Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Akin Tetlapouijtok (tlen ika timomachtiaj)  |  Agosto  2017

Ayakmo ma tikchiuakan tlen achto otikchiuayaj

Ayakmo ma tikchiuakan tlen achto otikchiuayaj

“Xikkawakah tlan achto ononkichitinemiah” (EFES. 4:22).

TLAKUIKALMEJ: 52 UAN 54

1, 2. ¿Tlen kijtoaj miakej itech iTlaixpantijkauan Jehová?

MIAKEJ kijtoaj iTlaixpantijkauan Jehová kipiaj kuali inyelis. Se neskayotl, se tlakatl tlen itoka Anton Gill okijkuilo itech se iamoch tlen okinpanok iTlaixpantijkauan Jehová ompa Alemania ijkuak nazis otetsakuayaj. Okijto nazis sapanoa okinkokoliayaj uan itech 1939 otsaktokaj 6,000 iTlaixpantijkauan Jehová kanin okinchiualtiayaj ma tekitikan. Noijki okijto maski sapanoa otlajyouijkej, yejuan san sekan okatkaj, okichiuayaj tlen kuali, okipiayaj yolseuilistli uan amo keman okikajkej Jehová.

2 Yikipia seki xiuitl, sekimej tlen chantij Sudáfrica noijki okitakej iTlaixpantijkauan Jehová kipiaj kuali inyelis. Tekiuajkej amo okinkauiliayaj san sekan ma monechikokan tlen ixchipajkej uan tlen amo. Pero domingo 18 de diciembre 2011, kanaj 78,000 tokniuan tlen oualayaj Sudáfrica uan itech okseki altepemej, okitemitijkej estadio tlen  kajki Johannesburgo para momachtiskiaj Biblia. Se tlakatl tlen ompa otlamaluiaya okijto: “Amo keman onikinmitaya sapanoa miakej kuali inyelis. Nochtin kualtsin omotlakentijkej uan noijki kuali okichipajkej estadio. Pero okachi onechtlajtlachialti yejuan amo techikoitaj”.

3. ¿Tleka tiiTlaixpantijkauan Jehová amo tikchiuaj ken oksekimej?

3 Miakej kijtoaj iTlaixpantijkauan Jehová kuali inyelis, non kiteititia yejuan amo ken oksekimej (1 Ped. 5:9). ¿Tleka tiiTlaixpantijkauan Jehová amo tikchiuaj ken oksekimej? Porque Biblia uan iespíritu santo toTajtsin Dios techpaleuiaj ma tikpatlakan toyelis uan ayakmo ma tikchiuakan tlen achto otikchiuayaj (Efes. 4:22, 24).

4. ¿Tlen timomachtiskej uan tleka?

4 Miak ipati ayakmo ma tikchiuakan tlen achto otikchiuayaj. Axkan tikitaskej tlen techpaleuis ayakmo ma tikchiuakan tlen achto otikchiuayaj uan tleka miak ipati. Noijki tikitaskej nochtin uelis kipatlaskej innemilis maski achto otlajtlakolchiuayaj. Timomachtiskej tlen uelis kichiuaskej akinmej yikipiaj miak xiuitl kixmatij Jehová uan ayakmo oksepa kichiuaskej tlen achto okichiuayaj. ¿Tleka moneki tikilnamiktoskej nin tlamantli? Sekimej tokniuan amo omomaluijkej uan oksepa opejkej kichiuaj tlen amo kuali. Ik non, moneki ma tikilnamikikan nin tlamantli: “Akin kimolia amitla weletis kitlajtlakolchiwaltis, kuali mamotlakxili iwa mamotlachili para amo matlajtlakolchiwa” (1 Cor. 10:12).

AMO MA TIMOKUAYEJYEKOKAN ITECH AUILNEMILISTLI

5. (1) Xikijto ika se neskayotl tleka moneki san niman ma tikkauakan tlen Jehová kikokolia (xikita tlaixkopinal tlen ika peua tlamachtil). (2) ¿Tlen tlajtlakoli moijtoa itech Colosenses 3:5-9?

5 ¿Tlen tikchiuaskiaj tla totlaken sokio uan tsojyak? ¿Amo melauak san niman timotlapatiliskiaj? Noijki ijkon san niman ma tikkauakan tlen Jehová kikokolia. Pablo okinmilui akinmej okichiuayaj ken Cristo: “Xikinkawakah nochteh ninteh tlajtlákolteh”. Ma tikitakan ome tlajtlakoli tlen Pablo okijto amo ma tikchiuakan: amo ma tiauilnemikan uan amo ma tikchiuakan “tlan pitsotik” (xiktlajtolti Colosenses 3:5-9).

6, 7. (1) ¿Tlen okijto Pablo ma tikchiuakan? (2) ¿Tlen okichiuaya Sakura uan ken okipatlak inemilis?

6 Auilnemilistli. Ijkuak Biblia kitekitiltia tlajtoli auilnemilistli kijtosneki ijkuak se tlakatl uan se siuatl motekaj maski ayamo monamiktiaj noso ijkuak tlakamej mosiuakuepaj noso siuamej motlakakuepaj. Pablo okinmilui akinmej okichiuayaj ken Cristo amo ma auilnemikan. Nin kijtosneki ma timochijchikauakan para amo ma timokuayejyekokan itech auilnemilistli. Oui ijkon tikchiuaskej, pero uelis tikchiuaskej tla timochijchikauaj.

7 Ma tikitakan tlen okipanok se ichpochtli tlen itoka Sakura tlen chanti Japón. * Ijkuak omoskaltijtoka iselti omomachiliaya. Ik non, ijkuak okipiaya 15 xiuitl opejki auilnemi iuan miakej tlakamej. Okinmaya eyi ikoneuan.  Ye kijtoa: “Kuali onimomachiliaya ijkuak oniauilnemiaya, onikitaya onechtlasojtlayaj. Pero satepan amo kuali onimomachiliaya”. Sakura oauilnenki hasta ijkuak okipiaya 23 xiuitl. Ijkuakon, opejki momachtia Biblia iuan iTlaixpantijkauan Jehová. Okipakti tlen opejki momachtia. Jehová okipaleui ayakmo ma moyolkoko nion ma pinaua uan ayakmo oauilnenki. Axkan ye precursora uan ayakmo iselti momachilia. Ye kijtoa: “Nochipa niyolpaki porque Jehová nechtlasojtla”.

AMO MA TIKCHIUAKAN “TLAN PITSOTIK”

8. ¿Tlen tlamantli uelis kichiuas Jehová ma techita tisokiojkej?

8 “Tlan pitsotik”. Ijkuak Biblia kijtoa ikaj kichiua “tlan pitsotik” amo san kijtosneki auilnemilistli. Noijki kijtosneki ijkuak ikaj tlachichina noso tlajtoa pitsotik (2 Cor. 7:1; Efes. 5:3, 4). Noijki kijtosneki akinmej san ichtaka kichiuaj tlen amo kuali, ken ijkuak kitaj pornografía. Non uelis kichiuas ma momajmachilikan (Col. 3:5). *

9. ¿Tlen panos tla san timokuayejyekoaj itech auilnemilistli?

9 Akinmej kitaj pornografía san kitemojtokej akin iuan motekaskej. Ik non, san mokuayejyekojtokej itech auilnemilistli. Sekimej ixtlamatkej kijtoaj akinmej kitaj pornografía momachiliaj ken akinmej kintekitiltiaj drogas noso tlauanaj. Pornografía melauak teijtlakoa. Akinmej kitaj pornografía san pinauaj, ayakmo okachi tekitij, amo yolpakij iuan inkalchanejkauan, mokajkauaj inmixpan tekiuajkej uan hasta momiktiaj. Se tlakatl tlen ayakmo okitak pornografía se xiuitl, okijto: “Axkan okachi nimotlakaita”.

10. ¿Tlen okichi Ribeiro para ayakmo kitas pornografía?

10 Miakej mochijchikajtokej ayakmo kitaskej pornografía. Pero uelis kichiuaskej ijkon ken okichi se tlakatl tlen itoka Ribeiro tlen chanti Brasil . Ijkuak okatka telpochtli, oksekan ochantito uan opejki tekiti kanin kololoaj amatl. Ompa okitaya pornografía itech revistas. Ye okijto: “Yolik onechpaktijtia nikitas pornografía uan satepan san onikchixtoka ma uia siuatl tlen iuan onichantiaya para nikitaskia pornografía”. Se tonal, ijkuak Ribeiro okololojtoka amatl okajsik se amochtli tlen itoka El secreto de la felicidad familiar uan opejki kitlajtoltia. Satepan opejki momachtia Biblia iuan iTlaixpantijkauan Jehová. Sapanoa omochijchika para ayakmo kitaskia pornografía. ¿Tlen okipaleui? Ye okijto: “Onimotlatlaujtiaya, oniktlajtoltiaya Biblia uan itech onimokuayejyekoaya ijkon opejki okachi niktlasojtla Jehová uan ayakmo oniknekiaya nikitas pornografía”. Biblia uan iespíritu santo toTajtsin Dios okipaleui Ribeiro ma kipatla inemilis. Omoapolakti uan axkan tlayekanki.

11. ¿Tlen tikchiuaskej para amo tikitaskej pornografía?

11 Ribeiro amo san omomachtiaya Biblia. Ye kuali omokuayejyekoaya tlen omomachtiaya uan okikauaya ma ajsi itech iyolo. Noijki okilui toTajtsin  Dios ma kipaleui. Non okipaleui okachi ma kitlasojtla Jehová uan ma kikaua pornografía. Tinochtin moneki ma tiktlasojtlakan Jehová ika nochi toyolo uan ma tikkokolikan tlen amo kuali para amo tikitaskej pornografía (xiktlajtolti Salmo 97:10).

AMO MA TIKUALANIKAN, AMO MA TITLAUIJUIKALTIKAN UAN AMO MA TITLAKAJKAYAUAKAN

12. ¿Tlen okipaleui Stephen amo san niman ma kualani nion ma tlauijuikalti?

12 Sekimej san niman kualanij uan tlauijuikaltiaj. Ijkon kintlajyouiltiaj inkalchanejkauan. Ma tikitakan tlen okipanok Stephen tlen chanti Australia. Ye okijto: “Onitlauijuikaltiaya uan san niman onikualaniaya. Nosiua uan ne eyi uelta otimoxelojkej uan hasta yitimokajkauaskiaj inmixpan tekiuajkej”. Ijkuakon, iTlaixpantijkauan Jehová opejkej kimachtiaj ika Biblia. ¿Ken okipaleui Stephen ijkuak opejki kichiua tlen kijtoa Biblia? Ye kijtoa opejki yolpaki iuan ikalchanejkauan. Achto san niman okualaniaya pero ayakmo san niman kualani. Axkan Stephen siervo ministerial uan isiua yikipia miak xiuitl tekiti ken precursora. Tlayekankej kijtoaj: “Stephen amo san niman kualani, yolyamanki uan kimati tekitis”. Noijki kijtoaj amo keman kitaj kualani. Stephen amo san iselti okipatlak iyelis, ye okijto: “Jehová onechpaleui ma nikpatla noyelis, ik non, axkan ye nechteochijtok”.

13. (1) ¿Tleka tlajtlakoli sapanoa tikualaniskej? (2) ¿Tlen techiluia Biblia ma tikchiuakan?

13 Biblia kijtoa amo san niman ma tikualanikan, amo ma titlauijuikaltikan nion ma timotsatsajtsilikan (Efes. 4:31). Tla amo tiktlakamatij Biblia, timokualaniskej iuan oksekimej. Miakej kijtoaj amo tlajtlakoli tla ijkon tikchiuaskej pero non amo kipaktia toTajtsin Dios. Ik non, miakej tokniuan yokipatlakej inyelis (xiktlajtolti Salmo 37:8-11).

14. ¿Uelis kipatlas inemilis akin kipaktia moteuis?

14 Ma tikitakan tlen okipanok Hans, se tlayekanki tlen chanti Austria. Akin kinyekana tlayekankej itech itlanechikol, okijto: “Hans amo keman nikita kualani”. Pero achto sapanoa okualaniaya. Ijkuak okatka telpochtli otlauanaya uan okipaktiaya moteuis. Se tonal, otlauanki, okualanki uan okimikti inovia. Okitsakej veinte xiuitl. Pero maski otsaktoka amo okipatlak iyelis. Satepan, inantsin okilui se tlayekanki ma kitlajpaloti Hans uan opejki momachtia Biblia. Ye okijto: “Oui onikpatlak noyelis. Pero ome tlaxelolmej onechyolchikajkej. Isaías 55:7 kijtoa: ‘Akin amo yolkuali ma kikaua iojui’. Uan 1 Corintios 6:11 kijtoa sekimej sapanoa otlajtlakolchiuayaj pero okikajkej ijkuak opejkej kichiuaj ken Cristo. Miak xiuitl Jehová onechpaleui ma nikpatla noyelis”. Hans omoapolakti kanin otsaktoka. Ye otsaktoka diecisiete xiuitl uan tlajko uan satepan okikixtijkej. Uan okijto: “Niktlasojkamatilia Jehová onechiknomatki uan onechtlapojpolui”.

15. ¿Tlen kichiuaj miakej pero tlen kijtoa Biblia?

15 Noijki moneki ayakmo ma titlakajkayauakan. Se neskayotl, miakej tlakajkayauaj para amo kitlaxtlauaskej impuestos noso para amo kijtoskej  tlen amo kuali okichijkej. Pero toTajtsin “Dios nochipa kijtoa tlan milák” (Rom. 3:4). Ik non, technauatia nochipa ma tikijtokan tlen melauak uan amo keman ma titlakajkayauakan (Efes. 4:25NHY; Col. 3:9). Ik non, moneki ma tikijtokan tlen melauak maski tipinauaskej noso amo kuali tlen techpanos (Prov. 6:16-19).

¿KEN OKIPATLAKEJ INNEMILIS?

16. ¿Tlen techpaleuis ma tikpatlakan tonemilis?

16 Amo uelis san toselti tikpatlaskej tonemilis. Sakura, Ribeiro, Stephen uan Hans omochijchikajkej para kipatlaskej innemilis. ¿Ken okipatlakej innemilis? Okinpaleui iTlajtol toTajtsin Dios uan espíritu santo (Luc. 11:13; Heb. 4:12). Tejuan noijki uelis techpaleuis Biblia tla mojmostla tiktlajtoltiaj, itech timokuayejyekoaj uan tikiluiaj Jehová ma techmaka ixtlamatilis uan chikaualistli para tiktlakamatiskej iTlajtol (Jos. 1:8; Sal. 119:97; 1 Tes. 5:17). Espíritu santo uan Biblia noijki techyolchikauaskej tla timomachtiaj achto tiaskej nechikolmej (Heb. 10:24, 25). Noijki moneki tiktekitiltiskej nochi tlen techmaka ialtepe Jehová, ken revistas, JW Broadcasting, aplicación JW Library uan página jw.org (Luc. 12:42).

¿Tlen techpaleuis ma tikpatlakan tonemilis? (Xikita párrafo 16).

17. ¿Tlen timomachtiskej chikome?

17 Yotikitakej seki tlamantli tlen amo moneki ma tikchiuakan akinmej tikchiuaj ken Cristo. Pero ¿san non moneki para ma techseli toTajtsin Dios? Amo, noijki moneki nochipa ma tikchiuakan tlen kuali. Chikome tikitaskej ken uelis ijkon tikchiuaskej.