokej uan yikatej kanaj se millón. * Itech 1949 tlen okatkaj itech kali kanin tekitij iTlaixpantijkauan Jehová okijtojkej: “Maski sapanoa oui itech ninmej tonalmej, tokniuan kipatioitaj monechikoskej. Nochipa omotlapouiayaj itech ueyi nechikol ijkuak otlamiaya uan otlajtlaniayaj: ‘¿Keman oksepa tikpiaskej toueyi nechikol?’”. Tlen omoijto ok ijkon kichijtokej tokniuan. (Tlen kajki itech kali kanin tekitij iTlaixpantijkauan Jehová itech Centroamérica).

^ párr. 9 Itech Anuario 1944, okijto “nin ueyi nechikol okichi ma kinmixmatikan iTlaixpantijkauan Jehová”.

^ párr. 14 Itech 2016 kanaj 2,262,646 (dos millones doscientos sesenta y dos mil seiscientos cuarenta y seis) okilnamikej imikilis Jesús itech México.